ལྷ་རྒོད།
དེང་སྐབས་བཙན་བྱོལ་བོད་མིའི་འོས་བསྡུའི་ལས་རིམ་འགྲོ་བཞིན་པའི་སྐབས་འདིར་ང་ཚོའི་སྤྱི་ཚོགས་ཀྱི་ནང་དུ་རྙོག་གླེང་གི་རྣམ་གྲངས་སམ་ཆབ་སྲིད་ཀྱི་ཟློས་གར་ནི་ཉི་མ་རེ་ལ་གསར་པ་རེ་མངོན་ཡོང་བའི་སྐབས་ཤིག་ཡིན་སྟབས། དེ་ཐམས་ཅད་ལ་ཇུས་གཏོགས་བྱ་དགོས་བྱུང་ན་དུས་ཚོད་ཀྱིས་ལྕོགས་ཐབས་ཀྱང་མེད།
ཡིན་ནའང་དེ་དག་གི་ནང་ནས་ཆེས་ཡ་མཚན་དགོས་པའི་དགྲ་དགའ་གཉེན་སྡུག་གི་བྱ་བ་ངན་པ་ཞིག་ཟུར་བཏོན་གྱིས་ཇུས་གཏོགས་བྱས་ན་འདི་ལྟར་ཡིན་ཏེ། ང་ཚོའི་ཅོལ་ཆུང་བ་རིགས་གཅིག་གིས་བཙན་བྱོལ་བོད་མིའི་འོས་བསྡུའི་ལས་རིམ་གྱི་སྔ་གཞུག་གི་གནས་ཚུལ་དག་ལ་རྒྱ་གཞུང་གིས་སྐྱོན་བརྗོད་བྱེད་ཀྱིན་འདུག་ཅེས་ཧ་ལས་ལས་དང་ཧོན་འཐོར་འཐོར་བྱེད་ཀྱིན་འདུག་པས་དེ་དག་ལ་གསལ་བཀྲོལ་གྱི་ཚུལ་དུ་ཅུང་ཟད་བཤད་ན་འདོད།
དེ་ཡང་རྨོངས་རྒན་བདག་ལ་མཚོན་ན། རྒྱ་ནག་གི་སྐྱོན་བརྗོད་ལ་ནམ་ཡང་ཧ་མི་ལས་ལ་ཧོན་མི་འཐོར། རྒྱུ་མཚན་གང་ལགས་ཤེ་ན། ང་ཚོས་ལེགས་པའི་བྱ་བ་གང་ཞིག་གཉེར་ཡང་རྒྱ་གཞུང་གིས་སྐྱོན་བརྗོད་དང་། ཧམ་བཤད་སོགས་བྱས་དང་བྱེད་བཞིན་པ་ནི་རྒྱུན་ལྡན་གྱི་གནས་ཚུལ་ཞིག་ལས་སྔར་མེད་པར་ཁ་རྩང་དེ་རིང་གི་གནས་ཚུལ་གསར་པ་ཞིག་གང་ཡང་མིན་པ་ནི་ཕྱོགས་ཡོངས་ལ་དོ་སྣང་ཅུང་ཟད་བྱེད་མཁན་ཞིག་ཡིན་ན། ལྐོག་གྱུར་གྱི་གནས་ཚུལ་ཞིག་གཏན་ནས་མིན་ལ་འབྱུང་འགྱུར་ལའང་དེ་ལྟར་བྱ་རྒྱུ་ཡིན་པ་ནི་ཕར་བལྟས་ཚུར་གསལ་ཡིན།
ལྷག་པར་དུའང་རྒྱ་ནག་གཞུང་གི་ངོས་ནས་བཤད་ན་བཙན་བྱོལ་བོད་མིའི་མང་གཙོའི་འཕེལ་རིམ་དང་། དེའི་མདུན་བསྐྱོད་རེ་རེས་ཁོང་ཚོའི་སྙིང་དཀྱིལ་དུ་མདུང་མོས་བསྣུན་པ་ལྟ་བུའི་ཟུག་གཟེར་སློང་གིན་ཡོད་སྟབས། ངས་བསམ་པར་གནས་ལུགས་ལྡན་མིན་ཇི་ལྟར་ཡང་སྐྱོན་བརྗོད་བྱེད་པ་ནི་ཁོང་ཚོ་ལ་མཚོན་ན་འོས་འགན་ཡོད་པར་འདོད་ཀྱིན་ཡོད།
