སྲིད་སྐྱོང་གི་འོས་བསྡུ་ཐོག་མ། མི་མང་གི་འགུལ་སྟངས་གསར་པ།

—ཚེ་དབང་ནོར་བུ།
 
བཀའ་བློན་ཁྲི་པ་མི་མང་གིས་ཐད་ཀར་འོས་འདེམས་ཐེངས་གསུམ་བྱས་པ་རེད། ཐེངས་དང་པོ་དང་གཉིས་པ་ལ་ཟམ་གདོང་རིན་པོ་ཆེ་འདམས་པ་རེེད། ལོ་བཅུ་དེ་ནི། སྤྱི་ཚོགས་ཡོངས་ཀྱིས་གྲུབ་འབྲས་བྱུང་བའི་ལོ་ངོ་བཅུ་ཆགས་ཡོད་པར་ངོས་འཛིན་བྱེད་ཀྱིན་ཡོད་པ་རེད། ཐེངས་གསུམ་པར་ད་ལྟའི་སྲིད་སྐྱོང་ལས་ཐོག་བློ་བཟང་སེང་གེ་འདམས་ནས་ལོ་བཞི་དང་ཕྱེད་ཀ་ཕྱིན་ཡོད།

ད་ཆར་མང་ཚོགས་ནང་ལོ་བཞི་དང་ཕྱེད་ཀའི་གྲུབ་འབྲས་གང་ཡིན་ངོས་འཛིན་ལ་རྩོད་རྙོག་ཡོང་གི་ཡོད། གླེང་སྟངས་མ་གཅིག་པའི་དཀའ་ངལ་འཕྲད་ཀྱིན་ཡོད། དབུས་གཙང་རྒྱུན་ལས་དང་མི་མང་ནས་ཚོགས་གཙོ་སྤེན་པ་ཚེ་རིང་ལ་རྒྱབ་སྐྱོར་བྱེད་དགོས་པའི་རྒྱབ་ལྗོངས་འདི་རེད། ཡང་གཅིག་བཤད་ན། དེ་རིང་ཁ་སང་བརྒྱུད་ལམ་ཚང་མ་ན། སྲིད་སྐྱོང་འོས་མི་གླེང་བསྡུར་་བྱེད་བཞིན་པའི་གནད་འགག་ཐུག་སའང་འདི་རེད། མ་འོངས་པའི་རྒྱལ་ཕམ་དེ་ཡང་ད་ལྟའི་གླེང་བསྡུར་འདིས་ཐག་གཅོད་དགོས་པ་རེད།

བོད་ཀྱི་ཆབ་སྲིད་ལོ་རྒྱུས་ནང་བལྟས་པ་ཡིན་ན། གནད་འགག་གི་བྱུང་རབས་མང་པོ་ཞིག་དབུས་གཙང་མི་མང་གིས་ཐག་གཅོད་དང་འགན་ལེན་བྱས་པ་གསལ་ཡོད། ཆོས་བརྒྱུད་རིམ་བྱོན་དང་། དེའི་རྗེས་ཀྱི་མངའ་མཛད་རིམ་བྱོན་ཚང་མས། བོད་ཀྱི་ཆབ་སྲིད་དང་རིག་གནས་འཛིན་སྐྱོང་གི་ལས་རིམ་ནང་ལ་ནུས་ཤུགས་གཙོ་བོ་བཏོན་གནང་ཡོད། ད་ཆ་ཚོགས་གཙོ་ལས་ཐོག་སྤེན་པ་ཚེ་རིང་དང་སྲིད་སྐྱོང་ལས་ཐོག་བློ་བཟང་སེང་གེ་གཉིས་དངོས་གཞིའི་འོས་མིར་འགྲན་རྩོད་འདིའི་ཐག་གཅོད་ཀྱི་གོ་རིམ་ནང་དུའང་། དབུས་གཙང་མི་མང་གིས་གནད་འགག་ཏུ་གཟིགས་ནས་ཁོང་གཉིས་བསྡུར་མགོ་ཚུགས་པ་དང་། བསྡུར་ནས་དཔྱད་གླེང་བྱས་ཏེ། བོད་སྤྱི་པའི་ལས་དོན་ལ་གྲུབ་འབྲས་སྤུངས་ཐུབ་མཁན། མང་ཚོགས་དང་སྤྱི་ཚོགས་ཀྱི་རེ་འདུན་ལ་ཐུགས་ཁུར་གནང་མཁན་སུ་ཡིན་པ་དེ་ངོ་འཕྲོད་པའི་ཐོག་ནས་འོས་ཤོག་འཕེན་པའི་སྟ་གོན་བྱེད་བཞིན་པ་འདིས། འོས་མི་གཉིས་ཀའི་མི་གཤིས་དང་འཇོན་ཐང་། གྲུབ་འབྲས་དང་ཁྱད་པར་བསྔོག་ནས་ཕྱི་གསལ་ནང་གསལ་བཟོ་བཞིན་ཡོད།

