—-རང་འཚོལ།
ཁུ་བྱུག
མཐོ་སྒང་གི་ཁུ་བྱུག
ལ་ཞེན་གྱི་ཕོ་རྒོད
འཇིགས་རུང་གི་ལྷིང་འཇགས་གསེབ་ནས
ཁྱེད་ཀྱིས་་་གླུ་རེ་ལེན་པ་ནི
སྤུན་ཟླའི་རྨ་ཁ་སོས་པའི་བདུད་རྩི
དགྲ་བོའི་སྙིང་རྩ་འདར་བའི་འབྲུག་སྒྲ
རིག་ཞེན་གྱི་མཛངས་པ
ཞུམ་མེད་ཀྱི་དཔའ་བོ
འཇིགས་རུང་གི་ལྷིང་འཇགས་ཕུག་པའི
ཁྱེད་ཀྱི་གླུ་སྒྲ་རེ་རེ་ནི
ཐང་ལ་ལྷུང་བའི་སྐད་ཡིག་གི་འཁར་བ
ཆར་རྡུང་ཁྲོད་ཀྱི་རིག་གཞུང་གི་བླ་གབ
མེར་བཞོན་པའི་ཚེ་སྲོག་གི་སྐྱོ་སང
ཁུ་བྱུག
དབྱངས་ཀྱི་རྒྱལ་པོ
རིག་གཅེས་ཀྱི་གླུ་བ་རྒོད་པོ
མཐོ་སྒང་གི་ཁུ་བྱུག་རྒས་པོ
ད་ཆ་ཁྱེད་ཐག་རིང་གི་དབེན་གནས་ན་བཞུད་པས
ང་ཚོས་དགུན་གྱི་གྲང་གདུང་མྱོང་བཞིན
མཆི་མའི་ཁ་བཏགས་ཀྱིས་ཁྱེད་ལ་སྐྱེལ་སྨོན་བྱེད་བཞིན་ཡོད
འོན་ཀྱང་་་
འདི་ལྟར་རྒྱང་རིང་དུ་བཞུད་པ་དེ
ཁྱེད་ལ་མཚོན་ན་་་ངལ་གསོ་ཞིག་ཏུ་ཟད
ངོ་མ་་་་
ཁྱེད་ཀྱི་ལ་ཞེན་གྱི་སྙིང་སྟོབས་དང
ཁྱེད་ཀྱི་རིག་ཞེན་གྱི་གླུ་སྒྲ་རྣམས
ད་དུང་་་ནམ་ཡང
ང་ཚོའི་སྙིང་དང་རྣ་བའི་གསེབ་ལ་སིམ་པའི་ཚེ་སྲོག་གསོན་པོ་རེ་ཡིན་པས
ཁྱེད་ངལ་གསོ་བཞིན་བདེ་བར་བཞུད
ཁྱེད་ངལ་གསོ་བཞིན་བདེ་བར་བཞུད
ཁྱེད་ངལ་གསོ་བཞིན་ཕེབས་་་་་་་
རང་འཚོལ་ནས། ༢༠༡༦ ། ༢ ། ༢༨ ཉིན། རིག་ཞེན་གྱི་གླུ་བ་བདུད་བྷེར་ཕུལ།