སྙེ་ལྷའི་ཐུགས་སྲས།
ཨ་མ་ལགས། ཕྱི་རོལ་ན་ཤོག་སྦག་གི་སྐད་སྒྲ་དང་བར་སྣང་ན་འོད་རིས་སྣ་ཚོགས་ཀྱིས་ཁེངས་འདུག དེ་ནི་ང་ཚོ་ཡུལ་གྱར་བ་སྡོད་སའི་གནས་བདག་ཚོའི་ལོ་གསར་རན་པའི་དགའ་སྟོན་གྱི་སྟ་གོན་དབུ་ཚུགས་ཟིན་པའི་རྣམ་པ་རེད། དེས་ང་ལ་ཁྱེད་རང་མཉམ་ཏུ་རྒྱུན་རིང་ལོ་གསར་གཏང་རྒྱུ་མ་བྱུང་བ་དང་། སྔར་འདས་ཟིན་པའི་རང་ཡུལ་དུ་ལོ་གསར་གཏོང་བའི་རྣམ་པ་མིག་སྔར་བསྐྱལ་བ་དེ་རེད།
ཨ་མ་ལགས། ངས་དེ་རིང་ཁྱེད་ལྷག་པར་དྲན། གཞན་ཡུལ་དུ་འཁྱམས་པའི་མི་ལོ་དེ་དག་ནང་ངས་ལས་བཀོད་བཟང་བའི་ཕ་འཛོམས་མ་འཛོམས་ཀྱི་ཕུན་ཚོགས་ལ་ཡིད་སྨོན་ཤོར་བ་བགྲང་གིས་མི་ཟིན་ལ། ཁྱེད་རང་དྲན་པའི་སྡུག་བསྔལ་གྱི་མུན་གསེབ་ལས་བདེ་སྐྱིད་ཀྱི་སྣང་བ་ཐོབ་མྱོང་མེད། སྐབས་འགར་ངས་ཁྱེད་རང་དྲན་དུས་མིག་ཆུའི་མཆོད་པ་བཤམས་ནས་དཀོན་མཆོག་ལ་གསོལ་བ་བཏབ་ནས་ང་ཡི་མགོན་སྐྱབས་སུ་བྱོན་གྱུར་རེ་འབོད་བྱེད་མྱོང་ཡོད་ལ། ལན་རེར་ང་གཅིག་པོ་ནགས་གསེབ་ཏུ་དྲན་གདུང་གི་འཁུར་པོ་འཁྱེར་ནས་སྐྱོ་གླུ་ལེན་ཞིང་གདུང་འབོད་ཀྱི་ཀི་ཤར་བརྒྱབ་པ་ཉུང་ཉུང་ཞིག་གཏན་ནས་མིན། འོན་ཀྱང་དཀོན་མཆོག་གིས་ཐུགས་རྗེས་ཡལ་བར་འདོར་བའམ་ལས་འབྲས་ཀྱིས་ཆད་པ་བཅད་པ་གང་ཡིན་ཆ་མ་འཚལ།
གང་ལྟར་ང་དང་ཨ་མ་ཁྱེད་ཀྱི་ལས་དབང་དྲན་གདུང་གི་གཉའ་གནོན་ཁོ་ན་མྱོང་བཞིན་མཉམ་འཛོམས་ཀྱི་དཔྱིད་དཔལ་ཤར་གྱུར་རེ་སྒུག་གི་ངང་ནས། ད་བར་མི་ལོ་དུ་མའི་དགུན་གཞུང་རིང་མོ་འདི་དག་སྡུག་བསྔལ་གྱི་གྲང་འཁྱག་ཁོ་ན་མྱོང་ནས་བསྐྱལ་བ་མ་ཡིན་ནམ། ད་དུང་ཡང་ནམ་ཟླ་སྡུག་པོ་དེས་ངེད་གཉིས་ལ་བཟོད་དཀའ་བའི་མནར་གཅོད་ཀྱི་གོ་རིམ་ཅི་འདྲ་ཞིག་གི་འཆར་བཀོད་བྱེད་བཞིན་ཡོད་དམ།
ཨ་མ་ལགས། གཞན་ཡུལ་དུ་དགའ་དགའ་སྤྲོ་དང་དུས་ཆེན་ཅི་འདྲ་ཞིག་ལ་རོལ་ཡང་ཨ་མ་ཁྱེད་ཀྱི་འཛུམ་ཞལ་དང་ཕྱག་ཟུང་དྲོན་པོས་རྔན་པ་གནང་བ་དྲན་དུས་དེ་ཐམས་ཅད་སྡུག་བསྔལ་གྱི་སྣ་འདྲེན་ཞིག་ཏུ་འགྱུར་གྱི་འདུག