རབ་འབྱོར་ནས།
དགྲ་དགའ་གཉེན་སྡུག་ཟེར་བ་འདི་ང་ཚོས་སྐྱབས་བཅོལ་བའི་སྤྱི་ཚོགས་ནང་དུ་རྒྱུན་དུ་ཐོས་པའི་གཏམ་དཔེ་ཞིག་ཡིན། བཙན་བྱོལ་བོད་གཞུང་དང་སྤྱི་ཚོགས་ཀྱི་ནང་མཚང་ཞིག་དང་། ནང་འགལ་ཞིག་ལ་ཕྱི་ལ་མངོན་དུས་གཏམ་དཔེ་འདི་ལན་མང་དུ་ཐོས། འདིའི་མཚོན་དོན་ནི། རང་ཕྱོགས་ཀྱི་ནང་འགལ་ལམ་ནང་སྐྱོན་ཞིག་གཞན་ལ་ཤེས་ཚོར་གྱི་གོ་སྐབས་མེད་པའི་སྒོ་ནས་སེལ་ཐུབ་ན་ལོས་བཟང་སྟེ། སེལ་མ་ཐུབ་ན་ཡང་དེ་དག་ཕྱི་ལ་མི་མངོན་པར། ཅི་ཡང་མེད་པའི་ཟོལ་གྱིས་སྡོད་དགོས་པ་དེ་ཡིན།
ང་ཚོས་དགྲ་དགའ་གཉེན་སྡུག་ཟེར་ནས་མི་གང་རུང་ཞིག་གིས་དགའ་སྡུག་བརྗོད་པ་ལ་ཚོད་འཛིན་བྱེད་ཅིང་། ཐ་ན་འགོག་པར་བྱེད། དེ་བས་ངས་གཏམ་དཔེ་འདི་ནི་ང་ཚོ་བོད་པའི་རུས་རྐང་ནང་ན་ཡོད་པའི་དམངས་གཙོ་ཡི་སྨྲ་བརྗོད་ཀྱི་ཁེ་དབང་འགོག་བྱེད་ཅིག་ལ་ངོས་འཛིན་བྱེད་ཀྱི་ཡོད། དགྲ་དགའ་གཉེན་སྡུག་གི་མཐར་ཐུག་གི་གོ་དོན་ནི་རང་སྐྱོན་སྦས་དགོས་པ་སྟེ། གཞུང་གི་ལས་སྣེ་ལྟ་བུ་ཞིག་གིས་ནོར་འཁྲུལ་ཇི་འདྲ་ཞིག་བྱུང་ན་ཡང་། དགྲ་མི་དགའ་ཞིང་གཉེན་མི་སྡུག་པའི་ཆེད་དུ་ནོར་འཁྲུལ་དེ་མ་གླེང་ཟེར་གྱི་ཡོད་པ་རེད། སྐབས་འདིར་དམངས་གཙོ་ཡི་ཁྱད་ནོར་གཉིས་ཏེ། སྨྲ་བརྗོད་ཀྱི་རང་དབང་དང་། ཕྱི་གསལ་ནང་གསལ་ཟེར་བ་དེ་གཉིས་ཀ་རྩིས་མེད་དུ་གཏོང་གི་ཡོད། ང་ཚོས་ཕྱོགས་གཅིག་ནས་༧གོང་ས་སྐྱབས་མགོན་ཆེན་པོ་མཆོག་ནས་ང་ཚོའི་སྤྱི་ཚོགས་ལ་དམངས་གཙོ་གསོལ་རས་གནང་སོང་ཟེར་ནས་སྤོབས་པའི་ངང་ནས་བརྗོད་བཞིན་ཡོད་ལ། ཡང་ཕྱོགས་གཞན་ཞིག་ནས་དགྲ་དགའ་གཉེན་སྡུག་ཟེར་ནས་དམངས་གཙོ་ཁྱད་ནོར་ལ་གཡོ་ཟོལ་བྱེད་ཀྱི་ཡོད།
