ཨ་ནུ་ཐང་བསོད་ནམས།
སྔོན་ལོར་ཡོ་རོབ་ཁུལ་དུ་གསེ་རི་ཡའི་སྐྱབས་བཅོལ་བ་ས་ཡ་བརྒལ་བ་བསླེབས་པས་ཡོ་རོབ་མནའ་འབྲེལ་རྒྱུན་མཐུད་དུ་གནས་རྒྱུར་དཀའ་ངལ་འཕྲད་ཡོད་ལ། ཡོ་རོབ་ཀྱི་རྒྱལ་ཁབ་ཁག་ཅིག་གིས་ད་ལོ་སྐྱབས་བཅོལ་བ་འགོག་ཆེད་དུ་རྒི་རིས་སི་དང་མ་གསའ་སྒྲོ་ནེའུ་ཡའི་ས་མཚམས་སུ་རྭ་བ་བཟོས་ཤིང་དམག་མི་བཏང་ནས་བཀག་ཡོད་པས། འགྲོ་བ་མིའི་ཐོབ་ཐང་ལྟ་རྟོག་ཚོགས་པ་ཁག་ཅིག་གིས་སྐྱོན་བརྗོད་ཤུགས་ཆེན་བྱས་ཡོད།
ཡོ་རོབ་མནའ་འབྲེལ་གྱིས་སྐྱབས་བཅོལ་བ་མང་པོ་ཡོ་རོབ་ཏུ་མི་ཡོང་ཆེད་དུ་ཏུར་ཁ་དང་མཉམ་ལས་བྱས་ཤིང་། ཏུར་ཁས་གསེ་རི་ཡའི་སྐྱབས་བཅོལ་བ་ཚོ་ཕྱིར་རང་ཡུལ་དུ་མི་སློག་པར་གནས་དེ་རུ་སྐྱབས་བཅོལ་སྤྲད་རྒྱུ་དང་། ཡོ་མནས་དེ་ལ་དཔལ་འབྱོར་གྱི་རོགས་སྐྱོར་བྱེད་རྒྱུའི་མོས་མཐུན་བྱས་ཤིང་། འབྱུང་འགྱུར་གྱི་ལོ་གསུམ་གྱི་རིང་ལ་ཡོ་སྒོར་ཐེར་འབུམ་དྲུག་རེ་སྤྲད་རྒྱུ་ཁས་ལེན་བྱས་ཁར། ཐེར་འབུམ་གསུམ་ཐེངས་གཉིས་ལ་སྔ་ལོའི་ཟླ་བཅུ་གཅིག་ནང་སྤྲད་ཟིན་ཡོད། འོན་ཀྱང་། ཏུར་ཁ་ཡིས་དེ་ཡིས་མི་འདང་བས་མང་དུ་དགོས་ཚུལ་དང་། ལྷག་པར་དུ་ཏུར་ཁའི་མི་སེར་ཡོ་རོབ་ཁུལ་དུ་མཐོང་ཆེན་ Visa མི་དགོས་པར་བསྐྱོད་ཆོག་རྒྱུའི་ཆ་རྐྱེན་བཏོན་ཡོད།
ཏུར་ཁའི་ནང་དུ་གསེ་རི་ཡའི་སྐྱབས་བཅོལ་བ་ས་ཡ་གཉིས་དང་འབུམ་བདུན་ལྷག་ཡོད་ཅིང་དེ་དག་གི་ལོ་རེའི་འགྲོ་སོང་ནི་ཡོ་སྒོར་ཐེར་འབུམ་ ༡༠ ཙམ་ཡིན་ཚུལ་ཏུར་ཁས་བརྗོད་འདུག ཉེ་ཆར་ཏུར་ཁའི་སྐྱབས་བཅོལ་བའི་སྡོད་གནས་སུ་ཡོ་རོབ་མནའ་འབྲེལ་གྱི་དཔོན་རིགས་དང་། འཇར་མན་གྱི་སྲིད་བློན་མར་ཁོ་དེ་རུ་ལྟ་སྐོར་དུ་ཕྱིན་ཞིང་། མོ་སྲུང་སྐྱོབ་ཀྱི་ཆེད་དུ་མོའི་སྐུ་སྲུང་བ་མོ་བསྡད་སའི་རླངས་འཁོར་གྱི་སྟེང་དུའང་ལངས་ནས་སྲུང་སྐྱོབ་དམ་པོ་བྱས་ཡོད།
སྐྱབས་བཅོལ་བ་རྣམས་ཏུར་ཁས་ཁེ་ཕན་ལེན་བྱེད་ཀྱི་མཚོན་ཆར་སྒྱུར་བཞིན་ཡོད།
