སྐྱིད་བྱམས་བསྟན་འཛིན་དགའ་བ།
སྤྱི་སྒེར་སུས་བཞེངས་དགོས་སམ།
རྗེས་དྲན་སྐུ་བརྙན་ཆེན་མོའི་སྐོར་གྱི་རྩོམ་ཡིག་སྔ་མའི་ནང་སྐུ་བརྙན་འདི་འདྲ་ཞིག་བཞེངས་དགོས་པ་དེ་༸གོང་ས་མཆོག་གི་བཀའ་དྲིན་རྗེས་དྲན་མཚོན་བྱེད་ཙམ་དུ་མ་ཟད། བོད་ཀྱི་བྱུང་རབས་ལོ་རྒྱུས་ཀྱི་ཆ་ནས་གལ་གནད་ཇི་ལྟར་ཆགས་ཚུལ་སྐོར་བརྗོད་ཟིན་སྟབས། འདིར་རྣམ་པ་ཚོས་གལ་གནད་དེ་གཉིས་མཁྱེན་པ་གཞིར་བཞག་ཐོག་ནས་འབྲི་ཁུལ་བྱས་ཡོད།
སྤྱིར་ང་ཚོས་༸གོང་ས་མཆོག་གི་སྐུ་བརྙན་ཞིག་བཞེངས་པ་ཙམ་གྱིས་དགེ་མཚན་ཇི་སྙེད་ཅིག་ཡོད་པ་སྨོས་མི་དགོས་ཀྱང་། བོད་ཀྱི་བྱུང་རབས་ལོ་རྒྱུས་ནང་དེ་དག་ཡོད་ཚད་གལ་གནད་ཅན་དུ་འགྱུར་སྲིད་དམ་ཞེ་ན། འདི་ནི་ཧ་ཅང་བཤད་དཀའ་སྟེ་དཔེར་ན། ཕྱི་རྒྱལ་པ་སྒེར་པས་བཞེངས་པའི་༸གོང་ས་མཆོག་གི་སྐུ་བརྙན་དུ་མ་བཞུགས་ཡོད་པ་དེ་དག་བོད་ཀྱི་བྱུང་རབས་ལོ་རྒྱུས་ནང་གལ་གནད་ཆེན་པོ་ཆགས་ངེས་པར་ཧ་ཅང་བཤད་དཀའ་ཞིང་། དེའི་རྒྱུ་མཚན་ཡང་སྐུ་བརྙན་ཆེ་ཆུང་དང་རྒྱུ་སྤུས་ཀྱི་ཆ་ནས་མིན་པར་སྐུ་བརྙན་དེ་དག་གི་ཐོག་ནས་༸གོང་ས་མཆོག་དང་བཞེངས་པ་པོ་གང་ཟག་སྒེར་དབར་གྱི་འབྲེལ་ལམ་མཚོན་ངེས་ཀྱང་། ༸གོང་ས་མཆོག་དང་བོད་མིའི་དབར་ཐུན་མིན་འབྲེལ་ལམ་དང་། བོད་མི་ས་ཡ་དྲུག་གིས་༸གོང་ས་མཆོག་ལ་བཅངས་པའི་བཅོས་མིན་གྱི་དད་པ་དང་འགྱུར་བ་མེད་པའི་བརྩེ་སེམས།
༸གོང་ས་མཆོག་གིས་བོད་རིགས་མི་མང་དཀའ་སྡུག་གི་གནས་ལས་ཇི་ལྟར་སྐྱབས་ཡོད་མེད་དང་། ༸གོང་ས་མཆོག་གིས་བོད་ཀྱི་རིག་གཞུང་འདི་ཉིད་འཇིག་རྟེན་ཀུན་ལ་ཇི་ལྟར་ཁྱབ་སྤེལ་གནང་ཡོད་མེད། བོད་མི་ས་ཡ་དྲུག་གིས་༸གོང་ས་མཆོག་གི་བཀའ་དྲིན་དེ་དག་ཇི་ལྟར་བྱས་ནས་རྗེས་སུ་དྲན་པར་བྱས་ཡོད་མེད། ཕྱི་རབས་པ་རྣམས་ཀྱིས་སྐུ་བརྙན་དེ་མཐོང་བ་ཙམ་གྱིས་དུས་རབས་བཅུ་དགུ་དང་ཉི་ཤུའི་གཡས་གཡོན་གྱི་བཙན་བྱོལ་བོད་མིའི་གནས་བབ་སྤྱི་དང་དེའི་དུས་སྐབས་ཀྱི་བོད་ཀྱི་བྱུང་རབས་ལོ་རྒྱུས་ཁག་ཡིད་ལ་དྲན་པ་དང་། མི་རབས་སྔ་མའི་ཕུགས་རེ་དེ་དག་ཕྱི་རབས་པ་རྣམས་ནས་མཇུག་གནོན་དགོས་པའི་དྲན་སྐུལ་བྱེད་ངེས་པ་སོགས་སྐུ་བརྙན་དེ་དག་གི་ཐོག་ནས་ཡོང་རེ་བྲལ་བས་ཡིན། དེས་ན་༸གོང་ས་མཆོག་གི་སྐུ་བརྙན་ཞིག་བཞེངས་པ་ཙམ་གྱིས་དགེ་མཚན་མང་དུ་ལྡན་ཡང་བོད་ཀྱི་བྱུང་རབས་ལོ་རྒྱུས་ནང་གལ་གནད་ཆགས་མིན་དེ་བཤད་དཀའ་བར་གྱུར་ཡོད།
