བདུད་བྷེ་ལགས་བདེ་མོར་ཕེབས་ཨ།

—–ལྷ་རྒོད།
 
གངས་ལྗོངས་ཀྱི་ཁུ་བྱུག་སྔོན་མོ་ལགས། ང་ཆུང་ཆུང་ནོར་ཕྱུགས་ཀྱི་རྫི་བོ་ཡིན་པའི་དུས་སུ་ཁྱེད་ཀྱི་གླུ་སྐད་ལ་ཉན་ནས་རྗེས་ཟློས་བྱས་པ་ནི་བགྲང་གིས་མི་ལང་ལ། བརྗོད་ཀྱིས་མི་ནུས། ད་དུང་ངས་ཆུ་བོ་དང་ཟམ་པ། རྫ་རི་དང་སྤང་རི། ནགས་ཀླུང་དང་རྩྭ་ཐང་གྲངས་མེད་པ་བརྒལ་བའི་དུས་སུ། ཁྱེད་ཀྱི་སྐད་སྒྲས་ངའི་ལུས་སེམས་ཀྱི་དཀའ་ཚེགས་དང་ངལ་དུབ་ཡོངས་སུ་བསལ་བའང་བགྲང་ལས་འདས། ངའི་ལང་ཚོའི་ན་ཚོད་ཡོངས་སུ་སྨིན་དུས་སུ་ཁྱེད་ཀྱི་གླུ་ཚིག་རེ་རེའི་ནང་དོན་དང་། འགྱུར་ཁུག་རེ་རེའི་སྒྱུ་རྩལ་གྱིས་ངའི་ཡིད་ཀྱི་བརྟན་པ་དབང་མེད་དུ་འཕྲོག་པར་བྱས། རྒྱུ་མཚན་དེའི་ཕྱིར། ངས་ནམ་རྒྱུན་གྲོགས་པོ་ངོ་ཤེས་དག་ལ་ཁྱེད་དང་ཁྱེད་ཀྱི་སྐད་ངག་གི་སྐོར་ལ་ཡང་ཡང་མོལ་མྱོང་།

ང་རྒྱལ་ཁམས་རྡོག་པས་བསྐོར་མཁན་ངེས་མེད་ཀྱི་འཁྱམ་པོ་རུ་གྱུར་དུས། རྣ་ཐོས་སུ་ཁྱེད་ཉིད་ར་བཟི་དང་མདོ་མེད་ཡིན་པ་དང་། ཡང་སྐབས་འགར་ཁྱེད་ཉིད་ས་ཁུལ་ག་གེ་མོ་ཞིག་ནས་སྤྲུལ་པའི་སྐུ་ཞིག་ཡིན་པར་ངོས་འཛིན་གྱིས་མཇལ་ཁ་ཞུ་མཁན་དང་། བརྐྱངས་ཕྱག་འཚལ་མཁན་ཡོད་པའང་ཐོས་མྱོང་ཡོད།
གང་ལྟར་ངའི་སྒོ་གསུམ་གྱི་ཡུལ་དུ་ལེགས་ཉེས་གང་ཞིག་ཚོར་ཡང་ཁྱེད་ལ་དགའ་བའི་དྭངས་གཙང་གི་སེམས་པ་དམར་པོ་འགྱུར་མ་མྱོང་ལ། ཁྱེད་ཉིད་ལ་དུང་བའི་བསྟོད་བསྔགས་མེ་ཏོག་གི་ཕྲེང་ཐག་ཆད་མ་མྱོང་།

ཡིན་ནའང་དེ་རིང་འཇིག་རྟེན་འདི་ནས་ཁྱེད་དང་འུ་གཉིས་དངོས་སུ་ཁ་བྲལ་དུ་ཕྱིན་སོང་མོད། ད་དུང་ང་ཉིད་འཇིག་རྟེན་འདི་དང་ཁ་བྲལ་མ་ཕྱིན་བར་དུ་ཁྱེད་ཀྱི་སྙན་འཇེབས་ལྡན་པའི་དབྱངས་རྟ་དེ་བཞིན་ངས་ནམ་ཡང་སྣང་མེད་དུ་བསྐྱུར་མི་སྲིད།

ད་ལྟ་ངས་ཁྱེད་ལ་ཟང་ཟིང་དངོས་པོ་སོགས་ཀྱི་དྲིན་ལན་གང་ཡང་འཇལ་མ་ནུས་ཀྱང་། ངས་ཡིད་ཀྱི་འདུན་པ་མཆོག་གསུམ་ལ་བསྒྱུར་ཏེ་ཁྱེད་ཉིད་ཕེབས་སྐྱེལ་གྱི་དོད་དུ་བསྔོ་སྨོན་གང་ཤེས་ཞུས་ཡོད་ལ་མ་ཎི་གང་མང་བགྲངས་ཡོད། ད་དུང་བླ་མ་ཡིད་བཞིན་ནོར་བུ་འཕགས་མཆོག་སྤྱན་རས་གཟིགས་ཀྱི་ཡིག་ཚང་དུ་གདུང་ཤུགས་དྲག་པོའི་སྒོ་ནས་མེ་ཏོག་ཆུང་ཡང་མཆོད་རྫས་ཀྱི་དཔེ་ལྟར་བསྔོ་སྨོན་ཡང་ཞུས་ཡོད།
མཐར་ཁྱེད་ཀྱི་ནང་མི་བུ་ཕྲུག་ཡོངས་ལ་ངས་སེམས་ཁོང་ནས་གདུང་སེམས་མཉམ་བསྐྱེད་ཞུ་བཞིན་ཡོད།
གངས་ལྗོངས་ཀྱི་ཁུ་བྱུག་སྔོན་མོ་བདུད་བྷེ་ལགས། ད་བདེ་མོར་ཕེབས་ཨ།