རྒྱལ་སྤྱིའི་བུད་མེད་ཉིན་མོ་ཇི་ལྟར་བྱུང་བའི་སྐོར།

རྔ་བཟའ་བདེ་པོ་འཚོས་བསྒྱུར།

ལོ་ལྟར་ཟླ་གསུམ་པའི་ཚེས་བརྒྱད་ཉིན་འཛམ་གླིང་གང་སར་རྒྱལ་སྤྱིའི་བུད་མེད་དུས་ཆེན་སྲུང་བརྩི་བྱེད་བཞིན་ཡོད། དེས་འཛམ་གླིང་གི་བུད་མེད་ཡོངས་དང་ལྷག་པར་དུ་དཔའ་མཛངས་ལྡན་པའི་བུད་མེད་དམ་པ་དག་གི་རྣམ་ཤེས་ལ་བརྩི་བཀུར་མཚོན་གྱིན་ཡོད།

ཕྱི་ལོ་༡༩༠༠ ནང་ལ་སྤྱི་ཚོགས་ཀྱི་གཉའ་གནོན་དང་དབྱེ་འབྱེད་ཁྲོད་ནས་བུད་མེད་ཚོ་སྡོད་བཟོད་བྲལ་ནས་ཡར་ལང་དང་སྐད་འབོད་བྱེད་འགོ་བརྩམས་ཏེ་འགྱུར་བ་གསར་བ་ཞིག་ལ་རེ་ལྟོས་བྱས།
ཨ་རིའི་སྤྱི་ཚོགས་རིང་ལུགས་ཚོགས་པས་འགན་བཞེས་ཏེ་རྒྱལ་སྤྱིའི་བུད་མེད་དུས་ཆེན་ཉིན་དང་པོ་དེ་ཟླ་གཉིས་པའི་ཚེས་ཉི་ཤུ་བརྒྱད་ལ་སྲུང་བརྩི་བྱས་ཤིང་དེ་ནི་ཆབ་སྲིད་ཀྱི་གནད་དོན་ཞིག་ལའང་ངོས་འཛིན་བྱས།  དེ་ནས་བཟུང་ཕྱི་ལོ་༡༩༡༣ ཟླ་གཉིས་པའི་རེས་གཟའ་ཉི་མ་མཐའ་མ་བར་རྒྱལ་ཁབ་ཀྱི་བུད་མེད་དུས་ཆེན་ཞེས་སྲུང་བརྩི་བྱས་ཡོད།

ཕྱི་ལོ་༡༩༡༡ ལ་ཀཱོ་པན་གྷན་( Copenhagen) དུ་རྒྱལ་སྤྱིའི་བུད་མེད་ལས་བྱེད་གྲོས་ཚོགས་ཤིག་ཇར་མན (Germany)གྱི་དམངས་གཙོ་སྤྱི་ཚོགས་ཚོགས་པའི་བུད་མེད་ལས་བྱེད་པའི་ཚོགས་གཙོས་བསྐོང་ཞིང་། བུད་མེད་ཐོབ་ཐང་རྩོད་ལེན་མཁན་ལྕམ་ཀཱ་ལ་རཱ་ཛྭ་ཀྭིན( Clara Zetkin)གྱིས་རྒྱལ་སྤྱིའི་བུད་མེད་ཉིན་མོ་ཞེས་པའི་བསམ་བློ་དེ་ཁྱབ་སྤེལ་བྱས་པས།  མི་མང་པོས་ཁོང་མོའི་བསམ་ཚུལ་ལ་བསྔགས་བརྗོད་བླ་ལྷག་བྱས་ཏེ་རྒྱལ་སྤྱིའི་བུད་མེད་ཉིན་མོ་དབུ་བརྙེས་ཡོད།

རྒྱལ་སྤྱིའི་བུད་མེད་ཉིན་མོ་ཐེངས་དང་པོ་དེ་ཟླ་གསུམ་པའི་ཚེས་བཅུ་དགུ་ཉིན་ཡོ་གླིང་(Austria) དང་ཌན་མཱར་ཀི( Denmark) ཇར་མན་དང་སྭི་བེ་ལན་ཌི( Swtzerland) ཡི་རྒྱལ་ཁབ་ཁག་ཏུ་སྲུང་བརྩི་བྱས་ཤིང་།  སྐྱེས་ཕོ་མོ་ས་ཡ་གཅིག་ལས་ལྷག་ཅིག་མཉམ་འཛོམས་ཐོག་བུད་མེད་ཀྱི་ལས་གནས་ཐོབ་ཐང་དང་འོས་བསྡུའི་རང་དབང་དགོས་པ་དང་ཕོ་མཆོག་མོ་དམན་གྱི་དབྱེ་འབྱེད་མཚམས་འཇོག་དགོས་པར་འབོད་སྐུལ་ནན་མོ་བྱས་ཡོད།