འོ་ན་ཇི་ལྟར་བྱས་ནས་བཞེངས་ན་ད་གཟོད་རྗེས་དྲན་སྐུ་བརྙན་ཆེན་མོ་འདི་༸རྒྱལ་བའི་བཀའ་དྲིན་རྗེས་དྲན་མཚོན་པ་ཙམ་དུ་མ་ཟད། བོད་ཀྱི་བྱུང་རབས་ལོ་རྒྱུས་ནང་ཧ་ཅང་གནད་འགག་དང་གལ་གནད་ཅན་ཞིག་ཏུ་འགྱུར་སྲིད་དམ་ཞེ་ན། འདིའི་འགག་རྩ་ཐུག་ས་དེ་སྐུ་བརྙན་དེའི་རྒྱུ་སྤུས་ཀྱི་ཆ་ནས་མིན་པར་བཞེངས་མཁན་དེ་བོད་མི་ས་ཡ་དྲུག་ཡིན་མིན་དེར་ཐུག་ཡོད་ལ། གོང་དུ་ཞུས་པའི་ཕྱི་རྒྱལ་པ་སྒེར་པས་བཞེངས་པའི་སྐུ་བརྙན་དེ་དག་སྐུ་བརྙན་ཡིན་པ་མཚུངས་ཀྱང་། བཞེངས་མཁན་དེ་སྤྱི་སྒེར་གང་ཞིག་ཡིན་མིན་གྱི་རྒྱུ་མཚན་དེས་ད་གཟོད་སྐུ་བརྙན་དེ་དག་བོད་ཀྱི་བྱུང་རབས་ལོ་རྒྱུས་ནང་གལ་གནད་ཆེ་ཆུང་གི་ཁྱད་པར་བཟོ་ངེས་ཡིན།
གནད་དོན་འདིས་གང་ཞིག་གསལ་བཤད་བྱས་ཡོད་དམ་ཞེ་ན་རྗེས་དྲན་སྐུ་བརྙན་ཆེན་མོ་འདི་བོད་ཀྱི་བྱུང་རབས་ལོ་རྒྱུས་ནང་གལ་གནད་ཆེན་པོ་ཆགས་ཕྱིར་གང་ཟག་སྒེར་དང་། བོད་མི་ས་ཡ་དྲུག་གི་ཚབ་མཚོན་རང་བཞིན་མི་ལྡན་པའི་ཚོགས་པ་ཞིག་གིས་བཞེངས་ན་བྱུང་རིམ་གྱི་ཆ་ནས་གལ་གནད་ཅན་དུ་མི་འགྱུར་བའི་གནས་ལུགས་དེ་བསྟན་ཡོད། དེས་ན་རྗེས་དྲན་སྐུ་བརྙན་ཆེན་མོ་འདི་བཞེངས་པར་བོད་མི་ས་ཡ་དྲུག་གི་ཚབ་མཚོན་ནུས་པའི་སྒྲིག་འཛུགས་ཤིག་གི་དགོས་མཁོ་མཆིས་པས། ང་ཚོར་དེ་ལྟ་བུའི་སྒྲིག་འཛུགས་ཤིག་གང་དུ་ཡོད་དམ།
དབུས་བོད་མིའི་སྒྲིག་འཛུགས།
ཕྱི་ལོ་ ༡༩༥༩ ལོར་༸གོང་ས་མཆོག་དང་བོད་མི་རྣམས་རྒྱ་གར་དུ་ཐོག་མར་སྐྱབས་བཅོལ་ལ་ཕེབས་དུས། རྒྱ་གར་གྱི་ས་གནས་ཏེ་ཙེ་པུར་དུ་ཐོག་མར་འབྱོར་ཞིང་སྐབས་དེར་གསར་འགོད་པས་༸གོང་ས་མཆོག་ལ་བོད་གཞུང་ཟེར་བ་གང་དུ་ཡོད་དམ་ཅེས་བཀའ་འདྲི་ཞུས་ཡོད། དུས་སྐབས་དེར་༸གོང་ས་མཆོག་དགུང་ལོ་ཆུང་ཆུང་ལས་ཕེབས་མེད་ཀྱང་འཕྲལ་ཕུགས་རྒྱང་གསུམ་གྱི་གནས་སྟངས་སྤྱི་ལ་མཁྱེན་རྟོགས་མངའ་བ་ཞིག་ཡིན་སྟབས་ཐེ་ཚོམ་ཙམ་ཡང་མེད་པར་ང་དང་ངའི་བཀའ་ཤག་གང་དུ་ཡོད་ས་དེར་བོད་མི་མང་ནས་བོད་གཞུང་ཡོད་པར་ངེས་འཛིན་བྱེད་ཀྱི་ཡོད་ཅེས་བཀའ་ལན་གནང་ཡོད།
