མཁོ་སྤྲོད་པ། རྨེའུ་དཀོན་རྒྱམ།
ཕྱི་ལོ་༢༠༡༦ ཟླ་༥ ཚེས་༩ ཉིན་སི་ཁྲོན་ཝིན་ཁྲན་མི་དམངས་ཁྲིམས་ཁང་ཟེར་བ་ནས་རྩོམ་པ་པོ་བློ་མིག་ལ་ལོ་ངོ་བདུན་དང་ཕྱེད་ཀའི་ཁྲིམས་ཐག་བཅད་ཡོད་པ་ཤེས་རྟོགས་བྱུང་འདུག ཕྱི་ལོ་༢༠༡༥ ཟླ་༤ ཚེས་༡༧ ཉིན་ཁོང་འཛིན་བཟུང་བཙོན་འཇུག་བྱས་ཏེ་ཝིན་ཁྲན་ལྟ་སྲུང་ཁང་ཟེར་བ་སོགས་ནས་ལོ་ངོ་༡དང་ཟླ་གཅིག་ལྷག་ལ་གཅར་རྡུང་མནར་གཅོད་ཀྱི་ཁྲོད་ནས་བཀག་ཉར་བཙོན་འཇུག་བྱས་ཡོད་འདུག དེ་རིང་གཞི་ནས་ཁོང་གི་ནང་མི་ཁ་ཤས་སི་ཁྲོན་ཝིན་ཁྲན་མི་དམངས་ཁྲིམས་ཁང་ཟེར་བ་ནས་ཆུ་ཚོད་ཕྱེད་ཀའི་རིང་ཐུག་བཅུག་ཡོད་འདུག
སྐབས་དེར་ཁོང་གིས་ནང་མི་ལ་བཤད་རྒྱུར་ཁོ་ཚོས་ང་ལ་༢༠༠༩ ནས་བཟུང་སྟེ་༢༠༡༥ བར་རྒྱལ་ཁབ་ཀྱི་གསང་བ་ཕྱིར་བསྒྲགས་བྱེད་མཁན་དང་རྒྱལ་ཁབ་ཁ་བྲལ་གྱི་བྱ་སྤྱོད་སྤེལ་བའི་ནག་ཉེས་བཙན་འཁེལ་བྱས་རུང་ཁས་ལེན་རྩ་བ་ནས་བྱས་མྱོང་མེད་ཅེས་བརྗོད་འདུག
ཁྲིམས་ཐག་ག་དུས་བཅད་མིན་ནང་མིར་ཁྲིམས་ཁང་གི་ངོས་ནས་གསལ་བཤད་གང་ཡང་མ་བྱས་པ་མ་ཟད། ཁྲིམས་ཐག་གཅོད་དུས་ནང་མི་ལ་བརྡ་ལན་ཙམ་ཡང་བྱས་མི་འདུག གཞན་ཡང་ཁྲིམས་རྩོད་པ་དང་ནང་མི་ཉེ་འབྲེལ་སོགས་ཁྲིམས་རྭར་སུ་གང་ཡོང་བཅུག་མེད་འདུག
དངོས་མིང་ལ་ཇོ་བློ་བཟང་འཇམ་དབྱངས་དང་ཡོངས་གྲགས་སམ་སྨྱུག་མིང་ལ་བློ་མིག་ཏུ་འབོད་པ་ཁོང་ནི། རང་ལོ་ཉེར་བརྒྱད་ཡིན་ཞིང་རྩོམ་པ་པོ་ཁོང་ནི་ཨ་མདོ་རྔ་བ་རྨེའུ་རུ་མའི་རུ་ཆེན་གསུམ་པའི་ཇོ་ཚང་གི་ཡིན་ཞིང་ཕ་མིང་ལ་རྡོར་ཁོ་དང་མ་མིང་ལ་འཛམ་དཀར་ཟེར་གྱི་ཡོད་འདུག ལོ་དྲུག་གི་སྟེང་རྔ་བ་ཀིརྟི་དགོན་པར་གྲྭ་པ་བྱས་ཤིང་། ཀིརྟིའི་ནང་བསྟན་གཞོན་ནུའི་སློབ་གྲྭར་ཞུགས་ཏེ་སློབ་སྦྱོང་རྒྱུན་སྐྱོང་བྱེད་བཞིན་པའི་སྐབས་སུ་རྒྱ་གཞུང་གིས་གྲྭ་ཕྲུག་བདུན་བརྒྱ་ལྷག་ཡོད་པའི་ནང་བསྟན་གཞོན་ནུའི་སློབ་གྲྭའི་སྒོ་བཙན་ཤུགས་ཀྱིས་སྒོ་བརྒྱབས་རྗེས། རྔ་བ་ཀིརྟི་དགོན་པའི་གཙོས་བྱས་ཏེ་བྲག་འགོ་དགོན་དང་རེབ་སྐོང་། བླ་རུང་སྒར་སོགས་ནས་ནང་ཆོས་དང་རྩོམ་རིག་སོགས་ལ་སློབ་སྦྱོང་གནད་སྨིན་བྱས་ཤིང་། ད་སྐབས་རྔ་བ་ཀིརྟི་དགོན་པའི་ཕར་ཕྱིན་འཛིན་གྲྭ་ཡིན་འདུག ཕྱི་ལོ་ ༢༠༡༠ ལོར་༼ན་བུན་སེར་པོའི་འཕྱུར་སྟངས།༽ཟེར་བའི་དེབ་ཅིག་བརྩམས་ནས་ཟི་ལིང་ནས་དཔར་བསྐྲུན་བྱས་འདུག