ཡོ་རོབ་ཁུལ་དུ་སྐྱབས་བཅོལ་བའི་གྲངས་འབོར་ཉུང་དུ་གཏོང་ཆེད་དུ་རྒི་རིས་སི་ལ་འབྱོར་མཁན་གྱི་སྐྱབས་བཅོལ་བ་རྣམས་ཕྱིར་ཏུར་ཁ་རུ་ཕྱིར་སློག་ཆོག་རྒྱུ་དང་། ཏུར་ཁས་དེ་ལ་སྐྱབས་བཅོལ་གྱི་ཐོབ་ཐང་སྤྲད་པའི་ཐོག་ནས་ཚུལ་མཐུན་ཡིན་ཚེ། གསེ་རི་ཡའི་མི་གཅིག་ཀྱང་ཕྱིར་རང་ཡུལ་དུ་ཕྱིར་སློག་མི་བྱེད་རྒྱུ་ཁས་ལེན་བྱས་འདུག འོན་ཀྱང་། ཆ་རྐྱེན་ནམ་སྐྱིན་ཚབ་ཏུ་ཡོ་སྣ་ཡིས་དེ་ལ་དཔལ་འབྱོར་གྱི་མཐུན་རྐྱེན་སྤྲད་རྒྱུ་སོགས་ཀྱི་ཆ་རྐྱེན་ ༧༢ ཅན་གྱི་གྲོས་ཆོད་འཇོག་རྒྱུར་ཡོ་ཏུར་གཉིས་ཀའི་ཕྱོགས་ནས་འབད་བརྩོན་བྱེད་བཞིན་ཡོད་པ་མ་ཟད། ཕྱེད་ཀ་ཙམ་ཞིག་ད་ནས་གཏན་འཁེལ་བྱས་ཟིན་འདུག འོན་ཀྱང་། ཏུར་ཁའི་མི་སེར་ཡོ་རོབ་ཁུལ་དུ་རང་དབང་གིས་བསྐྱོད་ཆོག་རྒྱུར་ད་དུང་ཡང་ཡོ་སྣས་མོས་མཐུན་བྱས་མེད།
ཏུར་ཁ་ཡོ་རོབ་མནའ་འབྲེལ་གྱི་ནང་དུ་འཛུལ་རྒྱུ་ནི་ཏུར་ཁས་འབད་བརྩོན་བྱས་པའི་ལོ་མང་གི་དམིགས་ཡུལ་ཧ་ཅང་གི་གལ་ཆེན་ཞིག་ཡིན་ཡང་། ད་ལྟའི་བར་དུ་མངོན་འགྱུར་བྱེད་ཐུབ་མེད་པར་ལྷག་ཡོད། འོན་ཀྱང་། གསེ་རིས་ཡའི་སྐྱབས་བཅོལ་བའི་གནད་དོན་ནི་འདོད་ཐོག་ཏུ་རྟ་རྒྱུགས་པ་ལྟར་ཏུར་ཁས་རྐྱེན་ངན་དེ་གྲོགས་སུ་བསྒྱུར་ནས་ཡོ་རོབ་ལས་དཔལ་འབྱོར་དང་། ཆབ་སྲིད་ཀྱི་ཁེ་ཕན་རེག་ཐབས་ལ་བརྩོན་བཞིན་ཡོད་ལ། གཅིག་བྱས་ན་ཐོབ་སྲིད་དེ། ད་ལྟ་ནས་བཟུང་དཔལ་འབྱོར་གྱི་ཁེ་ཕན་མང་པོ་ཞིག་རེག་ཟིན་ཁར། ཟླ་ ༥ ཚེས་ ༤ ཡི་ནང་དུ་ཆ་རྐྱེན་ཡོད་ཚད་ཀྱི་གཙོ་བོ་ཁག་ཡོ་རོབ་ཀྱིས་མ་བསྐངས་པ་ཡིན་ན། ཏུར་ཁས་སྐྱབས་བཅོལ་བ་ལེན་རྒྱུ་མཚམས་འཇོག་བྱེད་རྒྱུ་ཡིན་ཞེས་བསྒྲགས་འདུག
སྐྱབས་བཅོལ་བ་ལེན་མཚམས་བཞག་པ་ཡིན་ན་སྔར་ལྟར་ཡོ་རོབ་ཁུལ་དུ་ཉིན་རེ་སྐྱབས་བཅོལ་བ་སྟོང་ཕྲག་དུ་མ་སླེབས་པས། ཡོ་རོབ་ལ་མཚོན་ན་ཧ་ཅང་གི་ཉེན་ཁ་རུ་གྱུར་ཡོད། འོན་ཀྱང་། སྐྱབས་བཅོལ་དེ་དག་ནི་ཡོ་མནའ་དང་རྒྱལ་སྤྱིའི་རྒྱབ་སྐྱོར་མེད་ན་ཏུར་ཁ་ཁོ་ནས་སེལ་ཐབས་མེད་པས་ཏུར་ཁ་ལའང་ལེན་ཁག་མེད། འོན་ཀྱང་། ཏུར་ཁས་དེ་དག་མཚོན་ཆ་བཞིན་དུ་བེད་སྤྱོད་བཏང་ནས་དྲང་བདེན་མིན་པའི་ཁེ་ཕན་ཆེན་པོ་ཞིག་ལེན་ཐབས་བྱེད་བཞིན་ཡོད་པས། ད་ལྟ་གནད་དོན་དེ་ལ་ཡོ་མནའ་དང་ཏུར་ཁ་གཉིས་ཀྱིས་གཉིས་ཕན་གྱི་གྲོས་མོལ་བྱེད་མུས་རེད།
