ལྷ་རྩེའི་ཁུ་བྱུག
ཡར་ཀི་དགུང་སྔོན་སྤྲིན་པའི་གདན་སྟེང་དུ།།
རྩལ་ཆེན་མཁའ་ལྡིང་ཞིག་ལ་ཁྱུང་ཕྲུག་སྟོང་།།
ཁྱུང་ཕྲུག་ལ་ལས་མཐོངས་སུ་ཡང་རྩལ་སྦྱངས།།
ཁྱུང་ཕྲུག་ལ་ལས་ནམ་མཁའ་རླབས་ཀྱིས་བསྐྱོད།།
སྐལ་མེད་ཁྱུང་ཕྲུག་ང་རྒྱང་གི་གནམ་མཐར་ལུས།།
ལྷོ་བཞུད་སྤྲིན་པ་མཐོང་དུས་དྲན་པ་བྱུང་།།
སྦྲང་ཆར་དལ་གྱིས་འཇོ་དུས་ཡང་དུ་དྲན།།
ཡར་ཀི་རབ་བརྗིད་གངས་རིའི་ལྟོང་ཤེད་དུ།།
གཡུལ་རྒྱལ་གདོང་ལྔ་ཞིག་ལ་སེང་ཕྲུག་སྟོང་།།
སེང་ཕྲུག་ལ་ལ་གངས་དཀར་རྩེ་རུ་འཕྱོ།།
སེང་ཕྲུག་ལ་ལས་སྡེར་ཆགས་ཟིལ་གྱིས་གནོན།།
ལས་ངན་སེང་ཕྲུག་ང་རྒྱང་གི་གངས་མཐར་ལུས།།
གངས་རིའི་དབུ་རྩེ་མཐོང་དུས་དྲན་པ་བྱུང་།།
དབུ་རྩེར་གཞའ་ཚོན་ཤར་དུས་ཡང་དུ་དྲན།།
ཕར་ཀི་རབ་མཛེས་ན་དམར་གསེར་གཞུང་དུ།།
སྟོབས་ལྡན་རྐྱང་དཀར་ཞིག་ལ་རྐྱང་ཕྲུག་སྟོང་།།
རྐྱང་ཕྲུག་ལ་ལས་ཨ་ཡན་ཐང་ཆེན་འགྲིམ།།
རྐྱང་ཕྲུག་ལ་ལས་རྩྭ་བཟང་ཆུ་མཆོག་རོལ།།
བསོད་ཟད་རྐྱང་ཕྲུག་ང་རྒྱང་གི་ས་མཐར་ལུས།།
བྱང་གི་གནམ་མཐའ་མཐོང་དུས་དྲན་པ་བྱུང་།།
བསིལ་བུ་ཡང་མོར་ལྡང་དུས་ཡང་དུ་དྲན།།
ཡར་ཀི་སྐྱོ་བྲག་བླ་མའི་གདན་ས་རུ།།
མཚན་ལྡན་བླ་མ་ཞིག་ལ་སློབ་མ་སྟོང་།།
སློབ་མ་ལ་ལས་ཐབས་གྲོལ་གདམས་ངག་མནོས།།
སློབ་མ་ལ་ལས་དབེན་པའི་རི་སུལ་ཉུལ།།
སློབ་མ་མདོ་མེད་ང་རྒྱང་གི་ས་མཐར་ལུས།།
ས་གའི་དུས་བཟང་ཚེས་དུས་བླ་མ་དྲན།།
གདམས་པའི་དཀོར་མཛོད་ཕྱེས་དུས་ཡང་དུ་དྲན།།
ས་གའི་དུས་ཆེན་ཉིན་བཅོ་ལྔའི་ཡུན་དུ་བཀའ་དྲིན་སུམ་ལྡན་རྩ་བ་བླ་མ་གསལ་བྱེད་རིན་པོ་ཆེས་སྒྲུབ་པའི་སྐུ་མཚམས་ནང་དུ་སྐལ་ལྡན་སློབ་ཚོགས་ལ་ཕྱག་རྒྱ་ཆེན་པོའི་གདམས་ངག་དམར་ཁྲིད་བསྩལ་བའི་གཏམ་ཐོས་པས། ད་ལྟ་རང་བླ་མའི་མདུན་དུ་ཡོད་ན་ཅི་མ་རུང་སྙམ་པའི་དད་གུས་ཀྱིས་སྨུག་པོ་འཇང་གི་ཡུལ་ནས་རས་ཆུང་པས་བླ་མ་དྲན་པའི་ཉམས་མགུར་འགྲོས་ཀྱིས་མྱུར་མོས་བྲིས།
ས་ག་ཟླ་བའི་ཚེས་པ་བཅུ་ཉིན།