སྐབས་དེ་དུས་ཀྱི་གནས་སྟངས་ལ་གཞིགས་ན་བོད་གཞུང་ལ་བོད་མི་ས་ཡ་དྲུག་གི་ཚབ་མཚོན་བྱེད་ནུས་ཀྱི་ཆ་རྐྱེན་ཡོངས་སུ་ཚང་བར་བཤད་དཀའ་ཡང་༸རྒྱལ་དབང་སྐུ་ཕྲེང་ལྔ་བ་ཆེན་པོའི་དུས་སྐབས་ནས་བཟུང་སྟེ་༸རྒྱལ་དབང་སྐུ་ཕྲེང་རིམ་བྱོན་གྱིས་ཐུགས་རྗེའི་བྱིན་རླབས་དང་བོད་རིགས་མི་མང་ཡོངས་ཀྱི་གཡོ་བ་མེད་པའི་དད་པ་དམ་ཚིག་བཅས་ལ་བརྟེན་ནས་དེ་ལྟར་༸གོང་ས་མཆོག་དང་མགོོན་པོ་གང་ཉིད་ཀྱི་བཀའ་ཤག་གང་དུ་ཡོད་ས་དེར་བོད་མི་ས་ཡ་དྲུག་ནས་བོད་གཞུང་ཡོད་པར་ངོས་འཛིན་བྱེད་ཀྱི་ཡོད།
དེས་ན་སྐབས་དེ་དུས་ཀྱི་གནས་སྟངས་དེ་འདྲའི་འོག་ཏུའང་བོད་མི་ས་ཡ་དྲུག་ནས་ངོས་འཛིན་དེ་ལྟར་བྱེད་ཀྱི་ཡོད་ན་མི་ལོ་དྲུག་ཅུར་ཉེ་བའི་དེ་རིང་མང་གཙོའི་ཆ་རྐྱེན་ཡོངས་སུ་རྫོགས་ཤིང་། ཆོལ་ཁ་གསུམ་ཆོས་བརྒྱུད་དང་བཅས་པའི་སྤྱི་འཐུས་འདྲ་མཉམ་རང་བཞིན་ལྡན་པའི་དབུས་བོད་མིའི་སྒྲིག་འཛུགས་འདིར་བོད་མི་ས་ཡ་དྲུག་ནས་རང་གི་གཞུང་དང་རང་གི་སྐུ་ཚབ་ཏུ་ངོས་འཛིན་བྱས་དང་བྱེད་བཞིན་པ་ནི་དེ་བས་ཀྱང་འོས་ཆོས་ཚང་པ་ཞིག་རེད། དེའི་ཕྱིར་ལོ་ངོ་བརྒྱ་ཕྲག་འགའི་རྗེས་སུ་ཡང་ད་ལྟའི་བོད་དང་བོད་མིའི་གནས་སྟངས་སྤྱི་དང་། ལྷག་པར་དུ་༸རྒྱལ་བའི་བཀའ་དྲིན་དག་མི་རབས་ཕྱི་མ་རྣམས་ཀྱི་ཡིད་ལ་ཡང་མེ་ལོང་ནང་གི་གཟུགས་བརྙན་བཞིན་དུ་ལྷམ་མེར་གསལ་ཕྱིར་རྗེས་དྲན་སྐུ་བརྙན་ཆེན་མོ་འདི་བོད་མི་ས་ཡ་དྲུག་གི་ཚབ་མཚོན་བྱེད་ནུས་ཡོངས་སུ་རྫོགས་པའི་དབུས་བོད་མིའི་སྒྲིག་འཛུགས་ནས་བཞེངས་དགོས་ལ། འདི་ཉིད་ལས་གཞན་པའི་གང་ཟག་སྒེར་དང་ཚོགས་པ་གང་ཞིག་གིས་བཞེངས་ཀྱང་དེ་ནི་བོད་ཀྱི་བྱུང་རབས་ལོ་རྒྱུས་ནང་གལ་གནད་ཅན་ཞིག་ཏུ་འགྱུར་དཀའ་འོ། །
ཇི་ལྟར་བཞེངས་དགོས་སམ།