ཡོ་མནའི་སྲིད་འཛིན་ Donald Tusk ཡིས་ཏུར་ཁ་ནི་འཛམ་གླིང་གི་མིག་དཔེར་ལྟ་འོས་པའི་སྐྱབས་བཅོལ་བར་བདག་སྐྱོང་བྱེད་མཁན་ཞིག་རེད་ཅེས་ནས་བསྟོད་པ་ཕུལ་ཡོད་ཀྱང་། ཏུར་ཁའི་སྲིད་བློན་ Davutoglu ཡིས་ང་ཚོའི་རྒྱལ་ཁབ་ཀྱིས་ཡོ་རོབ་དང་མཉམ་དུ་བཞག་པའི་གྲོས་ཆོད་ཀྱིས་ཆ་ཤས་ཀུན་བསྐངས་ཟིན་པས། ད་ནི་ཏུར་ཁའི་མི་སེར་རྣམས་ཡོ་རོབ་ཁུལ་དུ་རང་དབང་གིས་བསྐྱོད་ཆོག་པའི་ཆོག་མཆན་གནང་རོགས་ཞེས་ནས་ནན་བརྗོད་བྱས་འདུག
སྔ་ལོ་ནས་བཟུང་སྟེ་ཏུར་ཁ་ནས་རྒུ་རིས་སིའི་རྒྱ་མཚོ་བརྒྱུད་ཅིང་གསེ་རི་ཡ་གཙོ་བོ་གྱུར་པའི་སྐྱབས་བཅོས་བ་ཉིས་སྟོང་ཙམ་ཉིན་རེར་ཡོ་རོབ་ཏུ་ཡོང་བཞིན་ཡོད་ཀྱང་། ད་ལོར་ཡོ་ཏུར་གཉིས་ཀྱི་གྲོས་ཆོད་རྗེས་ཀྱི་ཟླ་གསུམ་པའི་ནང་དུ་སྐྱབས་བཅོལ་བའི་ཡོང་ཚད་ཀྱི་གྲངས་འབོར་ ༨༠% ཙམ་མར་ཆགས་ཤིང་། ད་ནས་བརྩིས་བའི་ཉིན་ ༣༠ ནང་དུ་ཡོ་རོབ་ཏུ་སྐྱབས་བཅོལ་དུ་ཡོང་མཁན་ ༧ ༨༠༠ ལྷག་ལས་མ་ཟིན་པས་ཡོ་རོབ་ཀྱིས་ཏུར་ཁ་ལ་བསྟོད་མངགས་ཕུལ་ཡོད་ཀྱང་། དེ་ནི་ཚིག་གཅིག་བུ་ཡིས་མི་ཡོང་བ་འབྱུང་འགྱུར་ལོ་གསུམ་དང་བཞིའི་རིང་ལ་ཡོ་རོབ་ཀྱིས་ཡོ་སྒོར་ཐེར་འབུམ་དྲུག་ལས་མང་དུ་སྤྲད་ནས་ཏུར་ཁ་ལ་གུན་གསབ་སྤྲོད་དགོས་ཁར། ཏུར་མི་ཡོ་རོབ་ཏུ་ཡོང་བར་མཐོང་ཆེན་མི་དགོས་པ་བཟོ་དགོས་ཡོད་པས་ཡོ་རོབ་ཀྱི་འགན་འཁུར་ལས་སླ་བོ་ཞིག་ཆགས་མེད། ད་ལོར་ཏུར་ཁ་ནས་རྒི་རིས་སི་ལ་ཟླ་ ༤ ཚེས་ ༢༠ བར་དུ་སྐྱབས་བཅོལ་བ་ ༡༥༤ ༢༢༧ འབྱོར་ཡོད་ཅིང་དེ་དག་ལས་མི་ཉུང་བ་ཞིག་བྱིས་པ་དང་། མང་ཤོས་ཤིག་གཞོན་སྐྱེས་ཡིན་འདུག
གལ་སྲིད་ཏུར་ཁ་བ་ཡོ་རོབ་ཏུ་རང་དབང་གིས་ཡོང་དུ་བཅུག་ཚེ་ངན་ཕྱོགས་ནས་བལྟས་ན། གསེ་རི་ཡ་སོགས་ཁ་ཆེ་བ་མང་པོས་ཏུར་ཁའི་ལག་ཁྱེར་འཁུར་ནས་ཡོ་རོབ་ཏུ་མང་དུ་ཡོང་སྲིད་པ་མ་ཟད། ཏུར་ཁ་ནི་ཡོ་རོབ་དང་དཀྱིལ་ཤར་ཁ་ཆེ་གཉིས་ཀྱི་ཟམ་པ་རུ་སྔར་ལས་མང་དུ་ཆགས་ཤིང་། མ་འོངས་པར་ཏུར་ཁ་ནི་ཁ་ཆེའི་མི་རྒྱུ་གཉིས་ཀྱི་ཤུགས་རྐྱེན་ཡོ་རོབ་ཏུ་སྤེལ་སའི་སྒོ་ཆེན་དུ་འགྱུར་སྲིད་པས། ཡོ་རོབ་པ་མང་པོས་དེ་ལ་སེམས་ཁྲལ་བྱེད་ཀྱིན་ཡོད། འོན་ཀྱང་། ད་ལྟའི་ཁ་ཆེའི་སྐྱབས་བཅོལ་བ་ཡོ་རོབ་ཏུ་ཡོང་བ་འགོག་དགོས་ན་ཡོ་རོབ་ཀྱིས་ཏུར་ཁ་དང་མཉམ་ལས་མི་བྱེད་ཐབས་མེད་དུ་གྱུར་ཞིང་། མཉམ་ལས་ཁྲོད་དུ་ཏུར་ཁའི་དགོས་འདོད་མང་པོ་ཞིག་ཡོ་རོབ་ཀྱིས་མི་བསྐོང་གཏོལ་མེད་དུ་ཆགས་ཡོད།