ཡིན་ནའང་ཆེས་ཐབས་སྐྱོ་བ་ཞིག་ལ། ང་ཚོ་རང་ངོས་ནས་ཚུགས་ཀ་ཡོངས་སུ་ཤོར་ཏེ་(ཕྱི་དགྲའི་མགོ་བརྡུང་བྱེད་ཐོ་བ་མེད་པར། ནང་རྫ་རྐུབ་གཏོར་བྱེད་སྟ་རེ) ཟེར་སྲོལ་ལྟར་མདུང་རྩེ་ནང་བསྐོར་གྱིས་རྒྱ་གཞུང་གི་དྲིལ་བསྒྲགས་ལ་ཆར་པ་ཆུ་གྲོགས་ལྟ་བུའི་མཐུན་རྐྱེན་དུ་ཡིག་བསྒྱུར་དང་བརྒྱུད་འགོད། བགྲོ་གླེང་བྱེད་པ་ནི་དགྲ་དགའ་གཉེན་སྡུག་གི་བྱ་བ་ཞིག་ལས་བོད་མིའི་རྩ་དོན་ལ་ཕན་པའི་བྱ་བ་ཞིག་ནམ་ཡང་མ་མཐོང་། དེ་ལས་ཁྱེད་ཅག་ལ་ཤེས་ཡོན་དང་འཇོན་ཐང་ལྡན་ཚེ་མི་རིགས་ཀྱི་ལས་དབང་སེམས་སུ་བཅངས་ནས་སྨྱུག་རྩེ་དགྲ་ཕྱོགས་སུ་བསྐོར་ནུས་མཁན་ཞིག་བྱུང་ཚེ་ང་ཚོའི་སྤོབས་པ་དང་ཁྱེད་ཚོའི་གཟི་བརྗིད་ཅིའི་ཕྱིར་མིན།
སྤྱིར་བཏང་འདས་པའི་དུས་རབས་ཕྱེད་ཀ་ལྷག་ཙམ་གྱི་དུས་ཡུན་ནང་། སྤྱི་ནོར་༸གོང་ས་༸སྐྱབས་མགོན་ཆེན་པོའི་རྨད་བྱུང་ཐུགས་བསྐྱེད་ལས་བྱུང་བའི་བཙན་བྱོལ་སྒྲིག་འཛུགས་ལ་བརྟེན་ནས་འཚོ་གནས་བྱེད་མཁན་ཁག་གཅིག་ལ་མཚོན་ན། ཕྱོགས་ཞེན་གྱི་དུག་ཆུ་ཁོག་དུ་སོང་ནས་སྒོ་གསུམ་སྐྲན་ནད་དུ་བསྒྱུར་ཟིན་སྟབས། དུས་ཀུན་ཏུ་སྒྲིག་འཛུགས་དང་སྒྲིག་འཛུགས་ཀྱི་སྲི་ཞུ་བ་དག་ལ་རང་ཉིད་ཀྱི་ནུས་པ་ལ་དཔག་པའི་ཟུར་ཟ་དང་སྒྲོ་སྐུར། གཞན་གྱིས་བགྱིད་པ་ལ་ཡི་རངས་ཀྱི་མཐེ་བོང་གྱེན་དུ་ཀེར་བཞིན་པའི་ཁོང་ཚོའི་བྱ་སྤྱོད་ལ་བསམ་གཞིག་ནན་པོའི་སྒོ་ནས། རྒྱ་ཆེའི་མང་ཚོགས་ཀྱི་ངོས་ནས་ནམ་ཡང་གཡོ་འོག་ཏུ་མ་ཚུད་པར་རང་ཚུགས་བརྟན་པོར་གནས་དགོས་པ་ནི། ང་ཚོའི་འཕྲལ་ཕུགས་ཀྱི་དགོས་དམིགས་གལ་ཆེན་ཞིག་ཡིན་པར་ངོས་འཛིན་ཐུབ་དགོས་པར་སེམས་སོ།།
དངོས་གནས་ཡག་པོ་བྲིས་བཞག་ བོན་པོའི་སྤྱི་འཐུས་འདྲ་བོ་ཕོངས་རྒན་དེས་གྲ་བའི་སྤྱོད་ཚུལ་དང་ཡོངས་སུ་བརྒལ་ཏེ་འགྱོད་དང་བཅས་བློ་སེང་ལ་རྒྱབ་སྐྱོར་དང་ཚོགས་གཙོ་ལ་སྒྲོ་བསྐུར་བྱ་རྒྱུའི་རྒྱ་ནག་དང་འབྲེལ་བའི་དྲི་བ་དེ་འདྲ་ཞིག་བཏང་སོང་ ངོ་ཚ་ ཞབས་འདྲེན་པ་
ལྷ་རྒོད་ལགས་ཀྱིས་གསུངས་པ་བདེན། རྒྱ་ཕྱོགས་ནས་ང་ཚོའི་བཟང་ངན་ཚང་མ་ལ་སྐྱོན་བརྗོད་བྱེད་བཞིན་ཡོད། དཔེར་ན། དེ་སྔོན་༧ གོང་ས་མཆོག་ཆབ་སྲིད་འགན་དབང་ཡོངས་རྫོགས་མི་མང་གི་བསྐོས་པའི་མང་གཙོའི་ལམ་ལུགས་བཀའ་བློན་ཁྲི་པ་ལ་རྩིས་སྤྲད་ཀྱི་ཡིན་གསུངས་པའི་སྐབས། རྒྱ་ནག་གི་དེ་ལ་ངོ་རྒོལ་བྱས་པ་རེད།