གནས་ཚུལ་གཏོང་མཁན། ངག་དབང་།
ཕྱི་ལོ་༢༠༡༤ ཟླ་བ་༡༠ ལོ་མཇུག་ཏུ་༧གོང་ས་མཆོག་འདི་ག་ས་གནས་སུ་ཆིབས་བསྒྱུར་སྐབས་དོལ་ཚོགས་ནས་བྱ་ངན་བརྩམས་པ་ཁྲིམས་ཐོག་ཏུ་དེབ་སྐྱེལ་བྱས་པ་དེ་བཞིན་དེ་རིང་ཕྱི་ལོ་༢༠༡༦ ཟླ་བ་༥ ཚེས་༢༣ ཉིན་འདི་ག་ས་གནས་བྷོསྭ་ཊོན་མངའ་ཁོངས་ཀྱི་ཁེམ་བི་རིཇ་རྫོངས་ཁུལ་ཁྲིམས་ཁང་(Cambridge Distric Court) ཏུ་མཐའ་མའི་ཐག་གཅོད་ཆེད་སྔ་དྲོའི་ཆུ་ཚོད་ ༩ ཐོག་ངོས་ཕྱོགས་གཉིས་ཀ་ཁྲིམས་བཀུག་གནང་བྱུང་། ཆུ་ཚོད་ ༩།༣༠ ཐོག་ནག་ཉེས་པ་བློ་བཟང་རྒྱལ་མཚན་ནམ་(རྡོ་བ་རྒྱག་པ་)ཁོ་པའི་ཁྲིམས་རྩོད་པ་དང་བོད་པ་སྐད་སྒྱུར་བཅས་གསུམ་ནས་གནའ་སྐྱེལ་དམ་འབུལ་རྗེས་ས་གནས་སྲིད་གཞུང་གི་ཁྲིམས་རྩོད་པས་བློ་བཟང་རྒྱལ་མཚན་གྱི་ཉེས་དམིགས་ཆ་ཚང་ཁྲིམས་དཔོན་ཆེན་མོར་སྙན་སེང་ཞུས་རྗེས་དོལ་ཚོགས་པའི་ཁྲིམས་རྩོད་པས་གནད་དོན་དེའི་སྐོར་བློ་རྒྱལ་དང་གྲོས་བསྡུར་བྱ་དགོས་པས་དུས་ཚོད་འཕྲན་བུའི་འབོད་བསྐུལ་གྱིས་ཆུ་ཚོད་ ༡༠།༤༥ བར་ཁོ་པ་ཚོ་གྲོས་བསྡུར་རྗེས་ཆུ་ཚོད་ ༡༡ པ་མ་ཟིན་ཙམ་ལ་ཁྲིམས་དཔོན་ཆེན་མོ་མཆོག་གི་མདུན་དུ་སྐད་སྒྱུར་བརྒྱུད་ནག་ཉེས་ངོས་ལེན་བྱས་པར་ཁྲིམས་དཔོན་མཆོག་ནས་ད་རེས་ཁྱེད་རང་གིས་ནག་ཉེས་ངོས་ལེན་བྱས་པ་འདིས་ད་ལྟ་ཁྱེད་རང་ཨ་རིའི་མི་སེར་ཆགས་མེད་པས་མ་འོངས་པར་ཁྱེད་རང་ཨ་རིའི་མི་སེར་ཆགས་རྒྱུར་འགོག་རྐྱེན་ཆགས་སྲིད་པ་དེ་ཤེས་ཀྱི་ཡོད་དམ་ཞེས་སྐད་སྒྱུར་བ་བརྒྱུད་བཀའ་འདྲི་གནང་བར་ཤེས་ཀྱི་ཡོད་ཅེས་ལེན་འདེབས་བྱས་སོང་།
ཡང་ཁྲིམས་དཔོན་ནས་ནག་ཉེས་ངོས་ལེན་བྱས་ན་ཁྱེད་རང་ཉེན་རྟོགས་པས་ཚོད་ལྟའི་དུས་ཡུན་ལོ་གཅིག་འཇོག་རྒྱུ་དང་ལོ་དེའི་རིང་ནག་ཉེས་ཆེ་ཆུང་ལ་མ་ལྟོས་པར་དཔེ་ན། སྣུམ་འཁོར་གཏོང་ཆོག་ལག་འཁྱེར་མེད་པར་སྣུམ་འཁོར་གཏོང་བ། རྒྱ་ལམ་གྱི་གློག་དམར་པོར་སྣུམ་འཁོར་གཏོང་བ། ཆང་རག་དང་ཉལ་ཐག་སོགས་བེད་སྤྱོད་འོག་སྣུམ་འཁོར་གཏོང་བ། གཞན་ལ་སྣུམ་འཁོར་གྱིས་བརྡུང་པ་དང་། གཞན་ཡང་སྲང་ལམ་མམ་ཁྱིམ་ཁང་སོགས་གང་སར་འཁྲུག་པ་རྒྱབ་པ་སོགས་ཀྱི་ཁྲིམས་འགལ་རིགས་བྱས་ཚེ་འཛིན་བཟུང་གི་ནག་ཉེས་ལ་ཞིགས་པས་བཙོན་བཅུག་ལོ་གཉིས་དང་ཕྱེད་ཀའམ། ཨ་རི་ནས་