གནས་ཚུལ་མཁོ་སྤྲོད་པ། རྨེའུ་དཀོན་རྒྱམ།
ཕྱི་ལོ་༢༠༡༦ཟླ་༤ཚེས་༢༥ཉིན་རྒྱབ་ཨོ་སི་ཁྲོ་ལེ་ཡའི་སེད་ནེ་བོད་རིགས་མཐུན་ཚོགས་ཀྱི་ཁྱབ་ཁོངས་སུ་ཡོད་པའི་ཕ་མའི་འཐུས་མི་ཚོགས་ཆུང་གིས་གོ་སྒྲིག་བྱས་ཏེ་ ༸པཎ་ཆེན་སྐུ་ཕྲེང་བཅུ་བའི་ཡང་སྲིད་དགེ་འདུན་ཆོས་ཀྱི་ཉི་མ་མཆོག་དང་ཁོང་གི་ཡབ་ཡུམ་ནང་མི་དང་བཅས་པ་གར་སོང་ཆ་མེད་དུ་གྱུར་ནས་མི་ལོ་ ༢༡ འགྲོ་བཞིན་ཡོད་པའི་ཡིད་སྐྱོའི་གནས་བབ་དང་། ཡང་དེ་རིང་༸པཎ་ཆེན་རིན་པོ་ཆེ་སྐུ་ཕྲེང་བཅུ་པ་མཆོག་གི་ཡང་སྲིད་མཆོག་དགོང་ལོ་ ༢༧ ཕེབས་པའི་སྐུའི་འཁྲུངས་སྐར་ཉིན་མོ་ལ་འཁེལ་ཡོད་པས་འཁྲུངས་སྐར་བརྩི་སྲུང་གི་སྐུ་མགྲོན་གཙོ་བོ་བོད་མི་མང་སྤྱི་འཐུས་སྒྲོལ་དཀར་སྐྱབས་ལགས་དང་བདམས་ཐོན་བྱུང་བའི་བོད་མི་མང་སྤྱི་འཐུས་གདོང་འདུས་སྐྱིད་འཛོམས་ལགས། སེད་ནེ་བོད་རིགས་མཐུན་ཚོགས་ཀྱི་རྒྱུན་ལས་རྣམས་དང་མི་མང་། སློབ་ཕྲུག་བཅས་ཉིས་བརྒྱ་ལྷག་མཉམ་ཞུགས་གནང་སོང་།
ཐོག་མར་སེད་ནེ་བོད་རིགས་མཐུན་ཚོགས་ཀྱི་དྲུང་ཆེ་ལྷག་པ་ཚེ་རིང་ལགས་ཀྱིས་འཁྲུངས་སྐར་སྲུང་བརྩི་དང་འབྲེལ་བའི་གསུང་བཤད་གནང་དོན། དེ་རིང་ཀུན་གཟིགས་༸པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་གི་སྐུའི་འཁྲུངས་སྐར་སྲུང་བརྩི་ཞུ་བའི་དུས་འདིར་ང་ཚོས་ངེས་པར་དུ་དྲན་དགོས་པ་ཞིག་ནི་སྐུ་ཕྲེང་བཅུ་པ་མཆོག་གིས་བོད་བསྟན་སྲིད་ཆོས་དང་རིག་གཞུང་བཅས་པའི་ཐད་དགུང་ལོ་ ༢༤ ཙམ་དུ་སོན་པའི་དུས་ནས་ཡིག་འབྲུ་ཁྲི་བདུན་གྱི་སྙན་ཞུ་སོགས་བྲིས་གནང་སྟེ་རྒྱ་ནག་གཞུང་ལ་ཕུལ་བ་སོགས་བོད་ཀྱི་ཆོས་དང་རིག་གཞུང་སྲུང་སྐྱོབ་བྱ་རྒྱུ་སོགས་ཀྱི་ཐད་སྐུ་ངལ་ཚད་མེད་སྐྱོན་གནང་ཡོད་སྟབས། ང་ཚོ་བོད་མི་རེ་རེའི་ངོས་ནས་རྩ་ཆེའི་བཀའ་སློབ་དེ་དག་སེམས་ལ་བཅངས་ཏེ་བཀའ་བཞིན་བསྒྲུབ་དགོས་པ་ནི་བཀའ་དྲིན་རྗེས་དྲན་གྱི་མཆོད་པའི་མཆོག་ཡིན་སྐོར་གསུངས་སོང་།