ད་རེས་ཡང་སྐྱབས་བཅོལ་གཞུང་གི་ཕྱི་དྲིལ་བཀའ་བློན་གྱི་དགོངས་ཞུ་ལ་མི་ཁ་ཤས་ནས་དགྲ་དགའ་གཉེན་སྡུག་ཟེར་བའི་གཏམ་དཔེ་དེ་བཀོལ་ནས་ཁོང་མོའི་དམངས་གཙོའི་ཁེ་དབང་ལ་རྡོག་རྫིས་གཏོང་གི་ཡོད། བདེ་སྐྱིད་ཆོས་དབྱངས་ལགས་ཀྱི་དགོངས་ཞུས་ཀྱིས་དབང་ཆ་སྒེར་སྡེམ་གྱི་རྒྱ་ནག་དམར་གཞུང་དགའ་ཡང་སྲིད། ཡིན་ན་ཡང་གང་ཟག་སྒེར་པའི་མོས་མདུན་དང་སྨྲ་བརྗོད་རང་དབང་རྩ་ཆེན་དུ་བརྩི་བའི་གཞུང་དམངས་ཤིག་ཡིན་ཕྱིན་འདི་ལ་ཧང་སངས་དོན་ཅི་ཡང་མེད། རྒྱུ་མཚན་གང་ཞིག་བརྟེན་ནས་ང་བཀའ་བློན་ལ་བསྡད་ན་མི་འདོད་ཅེས་ནས་ཕྱི་ལ་ཐོན་པ་ཙམ་རེད། དེས་སྤྱི་ཚོགས་ལ་མགོ་སྐོར་བཏང་ཡོད་པ་མ་རེད། དེ་ནི་དམངས་གཙོའི་ཁེ་དབང་རེད། དེ་ལ་དགྲ་ཕྱོགས་དགའ་ན་ཡང་འདྲ། གཉེན་ཕྱོགས་སྡུག་ན་ཡང་འདྲ། དེ་ནི་དགྲ་དགའ་གཉེན་སྡུག་ཉི་ཚེ་བ་རེད།
དགྲ་དགའ་གཉེན་སྡུག་ངོ་མ་ནི་སྤྱི་ཚོགས་གང་ཞིག་གི་གནད་ཡོད་མི་སྣ་ཞིག་གིས་ཧམ་བཤད་དང་རྫུན་སྒྲིག་གིས་སྤྱི་ཚོགས་གང་ཞིག་ལ་མགོ་སྐོར་བཏང་ན་གཞི་ནས་ཡོང་གི་རེད། དེ་དུས་ང་ཚོའི་སྤྱི་ཚོགས་འདི་མགོ་སྐོར་བཏང་ཆོག་ཆོག་ཡོད་པ་ཞིག་ཏུ་མངོན་གྱི་ཡོད། སྤྱི་ཚོགས་དེའི་དྲང་བདེན་མཐོང་བའི་མིག་ཤེས་མི་གསལ་བ་མངོན་པ་དང་། སྤྱི་ཚོགས་དེ་ལ་བདེན་རྫུན་གྱི་དབྱེ་བ་འབྱེད་པའི་རྣམ་དཔྱོད་མེད་པ་དེ་མངོན་པ་རེད། ང་ཚོའི་སྤྱི་ཚོགས་འདིའི་སྤུས་ཀ་ཧ་ཅང་དམའ་བོ་ཞིག་ཏུ་མངོན་པ་ཡིན་སྟབས། དེ་དུས་དགྲ་དགའ་གཉེན་སྡུག་ངོ་མ་དེ་ཡོང་གི་རེད།
གལ་སྲིད་ད་རེས་ཀྱི་སྲིད་སྐྱོང་འོས་འདེམས་འདིའི་འབྲས་བུར་ཡང་སྐྱར་བློ་བཟང་སེང་གེ་ལགས་ལ་སྲིད་སྐྱོང་ཐོབ་པ་ཡིན་ན། འདི་ལྟ་བུའི་དགྲ་དགའ་གཉེན་སྡུག་ངོ་མ་དེ་འབྱུང་བའི་གོ་སྐབས་ཆེན་པོ་ཡོད། ཁོང་ནི་རང་ཉིད་ཀྱི་ཆེ་ངོམ་གཙོ་བོ་འཛིན་པ་ལས་བོ་སྐྱབས་བཅོལ་གཞུང་དམངས་ཀྱི་ཁེ་ཕན་གཙོ་བོར་བརྩི་མཁན་ཞིག་མིན་པ་གསལ་པོར་མངོན་ཡོད། རང་གི་ཆེ་ངོམ་གྱི་ཆེད་དུ་ཁོང་གིས་ཐ་ན་ཁོང་གི་བྱས་རྗེས་སུ་གཏན་ནས་འགྲོ་ཐབས་མེད་པའི་༧རྒྱལ་བ་རིན་པོ་ཆེའི་མཛད་རྗེས་ཀྱང་གཡོ་འཕྲོག་བྱེད་བཞིན་ཡོད།