ཕྱིར་འབུད་བྱེད་པ། ཨ་རིའི་མི་སེར་ཆགས་རྒྱུ་མེད་པ་སོགས་ཡོང་སྲིད་པ་ཤེས་སམ་ཞེས་བཀའ་འདྲི་གནང་སྐབས་ཤེས་ཀྱི་ཡོད་ཅེས་ལེན་འདེབས་བྱས་སོང་། དེ་ནས་ཡང་ཁྱེད་རང་གནོད་འཚེ་ཕོག་ཡུལ་ངག་དབང་ནོར་བུའི་ཉེ་འགྲམས་སུ་འགྲོ་བ་དང་གནོད་འཚེ་ཕོག་ཡུལ་ལ་མྱུར་འཕྲིན་ཁ་པར་ངོ་དེབ་སོགས་བརྒྱུད་ཐད་ཀར་འབྲེལ་བ་བྱེད་པ་དང་ཡང་གཞན་ལ་བརྒྱུད་བསྐུལ་གྱིས་འབྲེལ་བ་སོགས་བྱེད་མི་ཆོག་པའི་བཀའ་གནང་སོང་།
མཐའ་དོན་དུ་ཁྲིམས་དཔོན་མཆོག་ནས་བློ་བཟང་རྒྱལ་མཚན་ལ་ད་རིང་ཐེངས་གཅིག་ལ་ས་གནས་ཁྲིམས་རྩོད་པར་ཨ་སྒོར་ ༩༠ དགུ་བཅུ་ཐམས་པ་ས་གནས་སྲིད་གཞུང་ལ་ཟླ་རེར་ཨ་སྒོར་ ༥༠ ཐམས་པ་ལོ་གཅིག་རིང་འབུལ་དགོས་པ་དང་གལ་ཏེ་འབུལ་ཆད་བྱུང་ན་ལམ་སེང་འཛིན་བཟུང་གིས་ས་གནས་བྷོསྭ་ཊོན་ཁྲིམས་ཁང་དུ་ཁྲིམས་བཅད་གཏོང་རྒྱུའི་ཉེན་བརྡ་ཡང་བཏང་སོང་། དེ་རྗེས་ཁྲིམས་དཔོན་ཆེན་མོ་མཆོག་ནས་ཡིག་ཆའི་ཐོག་བློ་བཟང་རྒྱལ་མཚན་ནས་ས་རྟགས་ལེན་རྗེས་ཁྲིམས་གཏུགས་གི་ལས་རིམ་ཚར་སོང་།
དེ་ནས་སྲིད་གཞུང་ཁྲིམས་རྩོད་པས་གུས་པར་ལག་པ་བཏང་ཏེ་ད་ནས་བཟུང་ཁྱེད་རང་ནམ་ཡང་ཁྲིམས་ཁང་འདིར་ཡོང་དགོས་ཀྱི་མ་རེད་ཁྱེད་རང་གི་ཁྲིམས་གཏུགས་ལས་ཀ་ཚང་མ་ཡག་པོ་བྱུང་སོང་བས་བཀྲིས་བདེ་ལེགས་ཡོད་བཅས་གསུངས་བྱུང་། 
དེ་ནས་ཁྲིམས་ཁང་གི་ཕྱི་ལོགས་སུ་བྷོ་སྭ་ཊོན་བོད་ཀྱི་བདེན་དོན་དམངས་ཁྲོད་ཁ་བརྡའི་རྒྱུན་ལས་རྣམས་གུས་ཚོར་འགུགས་བཞུགས་འདུག་པས་གུས་པའི་ཁྲིམས་རྩོད་པའི་སྐུ་ཚབ་ལྕམ་སྐུ་ས་ར་ནེཡ་སུརེཤ་(Saranya Suresh) མཆོག་ལ་གྱོད་གཞི་འདི་སྐོར་བཅའ་འདྲི་དང་གུས་པ་ལ་ཡང་བཅའ་འདྲི་གནང་སོང་བའི་གནས་ཚུལ་མདོར་བསྡུས་སུ།
ཨཱ། ད་མ་ལེགས་མྭོ་བྱུང་ནུག ཨང་ངའོ།
སྔར་ནོར་བ་རེད། ད་ཡག་པོ་རེད། ནོར་ཡོད་མ་རེད། ད་དུང་་་
༅༅། དོལ་ཚོགས་དེ་ཚོ་ནི། ཚེ་མགོ་ཆོས་སྒོར་ཞུགས།། ཚེ་བར་སྐྱབས་ངོ་མ་ཤེས།
ཚེ་མཇུག་ཐ་ཤལ་རྒྱ་དམར་པོའི་རྒྱུགས་ཁྱི་བྱས།།
ཉི་མ་ལ་རྒྱབ་བསྟན། རང་ཡུལ་ལ་ངོ་ལོག།
རང་ཡུལ་འཕྲོག་མཁན་། མ་བསད་མཁན་ལ་ཐུགས་རྗེ་ཆེ་བརྗོད།
ཕ་བསད་མཁན་ལ་བཀྲིན་ཆེ་བརྗོད།
གཉེན་སྤུན་བསད་པར་ལེགས་སོ་བརྗོད།
སྐྱབས་ལྷ་འདྲེར་བྱེད་པ་ངོ་རེ་ཚ།།