ག་འདྲ་བྱས་ནས།

–མགར་ཐོག་མཁྱེན་རབ་འོད་གསལ།

 
ཁ་སང་དེ་རིང་བྱེས་འབྱོར་བོད་མིའི་སྤྱི་ཚོགས་སུ་སྲིད་སྐྱོང་འོས་མིར་ལངས་ཕྱོགས་ཀྱི་ཐད་ལ་དབུ་མ་དང་རང་བཙན་གྱི་རྩོད་པ་ཞིག་སྐྱ་སེར་གཉིས་ཀྱི་ཕྱོགས་ནས་དགག་སྒྲུབ་ཀྱི་གཏམ་བཤད་དང་རྩོམ་ཡིག་མང་དག་ཅིག་ཁྱབ་གདལ་དུ་འགྲོ་བགྱི་འདུག་ལ་དབུ་མ་ལ་མོས་མཁན་དག་གིས་བགྲོད་ལམ་ཡངས་པའི་གཉིས་སྨན་དབུ་མའི་ལམ་ནི་༧རྒྱལ་བ་རིན་པོ་ཆེས་རྒྱ་བོད་གཉིས་ཀྱི་ཁེ་ཕན་ཁོ་ནའི་ཆེད་དུ་གསར་གཏོད་མཛད་པ་ཡིན་པས་དེ་ལས་ལྡོག་སྟེ་རང་བཙན་ཁོ་ན་རེག་ཐུབ་ལ་འབད་ན་༧རྒྱལ་བ་རིན་པོ་ཆེའི་བཀའ་དགོངས་དང་རྦད་དེ་རྒྱབ་འགལ་ཡིན་ལུགས་དང་། རང་བཙན་ལ་མོས་མཁན་དག་གིས་བོད་ཀྱི་རྒྱལ་ཁབ་འདི་ཉིད་སྔོན་མ་ནས་རང་བཙན་གཙང་མ་ཡིན་པ་དང་ཕྱིས་སུ་ཁོང་ཚོ་ལྟ་བུའི་རླབས་ཆེན་དང་རྒྱལ་ཞེན་ཆེ་བའི་མི་སྣ་ཕལ་ཆེར་སྐྱེད་སྲིངས་མ་བྱས་པར་ཉམས་དམས་སུ་བཏང་བའི་རྐྱེན་གྱིས་བོད་རང་བཙན་ཤོར་སོང་བའི་བཟོ་འདྲ་བོས་ཁ་བརྐྱངས་སྣ་བརྐྱངས་ཀྱིས་འུད་སྒྲོག་བྱེད་རྐྱང་བྱས་ཏེ། རང་ཉིད་བོད་གཞིས་བྱེས་གཉིས་ཀྱི་སྤྱི་ཚོགས་སུ་མཁས་བླུན་ཀུན་གྱིས་དོ་སྣང་བྱེད་ཡུལ་གྱི་ཕོ་རོག་དཀར་པོ་ཞིག་ཏུ་འགྱུར་ཐུབ་ལ་ཐབས་ཤེས་ཡོད་རྒུ་བཏོན་ནས་རང་ཉིད་དགེ་ཆོས་སམ་དོན་རྒྱལ་ལྟ་བུའི་བློ་གྲོས་དང་རྣམ་དཔྱོད་ཡངས་པའི་མི་སྣ་ཞིག་ཏུ་ཡིན་པར་རློམ་པ་ནི་ལྐུགས་པས་བླུན་རྟགས་སྟོན་པ་དང་ཁྱད་ཅི།

དེ་ལྟ་བུའི་མི་སྣ་དེ་རིགས་ཀྱིས་རང་བཙན་རྩོད་ལེན་བྱེད་ཁུལ་གྱིས་ལྟ་བ་མཁྲེགས་བཟུང་བྱས་པ་དང་། རྒྱལ་ཞེན་དང་ལ་རྒྱ་ཆེས་ཆེར་ཡོད་མདོག་གིས་རྫུ་འཕྲུལ་ཆུང་ཆུང་འགའ་ཙམ་རེ་སྟོན་ཏེ་སྲིད་སྐྱོང་༼བློ་བཟང་སེང་གེ་༽མཆོག་དང་དོ་ཟླ་ཡོང་བར་ཨུ་ཚུགས་ཀྱིས་ལད་ཟློས་དང་འབད་བརྩོན་ཤུགས་ཆེར་ཞུས་ཀྱང་གནའ་དེང་གི་ཤེས་ཡོན་དང་རིག་གཞུང་བདག་གཉེར། ལྷག་པར་དུ་དེང་དུས་ཀྱི་ཆབ་སྲིད་གོ་རྟོགས་སོགས་གང་ཅིའི་ཐད་ནས་རང་རྐྱ་འཕེར་བ་ཞིག་དང་རང་རྐང་རང་སྟེང་དུ་ལངས་མ་ཐུབ་བར་ཨུ་ཚུགས་ཇི་ལྟར་བྱས་ཀྱང་དོ་ཟླར་མི་ཡོང་བར་བསྙོན་དུ་མེད།
དེ་སྔར་བོད་རང་བཙན་རྩོད་ལེན་པ་ཨ་ཚོགས་ཀླུ་མཁར་བྱམས་ཀྱིས་བསྒྲགས་གཏམ་སྤེལ་བར་ང་ཚོས་བོད་རང་བཙན་ལེན་དགོས་པ་ནི་ལོ་རྒྱུས་ཀྱི་འོས་འགན་ཞིག་ཏུ་ཆགས་ཡོད་ཚུལ་དེ་བོད་སྔ་ས་ནས་རང་བཙན་རྒྱལ་ཁབ་ཅིག་ཏུ་ཡིན་པའི་རྒྱུ་མཚན་དུ་བྱས་ན་རྒྱུ་མཚན་དུ་འགྲོ་ཐབས་ག་ལ་ཡོད་དེ། བོད་རང་བཙན་ལེན་དགོས་མིན་གྱི་གནད་དོན་དེ་དུས་དང་སྐབས་ལ་བསྟུན་ཏེ་བོད་དེང་དུས་ཀྱི་ཚན་རྩལ་རིག་གནས་གཙོས་སློབ་སྦྱོང་གི་ཆུ་ཚད་འདང་ངེས་ཤིག་ཡོད་མེད་དང་ཡོད་ཀྱང་དེང་རབས་རྒྱལ་ཁབ་གཞན་དང་མཉམ་གཤིབ་བྱེད་ཐུབ་མིན་སོགས་འབྱུང་འགྱུར་བོད་མི་རིགས་རང་ཉིད་ལ་དགེ་མཚན་ཅི་ཡོད་ཀྱི་ཁེ་བཟང་ལ་ལྟོས་ནས་འཐབ་རྩོད་བྱེད་དགོས་པ་ལས་འབྱུང་འགྱུར་དང་འབྱུང་འགྱུར་མ་ཡིན་པའི་སྣེ་གང་རུང་གཅིག་ལའང་བྱང་ཆ་རྩ་ནས་མེད་པར་ལྷིང་འཇགས་ཀྱི་རི་གྲོང་ཐམས་ཅད་འུར་ཟིང་ཞིག་གིས་ཁད་ཀྱིས་དཀྲོགས་པ་ཙམ་གྱིས་ཅི་ལ་ཕན།

དེ་དང་དེ་འདྲ་བའི་མི་བུ་འགའ་ཤས་ཤིག་ཀྱང་རང་རེ་བོད་ཕྲུག་ཁྱིམ་སྡེའི་སློབ་གྲྭ་ཁག་ཏུའང་དགུང་དུ་བཙུགས་པའི་དར་ལྕོག་བཞིན་རླུང་གར་གཡོ་ལ་ཁ་ལོ་བསྒྱུར་ཅིང་། གཞན་གྱིས་ཅི་ཟེར་ལ་བདེན་དུ་ཆུགས་རྐྱང་བྱས་ཏེ་མི་བུའི་སྒེར་ཚུགས་ཀྱང་ཤོར་ཟིན་པའི་མི་སྣ་དེ་རིགས་ཀྱིས་ག་འདྲ་བྱས་ནས་རང་བཙན་རྩོད་ལེན་གྱི་ལག་ལེན་དངོས་སུ་ཞུགས་ནས་འཐབ་རྩོད་བྱེད་ཕོད་དམ། མ་གཞི་མི་བུ་དེ་ཚོས་རང་མགོ་བོར་ནས་གཞན་མགོ་བཟུང་ཁུལ་བགྱིད་མཁན་གྱི་བྱིས་བློ་ཅན་ཤ་སྟག་རེད།
བྱིས་བློ་ཅན་དེ་དག་གིས་འུར་ལངས་པར་དགའ་ཐག་ཆོད་དེ་གསེར་ངོ་གསེར་དུ་མི་མཐོང་བར་ཕ་ངོ་དགྲར་མཐོང་གི་བླུན་རྟགས་རེ་སྟོན་ཏེ་དོན་དངོས་དང་མི་མཐུན་པའི་ཚད་ལས་བརྒལ་བའི་གདེང་སྤོབས་ཤིག་སླེབས་ཙ་ན། མང་གཙོ་ཞེས་པའི་ཁ་གཡང་སྒྲོགས་བཞིན་རང་དབང་ལོག་སྤྱོད་བྱས་པ་སོགས་ཀྱིས་རང་རེ་བྱེས་འབྱོར་བོད་མིའི་ནང་ཁུལ་དུ་ཟིང་སློང་བའི་ཉེར་བསྡོགས་བརྩམ་རྒྱུར་འགོ་ཚུགས་བས་ན། ནམ་རྒྱུན་ཡིན་མདོག་མདོག་གིས་བོད་བསྟན་སྲིད་ཀྱི་ཆེད་དུ་ཅི་ཡང་བྱ་ཐུབ་བོ་སྙམ་པའི་རང་རློམ་ཅན་བོད་རང་བཙན་རྩོད་ལེན་བྱེད་མཁན་དག་གིས་ད་ཡོད་བོད་མི་རིགས་འདི་ཉིད་ཀྱི་ཆིལ་སྒྲིལ་དང་མཛའ་མཐུན་གྱི་འབྲེལ་ཐག་དེ་བཅད་པ་མ་ཡིན་ནམ།