དེ་མིན་བོད་ནང་གི་མཆོད་མེ་དྲ་བ་དང་སེང་རྡོར་དྲ་བ། མཚོ་སྔོན་པོ་ཟིན་བྲིས་སོགས་སུ་ཆེད་རྩོམ་མང་པོ་སྤེལ་མྱོང་མཁན་ཞིག་ཡིན་འདུག ལྷག་པར་ཉེ་ཆར་ཁོང་གིས་༼ལྕགས་སྒྲོག་གིས་བཀྱིགས་པའི་གཏམ་རྒྱུད།༽ ༼རྔ་བའི་ཡི་གེ་བ་དག་ལ་མཚོན་གྱིས་བསྣུན་གྱིན་ཡོད།༽ ༼ང་མ་ཤི་བར་དུ་ལྟ་ཚུལ་བཤད་ཁོ་ཐག་ཡིན།༽ ཟེར་བ་སོགས་ཀྱི་རྩོམ་ཡིག་མང་པོ་ཞིག་སྤེལ་འདུག དམིགས་བསལ་བོད་ནང་གི་རྩོམ་པ་པོ་སྒོ་ཤེར་དང་སེང་རྡོར། དགུ་རུང་སྤུན་གྲོལ་དང་ཞོགས་ལྗང་སོགས་དང་ལྷན་དུ་༼ཟི་ལིང་གཟའ་ཉི་མའི་ཁ་བརྡ་༽སོགས་ཀྱིས་མཚོན་པའི་མཚོ་སྔོན་དགེ་འོས་སློབ་ཆེན་སོགས་ནས་བགྲོ་གླེང་མང་པོ་བྱས་མྱོང་ཡོད་འདུག མ་ཟད་ཐོག་དང་པོར་རྔ་བ་རང་ནས་ཀྱང་༼རང་གྲོལ་བསྐྱར་ཞིབ་༽དང་༼གཟའ་ཉི་མའི་ཁ་བརྡ།༽ཟེར་བའི་བགྲོ་གླེང་གསར་འཛུགས་བྱས་ཏེ་གཞོན་སྐྱེས་མང་པོར་ཤུགས་རྐྱེན་ཆེན་པོ་ཐེབས་འདུག གཞན་རྨེའུ་རུ་མ་ནས་ཀྱང་༼སྨྲ་བརྗོད་མེད་པའི་འུ་ཅག་༽ཟེར་བའི་དམངས་ཚོགས་དང་མཉམ་དུ་བགྲོ་གླེང་ཞིག་གོ་སྒྲིག་བྱས་ཡོད་པ་བཅས།
རྨེའུ་དཀོན་རྒྱམ་གྱིས། འབྲེལ་གཏུགས་ཁ་པར་ཨང་གྲངས། 0061 0403649808
༅༅། རྒྱ་མཚོ་བཏུང་ཡང་མ་ངོམས་། རི་བོ་ཟས་ཀྱང་མ་རྒྱག་པ། རྒྱ་དམར་པོ་ཆོས་མེད་ཀླ་ཀློ་དེ་ཚོའི་ང་ཚོ་གངས་ཅན་པ་ཚོར་གཉའ་གཉོན་ཤ་སྟག་བཏང་པ་ཅི་ཡིན་ནམ།
སྐྱག་རྫུན་བདེན་མིན་རིང་ལུགས་པ་ཚོ་འཛམ་གླིང་མི་མང་ལ་ངོ་ཚ་རྒྱུ་ཅི་ཡང་མི་འདུག།
ང་ཚོའི་ལྷ་སྲུང་དང། སྐྱེས་ལྷ། ཡུལ་ལྷ་རྣམས་ནས་ཕྲན་བུ་ཙམ་ཡང་སྐྱོབས་ཐུབ་ཀྱི་མེད་པ་ཅི་ཡིན་ནམ།
བློ་མིག་ལ་ཉེས་མེད་ཉེས་འཛུགས་ཀྱི་བཙོན་ལ་བཅུག་པར་སེམས་གཏིང་ནས་སྡུག།
ལྷ་ཡོད་ན་གཟིགས།་དགོས། སྐྱེས་ལྷ་། སྲུང་མ་ཡོད་ན་གཟིགས་དགོས། ད་ཡིབ་ནས་མ་བཞུགས།།