རྩོམ་ཡིག་སྔ་མའི་ནང་རྗེས་དྲན་སྐུ་བརྙན་ཆེན་མོ་འདིའི་རིང་ཚད་ལ་ཧྤི་ཀྲི་བརྒྱ་དང་བཅུ་གསུམ་ཡོད་པ་ཞིག་བཞེངས་ན་དགོས་པ་རྒྱུ་མཚན་ཇི་ཡོད་བཤད་ཡོད་པ་ལྟར། རིང་ཚད་འདི་དང་ལྡན་པ་ཞིག་བཞེངས་ན་འགྲོ་གྲོན་ཡང་ཆུང་ཆུང་ཞིག་མིན་པར་བརྟེན། ང་ཚོས་འགྲོ་གྲོན་འདི་དག་གང་ནས་འཚོལ་སྒྲུབ་ཞུ་དགོས་སམ། གོང་གི་ལེ་ཚན་ནང་རྗེས་དྲན་སྐུ་བརྙན་ཆེན་མོ་འདི་བོད་མི་ས་ཡ་དྲུག་གི་སྐུ་ཚབ་མཚོན་པའི་དབུས་བོད་མིའི་སྒྲིག་འཛུགས་ནས་བཞེངས་དགོས་པ་བསྟན་ཡོད་པ་ལྟར། འགྲོ་གྲོན་ཡང་དབུས་བོད་མིའི་སྒྲིག་འཛུགས་ནས་གཏོང་དགོས་སམ་སྙམ་ན། དེ་ནི་གཏན་ནས་མ་ཡིན་ཏེ། སྐུ་བརྙན་འདིའི་འགྲོ་གྲོན་ཡོངས་རྫོགས་བོད་མི་ས་ཡ་དྲུག་རང་ངོས་ནས་༸རྒྱལ་བའི་བཀའ་དྲིན་མཚོན་བྱེད་དང་། བསོད་ནམས་གསོག་ཆེད་དུ་ཕུལ་བའི་ཞལ་འདེབས་མ་དངུལ་གྱིས་བཞེངས་ན་དགེ་མཚན་ཆེ་བ་དང་ལོ་རྒྱུས་ཀྱི་རིན་ཐང་ལྡན་ངེས་ཡིན།
སྤྱིར་རྗེས་དྲན་སྐུ་བརྙན་ཆེན་མོ་འདི་འདྲ་ཞིག་བཞེངས་འགོ་བཙུགས་ན་འགྲོ་གྲོན་གྱི་དཀའ་ངལ་ཅུང་ཟད་ཀྱང་འཕྲད་མི་སྲིད་ཅིང། དེ་ཡང་༸གོང་ས་མཆོག་སྐུ་སྒེར་གྱི་མཛད་འཕྲིན་ལས་བརྟེན་ནས་རྒྱལ་སྤྱིའི་ནང་ནས་ཞལ་འདེབས་འབུལ་མཁན་དང་སྦྱིན་བདག་བྱེད་མཁན་ནི་མཚམས་མ་ཆད་པར་ཡོང་ངེས་ཡིན་པ་གདོན་མི་ཟ་ཡང་། རྗེས་དྲན་སྐུ་བརྙན་ཆེན་མོ་འདི་བོད་མི་ས་ཡ་དྲུག་གིས་༸རྒྱལ་བའི་བཀའ་དྲིན་རྗེས་སུ་དྲན་པ༌མཚོན་ཐུབ་པ་དང་། བོད་ཀྱི་བྱུང་རབས་ལོ་རྒྱུས་ནང་གལ་གནད་ཆགས་ཕྱིར་བོད་མི་ས་ཡ་དྲུག་ཁོ་ནས་ཕུལ་བའི་ཞལ་འདེབས་མ་དངུལ་ནས་བཞེངས་དགོས་པ་དེ་ཧ་ཅང་གནད་འགག་ཆགས་ཡོད།
༸གོང་ས་མཆོག་གིས་བོད་མི་རིགས་རིག་གཞུང་དང་བཅས་པ་བསྐྱངས་པའི་བཀའ་དྲིན་གྱི་ཆ་ནས་བཤད་ན་ང་ཚོ་མི་རེ་ངོ་རེས་༸གོང་ས་མཆོག་གི་བཀའ་དྲིན་རྗེས་དྲན་མཚོན་བྱེད་དུ་སྟོང་གསུམ་སྣོད་ཀྱིས་བསྐངས་ནས་ཕུལ་ཡང་ད་དུང་བཀའ་དྲིན་གྱི་ཆ་ཤས་ཕྲ་མོ་ཙམ་ཡང་གཞལ་ཐབས་མེད་པ་ནི་རང་བློ་རང་ལ་ལྐོག་ཏུ་མ་གྱུར་བ་ཡིན་སྟབས་ཚང་མས་མཁྱེན་གསལ་ལྟར་རེད།