དེ་བས་ན་ཁོ་བོ་ཅག་དག་གིས་ངལ་སོས་པའི་རྨི་ལམ་སྐྱིད་པོ་ཞིག་བཏང་བ་ལས་དོན་གྱིས་བོད་མི་རིགས་འདི་ཉིད་ལ་ཕན་པ་ཅུང་ཟད་ཙམ་ཡང་མི་བྱུང་སྟབས། ཐོག་མ་ཉིད་ནས་འབྱུང་འགྱུར་གྱི་ཉེས་སྐྱོན་དག་ལ་འཛེམས་དོག་བྱེད་དགོས་པ་རེད་མ་གཏོགས། བླ་ལྷག་གིས་རྒྱལ་ཞེན་ཡོད་བཤད་པ་དང་རྒྱལ་ཞེན་ཡོད་པས་རང་བཙན་རྩོད་ཁུལ་བགྱིས་པ་ཙམ་གྱིས་སུ་ལའང་བརྩི་འཇོག་བྱེད་མི་དགོས་པར་རང་ཤེད་ཚ་བོས་ག་འདྲ་བྱས་ནས་བོད་ཀྱི་རང་བཙན་བསྐྱར་གསོ་བྱེད་ཐུབ་བམ། བོད་རྒྱ་འབྲེལ་མོལ་ཡོང་ཐབས་མེད་ལུགས་དང་མེད་ཚུལ་གྱིས་འུར་བརྒྱབ་ནས་འབད་བརྩོན་མ་ཞུས་པར་ཁ་བདེ་བོ་རྐྱང་རྐྱང་བྱས་བསྡད་ན། བོད་མི་རིགས་ཀྱི་རྩ་དོན་ལ་ཕམ་ཁ་སྟེར་བ་ལས་ཁེ་བཟང་ཏིལ་འབྲུ་ཙམ་སྟེར་མི་ཐུབ།
འོན་ཀྱང་དེ་འདྲ་བའི་མངོན་སུམ་ལ་བསྙོན་བའི་རྒོལ་བ་དག་གིས་ད་དུང་མུ་མཐུད་དུ་རང་ལྟ་མཆོག་འཛིན་གྱིས་སྤྱི་ཚོགས་ག་གེ་མོ་ཞིག་གི་སྡིངས་ཆའི་སྟེང་ལ་མ་འགྲིག་པ་དང་མ་རན་པ་འདི་དང་གན་རེད་ཅེས་མཛུབ་མོ་ཕྱིར་ཀེར་གྱི་སྙིང་སྟོབས་ཙམ་ལས་ནང་གུག་གི་སྤོབས་མེད་པའི་སྡར་མ་དེ་རྣམས་ག་འདྲ་བྱས་ནས་བོད་རང་དབང་རང་བཙན་གྱི་འཐབ་རྩོད་པ་ཞིག་ཏུ་ངོས་འཛིན་བྱེད་ཐུབ་བམ། དེ་ཙམ་མ་ཟད་ཕ་ངོ་ཟིན་ཐུབ་པའི་བྱིས་པ་ལོ་གསུམ་ཅན་ཞིཧ་ཏུའང་ངོས་འཛིན་བྱེད་དཀའ་བར་སེམས། དེ་བས་ན་ཕྱི་ནང་དབྱེར་མེད་ཀྱི་བོད་རིགས་ཡོད་དོ་ཅོག་གིས་དེ་རིགས་ཀྱི་ལས་དང་རྒྱང་དུ་གྱེས་ཏེ་དབུ་མ་དང་རང་བཙན་གང་འོས་ཀྱིས་བདར་ཤ་དཔྱད་ནས་ད་གཟོད་འཆར་ལྡན་ངང་ལས་ལ་གཞོལ་བར་ཤིན་ཏུ་ནས་གལ་ཆེའོ།