རུམ་བཏེག་བཤད་གྲྭའི་ལོ་རྒྱུས།

སྐྱོ་བྲག་དགའ་དབང་།
 
དཔལ་རྒྱལ་དབང་ཀརྨ་པ་རང་བྱུང་རིག་པའི་རྡོ་རྗེའི་ཕྲིན་ལས་ཀྱི་ཆ་ཤས། སྦས་ཡུལ་འབྲས་མོ་ལྗོངས་ཀྱི་དབུས་འགྱུར་འཆང་། རུམ་བཏེག་བཤད་སྒྲུབ་ཆོས་འཁོར་གླིང་གི་མཐོ་རིམ་བཤད་གྲྭ་ཆེན་མོ། ཀརྨ་ཤྲཱི་ནཱ་ལནྡཱ་དབུ་བརྙེས་ནས་ལོ་འཁོར་ཉེར་ལྔ་ཟིན་པའི་དུས་དྲན་དང་སྟབས་བསྟུན་ཏེ། གནའ་དིང་གི་ཤེས་བྱ་རིག་པའི་གནས་ཀུན་ལ་བློ་གྲོས་ཀྱི་འཇུག་པ་མྱུར་བས་གང་ལའང་མི་འཇིགས་པའི་སྤོབས་པ་ཐོབ་པའི་ན་གཞོན་རྩོམ་པ་པོ་རྩིས་ཆེ་ལེགས་མཐོང་གིས། ཀརྨ་ཤྲཱི་ནཱ་ལནྡཱ་ཆེས་མཐོའི་གཙུག་ལག་སློབ་གཉེར་ཁང་གི་ལོ་རྒྱུས་མཐའ་མའི་དགོངས་བཞེད། ཅེས་པ་ཞིག་གསར་རྩོམ་གནང་སྟེ་དབྱིན་ཡིག་ཏུའང་བསྒྱུར་གདའ།

ལོ་རྒྱུས་འདིའི་ཁྱད་ཆོས་སུ་མཐོང་སྟེ་ཁོ་བོས་ངོ་སྤྲོད་དུ་བྲིས་པ་ནི་འདི་དག་ཡིན།

༡ བརྗོད་བྱའི་ཆ་ནས། བོད་ཀྱི་དུས་འགྱུར་དང་། རྒྱལ་དབང་ཀརྨ་པ་ཡབ་སྲས་བརྒྱུད་པ་དང་བཅས་པའི་མཛད་ཕྲིན་ཕལ་མོ་ཆེ་ལ་འབྲེལ་བ་གཏིང་ཟབ་ཡོད་པས་ཀུན་གྱི་ཤེས་བྱ་གལ་ཆེན་དང་།

༢ ཀུན་སློང་གི་ཆ་ནས། ལོ་རྒྱུས་རིག་པའི་བརྟགས་ཐབས་ཀྱིས། དངོས་ཀྱི་བྱུང་བ་གང་ཡིན་དྲང་བརྗོད་བྱས་པ་ལས། ཕྱོགས་ཞེན་གྱི་དབང་དུ་མ་སོང་བ།

༣ ཁུངས་ལུང་གི་ཆ་ནས། ལོ་རྒྱུས་དངོས་དང་འབྲེལ་བ་ཡོད་པའི་ཡིག་ཆ་དང་། གང་ཟག་དག་ལ་གཏུག་བཤེར་གྱིས་གཏན་ལ་ཕབ་པ་ལས། རང་གི་ཚོད་དཔག་ཙམ་དུ་མ་བཞག་པ།

༤ འབྲི་ཐབས་ཀྱི་ཆ་ནས། གནའ་དེང་ཟུང་འབྲེལ་དུ་བྱས་པས། དགོས་ངེས་འབུར་དུ་ཐོན་ཅིང་། སྤོམ་བཤད་དང་། ཉོག་བཤད་ཀྱི་སྐྱོན་གྱིས་མ་རེག་པ།

༥ དགོས་ཕན་གྱི་ཆ་ནས། བོད་ཀྱི་དུས་འགྱུར་དང་འབྲེལ་བའི་སྤྱི་སྒེར་གང་མང་ཞིག་གི་གནས་ཚུལ་གསལ་རྟོགས་ཡོང་བ་དང་། རྗེས་ཀྱི་ལོ་རྒྱུས་སྨྲ་བ་རྣམས་ལའང་གནའ་དེང་ཟུང་འབྲེལ་གྱི་རིགས་པའི་བརྟགས་ཐབས་གསར་པ་ཞིག་གི་ལམ་སྟོན་ཐོབ་ངེས་སུ་འདུག་པས། བོད་ཀྱི་ལོ་རྒྱུས་རིག་པའི་འགྱུར་མཚམས་ཤིག་ཏུ་ངོས་འཛིན་བྱས་ནའང་ཆོག་གི་རེད།
དེ་ལྟར་ན། ལོ་རྒྱུས་འདི་ནི། ཤེས་རབ་ཀྱི་རྩལ་ལས་བྱུང་བའི་ལག་རྗེས་ཤིག་དང། འདས་སོང་གི་གནས་ཚུལ་མཐོང་བའི་རྒྱང་ཤེལ་ཞིག་དང། གཞན་ལ་རིགས་ལམ་གསར་པ་སྤྲོད་པའི་སློབ་དཔོན་ཞིག་ཏུ་མཐོང་བྱུང་བས་ན། ངོས་རང་ཧ་ཅང་གི་དགའ་བོ་བྱུང་།

ལོ་རྒྱུས་ཀྱི་ཡིག་ཆ་གསར་པ་འདིས་དངོས་བྱུང་གི་གནས་ཚུལ་མང་པོ་ཞིག་གསར་རྟོགས་ཡོང་བས་ན། མཐོང་རྒྱ་ཡངས་པའི་གང་ཟག་གཟུར་གནས་ཤིག་ཡིན་ནས་བཟུང་། སེམས་ལ་དགའ་བ་མི་སྐྱེད་པ་མི་སྲིད་པ་ལྟ་བུ་ཡིན་ནའང་། རང་ཉིད་མ་གཏོགས་གཞན་ཡོད་ན་མི་ཆོག་པ་དང་། རང་ཉིད་མ་གཏོགས་གཞན་གླེང་ན་མི་འགྲིག་པ་དང་། རང་ཉིད་གཅིག་པུ་ཀུན་གྱི་བླ་རུ་བཀྱགས་དགོས་པར་རློམ་པའི་རང་མཐོང་ཆེ་བ་འགའ་ཞིག་གི་གློ་བར་འཇེན་པ་དཀའ་མོད་དེ། དེ་ནི་རྩོམ་པ་པོའི་གཟུར་གནས་ཀྱི་བློ་གྲོས་ཉི་མ་རང་རློམ་འབྱུང་བྱའི་མིག་ལ་མ་འཕྲོད་པ་ཙམ་དུ་ཟད་དོ། །