དཔེར་ན་ཆོས་ཕྱོགས་ཀྱི་དགེ་བཤེས་མའི་ལམ་སྲོལ་གསར་བཏོད་བྱུང་བ་ལ་མཚོན་ན། ༧རྒྱལ་བ་རིན་པོ་ཆེ་ལྟ་བུ་ཞིག་གིས་མ་གཏོགས་རྩ་བ་ནས་གནང་ཐབས་མེད་པའི་ཆོས་ཕྱོགས་ཀྱི་མཛད་པ་གཙང་མ་ཞིག་རེད། དེ་ཡང་ཁོང་གི་བྱས་རྗེས་སུ་རྗོད་བཞིན་ཡོད། དེ་བཞིན་ད་ལྟ་ང་ཚོར་ཡོད་པའི་སྐྱབས་བཅོལ་བོད་ཀྱི་གཞུང་དམངས་རྨང་གཞི་་འདི་འདས་པའི་ལོ་ལྔ་བཅུ་ལྷག་གི་རིང་ལ་བཙན་བྱོལ་བོད་གཞུང་དམངས་གཉིས་ནས་འབད་བརྩོན་བྱས་ནས་གྲུབ་པ་ཡིན། དེ་ཡང་ཁོང་རང་གི་བྱས་རྗེས་ཡིན་ཟེར་གྱི་ཡོད།
ཉེ་ཆར་རྡ་རམ་ས་ལའི་གཞུང་ལམ་ཡར་རྒྱས་སུ་བཏང་བ་ནི་རྒྱ་གར་འབྲེལ་ཡོད་ལས་ཁུངས་ནས་༧གོང་ས་སྐྱབས་མགོན་རིན་པོ་ཆེ་ཡི་ཕེབས་སྐྱོད་བདེ་བོ་ཡོང་བ་གཙོ་བོར་དམིགས་ནས་བསྒྲུབས་པ་ཞིག་ཡིན། དེ་ཡང་ཁོང་རང་གི་བྱས་རྗེས་ཡིན་ཟེར་གྱི་ཡོད། དེ་མ་ཟད་ད་དུང་སྒྲུང་ཞིག་རྫུན་སྒྲིག་བྱས་ནས་མི་དམངས་མགོ་སྐོར་གཏོང་རྩིས་བྱས་ཡོད་། གལ་སྲིད་ད་རེས་བློ་བཟང་སེང་གེ་ལགས་ལ་ཡང་སྐྱར་ཐོབ་ན། ང་ཚོའི་སྤྱི་ཚོགས་འདི་དགྲ་གྲོགས་གཉིས་ཀྱི་མིག་ལམ་དུ་གཡོ་འཕྲུལ་གྱིས་མགོ་སྐོར་གཏོང་ཆོག་ཆོག་ཡོད་པ་དང་། བདེན་རྫུན་གྱི་དབྱེ་བ་འབྱེད་པའི་ནུས་པ་མེད་པའི་རྨོངས་རྟུལ་གྱི་སྤྱི་ཚོགས་ཤིག་ཏུ་མངོན་པ་རེད། འདི་ནི་དགྲ་དགའ་གཉེན་སྡུག་ངོ་མ་དེ་རེད།