ག་རེ་བྱས་ནས་ཡོ་རོབ་ཀྱིས་སྐྱབས་བཅོལ་བ་ངེས་པར་དུ་ལེན་དགོས་པ་ཡིན་ནམ།
ཡོ་རོབ་ཁུལ་དུ་གསེ་རི་ཡའི་སྐྱབས་བཅོལ་བ་འབུམ་ཕྲག་མང་པོ་སླེབས་བཞིན་ཡོད་ཅིང་སྔ་ལོ་གཅིག་བུ་རུ་ས་ཡ་གཅིག་ལས་བརྒལ་བ་སླེབས་ཡོད། དེ་དག་ལས་ ༩༠% ལྷག་འཇར་མན་གྱིས་བླངས་ཡོད། དེར་བརྟེན། ཡོ་རོབ་ཀྱིས་ཐབས་ཤེས་ཡོད་དགུ་རྩལ་སྤྲུགས་བཏོན་ཏེ་གསེ་རི་ཡ་དང་ཨེ་རག་ཁི། ཨ་རྒན་སོགས་ཀྱི་སྐྱབས་བཅོལ་བ་འགོག་བཞིན་ཡོད་ལ། དེ་འགོག་པ་ལ་དེ་དག་ཡོང་སའི་རྒི་རིས་སི་དང་ཏུར་ཁའི་བར་གྱི་མཚོ་འགྲམ་འགོག་དགོས་ཀྱང་། མཚོ་འགྲམ་རྒྱ་ཆེ་ཁར་རྒྱ་མཚོ་བརྒྱུད་ནས་ཡོང་མཁན་ཚོ་འཛིན་བཟུང་བྱས་སྐབས་དེ་དག་ཕྱིར་རང་ཡུལ་དུ་སློག་ཐབས་དཀའ་ཞིང་། དཀའ་དགོས་དོན་ཡང་སྐྱབས་བཅོལ་བ་དེ་དག་གི་ཡུལ་དུ་དམག་འཁྲུག་ཡོད་པས། ཚེ་སྲོག་གི་འཇིགས་པ་ཡོད་མཁན་ཚོས་ཡོད་ཚུལ་དང་། མེད་མཁན་ཚོས་སྐྱབས་བཅོལ་རེག་ཆེད་དུ་ཡོད་ཚུལ་གྱི་སྒྲུང་གཏམ་སྣ་ཚོགས་བསྒྲིགས་པས་ཡོ་རོབ་ཀྱིས་མི་ལེན་ཐབས་མེད་དུ་ཆགས་བཞིན་ཡོད།
མི་ལེན་ཐབས་མེད་དུ་ཆགས་དགོས་དོན་ཡང་ཡོ་རོབ་མནའ་འབྲེལ་ནི་མང་གཙོ་དང་དེང་རབས་ཀྱི་དཔལ་ཡོན་དར་སའི་བསྟི་གནས་དེ་ཡིན་པས་ཡིན་ཞིང་། བསྟི་གནས་དེའི་དཔལ་ཡོན་གྱི་རྩ་བ་འཛུགས་ས་ནི་བྱམས་པ་དང་བརྩེ་བ། བཟོད་སྲན་དང་གུ་ཡངས་ཀྱི་མི་ཆོས་ཀྱི་རིག་པའི་སྒང་ནས་བཙུགས་པས་རེད། དེར་བརྟེན། དམག་ཆེན་གཉིས་པའི་རྗེས་སུ་ཡོ་རོབ་ཀྱི་ཁྲིམས་སུ་དཔལ་འབྱོར་གྱི་སྐྱབས་བཅོལ་བ་མ་ཡིན་པའི་ཚེ་སྲོག་གི་ཉེན་ཁ་སླེབས་པའི་ཆབ་སྲིད་ཀྱི་སྐྱབས་བཅོལ་བ་སུ་ཞིག་ཡིན་ཡང་། མི་རིགས་དང་ཆོས་ལུགས་ཀྱི་དབྱེ་བ་མེད་པར་གནས་ཚང་སྤྲད་དགོས་རྒྱུའི་ཁྲིམས་བཟོས་ཡོད་པས། གསེ་རི་ཡ་གཙོ་བོ་གྱུར་པའི་དམག་འཁྲུག་གི་འཇིགས་པ་ཡོད་པའི་རྒྱལ་ཁབ་ཀུན་གྱི་མི་སེར་གནས་དེ་རུ་སླེབས་ཚེ་སྐྱབས་བཅོལ་བའི་ལག་ཁྱེར་སྤྲོད་བཞིན་ཡོད།