འོས་བསྡུའི་ལས་རིམ་ནང་མངོན་གསལ་ཆགས་དགོས་པའང་འདི་རེད། འོས་མི་སོ་སོས་མང་ཚོགས་ལ་རྩིད་འབུལ་བྱེད་ཐུབ་དགོས་པའང་འདི་རེད། ཟླ་བ་གཅིག་དང་ཉིན་ཉི་ཤུའི་ནང་ལ། གནད་དོན་འདི་ཕྱི་གསལ་ནང་གསལ་ཆགས་འགྲོ་བ་དང་། ཟླ་བ་གསུམ་པའི་ཚེས་ཉི་ཤུའི་ཉིན་མོར། བོད་ཀྱི་ལོ་རྒྱུས་ནང་ལ་ཆེས་ཐོག་མ་ཡིན་པའི་སྲིད་སྐྱོང་འོས་འདེམས་ཀྱི་རི་མོ་དང་པོ་དེ་འབྲི་གཏན་འཁེལ་ཡོད། རི་མོ་དེ་གང་འདྲ་ཞིག་འབྲི་དང་མི་འབྲི་དང་སྲིད་སྐྱོང་འོས་མི་གཉིས་ནས་མང་ཚོགས་ལ་རང་ཉིད་ག་ཚད་ཅིག་གསལ་སྟོན་ཐུབ་མ་ཐུབ་ཀྱིས་ཐག་ཆོད་འགྲོ་བ་ཞིག་ཆགས་ཡོད།

ད་ལྟའི་ཆར། བཙན་བྱོལ་སྤྱི་ཚོགས་འདི། ཚོགས་གཙོ་སྤེན་པ་ཚེ་རིང་གི་རྒྱབ་སྐྱོར་བའི་ཕྱོགས་ཁག་དང་། སྲིད་སྐྱོང་བློ་བཟང་སེང་གེ་ལ་རྒྱབ་སྐྱོར་བའི་ཕྱོགས་ཁག་ཅེས་སྡེ་ཚན་ཆེན་པོ་གཉིས་ཆགས་ཡོད། ཕྱོགས་ཁག་གཉིས་ཀས་སྐྱོན་ཆ་དང་གྲུབ་འབྲས་གླེང་རེས་བྱེད་ཀྱིན་ཡོད་ནའང་། གཙོ་དོན་ལྟེ་བ་ནི། འོས་མི་གཉིས་སོ་སོའི་ངོས་ནས། འཛིན་སྐྱོང་དང་ཆབ་སྲིད་དབང་བསྒྱུར་གྱི་འཆར་གཞི་ཁ་གསལ་གཏིང་གསལ་རེ་མང་ཚོགས་ལ་བསྟན་དང་མ་བསྟན་གྱིས་མཐའ་མའི་ཐག་གཅོད་ཀྱི་ཁ་ཕྱོགས་འཁྲིད་ཀྱིན་ཡོད།