སྤྱིར་བཏང་དམངས་གཙོའི་ཡན་ལག་ཚང་བའི་རྒྱལ་ཁབ་དང་སྤྱི་ཚོགས་ཤིག་ཡིན་ན། བློ་བཟང་སེང་གེ་ལགས་ནས་༧རྒྱལ་བ་རིན་པོ་ཆེ་དང་རྒྱ་གར་གཞུང་གི་སྐུ་དྲིན་ཡང་མངོན་སུམ་འཛེམ་མེད་ཀྱིས་ཧམ་འཕྲོག་བྱས་ནས་མི་དམངས་མགོ་སྐོར་གཏོང་ཐབས་བྱེད་པ་འདི་ལྟ་བུ་ནི་ཁྲིམས་ལ་གཏུགས་དགོས་པ་ཞིག་ཡིན། དེ་ལྟར་མ་བྱུང་ན་ཡང་། གནས་སྐབས་ཁོང་སྲིད་སྐྱོང་གི་འོས་འགྲན་ལ་ཞུགས་པ་མཚམས་བཞག་ནས། ༧རྒྱལ་བ་རིན་པོ་ཆེ་དང་རྒྱ་གར་གཞུང་ལ་ཁོང་ཚོའི་སྐུ་དྲིན་ཧམ་འཕྲོག་བྱས་པ་དང་། མི་དམངས་ལ་ཁོང་ཚོ་མགོ་སྐོར་གཏོང་ཐབས་བྱས་པ་བཅས་ལ་ཐུགས་བདེན་དགོངས་དག་ཞུ་དགོས་པ་མ་ཟད། མ་འོངས་པར་དེ་ལྟར་མི་བྱེད་པའི་དམ་བཅའ་ཕུལ་ནས་ཡང་སྐྱར་འོས་འགྲན་ལ་ཞུགས་དགོས་པ་ཡིན།
བློ་སེང་ལགས་ཀྱིས་དེ་ལྟར་བྱེད་པ་ཕར་ཞོག ཁོང་གིས་ད་དུང་རྫུན་རྐུབ་རྙིང་པ་རྡོལ་གྱིན་རྡོལ་གྱིན་རྫུན་གསར་པ་སྒྲིག་གིན་སྒྲིག་གིན་འགྲོ་གི་ཡོད། བློ་སེང་གིས་རྫུན་སྒྲིག་བྱེད་པ་ནི་རྫུན་སྒྲིག་ཙམ་མིན། དེའི་ཕུགས་ན་མི་དམངས་ལ་མཐོང་ཆུང་ཡོད། མི་དམངས་ཀྱི་ཤེས་ཚད་ལ་མཐོང་འཇོག་ཧ་ཅང་དམའ་བའི་རྟགས་ཤིག་ཡོད། ཁོང་གིས་རང་གི་འདོད་མོས་ལྟར་མི་དམངས་ལ་མགོ་སྐོར་བཏང་ཆོག་ཡོད་བསམ་གྱི་ཡོད། དེ་མིན་ན་༧དགེ་བཤེས་མའི་ལམ་སྲོལ་དེ་ཁོང་རང་གི་སྟེང་ལ་ཇི་ལྟར་སྦྱོར་རམ། རྡ་རམ་ས་ལའི་གཞུང་ལམ་གྱི་རྫུན་སྒྲུང་དེ་ཇི་ལྟར་བསྒྲིགས་སམ།
ང་ཚོས་སྲིད་སྐྱོང་འདེམས་བསྐོ་བྱེད་པ་ནི་སྲིད་སྐྱོང་འདེམས་བསྐོ་བྱེད་པ་གཅིག་པོ་མིན། ང་ཚོས་གོ་སྐབས་འདི་བཟུང་ནས་ང་ཚོ་ནི་མགོ་སྐོར་བཏང་ཆོག་ཆོག་མིན་པའི་སྤྱི་ཚོགས་ཤིག་ཡིན་པ་རང་གཞན་གཉིས་ཀར་སྟོན་དགོས། དེ་ལས་གལ་ཆེ་བ་ཞིག་ནི་ང་ཚོས་༧གོང་ས་མཆོག་ལ་ཐུགས་བདེ་གསོལ་བའི་གོ་སྐབས་རྩ་ཆེན་ཞིག་ཡིན། ༧གོང་ས་མཆོག་ནས་ལོ་ངོ་ལྔ་བཅུ་ལྷག་གི་རིང་ལ་བཙན་བྱོལ་གཞུང་དམངས་འདི་གཉོར་སྐྱོང་གནང་ནས་ཡོང་། ང་ཚོ་ལ་སེམས་གསོ་གནང་ནས་ཡོང་། ང