ཡོ་རོབ་གཙོ་བོར་གྱུར་པའི་ནུབ་ཕྱོགས་ཀྱི་མང་གཙོའི་ལུང་པ་དག་ཏུ་ཆབ་སྲིད་ཀྱི་སྐྱབས་བཅོལ་བ་ལེན་པའི་ཁྲིམས་ལུགས་ཡོད་པའི་རྒྱུ་མཚན་དུ་བྱས་ནས་བོད་པ་མང་པོ་ཞིག་ལའང་ནུབ་ཕྱོགས་ཀྱི་མི་སེར་གྱི་ཐོབ་ཐང་རེག་བཞིན་ཡོད་ལ། ཁ་ཆེ་དང་ཨ་ཧྥུ་རི་ཁ། ཝི་ཐི་ནམ་དང་རྒྱ་རིགས་མང་གཙོ་དོན་གཉེར་བ། ཧྥ་ལོན་གོ་སོགས་ལ་རེག་བཞིན་ཡོད། ལྷག་པར་དུ་ཉེ་བའི་དུས་རབས་ཕྱེད་ཀའི་རིང་ལ་དམག་འཁྲུག་དང་ནང་འཁྲུག་རྫོགས་མཐའ་མེད་པའི་ཁ་ཆེའི་རྒྱལ་ཁབ་ཁག་གི་མི་སྣ་ས་ཡ་མང་པོ་ནུབ་ཕྱོགས་སུ་སྐྱབས་བཅོལ་དུ་སླེབས་བཞིན་ཡོད་ལ། སྐྱབས་བཅོལ་སྤྲད་པའི་ཁྲིམས་ལུགས་དེས་ཁ་ཆེ་བ་རྣམས་ལ་བླ་མེད་ཀྱི་ཁེ་ཕན་རེག་ཡོད།
མ་གཞི་ཡོ་རོབ་པ་ནི་ཨེ་ཤ་ཡ་དང་མི་འདྲ་བ་ཁ་ཆེ་ལ་དེ་ཙམ་ཉམས་མྱོང་མེད་པས་དམག་ཆེན་གཉིས་པའི་མཇུག་མ་གཏོགས་ཁ་ཆེ་བ་རྣམས་ཡོ་ནུབ་དང་ཡོ་དཀྱིལ་གྱི་རྒྱལ་ཁབ་ཁག་ཏུ་ཁ་ཆེ་གནས་སྤོ་བྱེད་མཁན་ཧ་ཅང་གི་ཉུང་ལ། མེད་ཅེས་ན་ཆོག འོན་ཀྱང་། དམག་ཆེན་གཉིས་པའི་རྗེས་ཀྱི་ལོ་རབས་དྲུག་ཅུ་བ་ནས་གཙོ་བོ་མགོ་བཙུགས་ཏེ་ཡོ་ནུབ་ཁུལ་དུ་ཁ་ཆེ་གནས་སྤོ་བའི་གྲངས་འབོར་ཧ་ཅང་གི་འཕེལ་ཞིང་། ཧྥ་རན་སིའི་གྲོང་ཁྱེར་ཁག་ཅིག་དང་བྷ་རྗམ་གྱི་རྒྱལ་ས་རུ་ཁ་ཆེའི་མི་འབོར་ ༢༥ % བརྒལ་ཡོད་པས། ད་ལྟ་གྲོང་ཁྱེར་དེ་དག་ནི་ཡོ་རོབ་ཀྱི་ནང་དུ་ཧ་ཅང་གི་བདེ་འཇགས་མེད་པའི་གྲོང་ཁྱེར་དུ་ཆགས་ཡོད།
ཡོ་རོབ་ནང་གི་ཁ་ཆེའི་མི་འབོར།
ལོ་རབས་དྲུག་ཅུ་བ་ནས་མགོ་བཙུགས་ཤིང་ཁ་ཆེ་བ་རྣམས་བྷེལ་རྗམ་དང་ཧྥ་རན་སི། འཇར་མན་གསུམ་གཙོ་བོ་གྱུར་པའི་ཡོ་རོབ་མནའ་འབྲེལ་གྱི་རྒྱལ་ཁབ་ནང་དུ་སླེབས་ཤིང་། ཁོང་ཚོའི་མི་འབོར་འཕེལ་ཚད་ནི་ཧ་ཅང་གི་མྱུར་ཞིང་ ༢༠༡༠ ལོའི་སྡོམ་རྩིས་བཀོད་པ་ལྟར་ན་ཡོ་སྣའི་ནང་དུ་ཁ་ཆེ་བ་ས་ཡ་ ༤༤ ལྷག་ཟིན་འདུག་པས། ཚོད་དཔགས་བྱས་ན་ད་ལྟ་མ་མཐའ་ཡང་ཁ་ཆེ་བ་ས་ཡ་ ༥༠ ལྷག་ཡོ་མནའི་ཁུལ་དུ་ཡོད་པ་གཏན་འཁེལ་རེད། འདས་པའི་ལོ་ངོ་ལྔ་བཅུ་ཙམ་གྱི་ནང་དུ་ཁ་ཆེ་བས་ཡོ་མནའི་མི་འབོར་གྱི་ ༧ % ཟིན་འདུག་པ། མུ་མཐུད་དུ་དེ་ལྟར་འཕེལ་དུ་བཅུག་པ་ཡིན་ན་མ་འོངས་པའི་ལོ་ངོ་བརྒྱ་དང་ཉིས་བརྒྱ་ཡི་ནང་དུ་ཡོ་སྣའི་ཕྱེད་ཙམ་ཁ་ཆེ་བ་ཆགས་སྲིད་པས། སྐྱབས་བཅོལ་བ་ལེན་པའི་སྲིད་ཇུས་འདི་ལ་ཡོ་མི་ཚོས་སྟངས་འཛིན་ཡག་པོ་ཞིག་བྱེད་མ་ཐུབ་ཚེ། མ་འོངས་པར་ཁ་ཆེ་དང་། གཞན་མི་གནས་སྤོ་བའི་ཤུགས་རྐྱེན་འོག་ཏུ་ཡོ་རོབ་ཀྱི་དེང་རབས་ཀྱི་དཔལ་ཡོན་རྩ་རྫོགས་བྱེད་པའི་ཉེར་ལེན་དུ་འགྱུར་ངེས་རེད།
རྒྱུ་མཚན་དེ་དག་ལ་བརྟེན་ནས་དེང་རབས་ལ་དགའ་ཞེན་ཡོད་པའི་མི་སྣ་མང་པོ་ཞིག་གིས་གནད་དོན་དེ་ལ་སེམས་ཁྲལ་བྱེད་ཀྱིན་ཡོད་ལ། ཡོ་མནའི་ཆབ་སྲིད་ཀྱི་གནད་ཡོད་མི་སྣ་མང་པོ་ཞིག་གིས་གནད་དོན་དེ་སེེལ་ཐབས་ལ་འབད་བརྩོན་བྱེད་བཞིན་ཡོད། དེར་བརྟེན། དཀའ་ངལ་དེ་རང་གཞན་གཉིས་ཕན་གྱི་ཐོག་ནས་སེལ་བའི་རེ་བ་ཡོད། གལ་སྲིད་སེལ་མ་ཐུབ་པ་ཡིན་ན་ཡོ་མནའ་ཐོར་ཞིག་ཏུ་འགྲོ་བའི་ཉེར་ལེན་བྱེད་སྲིད་ལ། གཅིག་བྱས་ན་ཡོ་མི་ཚོས་ཡོ་མནའ་ཐོར་ཞིག་ཏུ་འགྲོ་བར་ཞེད་ནས་སྐྱབས་བཅོལ་སྤྲད་རྒྱུའི་ཁྲིམས་ལུགས་ལ་འགྱུར་བ་གཏོང་སྲིད་ཁར། མི་གཏོང་རང་གཏོང་ཡང་ཆགས་བཞིན་ཡོད། གལ་སྲིད་འགྱུར་བ་བཏང་བ་ཡིན་ན་དོན་དངོས་ཀྱི་སྐྱབས་བཅོལ་མཁོ་བའི་མི་རིགས་དང་མི་སྣ་རྣམས་ལ་རེ་ས་བརྟེན་ས་མེད་པ། སྐྱབས་མེད་མགོན་མེད་དུ་ལུས་ངེས་ཡིན་ཁར། སྲིད་དབང་གཅིག་སྡུད་པ་ཚོས་རང་དང་ལྟ་བ་ཐ་དད་དུ་འཛིན་མཁན་གྱི་རང་གི་མི་སེར་དང་། མི་སེར་སྤེལ་ཡུལ་ཚོར་གང་འདོད་དུ་མནར་གཅོད་གཏོང་ངེས་རེད།
གཅིག་བྱས་ན་གང་འདོད་དུ་མནར་གཅོད་བཏང་ཏུ་བཅུག་ཚེ་མནར་གཅོད་ཕོག་པའི་མི་སེར་རྣམས་ཀྱིས་རང་གིས་དཀའ་ལས་མ་བརྒྱབ་ན་སྐྱོབ་མཁན་གཞན་སུ་ཡང་མེད་པའི་དེ་ཉིད་རྟོགས་ནས། རང་གི་རང་དབང་དང་ཐོབ་ཐང་གི་ཆེད་དུ་སྔར་ལས་འཐབ་རྩོད་བྱེད་སྲིད་ལ། བྱེད་མཁན་གྱི་དབུ་ཁྲིད་ཚོས་གནང་བའི་འཐབ་རྩོད་ཀྱི་དམིགས་ཡུལ་གྱི་རྩ་བ་ནོར་ཝེའི་བྱ་དགའ་དང་། ཕྱི་ཕྱོགས་སུ་གྲགས་པ་རྒྱས་རྒྱུའི་སླད་དུ་མ་ཡིན་པ། དོན་དངོས