ཚོགས་གཙོ་སྤེན་པ་ཚེ་རིང་གིས་ཉམས་མྱོང་དང་འཇོན་ཐང་། སྤོབས་པ། འཆར་གཞི་བཅས་ཞིབ་ཚགས་དང་ཕྱི་གསལ་ནང་གསལ་བཟོས་དང་བཟོ་བཞིན་ཡོད། འདི་ནི་ཕྱོགས་གཅིག་ནས་ད་ལྟའི་སྐབས་ལ་མང་ཚོགས་ནང་གསལ་བཤད་གནང་དགོས་ངེས་ཤིག་ཆགས་ཡོད་པ་དང་། གཉིས་ནས་དབུས་གཙང་མི་མང་གཙོས་པའི་རྒྱ་ཆེའི་མི་མང་གིས་ཁོང་གི་གནང་སྟངས་འདིར་ཕྱོགས་ཡོངས་ནས་དོ་སྣང་ཤུགས་ཆེ་བྱེད་ཀྱིན་ཡོད།

སྲིད་སྐྱོང་བློ་བཟང་སེང་གེར་མཚོན་ན། ལོ་བཞི་དང་ཕྱེད་ཀའི་རྗེས་ཀྱི་དེ་རིང་། རང་ཉིད་མང་ཚོགས་ཀྱིས་ཕྱི་གསལ་ནང་གསལ་གྱིས་མཐོང་བ་ཞིག་དགོས་རྒྱུ་ཡང་། རྒྱབ་སྐྱོར་བ་ཚོའི་གནང་སྟངས་ལ་བལྟས་ན། ད་ལྟ་གཞི་ནས་མང་ཚོགས་ལ་ངོ་སྤྲོད་བྱེད་ཀྱིན་པ་དང་མཚུངས། ཨ་སྒོར་རག་ཡོད། རྨང་གཞི་བཟོས་ཡོད། ཁང་པ་ཐོག་རྩེག་གཉིས་པ་བརྒྱབ་ཆོག་ཆོག་ཡིན་ལབ་བསྡད་པ་ཁོ་ན་ཞིག་གིས་གསལ་པོ་ཆགས་ཐུབ་ཀྱི་མེད་པའི་གནས་སྟངས་ཆགས་ཡོད།

དབུས་གཙང་མི་མང་ལ་མཚོན་ན། ཉི་མ་རེ་རེར་ཞིབ་དཔྱད་ལ་ཕྱོགས་ཤུགས་ཇེ་ཆེ་རེད། སོ་སོས་འདམས་པའི་སྤྱི་འཐུས་ཚོས་ཅི་ཞིག་གླེང་ཡོད་པ་དང་གྲོས་ཚོགས་ར་བའི་ནང་འགན་གང་ཞིག་འཁྱེར་བའི་རིམ་པ་དག་ཕྱོགས་བསྡོམས་དང་དབྱེ་ཞིབ་བསྐྱར་དུ་བྱས་ནས། མ་འོངས་པའི་སྲིད་སྐྱོང་འོས་ཤོག་དེ་སུ་ལ་འཕེན་དགོས་པའི་སྐོར་གླེང་སློང་བྱེད་ཤུགས་ཆེ་རུ་ཕྱི་འདུག་ལ། དེ་བས་ཀྱང་སྲིད་སྐྱོང་གིས་གྲོས་ཚོགས་ལ་ལན་འདེབས་དང་འགན་ཁུར་གནང་སྟངས་ལ་དོ་ནན་པོས་བལྟ་ཞིབ་ཡང་ཞིབ་བྱེད་ཀྱིན་འདུག དབུས་གཙང་མི་མང་གི་ད་ལྟའི་འགུལ་སྟངས་འདིས། བདེན་པ་ཞིག་བསྔོགས་ཀྱིན་འདུག བདེན་པ་ཞིག་འཚོལ་གྱིན་འདུག དབུས་གཙང་མི་མང་གིས་སྣེ་ཁྲིད་གནང་སྟངས་འདིར་ཡི་རང་ཞུ། དབུས་གཙང་མི་མང་ལ་ཐུགས་རྗེ་ཆེ་ཞུ།