—-
རྔ་བ་ཀུན་བཟང་།
འཁོར་བ་ལགས། ང་ལ་ལན་ཞིག་གནོངས་དང་།
དུས་ཚོད་ཀྱི་མནར་གཅོད་ཁྲོད་ནས།
སྡུག་བསྔལ་དེ་བདེ་བར་འཛིན་པའི་ང་ཚོ།
ད་གཟོད་རྣག་ཁྲག་གི་སྐོམ་གདུང་སད་པས།
ངས་ཡང་བསྐྱར་དེ་རིང་།
འདི་ལྟར་ཁྱོད་ལ་འདྲི་བཞིན་ཡོད།
རེད་ཡ།
ས་གཞི་ནི་སྔར་བཞིན་སྟོང་ལྷང་ལྷང་དུ་གནས་ཤིང་།
འཇམ་ཐིང་ཐིང་གི་མཚན་ལྗོངས་དང་འདྲ་བས།
རླུང་བུའི་ལྡང་ཕྱོགས་ཀྱང་ཧ་ཅང་འཇམ།
འོན་ཀྱང་།
ལན་གཅིག་གཟིགས་དང་།
ང་དང་ངའི་གཡས་གཡོན་ན།
ལ་ལ་སྐད་ཅིག་བདེ་བའི་ཞགས་པས་བཅིངས།
ལ་ལས་འཁོར་བའི་སྡུག་བསྔལ་བདེ་བར་འཛིན།
ལ་ལས་ཚ་གྲང་གདུང་བའི་ངུ་འབོད་ཤོར།
ལ་ལ་ལོངས་སྤྱོད་ཆགས་པས་ངན་སོང་ལྷུང་།
གང་ལྟར།
ངས་འདི་ལྟར་ཁྱོད་ལ་འདྲི་བཞིན་ཡོད།
དཀོན་མཆོག་གིས་གུ་ཡངས་མེད་ན།
ཤ་རུས་དག་ཞུ་ནས་དུ་སྔོན་ལ་གྱུར་རྗེས།
འཁོར་བ་ཁྱེད་འཇིགས་པ།
ངའི་མེ་ལོང་ངོས་སུ་ཤར་སྲིད།
༢༠༡༦ ། ༥ ། ༢༨