དེ་ན་ང་དགའ་བའི་བྲོ་གར་འཁྲབ་རྒྱུར་དགའ་པོ་མེད་ལ་སྙན་པའི་གླུ་ཆུང་ལེན་གྱུར་ཡང་སྤྲོ་སྣང་མེད། དཀོན་མཆོག་མཁྱེན། མཁྱེན་པ་དཔལ་མངའ་བའི་བདག་ཉིད་དང་། ནུས་མཐུ་དང་སྙིང་བརྩེ་གོང་ན་མེད་པའི་ཁྱེད་རྣམས་ཀྱིས་ང་དང་ཨ་མ་ཁྱེད་ཀྱི་ལས་དབང་འདི་སྡིག་ཉེས་ཅི་ཞིག་གི་ཉེར་ལེན་ཡིན་པ་གསུང་ཞིག་བྱོན་ནས། དེ་ལས་ཐར་བའི་རྣམ་པར་དཀར་བའི་ལམ་གྱི་སྣེ་མོ་ཞིག་བསྟན་པར་འགྱུར་ན། བུ་ངས་དཀའ་སྤྱད་འབད་བརྩོན་ཐོག་ནས་ཡོད་ཚད་བསྒྲུབ་ཕོད་པའི་སྙིང་སྟོབས་ཡོད་ལ་ཐམས་ཅད་ཡིད་གཡོ་ནུས་བའི་སྐྱོ་གར་ཅི་ཞིག་འཁྲབ་དགོས་ཀྱང་སྤྲོ་བས་དང་དུ་ལེན་ངེས་ཡིན།
ཨ་མ་ལགས། ང་དང་ཁྱེད་ཤི་བྲལ་མིན་པའི་མཉམ་འཛོམས་ཀྱི་སྐལ་བ་ཞིག་ཤར་གྱུར་བུ་ངས་དཀོན་མཆོག་ལ་གསོལ་བ་འདེབས་ཞིང་ཡོད་ལ། རྒྱུན་ཏུ་དེ་ཁོ་ནར་དམིགས་ནས་རྣམ་པར་དཀར་བའི་ལས་ལ་གཞོལ་རྒྱུ་ནི་གོམས་ལོབས་སུ་སོང་ཟིན་འདུག འོན་ཀྱང་ང་ད་ལྟ་སྙིང་རྗེ་མེད་པའི་གཤིན་རྗེ་དང་ནམ་ཡོང་མེད་པའི་འཆི་བ་ལ་འཇིགས་ཤིང་ཡོད།
ཨ་མ་ལགས། ངེད་གཉིས་ཀྱི་བགོ་སྐལ་དུ་ཤི་བྲལ་ཟེར་བའི་འཇིགས་རུང་སྲིན་གཟུགས་དང་འདྲ་བའི་ཡིག་འབྲུ་གཉིས་པོ་དེ་ལྷུང་ཡོང་སྙམ་ནས་ངས་མགོན་སྐྱབས་འབོད་བཞིན་ཡོད། མཁྱེན་བརྩེའི་བདག་ཉིད་ཀྱེ། ནུས་མཐུའི་མངའ་བདག་ཀྱེ། ང་དང་ཨ་མ་ཁྱེད་ཀྱིས་རེ་འདུན་བསྒྲུབ་པའི་ལམ་སྣེ་འདྲེན་ཏུ་གསོལ། དེ་ལྟར་གནང་ན་ངའི་དད་སེམས་ཀྱི་མེ་ཏོག་ནམ་འཚོའི་བར་མི་སྐམ་ལ་ཡིད་ཆེས་དང་བློ་གཏད་ཀྱི་རྒྱ་མཚོ་ཡང་། དབྱར་གྱི་ཆུ་བོ་དང་དགུན་གྱི་ཁ་བ་དཀར་པོར་གྱུར་བ་སོམ་སྙི་ཅི། མ་ཟད་ང་དང་ཨ་མ་ཁྱེད་རང་དྲན་གདུང་གི་ནད་ཀྱིས་མནར་ཐེངས་རེར་རེ་བའི་མིག་འབུར་གཏོད་ས་ནོར་མེད་པ་དང་། གདུངས་ཤུགས་དྲག་པོའི་གསོལ་འདེབས་དང་། མིག་ཆུས་རང་གདོང་བརླན་ཡང་ད་དུང་ཁོང་རྣམས་ལ་ཕྱག་མཆོད་དང་སྐྱབས་འཇུག་ཞུས་པ་དེ་ཡང་རེ་སྟོང་དུ་མ་བཏང་བ་ནི་དཀོན་མཆོག་ཟེར་བའི་འཇུག་གཞི་འདི་མིང་དོན་མཚུངས་པ་ཞིག་ཏུ་འགྱུར་བར་མི་འགྲོ་འམ།
ཨ་མ་ལགས། ཁྱེད་ཀྱིས་འདས་ཟིན་པའི་ཞལ་འཛུམས་འདི། ད་ལྟ་ཡང་བུ་ངའི་སྙིང་ཁོང་དང་འདྲེན་བྱེད་ཀྱི་ཡུལ་དུ་གསོན་པོ་གསོན་རྐྱང་དུ་གནས་ཡོད།
ཨ་མ་ལགས། ཡུལ་གྱིས་སྐལ་བའི་བུ་ངས་རང་དབང་མེད་པར་སྐྱོ་སྣང་དང་ལྷན་དུ་ཤོར་བའི་མིག་ཆུའི་ཐིགས་པ་དེ་དག་དེ་རིང་རྒྱ་གར་བའི་ལོ་གསར་ཉིན་ཁྱེད་རང་དྲན་པའི་ལེགས་སྐྱེས་སུ་ཕུལ་བཞིན་ཡོད།།
རྒྱ་གར་གྱི་ལོ་གསར་སྐབས་བྲིས་པའི་རྩོམ་ཡིག་འདི་ཨ་མའི་དུས་ཆེན་ལ་སྙེ་ལྷའི་ཐུགས་སྲས་ནས་ཕུལ།