་ཚོའི་ཆེད་དུ་ཐུགས་ཁྲལ་གནང་ནས་ཡོང་། ད་དགུང་ལོ་བརྒྱད་ཅུར་ཕེབས་ཡོད། དུས་ཚོད་འདི་ནི་ང་ཚོས་༧གོང་ས་མཆོག་གི་ཐུགས་ཁྲལ་ཇེ་ཡང་དུ་གཏོང་བའི་དུས་ཡིན། ང་ཚོས་ཕར་༧གོང་ས་མཆོག་ལ་ཐུགས་གསོ་གནང་བའི་དུས་ཡིན། ཐུགས་གསོ་བྱེད་པའི་ཐབས་ལམ་མཆོག་ཏུ་གྱུར་བ་ཞིག་ནི་བཙན་བྱོལ་གཞུང་དམངས་འདི་གཡོ་འཕྲུལ་དང་ཧམ་རྫུན་གྱིས་མགོ་སྐོར་གཏོང་ཆོག་ཆོག་ཅིག་མིན་ཅིང་། རྣམ་དཔྱོད་དང་ལྡན་པའི་སྒོ་ནས་རང་གི་འགོ་ཁྲིད་འདེམས་ཐུབ་པའི་ནུས་པ་སྟོན་རྒྱུ་དེ་ཡིན།
ང་ཚོས་འདི་ལྟར་འགོ་ཁྲིད་ཅིག་འདེམས་ཐུབ་པའི་ཉིན་མོ་དེ་ནི་གཞིས་ལུས་མི་དམངས་ལ་སེམས་གསོ་ཆེན་པོ་ཞིག་དང་། རྒྱ་གར་གཞུང་དམངས་ཀྱིས་གཙོས་པའི་བོད་ཀྱི་རྩ་དོན་ལ་སྐུ་དྲིན་ཅན་གྱི་བོད་དོན་རྒྱབ་སྐྱོར་ཚོགས་པ་ལ་དྲིན་གཟོ་ཆེན་པོ་ཞིག ༧གོང་ས་མཆོག་ལ་རྒྱལ་བ་དགྱེས་པའི་མཆོད་སྤྲིན་བླ་ན་མེད་པ་ཞིག་ཕུལ་བའི་ཉིན་མོ་དང་། དགྲ་དགའ་གཉེན་སྡུག་དེ་དགྲ་སྡུག་གཉེན་དགར་གྱུར་བའི་ཉིན་མོ་ཡིན།
རེད་ད། མི་མཚན་ཉིད་ཚང་བ་ཞིག་གི་སྐད་ཆ་རེད། ཧ་གོ་འདུག། རྒྱབ་སྐྱོར་ཡོད་ད།
སྐད་ཆ་གཅིག་བཤད་འདོད་ཡོད་པ་ནི། ལོ་བཞི་དང་ཕྱེད་ཀའི་རིང་སྐྱོན་བརྗོད་ཀྱི་སྐད་ཆ་ཚིག་གཅིག་མེད་པར་ད་རེས་འོས་བསྡུ་འགྲོ་བཞིན་པའི་སྐབས་འདིར་ལས་གནས་ནས་དགོངས་ཞུ་ཕུལ་སྟངས་དེ་ཆབ་སྲིད་བཙོག་པའི་ཁྲབ་སྟོན་མིན་ན་ག་ར་རེད་དམ།། དེས་ང་ཚོའི་སྤྱི་དོན་ལ་གནོད་འགལ་མ་གཏོགས་ལེགས་སྐྱེས་གང་ཡང་ཕུལ་མེད།།
རབ་འབྱོར་ལགས་ཀྱིས་ང་ཚོས་ངེས་པར་དུ་མཐོང་དགོས་ངེས་ཀྱི་གནད་འགག་དེ་གླེང་འདུག ཐུགས་རྗེ་ཆེ།