འོན་ཀྱང་མེ་ཏོག་ཆུང་ཡང་མཆོད་པའི་རྫས་ཞེས་པ་ལྟར་སྤྱིར་༸གོང་ས་མཆོག་གིས་མ་མཁྱེན་པ་ཞིག་མེད་རུང་ང་ཚོས་ལྷག་བསམ་རྣམ་དག་གི་ཐོག་ནས་༸གོང་ས་མཆོག་གིས་ད་བར་བསྐྱངས་པའི་བཀའ་དྲིན་དག་བོད་མི་ཡོངས་ཀྱིས་ནམ་ཡང་བརྗེད་མེད་པ་མ་ཟད། ༸གོང་ས་མཆོག་དགུང་གྲངས་བརྒྱ་དང་བཅུ་གསུམ་བར་བཞུགས་རྒྱུར་བོད་མི་ཡོངས་ནས་མངོན་འདོད་ཤུགས་ཆེར་ཡོད་པ་གསལ་སྟོན་ཐུབ་པའི་ཆེད་རྗེས་དྲན་སྐུ་བརྙན་ཆེན་མོ་འདི་༸གོང་ས་མཆོག་སྐུ་འཚོ་བཞུགས་ཀྱི་དུས་སྐབས་སུ་ངེས་པར་བཞེངས་དགོས་ལ། སྐུ་བརྙན་འདི་འདྲ་བཞེངས་པ་ལས་ང་ཚོས་རྒྱལ་སྤྱིའི་ཁྱོན་ཡོངས་དང་ལྷག་པར་དུ་རྒྱ་ནག་ལ་ཡང་གནད་དོན་དུ་མ་ཞིག་ལ་ལན་འདེབས་ཐུབ་ངེས་ཡིན་པ་ནི་བརྗོད་མི་དགོས་པ་ཞིག་རེད།
གང་དུ་བཞེངས་དགོས་སམ།
དྲི་བ་འདི་འཁོར་མཁན་དང་གཏོང་མཁན་ཉུང་ཉུང་མིན་ལ་དོན་དངོས་ཆ་ནས་ཀྱང་ཧ་ཅང་གནད་འགག་ཅན་གྱི་དྲི་བ་ཞིག་ཆགས་ཡོད། རྗེས་དྲན་སྐུ་བརྙན་ཆེན་མོ་འདི་༸གོང་ས་མཆོག་གི་བཀའ་དྲིན་རྗེས་དྲན་མཚོན་བྱེད་ཁོ་ན་མ་ཡིན་པར། བྱུང་རབས་ལོ་རྒྱུས་ཀྱི་ཆ་ནས་གལ་གནད་དུ་ལྟ་ཡི་ཡོད་སྟབས། གང་དུ་བཞེངས་སའི་ས་གནས་དེ་ཡང་རང་བཞིན་གྱི་གནད་འགག་ཆགས་ཡོད།
འདས་ཟིན་པའི་བོད་ཀྱི་ལོ་རྒྱུས་ནང་ཁ་ཆག་སྣ་རལ་གྱི་བཀྲ་མ་ཤིས་པའི་སྐྱོ་གར་མང་དུ་བྱུང་ཡོད་ཀྱང་། ཕྱི་ལོ་ ༡༩༥༩ ལོ་ནས་ད་ལྟའི་བར་རྒྱ་གཞུང་ནས་བོད་ས་ཡོངས་སུ་བཙན་བཟུང་བྱས་པ་ཙམ་དུ་མ་ཟད། བོད་མི་རིགས་ཀྱི་ངོ་བོ་རྩ་བརླག་ཏུ་འགྲོ་གཞིའི་ལས་གཞི་སྣ་མང་སྤེལ་དང་སྤེལ་བཞིན་ཡོད་པའི་གནས་སྟངས་ཐབས་སྡུག་འདི་འདྲ་ཞིག་སྔར་བོད་ཀྱི་ལོ་རྒྱུས་ནང་བྱུང་མ་མྱོང་བ་ཞིག་རེད། འོན་ཀྱང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེའི་བཀའ་དྲིན་ལ་བརྟེན་ནས་བོད་མི་རིགས་དང་བོད་ཀྱི་རིག་གཞུང་འདི་དག་བྱེ་མ་ཆུ་སིམ་ལྟར་རིམ་ཡལ་དུ་མ་གྱུར་པར་དུས་རབས་ཉེར་གཅིག་པའི་དཔལ་ཡོན་ཁྲོད་བོད་མི་རིགས་དང་བོད་ཀྱི་རིག་གཞུང་འདི་དག་བརླགས་ན་མི་རུང་བའི་ངེས་ཤེས་དེ་འཛམ་གླིང་མི་མང་ལ་རྙེད་དུ་བཅུག་ཡོད།
དེས་ན་འདི་ལྟ་བུའི་རྐྱེན་ངན་གྲོགས་སུ་ཤར་བའི་གཟི་བརྗིད་ལྡན་པའི་ལོ་རྒྱུས་ཀྱི་ལེའུ་གསར་པ་འདི་༸གོང་ས་མཆོག་བཙན་བྱོལ་དུ་བཞུགས་དུས་སུ་ཡིན་སྟབས། རྗེས་དྲན་སྐུ་བརྙན་ཆེན་མོ་འདི་ཡང་དུས་སྐབས་འདིའི་བྱུང་བ་མཚོན་ཕྱིར་༸གོང་ས་མཆོག་དང་བོད་མི་སྐྱབས་བཅོལ་པ་གནས་ཡུལ་རྒྱ་གར་དུ་བཞེངས་ན་བྱུང་རབས་ལོ་རྒྱུས་ཀྱི་ཆ་ནས་དགེ་མཚན་ལྡན་ངེས་སོ། །
མདོར་ན་བདག་གིས་བོད་མི་རིགས་ཀྱི་འཕྲལ་དང་ཕུགས་ལ་བསམ་གཞིགས་བྱས་ཁུལ་གྱིས་བོད་མི་ས་ཡ་དྲུག་ལ་ཕུལ་བའི་བསམ་ཚུལ་འདི་དག་འཚོགས་ལ་ཉེ་བའི་གྲོས་ཚོགས་ནང་བགྲོ་གླེང་ཡོང་རྒྱུར་ཡིད་ཆེས་བྱེད་བཞིན་ཡོད།
མི་གསོན་པོར་ཡོད་དུས་འདྲ་གཟུགས་བཟོ་སྲོལ་མེད། ངས་ནི་རྣམ་རྟོག་འདྲ་ཞིག་ལངས་སོང་། སུ་ཞིག་གི་འགྲོ་ལུགས་རེད།
སྐུ་འཚོ་ཞུགས་སྐབས་རྗེས་དྲན་སྐུ་བརྙན་
ཟེར་བའི་ཐ་སྙད་དེ་ཚད་སྒྲུབ་ཨ་ཡིན་ནམ་།
སྔོན་མར་ཨེ་རག་གི་ནང་དུ་ས་འདག་མུང་སིང་གིས་ལྷ་དབང་ལམ་ལུགས་ལྟ་བུའི་སྲིད་དབང་འཛིན་དུས་སྐུ་བརྙན་ཆེན་པོ་དེ་འདྲ་བཟོ་བསྐྲུན་བྱས་མྱངས་ཡོད་རེད། ས་འདག་མུང་སིང་སྐུ་འཚོ་བཞུགས་སྐབས་སུ་བཟོས་པ་རེད། རྗེས་སུ་ཨེ་རག་གི་མི་དམངས་ཀྱིས་ས་འདག་མུ་སིང་སྐུ་བརྙན་གྱི་སྐེ་ལ་ཐག་པ་བཏགས་ནས་མར་གཏོར་བཤིག་བྱས་པ་རེད།
སྲིད་དབང་སྒེར་འཛིན་པ་ཚོ་སྐུ་འཚོལ་བཞུགས་སྐབས་སུ་ངོ་དགའ་སྤྲེལ་ལད་དང་རང་དོན་ཁོག་བཅུག་ཅན་གྱི་བློན་པོ་དག་གིས་སྐུ་བརྙན་བཟོ་བསྐྲུན་བྱས་མྱངས་བར་འཛམ་གླིང་གི་ལོ་རྒྱུས་ནང་དུ་གང་མང་བྱུང་མྱངས་ཡོད་རེད། དེ་ལ་ཧང་སང་དགོས་དོན་ཅང་ཡོད་མ་རེད། རྗེས་སུ་ཁོ་རང་ཚོས་མར་གཏོར་འོང་གི་རེད།
རིག་གནས་གསར་བརྗེའི་སྐབས་སུ་ཡང་སྐུ་བརྙན་དང་ལྷ་ཁང་སོགས་བོད་མི་ཁ་ཅིག་གིས་གཏོར་བཤིས་བྱས་པ་རེད། རྗེས་སུ་ཡར་བཟོ་བསྐྲུན་བྱེད་དུས་གཏོར་མཁན་ཚོ་སྔོན་མ་རེད། མྱོང་བ་དངོས་མཐོང་གི་བོད་ཀྱི་ལོ་རྒྱུས་རེད་ད་་་་་ཧཧ
ངས་གསར་འགྱུར་ཞིག་བཤད།
ཉེ་ཆར་ཐའེ་ཝན་དུ་ཚོགས་པ་ཞིག་གིས་རྒྱ་ནག་གི་སྲིད་བློན་ཟུར་པ་ཝིན་ཅ་པའོ་ཡི་འདྲ་བརྙན་ཅིག་བཞེངས་པ་རེད། རྒྱུ་མཚན་ནི་ཁོང་གི་སྐབས་སུ་ཐའེ་ཝན་ལ་ཚོང་སོགས་ཀྱི་གོ་སྐབས་མང་པོ་སྤྲད་ནས་དཔལ་འབྱོར་ཐོག་ཕན་ཐོགས་པ་རེད་ཟེར།
སྐུ་འདྲའི་ཁྲིའི་ངོས་སུ་ཐའེ་ཝན་གྱི་དཔའ་བོ་ཞེས་བྲིས་པ་རེད།
སྤྱིར་རྡོ་རིང་བཞེངས་པ་དང་ཁྱད་པར་ཐའེ་ཝན་གྱི་དཔའ་བོ་ཞེས་བྲིས་པར་ཐའེ་ཝན་གྱི་མི་ཚོ་ཧ་ལས་ཤིང་གད་མོ་ཡང་ཤོར་བ་རེད། དེ་ནས་གཞུང་དང་གྲོས་མོལ་བྱས་ནས་ཉིན་གཅིག་གི་རྗེས་ནས་ས་ས་མལ་དང་རྡོ་རྡོ་མལ་བྱས་ནས་མེད་པ་བྱས་པ་རེད།
ཧཧཧ་ཐའེ་ཝན་ལྷོ་ཕྱོགས་ཀྱི་སློབ་གྲྭ་ཞིག་གི་ནང་གི་ཅང་ཅེ་ཧྲི་ཡི་འདྲ་གཟུགས་ཀྱང་ན་ཉིན་ཐའེ་ནན་གྲོང་ཁྱེར་སྤྱི་ཁྱབ་པས་བཀའ་རྒྱ་བཏང་ནས་མེད་པ་བྱས་པ་རེད།
འདུས་བྱས་ཚང་མ་མི་རྟག་པ་རང་འདྲ་པོ་ཞིག་ཡོད་རེད།
དེ་ཚོ་ནང་བཞིན་རེད་གཏན་ནས་ཞ་གི་མེད། འོན་ཀྱང་མཆན་ལ་འཁྲིས་ནས་མཆན་བཏབ་པ་ཙམ་ཡིན།
གསོན་པར་སྐུ་བརྙན་བཞེངས་པ་སྟ་ཡོད་ས་རེད། གུ་རུ་ང་འདྲ་མ་ལྟ་བུ་དེ་ཚོ་དེ་འདྲ་མིན་འགྲོ། འོན་ཀྱང་། དྲན་རྟེན་དང་རྗེས་དྲན་ཞེས་པའི་ཐ་སྙད་ཡོད་མེད་མ་ཤེས།
སྐུ་ཞབས་བསྟན་དགའ་ལགས།
དངོས་གནས་དྲིན་གཟོ་ཞིག་གམ་ལོ་རྒྱུས་གསར་པ་ཞིག་བཟོ་འདོད་ན། གསུང་པར་ཁྲི་ཁྲག་འབུམ་ཁྲག་ཁང་པའི་ནང་བརྩིགས་པ་དེ་ཚོ་ཡིག་ཐོག་ཏུ་ཕབ་སྟེ་སྤྱི་ཚོགས་ནང་བཀྲམ་ཏེ། སྐྱབས་མགོན་མཆོག་གི་དགོངས་པ་བཞེས་ཕྱོགས་མི་མང་ལ་མཁོ་སྤྲོད་བྱས་ན་དེའི་ལྷག་ཨ་ཡོད། སངས་རྒྱས་བཅོམ་ལྡན་འདས་དང་རྗེས་འཇུག་ཚོ་དྲན་པ་ཡང་གསུང་གི་ཐོག་ནས་རེད་མ་གཏོགས། སྐུ་འདྲ་གཙོ་བོ་མ་རེད་ལགས།
༧གོང་ས་མཆོག་ནས་ང་ལ་སྐྱེ་སྐར་ལེགས་སྐྱེས་ཡག་ཤོས་དེ་གཞན་ཽན་སེམས་པ་བཟང་པོ་དང་ཡ་རབ་སྤྱོད་བཟང་བྱས་ན་དེ་ཡིན་གསུངས་ཡོད་པ་རེད། མ་ཟད་བཀའ་འགྱུར་བསྟན་འགྱུར་མཆོད་གཤམ་བྱས་ན་མི་ཕན་ལྟ་ཀློག་དང་བཟོ་དགོས་གསུངས་པ་རེད། ད་གོང་ས་མཆོག་འདྲ་སྐུ་བཟོ་བ་ལས་ཁོང་གི་ཞལ་གསུངས་ལག་ལེན་གནང་ན་དེ་ལས་རྗེས་དྲན་མཆོག་ག་ལ་ཡོད
སྐུ་ལས་གསུང་གལ་ཆེ་བས་ཁོང་གིས་གསུངས་པའི་གསུང་དེ་ཚོར་ཉམས་ལེན་བྱས་ན་དེས་མ་འཐུས་པ་མེད་རེད། བཙན་བྱོལ་བ་ནི་གཞན་གྱི་སྦྱིན་བདག་རོགས་རམ་ལ་རྒྱབ་བརྟེན་བྱས་ནས་བསྡད་ཡོད་དུས་ཡང་གསེར་དངུལ་གྱི་སྐུ་འདྲ་དེ་འདྲ་བཞེངས་ན་གཞན་གྱི་མིག་ངོར་མཛེས་པོ་ཡོད་པ་མ་རེད། གཞིས་བཞུགས་རྣམས་ལ་དེ་འདྲའི་ལས་འགུལ་སྤེལ་ས་ཡོད་པ་མ་རེད། བླ་མ་བཟོད་པས་བྱམས་པ་མགོན་པོ་ཆེན་པོ་ཞིག་བཞེངས་རྒྱུར་ཡང་ཕྱི་རྒྱལ་བ་མང་པོས་དགག་པ་བྱེད་ཀྱི་འདུག