ཕྱི་ལོ་༡༠༡༣ གྱི་རྗེས་ནས་རིམ་བཞིན་བགྲོ་གླེང་གི་འབྲས་སུ།  རྒྱལ་སྤྱིའི་བུད་མེད་ཉིན་མོ་ཟླ་གསུམ་པའི་ཚེས་བཅུ་དགུ་དེ་ཟླ་གསུམ་པའི་ཚེས་བརྒྱད་ལ་བསྒྱུར་བཅོས་བཏང་སྟེ་དུས་ད་ལྟའི་བར་འཛམ་གླིང་གི་དུས་ཆེན་ཁྱད་པར་ཅན་ཞིག་ཏུ་གྱུར་བ་མ་ཟད་ལོ་དེ་ག་རང་ལ་ཡུ་རོབ་རྒྱལ་ཁག་ཏུ་ཡང་ཁྱབ་བརྡལ་ཆེན་པོ་ཕྱིན་ཏེ་རྒྱལ་སྤྱིའི་བུད་མེད་ཉིན་མོ་ཞེས་སྲུང་བརྩི་བྱེད་དང་བྱེད་མུས་ཡིན།

སྐབས་དེར་དམག་འཁྲུག་ཁྲོད་དུ་ཨུ་རུ་སུའི་དམག་མི་ས་ཡ་གཉིས་ལྷག་འདས་གྲོངས་སུ་ཕྱིན་པས། ཨུ་རུ་སུའི་བུད་མེད་ཚོས་” འཚོ་རྟེན་དང་ཞི་བདེའི“ སླད་དུ་ངོ་རྒོལ་བྱེད་འགོ་བརྩམས། ཆབ་སྲིད་ཀྱི་མགོ་གཙོ་རྣམས་ཁོང་ཚོའི་ཁ་གཏད་དུ་ལངས་ཀྱང་བུད་མེད་ཚོས་ངོ་རྒོལ་ཆུ་བོའི་རྒྱུན་དུ་བྱས་ཏེ་མཐར་ཁོང་ཚོ་རྐུབ་སྟེགས་མཐོ་ས་ནས་དམའ་སར་བཙན་གྱིས་བཤོལ་དགོས་བྱུང་ཞིང་།  སྲིད་གཞུང་གིས་བུད་མེད་ཚོར་འོས་བསྡུའི་ཐོབ་ཐང་སྤྲད།  ཉི་མ་དེ་ནི་ད་དུང་ལོ་རྒྱུས་རང་བཞིན་ལྡན་པའི་ཐོག་ནས་ཡི་ཤུའི་ལོ་ཐོ་རུ་གསུམ་པའི་བརྒྱད་ཅེས་གསལ།

རྒྱལ་སྤྱིའི་བུད་མེད་ཉིན་མོ་འདི་ནི་ལོ་རེ་བཞིན་གཟི་བརྗེད་ཆེ་རུ་དང་ནུས་ཤུགས་གོང་དུ་འཕེལ་བཞིན་ཡོད་པས།  ཕྱི་ལོ་༡༩༧༥ ལོར་འཛམ་གླིང་མཉམ་སྦྲེལ་རྒྱལ་ཚོགས་ཀྱིས་ཀྱང་ཉིན་མོ་འདི་ནི་རྒྱལ་སྤྱིའི་བུད་མེད་ཉིན་མོ་ཡིན་ཞེས་ངོས་འཛིན་བྱས་ཏེ་གོ་མིང་བྱིན་ཡོད།   དེར་བརྟེན།   ད་སྐབས་འཛམ་གླིང་གི་བུད་མེད་ཚོགས་པ་དང་སྲིད་གཞུང་ཚང་མས་སུམ་པའི་ཚེས་བརྒྱད་ནི་རྒྱལ་སྤྱིའི་བུད་མེད་ཉིན་མོ་གལ་ཆེན་ཞིག་བརྩིས་ནས་སྲུང་བརྩི་བྱེད་པ་མ་ཟད་ཉིན་དེར་ལས་འགུལ་སྣ་ཚོགས་སྤེལ་ཏེ་བུད་མེད་ལ་ཆེ་མཐོང་སྤྲོད།   དེ་འདྲ་ཡིན་དུས་རྒྱལ་སྤྱིའི་བུད་མེད་ཉིན་མོར་གཞུང་འབྲེལ་གྱི་གུང་གསེང་ཡིན།   མདོར་ན་དུས་ཆེན་འདི་ནི་ཨ་རི་ནས་དར་ཏེ་འཛམ་གླིང་ཕྱོགས་ཡོངས་ལ་ཁྱབ་པས་རྒྱལ་ཁབ་འདི་ཚོ་ཚང་མར་གུང་གསེང་གཏོང་གི་ཡོད།
(Afghanistan, Armenia, Azerbaijan, Belarus, Burkina Faso, Cambodia, China (for women only), Cuba, Georgia, Guinea-Bissau, Eritrea, Kazakhstan, Kyrgyzstan, Laos, Madagascar (for women only), Moldova, Mongolia, Montenegro, Nepal (for women only), Russia, Tajikistan, Turkmenistan, Uganda, Ukraine, Uzbekistan, Vietnam and Zambia.)

རྒྱལ་སྤྱིའི་བུད་མེད་ཉིན་མོར་སྦྱར།
༢༠༡༦/༣/༨