ཀླུ་གན་རྐྱལ་དགོན་པའི་གྲྭ་ལོག་རབ་འབྱོར་གྱིས་དེང་སང་སྐད་འཕྲིན་ཚོགས་པ་བཙུགས་ཡ་དང་ཚག་པར་སོགས་ལ་འབྲི་བ་སོགས་གང་ཐད་ནས་ཚོགས་གཙོ་སྤེན་པ་ཚེ་རིང་མཆོག་ལ་རྒྱབ་སྐྱོར་བྱེད་ཀྱི་ཡོད་མདོག་གིས། སྲིད་སྐྱོང་བློ་སེང་ལགས་ལ་ཚད་ལས་འདས་པའི་རྨ་འབེབས་དང་སྐྱོན་བརྗོད་བྱེད་ཀྱི་འདུག་པས་ཚང་མས་གཟབ་གཟབ་གནང་རོགས།
རྒན་རབ་འབྱོར་ལགས་ཀྱིས་གནད་ལ་འཁེལ་བ་ཞིག་བྲིས་འདུག བཀའ་དྲིན་ཆེ།
རབ་འབྱོར་ཟེར་བ་འདིས་བློ་སེང་གིས་གསལ་བཤད་བཟོ་ཚར་པའི་སྐད་ཆ་རྙིང་པ་རྐྱང་རྐྱང་བཤད་འདུག
རཔ་འབྱོར་ཕོ་རྒོད་ངོ་མ་རེད་
བློ་བཟང་སེང་གེས་རྫུན་དང་ཧམ་པ་ཁོ་ན་བཤད་ནས་རང་ཉིད་བརླག་སོང་། ཐ་ན་ཁང་པ་ཉོས་པའི་རིམ་དངུལ་ཡོང་ཁུངས་ཀྱི་གླེང་རྙོག་ལ་ཁྲིམས་ཐོག་ནས་རྗེས་འདེད་ཙམ་གྱི་སྤོབས་པའང་མེད་སོང་བ་དེས་མང་ཚོགས་ཀྱི་མིག་མདུན་ནས་ཚོས་གཞི་ལོག་སོང་།
ལོ་ལྔ་ལ་ཉེ་བའི་རིང་ལས་ཀ་འདི་བྱས་དང་གྲུབ་འབྲས་འདི་ཐོན་མེད་པ་ཆགས་ནས། ད་ནི་ག་ཚད་ཀྱིས་གཏམ་བཤད་བྱས་པ་དེ་ཚོད་ཀྱིས་གྲུབ འབྲས་དེ་ཚོས་རང་ཚུགས་མི་ཐུབ་པ་ཆགས་ནས། རང་ཉིད་ལ་ཡིད་ཆེས་དང་གདེང་ཚོད་ཙམ་ཡང་མེད་པ་ཆགས་ཚར་འདུག
སྤེན་པ་ཚེ་རིང་གིས་མི་འགྱངས་པར་རྫུན་ཕུང་རྩད་ནས་གཅོད་པའི་གཏམ་བཤད་སྐད་གྲགས་ཅན་ཞིག་གནང་རྒྱུ་རེད་ཅེས་ད་ཆ་འོས་བསྡུའི་ལས་རིམ་ནང་ལ་ཚ་ཚ་འུར་འུར་རེད། དེ་ཡང་བློ་བཟང་སེང་གེ་ལ་མཚོན་ན། ཟློག་ཐབས་མེད་པའི་ས་ཡོམ་ཅིག་ཆགས་རྒྱུ་རེད།
བློ་སེང་ནི་སྟོང་བཤད་གཅིག་བདེན་རེད། བགྲོ་གླེང་སྐབས་སུ་ནང་དོན་ཅན་ཅི་ཡང་བཤད་རྒྱུ་མེད་གི སྤེན་ཚེ་ཡིས་ཤེས་བ་ཚང་མ་གཅིག་གཅིག་གཉིས་གཉིས་ཀྱིས་བཤད་ཐུབ་གི གང་ལྟར་ཁོང་གཉིས་ལ་བརྩི་མཐོང་ཡོད། གལ་ཏེ་བློ་སེང་ལ་ཡང་བསྐྱར་འོས་ཐོབ་པ་ཡིན་ན། རྗེས་ཕྱོགས་རང་ཉིད་ལས་བོད་དོན་གཙོ་བོར་འཛིན་རྒྱུ་ནི་གལ། རབ་འབྱོར་གྱིས་གསུངས་བ་ལ་རྗེས་སུ་ཡི་རངས་ཡོད་དོ།