དེ་རྗེས་བོད་མི་མང་སྤྱི་འཐུས་སྒྲོལ་དཀར་སྐྱབས་ལགས་ཀྱིས་གསུང་བཤད་གནང་དོན། ཀུན་གཟིགས་༸པཎ་ཆེན་སྐུ་ཕྲེང་བཅུ་བ་མཆོག་གིས་བོད་མི་རིགས་དང་བོད་ཀྱི་རིག་གཞུང་ལ་བླ་ན་མེད་པའི་མཛད་རྗེས་བཞག་གནང་བ་རྣམས་བཀའ་དྲིན་རྗེས་དྲན་གྱིས་ཡིད་ངོར་བཅིངས་ཏེ་༸པཎ་ཆེན་སྐུ་ཕྲེང་བཅུ་བའི་ཡང་སྤྲུལ་དགེ་འདུན་ཆོས་ཀྱི་ཉི་མ་མཆོག་འཕྲལ་དུ་གློད་གྲོལ་གཏོང་ཐབས་ལ་བོད་མི་ཚང་མས་འབད་འབངས་བྱེད་དགོས། སྤྱིར་བཏང་ནས་རྒྱ་གཞུང་གིས་ཤེས་བཞིན་དུ་དུས་རྟག་བོད་མི་མང་གི་སེམས་ལུས་གཉིས་ཀར་རྨ་ཁར་ཇེ་ཆེ་ནས་ཇེ་ཆེར་བཟོས་དང་བཟོ་བཞིན་ཡོད། དཔེར་ན། བོད་མི་རིགས་དང་བོད་ཀྱི་རིག་གཞུང་ལ་མཐོང་ཆུང་དང་ཁྱད་གསོད། འགྲོ་བ་མིའི་ཐོབ་ཐང་དང་རང་དབང་བཙོན་འཕྲོག་བྱས་པ་སོགས་ཀྱི་དབང་གིས་རང་ལུས་མེར་སྲེག་གིས་མཚོན་པའི་བོད་ནང་དུ་དོན་རྐྱེན་འདྲ་མིན་སྣ་ཚོགས་བྱུང་དང་འབྱུང་བཞིན་པའི་མཇུག་འབྲས་ཡོད་ཚོད་རྒྱ་གཞུང་ལ་ཐུག་ཡོད་པ་གསལ་བོ་ཡིན་པས། བོད་རྒྱའི་དཀའ་རྙོག་འདི་མ་སེལ་བར་འགན་འཁུར་ཚང་མ་རྒྱ་གཞུང་ལ་ཡོད་ཅེས་གསུངས་སོང་།
དེ་མཚུངས་ཨོ་སི་ཁྲོ་ལེ་ཡའི་བོད་མི་མང་སྤྱི་འཐུས་སུ་བདམས་ཐོན་བྱུང་བའི་གདོང་འདུས་སྐྱིད་འཛོམས་ལགས་ཀྱིས་གསུང་བཤད་གནང་དོན། རྒྱ་གཞུང་གིས་མུ་མཐུད་༸པཎ་ཆེན་རིན་པོ་ཆེ་ཡང་སྲིད་མུ་མཐུད་བཀག་ཉར་སྦས་སྐོང་བྱས་པ་དེས། གཞི་རྩའི་འགྲོ་བ་མིའི་ཐོབ་ཐང་དང་རང་དབང་། འདྲ་མཉམ་བཅས་ཀྱི་སྲུང་སྐྱོབ་ཐད་ལ་དོ་ཁུར་གང་ཡང་མེད་པ་མ་ཟད། རྩིས་མེད་རྡོག་རོལ་བཏང་དང་གཏོང་བཞིན་པ་གསལ་བོར་བསྟན་ཡོད་ཅེས་དང་། དམིགས་བསལ་བོད་ནང་དུ་༸པཎ་ཆེན་རིན་པོ་ཆེ་དགེ་འདུན་ཆོས་ཀྱི་ཉི་མ་མཆོག་གིས་གཙོས་བོད་ཀྱི་ཆབ་སྲིད་བཙོན་པ་རྣམས་འཕྲལ་དུ་གློད་གྲོལ་ཡོང་ཐབས་སུ། བོད་མི་རང་ཉིད་ཀྱི་ངོས་ནས་དང་བོད་དོན་རྒྱབ་སྐྱོར་བ། ལྷག་པར་ཞི་བདེ་དང་དྲང་བདེན་ལ་དགའ་བའི་རྒྱལ་སྤྱིའི་ཚོགས་སྡེ་ཁག་ནས་རྒྱ་གཞུང་ལ་གནོད་ཤུགས་གནད་ལ་འཁེལ་བ་ཡོང་ཐབས་ཀྱི་ལས་འགུལ་མུ་མཐུད་སྤེལ་དགོས་པའི་འབོད་སྐུལ་ཆེན་ནན་པོ་ཞུས་སོང་།
མཇུག་ཏུ་སྐུའི་འཁྲུངས་སྐར་དང་འབྲེལ་བའི་སྙན་ངག་གྱེར་འདོན་དང་བོད་པའི་སློབ་ཕྲུག་ལྔ་བཅུ་ལྷག་གི་ནང་ཁུལ་ལ་རི་མོ་འགྲན་བསྡུར་ཞིག་སྤེལ་ནས་འཁྲུངས་སྐར་བརྩི་སྲུང་གི་ཚོགས་འདུ་གྲོལ་སོང་།