དུང་དཀར་ཡོན་ཏན་རྒྱ་མཚོ།
དང་པོ།༽ ཁྱེད་ཅག་བོད་རིགས་ལས་བྱེད་པའམ་བོད་རང་གི་སྐད་དང་ཡི་གེ་ས་ཆའི་སྒྲིག་ལམ་སོགས་ལ་བདག་པོ་བྱེད་མཁན་གྱི་ལས་བྱེད་པ་ཡིན་ཞིང་ཁྱེད་ཚོ་ཚེ་གང་བོར་ལས་བྱེད་པ་བྱེད་ཐུབ་པའང་རང་ས་རང་ཡུལ་ཕ་མ་སྤུན་མཆེད་སོགས་ཀྱི་དྲིན་ཡིན་པ་ཤེས་པའི་སྟེང་མ་མཐའ་ཡང་བོད་རང་གི་ཆབ་དཔལ་རིག་གསུམ་ལ་བྱས་རྗེས་འཇོག་མ་ཐུབ་རུང་གནོད་མི་སྐྱེལ་བའི་རེ་བ་ཞུ་བཞིན་ཡོད་ལགས།
གཉིས་པ།༽ ཁྱེད་ཅག་ནི་ཤེས་ཡོན་པའི་སྡེར་གཏོགས་པས་ན་བོད་རང་གི་སྐད་ཡིག་ལ་བྱང་ཆུབ་པ་ནི་སྨོས་མ་དགོས་པ་རེད། དེ་བས་བོད་སྤྱི་ཚོགས་ལ་ལྷག་བསམ་དང་དུང་བ་ཆེ་བའི་རྒྱུ་མེད་དབུལ་བོ་ཚོས་དཀའ་སྡུག་འབུམ་ཕྲག་གིས་སླར་གསོ་གནང་བཞིན་པའི་ཁྱེད་དང་ང་ཡི་ཕ་སྐད་ཕ་ཡིག་ལ་སྦྲག་སྐད་སྦྲག་ཡིག་གི་ནག་ཐིག་མི་བཟོ་རོགས་ཞེས་རེ་བ་ནན་གྱིས་ཞུས་པ་ལགས་སོ།།
གསུམ་པ།༽ འཆི་གསོན་གང་ལ་ཐུག་ནའང་མཐར་རེ་ས་དང་རྟེན་ས་དེ་ཡུལ་མི་སྤུན་ཟླ་དག་ལས་མེད་པས་ན་ཁྱེད་ཚོས་དེ་དག་གི་ཆེད་དུ་དང་མི་རིགས་དང་རང་ཉིད་ཀྱི་ཆེད་དུ་ལས་བྱེད་པ་ཡང་དག་པ་རེ་བྱེད་རྒྱུ་ལས་ཁྱི་སྨྱོན་ཇི་བཞིན་ཁ་ནང་ལ་ཕྱིར་འཁོར་ནས་བོད་རིགས་མི་དམངས་ཀྱི་འཚོ་རྟེན་གྱི་སྟེང་ལ་སོ་མི་འདེབས་པའི་རེ་བ་སྙིང་ནས་ཞུ།
བཞི་བ།༽ ཁྱེད་ཅག་ཕ་ཡུལ་ལ་ལོག་ཐེངས་རེར་མི་བུ་རླབས་ཆེན་ཚོའི་དཀའ་སྡུག་གི་སློབ་གསོ་དང་ལ་རྒྱ་ཡི་རྡོ་རིང་ལས་བྱུང་བའི་ཕ་སྐད་ལ་གས་ཆག་མི་གཏོང་རོགས་ཞུ། སྤྱིར་བཤད་ན་ཕ་ཡུལ་གྱི་ཡུལ་མི་ཚོ་ཕ་སྐད་ཕ་ཡིག་གི་ཕྱོགས་ལ་ཅུང་ཙམ་བྱང་གི་འདུག་མོད། ཁྱེད་དང་ཁྱེད་ཀྱི་རྒན་མོ། ད་དུང་བོད་སྐད་གོ་ཡང་མི་ཤོད་པའི་བྱིས་པ་རྒྱ་མ་བོད་དག་ནི་ཁུལ་དང་རྫོང་ཞིང་ཆེན་རིམ་པ་ནས་ཕྱིར་ཕ་ཡུལ་ལུང་པར་ལོག་ཐེངས་རེར། རང་གི་ཕ་སྐད་དང་ཕ་ཡིག་ལ་རྫོབ་ཆེན་རེ་བསྐྱིལ་ནས་བྱ་རྡོ་སྟེང་ནས་འཕུར་བ་བཞིན་ཕྱིར་འདུག་གནས་ལ་བུད་འགྲོ་བ་ནི་བོད་མི་རིགས་ལ་མཚོན་ན་ཇི་འདྲའི་ཉེན་ཁ་ཆེ་བ་ཞིག་རེད་ཨང་།། དེ་བས་ཁྱེད་ཅག་ཕ་ཡུལ་ལ་ལོག་སྐབས་ཕ་སྐད་དང་ཕ་ཡིག་ལ་བརྩི་བཀུར་དང་དོ་སྣང་། ལྷག་པར་དུ་ཁྱིམ་མི་བཟའ་ཚང་གི་སྔུན་ནས་ཕ་སྐད་ཕ་ཡིག་དག་མ་བཤད་མཁན་གྱི་སྣེ་འཁྲིད་པ་དེ་ཡིན་ཆོག་ཆོག་རེད།
ལྔ་བ།༽ བོད་མི་རིགས་ཤིག་གཞུང་ཞབས་པར་གྱུར་བ་ནས་བཟུང་བོད་ལ་ངོ་ལོག་འདུག་ཅེས་ནའང་མི་ཆོག་པ་མེད་མོད། དེ་ཡང་མ་ངེས་པ་ཞིག་ཡིན་སྲིད། འོན་ཀྱང་ཁྱེད་རང་ལས་བྱེད་པར་གྱུར་བ་ནས་བོད་སྐད་དང་བོད་ཡིག་བརྗེད་སོང་བ་འདི་ནི་མིའི་རིགས་ཀྱི་ལོ་རྒྱུས་དང་གནས་ལུགས་ཀྱི་སྟེང་ནས་བཤད་ན་ཁྱེད་ནི་མི་རིགས་གཡོ་ཚོང་བྱེད་མཁན་གྱི་ཉེས་ཅན་དུ་གྱུར་སོང་བ་རེད། དེ་འདྲ་ཞིག་ཡིན་ཚེ་བོད་ལ་ལས་བྱེད་པ་འམ་གཞུང་ཟ་བ་ཡོད་པ་ལས་མེད་ན་བཟང་བ་འདྲ་བོ་རེད།
དྲུག་པ།༽ མི་སུ་ཞིག་ཡིན་ན་རང་གི་ཁྱིམ་ཚང་དང་ཁྱིམ་རྒྱུད་དེ་དར་ཞིང་གནས་ན་འདོད་པ་ལས་ཉམས་ན་མི་དགའ་བ་ཡིན་པས་ན། ཁྱེད་གྱི་མི་རིགས་དང་ཁྱེད་ཀྱི་ཕ་ས་འདི་འཇིག་རྒྱུའི་མགོ་བརྩམ་ཡོད་ཚེ་ད་གཟོད་ཁྱེད་ཀྱི་ཤ་རུས་ཀྱི་རྒྱུན་འདི་ཡང་གང་འདྲ་ཞིག་ཏུ་འགྱུར་གྱི་ཡོད་པ་བསམ་བློ་ཐོངས་ཤིག
བདུན་པ།༽ ཀུན་གཟིགས་པཎ་ཆེན་རིན་པོ་ཆེ་མཆོག་གིས་ཀྱང་། ལྷག་པར་དུ་མི་རིགས་ཀྱི་ལས་བྱེད་པ་ཡིན་འདོད་རྒྱུ་ཞིག་གིས་རང་གི་མི་རིགས་ལ་གཅེས་དགོས་ཀི་ཨ། བཟང་དགོས་ཀི་ཨ། ཕན་ཐོགས་དགོས་ཀི་ཨ། ཞེས་གསུངས་པ་ནང་བཞིན་ཁྱེད་ཅག་བོད་རིགས་ལས་བྱེད་པ་ཞིག་ཡིན་པའི་ཆ་ནས་མི་རིགས་ལ་ཞབས་འདེགས་ཞུ་རྒྱུ་དང་རོགས་རམ་གནང་རྒྱུའི་ཆེད་དུ་རེད་མ་གཏོགས། གུང་ཏང་ཚང་ལ་གཞན་པའི་དགོས་མཁོ་ཅང་ཡོད་པ་མ་རེད། དེ་བས་ཁྱེད་ཅག་ནི་མི་རིགས་ལས་བྱེད་པ་ཞིག་ཡིན་པའི་སྟེང་ནས་རང་རང་གི་འོས་འགན་དེ་མི་བརྗེད་རོགས་ཞུ་ཞེས་ཞུས་པ་ལགས་སོ།།
བརྒྱད་པ།༽ མི་རིགས་ཀྱི་ལས་བྱེད་པ་ཚོས་གཞུང་ཡིག་སྣ་ཚོགས་བོད་ཡིག་གི་སྟེང་ནས་འབྲི་རྒྱུ་དང་དམངས་ཁྲོད་ལའང་བོད་ཡིག་གི་སྟེང་ནས་སྤེལ་ཅི་ཐུབ་གནང་རྒྱུའི་འབོད་སྐུལ་ཞུས་པ་ཡིན། དོན་ངོ་མར་བཤད་ན་འདི་ནི་ང་ཚོའི་ལས་བྱེད་པའི་སྡེ་ངན་སོང་བ་རེད་མ་གཏོགས་གཞུང་ཕྱོགས་ནས་འདི་ལ་རྒྱབ་སྐྱོར་དང་ཁྲིམས་མཐུན་གྱི་ཁེ་དབང་ཡོད་པ་རེད། བོད་ལ་ཁེ་དབང་གང་ཡོད་དག་ལས་བྱེད་པའི་སྡེ་ནས་དབུ་བཙུགས་ཏེ་ལག་ལེན་གནང་རྒྱུ་དེ་གལ་གནད་ཆེན་པོ་རེད། དེ་བས་དུས་དང་རྣམ་པ་ཀུན་ཏུ་འདིའི་ཕྱོགས་ལ་འབད་པ་བྱེད་རྒྱུའི་རེ་བ་ཞུ་བཞིན་ཡོད་ལགས་སོ།
དགུ་བ།༽ གོང་གི་རེ་འདོད་འདི་དག་སྒྲུབ་མི་ཐུབ་མཁན་དང་ཟ་ཕོར་ཁོ་ནའི་ཆེད་དུ་མི་རིགས་ཀྱི་ཆབ་དཔལ་རིགས་གསུམ་ལ་ངོ་རྒོལ་བྱེད་པ་དང་ཏང་གི་སྒྲིག་གཞི་མི་ཤེས་པའི་ལས་བྱེད་པའི་རིགས་ནི་རྩ་བ་ནས་མེད་ན་བཟང་བ་རེད། དེ་བས་ལས་བྱེད་པའི་ཕྱོགས་ནས་མགྱོགས་བྲིས་སུ་ཐལ་བ་འདི་བདག་གི་བསམ་ཚུལ་དང་ཞུ་བ་ཙམ་ཡིན་པས་འདི་ལ་ཡིད་མཐུན་ཡོད་མཁན་ཞིག་ཡིན་ཚེ་བསམ་བློའི་སྟེང་ནས་རྒྱབ་སྐྱོར་གནང་རོགས་ཞུ་ཞེས་ཞུས་པ་ལགས་སོ།།
ཁྱེད་ཚོ། ཞེས་མང་ཚིག་གསལ་བྱེད་ཀྱི་ཚོ་ཇི་ལྟར་བྱུང་བརདཔྱད་པ། ཁ་ནས། ཙོ།མ་གཏོགས། ཚོ། ཞེས་མི་འཐོན། ཅག་ཅེས་པ་གྱུར་ནས་ཙོར་གྱུར་པ། བློ་ནང་དུ་བཀུགས་ཏེ། ཙོའམ་ཚོ་ཞེས་གང་ཡིན་པ་རང་གི་ལྕེ་ལ་དྲི་དགོས་སོ།