དགྲ་དགའ་གནས་སྡུག་གི་གོ་དོན་ལ་ཡང་ལོག་འགྲེལ་རྒྱབ་ཀྱི་འདུག། དགྲ་དགའ་གནས་སྡུག་གི་ལས་ནི་གནས་ལ་ཕན་རྒྱུ་མེད་ཁར་དགྲ་ལ་མཐུན་རྐྱེན་སྐྲུན་པའམ་དགྲ་ཡིས་སྐྱོན་འཛུགས་ལ་མཐུན་འགྱུར་དང་གནས་ཀྱི་ནུས་སྟོབས་ཉམས་རྐྱེན་དང་དགྲ་ལ་ཁ་གཏོད་ཀྱི་ནུས་པ་བཅས་ལ་དགྲ་བོས་ཤེས་སུ་བཅུག་པ་དེ་དག་ལ་ཟེར་ནི་རེད། བདེ་ཆོས་ཀྱིས་དང་སྤེན་ཚེ་ཅན་གྱིས་གོང་ཞུ་དེ་དག་ཨ་ན་མ་ན་བྱས་པ་རེད། དེས་ན་དགྲ་དགའ་གནས་སྡུག་ཞེས་པའི་སྐད་ཆ་དེ་ཚོ་ཡོང་བ་རེད། བློ་སེང་གི་རྫུན་གཏམ་བཤད་ནས་བཙན་བྱོལ་བོད་པ་ལ་གནོད་རྐྱེན་སོང་བའི་སྡུར་ཙམ་ཡོད་ནི་མ་རེད། ཚིག་འགོ་མཐོར་དམན་གྱི་སྐད་ཆ་རེ་འགའ་བྱུང་ཡོད་ན་ཡང་ཆོག། དེས་མི་སྐྱོན། སྤེན་པ་ཚེ་རིང་གིས་གོང་ས་མཆོག་དང་མདོ་སྟོད་མི་དམངས་དབར་ན་འགལ་ཟླ་བཟོ་ཡོང་གི་འདུག། གོང་ས་མཆོག་གིས་ཡོངས་གྲགས་ཀྱི་གསུངས་ལ་ཡང་ལོག་འགྲེལ་གྱིས་ཆོལ་ཁའི་འགལ་ཟླ་བཟོ་ཡོང་གི་འདུག། སྔ་ཕྱིར་མི་མཐུན་པའི་ནང་འགལ་གྱི་ཕུང་པོ་སྤུང་ཡོང་གི་འདུག། ཁོ་རང་སྲིད་སྐྱོང་མི་ཐོབ་པ་ཤེས་ནས་ཡ་མེད་ཀྱིས་ལོག་བཤད་དང་སྐྱོན་འཛུགས་བྱེད་ཡོང་གི་འདུག། ཁོ་རང་སྲིད་སྐྱོང་མི་ཐོབ་པ་ཤེས་ནས་ངོ་ཚ་མེད་པའི་བྱ་སྤྱོད་སྤེལ་ཡོང་གི་འདུག། དེ་ཚོ་ནི་བཙན་བྱོལ་བ་རྣམས་གཏོར་རྐྱེན་བཟོ་རྒྱུའི་ཆ་རྐྱེན་བླ་ན་མེད་པ་དག་རེད། ཁོ་པ་ལ་མ་འོངས་བོད་ཀྱི་ཆབ་སྲིད་དང་དཔལ་འབྱོར། ཤེས་ཡོན་དང་སྤྱི་ཚོགས་བདེ་དོན་སོགས་ལ་ཁ་ཕྱོགས་དང་ལམ་ཕྱོགས་གསར་པ་གང་ཡང་གླེང་རྒྱུ་དང་བཤད་རྒྱུ་མི་འདུག། རྒྱ་བོད་ཞི་འགྲིག་སྐོར་གོང་ས་མཆོག་དང་བཀའ་སློབ་དགོངས་སྐོར་ཞུ་རྒྱུ་ཡིན་ཟེར་བ་དེ་རེད། ཧཧཧཧ། ༧༩ ལོ་ནས་ད་ལྟའི་བར་དུ་ལམ་ཁ་དེར་གནས་ཡོད་པ་ཤེས་པ་གྱིས། རྒྱ་བོད་འབྲེལ་མཐུད་པ་དམིགས་འཛུག་དགོས་གལ་ཆེ་ཚུལ་དེ་གཅིག་རེད། ཧཧཧཧཧ། བུ་ནམ་སྐྱེ་མི་ཤེས་མིང་ཟླ་བ་གྲགས་པ། ཟེར་བའི་དཔེར་ལྟར་མ་རེད་དམ། རྒྱ་ནག་ཚང་གིས་ངེད་བཙན་བྱོལ་ཚང་ལ་སྔོན་འགྲོའི་ཆ་རྐྱེན་འགའ་སྔ་རྗེས་རིམ་པའི་བཙན་བྱོལ་ཚང་གི་ལྕོག་རྩེ་སྟེང་བཞག་ཡོད། དེ་དག་ལ་མོས་མཐུན་ནམ་བྱུང་ན་རྒྱ་ནག་དང་བཙན་བྱོལ་བ་དབར་གྲོས་མོལ་བྱེད་རྒྱུ་ལས་གཞན་བཤད་རྒྱུ་གླེང་རྒྱུ་གང་ཡང་མེད། ཟེར་ནས་མཐའ་སྡོམ་དེར་འགྱུར་བ་མེད་པར་གནས་བསྡོད་ཡོད་པས་རྒྱ་ནག་གིས་བཤད་པའི་ཆ་རྐྱེན་རྣམས་ངེས་ལེན་ཡོད་པའི་ཐོག་ནས་རྒྱ་བོད་འབྲེལ་མཐུད་པ་འཛུག་རྒྱུ་ཡིན་ནམ་དེ་དག་ངེས་ལེན་མེད་པའི་ཐོག་ནས་འབྲེལ་མཐུད་པ་འཛུག་རྒྱུ་ཡིན། ལར་ནི་རྒྱ་ནག་གིས་འགུལ་ཅོག་དང་གསལ་ཁ་ཟུར་ཙམ་མེད་པའི་གནས་སྐབས་དེར་འབྲེལ་མཐུད་པ་འཛུག་གི་ཡིན་ཟེར། འོ་ན་འབྲེལ་མཐུད་པ་དེ་དག་གིས་ཕ་ཕྱོགས་སུ་འབྲེལ་བ་བྱེད་སའི་ལས་གནས་དང་མི་སྣ། གནས་བབ་དང་རྒྱུད་རིམ། ལོ་ཟླ་དང་ཚེས་གྲངས། ས་གནས་དང་འཁོ་ཡུག། ཅི་ཞིག་གི་ཐོག་ཏུ་འབྲེལ་མཐུད་བྱེད་རྒྱུ་ཡིན་ནམ། ད་ལྟའི་ཆར་རྒྱ་བོད་ཞི་མོལ་གྱི་ལྷན་འཚོག་ནི་རི་བུའི་རྭ་དང་མོ་ཤམ་གྱི་བུ་བཞིན་རེད། དེས་ན་འབྲེལ་མཐུད་པའི་ལས་དོན་ཡང་ནམ་མཁའི་མེ་ཏོག་རེད་དོ། མིང་ཙམ་ཡོད་པས་ཕན་ནི་མ་རེད། ལས་དོན་ཐོག་ལ་གོམ་པ་རྒྱབ་ཐུབ་ཡ་ལ་ལྟ་དགོས། བཙན་བྱོལ་སྒྲིག་འཛུག་ནང་དུ་ཕྱིར་དྲིལ་དང་ནང་སྲིད་སོགས་བཀའ་ཤག་གི་སྡེ་ཚན་དང་ལྷག་པར་དུ་རྒྱ་ཡིག་གི་སྡེ་ཚན་བཅས་དམིགས་གསལ་གྱི་ཆེད་འཛུགས་བྱས་པ་དེ་དག་གིས་རྒྱ་བོད་དབར་གྱི་དཀའ་རྙོག་དང་རྒྱ་བོད་འབྲེལ་བ་སྐོར་དམིགས་གསལ་ཕྱག་ལས་གནང་ཐུབ་ཀྱི་མེད་ན་དེ་དག་ཆེད་འཛུགས་ཀྱི་དགོས་དམིགས་སྟོང་སོང་བ་རེད།