་ཀྱིས་གཉའ་གནོན་གཏོང་མཁན་གྱི་སྲིད་གཞུང་ལ་ཁ་གཏད་གཅོག་བྱེད་དང་། སྲིད་གཞུང་གི་ནུས་པ་ཆུང་དུ་གཏོང་རྒྱུ་ལ་དམིགས་ངེས་པས། དམིགས་པ་ཡིན་ན་གྲུབ་འབྲས་ངེས་ཅན་ཞིག་ཐོན་ཐུབ་པས། ཕྱོགས་གཞན་ཞིག་ནས་བལྟས་ན་སྐྱབས་བཅོལ་མ་སྤྲད་ཚེ་གནོད་པ་ལས་ཕན་ཐོགས་ཡོད་སྲིད།
ལྷག་པར་དུ་སྐྱབས་བཅོལ་རྫུན་མ་སྟེ། དཔལ་འབྱོར་གྱི་སྐྱབས་བཅོལ་བ་དང་། ཡུལ་མི་གནས་སྤོ་བ་ཚོའི་ལམ་ཁ་འགག་པས་ཡིན། འོན་ཀྱང་། དེ་ནི་འཐབ་རྩོད་མཁན་སོ་སོའི་བློ་སྟོབས་དང་ནུས་ཤུགས་ལ་རག་ལས་པས་ཐམས་ཅད་ཀྱི་གྲུབ་འབྲས་གཅིག་པ་ཞིག་ཡིན་མི་སྲིད་པས། འཐབ་རྩོད་བྱེད་མི་ཐུབ་མཁན་གྱི་མི་མང་དང་། ཕྱོགས་ཁག་རྣམས་ལ་སྐྱབས་བཅོལ་མ་སྤྲད་པ་ཡིན་ན་ཡོངས་སུ་རྩ་མེད་དང་། འགྱེལ་ས་ནས་ནམ་ཡང་ལངས་མི་ཐུབ་མཁན་ཞིག་ཏུ་འགྱུར་ཉེན་ཆེ་བས་ལེགས་པོ་ཁོ་ན་རུ་མ་མཐོང་།
གཞན་མི་གནས་སྤོ་བྱེད་རྒྱུ་ནི་ངན་པ་ཁོ་ན་མིན།
ལོ་རྒྱུས་ཁྲོད་དུ་གཞན་མི་གནས་སྤོ་ཡིས་དམག་འཁྲུག་དང་། བཙན་འཛུལ་ཁྲིད་ནས་ཡོང་བ་ནི་བདེན་པ་ཡིན་ཡང་། དེ་ནི་ངན་པ་ཁོ་ན་མིན་པ་རྒྱལ་ཁབ་རྣམས་ལ་མཚོན་ན་མེད་དུ་མི་རུང་བའི་ཡར་རྒྱས་འགྲོ་སའི་ལམ་བུ་ཧ་ཅང་གི་གལ་ཆེན་ཞིག་ཡིན་པས། དེ་ཡག་སྡུག་གང་དུ་འགྲོ་མིན་ནི་ཡོང་སའི་རྒྱལ་ཁབ་ཀྱིས་སྟངས་འཛིན་ཡག་པོ་བྱེད་ཐུབ་མིན་ལ་རག་ལས་ཡོད།
གཞན་མི་གནས་སྤོ་དང་། རིགས་འདྲེས་བཟའ་ཚང་གི་བགྲོད་ལམ་འདི་བརྒྱུད་ནས་མི་རྣམས་ཀྱིས་རིག་གཞུང་བརྗེ་རེས་དང་། ལག་ཆ་ལེན་རེས། སློབ་སྦྱོང་བྱེད་རེས་དང་། རོགས་རམ་བྱེད་རེས་སོགས་གནང་ནས་ཡར་རྒྱས་གཉིས་ཕན་གྱི་ལམ་དུ་བསྐྱོད་ཡོད་ལ། དེ་ནི་མི་རིགས་ཤིག་དང་རྒྱལ་ཁབ་ཅིག་ཡར་རྒྱས་སུ་འགྲོ་བ་ལ་ངེས་པར་དུ་དགོས་པའི་གལ་ཆེའི་རང་བཞིན་ཞིག་ཀྱང་ཡིན། འོན་ཀྱང་། དེ་ལ་སྟངས་འཛིན་ཡག་པོ་ཞིག་བྱེད་མ་ཐུབ་པ་ཡིན་ན་གྲུབ་འབྲས་ལྡོག་ཕྱོགས་སུ་ཐོན་པ་ལོ་རྒྱུས་ཀྱིས་གསལ་བཤད་གནང་ཡོད་པས། དུས་ཡུན་ཐུང་ངུ་ཡི་ནང་དུ་གཞན་མི་གནས་སྤོ་ཡོང་མཁན་མང་དྲགས་ན། བཙན་འཛུལ་དང་གཉའ་གནོན། སྡང་སེམས་དང་ཕན་ཚུན་མི་དགའ་བའི་འགལ་བ་མང་པོ་སླེབས་ངེས་ཡིན་པས། དེ་ལ་སྟངས་འཛིན་ཡག་པོ་ཞིག་བྱེད་རྒྱུ་དང་། གནས་སྟངས་ལ་དཔགས་ནས་མང་ཉུང་འཚམས་པོའི་སྒོ་ནས་གཞན་མི་གནས་སྤོ་རུ་ཡོང་དུ་འཇུག་རྒྱུ་ནི་རྒྱལ་ཁབ་དེའི་སྲིད་གཞུང་གི་ལས་འགན་ཡིན་ཕྱིན། འདས་པའི་ལོ་ངོ་ལྔ་བཅུའི་ནང་དུ་ནུབ་ཕྱོགས་ཀྱི་རྒྱལ་ཁབ་ཚོས་དེ་ལ་སྟངས་འཛིན་ཡག་པོ་ཞིག་བྱེད་ཐུབ་མེད། མེད་དགོས་དོན་ཡང་ཁོང་ཚོས་སྐད་རིགས་གཅིག་གྱུར་གྱི་སྒང་ནས་རིག་གཞུང་སྣ་འདུས་ཀྱི་སྟོབས་ཆེན་རྒྱལ་ཁབ་ཅིག་བསྐྲུན་འདོད་པས་རེད།
དེ་ལྟར་མུ་མཐུད་དུ་ཡོ་ཁུལ་དུ་ཁ་ཆེའི་མི་འབོར་ཚད་ལས་འདས་པ་འཕེལ་བ་ཡིན་ན། ནུབ་ཕྱོགས་ཀྱི་དཔལ་ཡོན་རྩ་བརླགས་སུ་འགྲོ་ཉེན་ཆེ་ཁར། མི་རིགས་དཀར་པོ་ཡང་རིགས་རུས་གཞན་དང་འདྲེས་ནས་ཉམས་རྒུད་དུ་འགྲོ་ངེས་རེད། དཔེར་ན། སོག་པོ་ལྟ་བུ་རེད། སོག་པོ་ཡར་རྒྱས་ཕྱིན་པ་དང་མཉམ་དུ་གཞན་ལ་བཙན་འཛུལ་བྱས་ཤིང་། རིམ་བཞིན་བཙན་འཛུལ་བྱེད་སའི་མི་སེར་ནང་དུ་སོག་མི་རྣམས་འདྲེས་ཤིང་། མཐར་སོག་རིགས་ས་ཡ་མང་པོ་བཙན་འཛུལ་བྱེད་སའི་ཡུལ་ལུང་དེའི་མི་རིགས་སུ་ཆགས་ནས་ད་ལྟ་སོག་པོ་ས་ཡ་མང་པོ་གཞན་རིགས་སུ་ཐིམ་ཡོད།
གང་ལྟར་ཁ་ཆེ་རྣམས་ཅི་ལྟར་མི་འབོར་སྤེལ་བ་ལ་མཁས་ཀྱང་དེང་རབས་ཀྱི་རིག་པའི་དཔལ་ཡོན་གྱི་དོ་ཟླར་ཡོང་དུ་དཀའ་བས། ཡོ་རོབ་པ་ཁ་ཆེ་བར་མ་ཆགས་པའི་སྔ་རོལ་ཏུ་ཁ་ཆེ་བ་རྣམས་དེང་རབས་ཀྱི་དཔལ་ཡོན་ལྡན་པའི་ཡོ་རོབ་ལྟར་ཆགས་པའི་སྨོན་ལམ་ཡོད་ལ། ལྷག་པར་དུ་ཆོས་ལུགས་ཀྱི་ཆེད་དུ་ཁ་ཆེ་རྣམས་ནང་དམེ་དང་གཉའ་གནོན་གཏོང་རེས། ཕྱོགས་ཁག་སྒྲིག་ནས་འཐབ་འཛིང་བྱེད་རེས་བྱེད་པའི་སྐྱི་གཡའ་བའི་གནས་ཚུལ་འདི་དག་མ་འགྱངས་པར་རྒྱུན་ཆད་ནས། ཕོ་མོ་དབྱེ་མེད་དང་ཆོས་ལུགས་དབྱེ་མེད། ལྟ་བ་དབྱེ་མེད་དང་མི་རིགས་དབྱེ་མེད་ཀྱི་སྒོ་ནས་མི་ཀུན་ལ་འགྲོ་བ་མིའི་ཐོབ་ཐང་འདྲ་མཉམ་དུ་སྤྲད་སའི་ཁོར་ཡུག་ཅིག་དང་། མི་ཆོས་རིག་པ་གཙོར་བཟུང་གིས་འགྲོ་བའི་མིའི་ལོ་རྒྱུས་ཁྲོད་དུ་མི་ཡུལ་ལ་ཕན་བདེ་སྐྲུན་མཁན་གྱི་གླིང་ཕྲན་ཞིག་དང་། ལམ་ལུགས་ཤིག་ལ་འགྱུར་བར་སྨོན།།