—-མཁན་པོ་དཔའ་བརྟན།
སྔོན་ལས་ཤུགས་ཀྱིས་ལྷན་དུ་ཚོགས་པ་དང་།།
བྱ་བའི་དབང་གིས་སོ་སོར་གྱེས་ན་ཡང་།།
དམ་ཚིག་གཅིག་པའི་གྲྭ་ཚང་སེར་ཉོབ་མར།།
ཚོགས་པ་གཞན་ལས་ལྷག་པའི་ཞེན་པ་བདོག།
ཡག་པོ་རེད་ཟེར་གནམ་ལ་བཀྱག་ཀྱང་བླའི།།
སྡུག་པོ་རེད་ཅེས་དོང་དུ་མནན་ཡང་རུང་།།
འགྲོ་བའི་སེམས་ཁམས་ཆོས་ལ་འགོད་པ་དང་།།
ཆོས་ལ་ཆོས་བཞིན་སྒྲུབ་པོ་གཞན་ལས་མང་།།
འདི་ཉིད་བླ་མ་དམ་པའི་བཀའ་དྲིན་ཏེ།།
འདི་ཉིད་གྲུབ་བརྙེས་གོང་མའི་བྱིན་རླབས་ཡིན།།
འདི་ཉིད་གནས་དང་དགོན་པའི་ཐུགས་རྗེ་སྟེ།།
འདི་ཉིད་དབུ་ནག་བོད་པའི་ལ་རྒྱའང་ཡིན།།
གཞན་གྱིས་མ་འཇོན་སྣེ་བརྒྱ་གླེང་བ་ལས།།
རང་གིས་གང་འཇོན་ལས་གཅིག་བྱས་པ་དགའ།།
ཚང་མས་དམ་ཆོས་འགྲུབ་པ་དཀའ་ན་ཡང་།།
སུས་ཀྱང་མ་འགྲུབ་ཟེར་ན་འཆལ་གཏམ་ཡིན།།
གཞན་གྱི་ལེགས་པའི་ཆ་ཤས་ལེན་པ་དང་།།
རང་གི་སྐྱོན་ལ་ཤེས་ནས་འདོར་བ་སྟེ།།
རང་གཞན་གོ་ས་བརྗེས་ནས་དཔྱོད་ཤེས་ན།།
གཉིས་ཕན་མཉམ་གནས་ཡོང་བའི་དུས་ཤིག་ཡོད།།
བླ་མས་གྲྭ་ཚང་བདེ་སྡུག་མཐོང་བ་དང་།།
གྲྭ་པས་བླ་མའི་བསྟན་ཆུས་སྲུང་བ་སྟེ།།
བླ་གྲྭ་ཕན་ཚུན་གཅིག་ལ་གཅིག་བརྟེན་པ།།
ཤེས་ན་དགོན་པ་དར་བའི་གཞི་ཚུགས་སོ།།
དགོན་གཙོ་དགེ་དྲག་རྣམས་ལ་སྐུ་ཡོན་དགོས།།
གྲྭ་བཙུན་རེ་རེ་བཞིན་དུ་ལྷག་བསམ་དགོས།།
དགེ་འདུན་འདུས་པའི་སྡེ་ལ་ཐུགས་མཐུན་དགོས།།
མཐོ་དམན་ཀུན་ལ་བསླབ་ཁྲིམས་གཙང་མ་དགོས།།
བླ་མའི་མཛད་པ་ལུང་རྟོགས་བསྟན་ལ་སྐྱོང་།།
སློབ་མའི་རང་འགན་ཐོས་བསམ་སྒོམ་ལ་ཁུར།།
དགོན་པའི་དར་རྒྱས་བཤད་དང་སྒྲུབ་པར་བརྩི།།
ཀུན་ཀྱང་བསྟན་དང་འགྲོ་བའི་དོན་ལ་འབད།།
རང་ལ་དགོས་པའི་ཡོན་ཏན་སྣ་གཅིག་མེད།།
རོགས་ལ་ཕན་པའི་བྱ་བ་གྲུབ་པའང་མེད།།
བསྟན་ལ་སྲིད་ཞུའི་ནུས་པ་ཏིལ་ཙམ་མེད།།
མེད་གསུམ་འཛོམས་དེས་གུས་དང་བཅས་ཏེ་ཕུལ།།