བསམ་ཚུལ་ཡག་པོ་འདུག རང་གི་ཨ་མའི་བཀའ་དྲིན་རྗེས་དྲན་མཚོན་ཕྱིར་ཨ་མ་ཡོད་དུས་ནས་རྡོ་ཡི་སྣང་བརྙན་བཟོ་མཁན་ཕྱི་ནང་གང་སར་མང་པོ་ཡོད་པ་རེད། དེའི་དོན་རྡོག་རྡོག་བཤད་ན་བཀའ་དྲིན་རྗེས་དྲན་མཚོན་ཕྱིར་རེད། ༧གོང་ས་མཆོག་གིས་ང་ལ་འཁྲུངས་སྐར་གྱི་ལེགས་སྐྱེས་ངོ་མ་སེམས་པ་བཟང་པོ་ཡིན་གསུངས་པ་བདེན་མོད། ང་ཚོའི་ངོས་ནས་བཀའ་དྲིན་རྗེས་དྲན་གྱི་ཁོང་གི་རྡོ་སྐུ་ཆེན་མོ་ཞིག་བཞེངས་ཐུབ་ན། འཇིག་རྟེན་ཡ་རབས་དང་། ཆོས་ཀྱི་ཐོག་ནས་བསོད་ནམས་གསོག་ཐུབ་པ་སོགས་གང་གི་ཐད་ནས་བསམ་ན་ཧ་ཅང་ཡག་པོ་འདུག་ཅེས་རྒྱབ་སྐྱོར་དང་ཡི་རངས་བྱེད་དོ།།
སྐྱིད་བྱམས་བསྟན་འཛིན་དགའ་བ་ཟེར་བ་འདི་དེ་སྔོན་དུས་བབ་ཐོག་རྩོམ་ཡིག་ཟང་ཟིང་ཞིག་སྤེལ་ཏེ། ༸དགའ་ལྡན་ཕོ་བྲང་དང་། སྐུ་ངོ་སྣར་སྐྱིད་བར་དཀྲུག་ཤིང་རྒྱག་མཁན་དེ་མ་རེད་དམ། སྐབས་དེའི་རྩོམ་ནང་རྒྱལ་དབང་བཅུ་གསུམ་པའི་མཛད་པ་འཕྲིན་ལས་བཤད་དེ་བཅུ་བཞི་པར་ཟུར་ཟ་བྱས་སོང་ཞེས་འཁོད་པ་ཞིག་དྲན། དྲྭ་གྲོགས་འགས་༸གོང་ས་མཆོག་གི་འཁྲུངས་སྐར་སྐབས་གནང་བའི་བཀའ་སློབ་དྲན་གསོ་གནང་འདུག གནད་དོན་གཙོ་བོ་དེ་རང་རེད། རྗེས་དྲན་སོགས་མིང་སྙན་པོ་རེ་བཏགས་ཏེ་ལས་འགུལ་འདྲ་རྩོམ་སྟངས་འདི་རྗེས་དྲན་ངོ་མ་ཡིན་མིན་ཐེ་ཚོམ་རེད། མ་ཟད། དབང་ཆ་གཅིག་སྡུད་པ་རྣམས་རང་གནོངས་ཡོད་པའི་རྐྱེན་གྱིས་འདྲ་སྐུ་འདྲ་གསར་བཟོ་བྱེད་བཞིན་པ་རེད། ༸གོང་ས་མཆོག་རང་སོ་སོའི་སེམས་ནང་ཉར་དགོས་པ་རྗེས་དྲན་སྐུ་བརྙན་ངོ་མ་དེ་རེད། དེ་མིན་འཁྲབ་སྟོན་མང་རྒྱུ་མི་འདུག་གོ །
མཆན་འགོད་པ། ལྷག་པར་གསལ་བཤད་ཞུ་རྒྱུར། གུས་པས་དགའ་ལྡན་ཕོ་བྲང་དང་སྣང་སྐྱིད་བར་དཀྲུག་རྐྱེན་སློང་གཞི་རྩོམ་སོགས་གང་ཡང་སྤེལ་མྱོང་མེད་པས། དེ་དོན་དགོངས་འཇགས་ཞུ། གཞན་སེམས་ཅན་རང་རང་ལ་ཁམས་མོས་མི་འདྲ་རེ་ཡོད་པས། ཁྱེད་ཀྱིས་སོ་སོའི་བསམ་ཚུལ་ལྷུག་པོར་གསུངས་པ་ལ་འགག་བྱ་གང་ཡང་མེད།