—-སྐྱོ་བྲག་དགའ་དབང་།
དཔྱིད་ཀ་བོད་ཡུལ་མཐོ་སྒང་གི་ས་ཆུ་དྲོས་པ་ན། མེ་ཏོག་རྣམས་སྐྱེ་བ་ཐོག་མའི་གྲས་སུ་མེ་ཏོག་གི་འདབ་མ་དམར་པོ་ལ་སྔོན་པོའི་མདངས་ཆགས་པ་ཆུང་ངུ་ཞིག་ཆུ་འགྲམ་གྱི་ཉེ་སྐོར་དག་ཏུ་དམར་ཐ་རེ་སྐྱེ་ཡོང་བའི་མིང་ལ། ང་ཚོའི་ལུང་པས། མེ་ཏོག་འདི་སྐྱེ་བ་དང་ལུག་མ་མོ་ལ་ལུ་གུ་བཙའ་བ་ཟླ་དུས་མཉམ་པ་ལ་བསམས་ཏེ། ལུ་གུ་མེ་ཏོག །ཅེས་འབོད། ཁམས་ལྷ་ཐོག་བ་གོར་འབྲོག་སྡེས། བྱ་མིག་མེ་ཏོག །ཅེས་ཟེར་གྱི་ཡོད་འདུག་པ་ནི། དབྱིབས་དང་ཁ་དོག་ལས་བཏགས་པར་མངོན། ད་དུང་བོད་ཀྱི་ཡུལ་ལུང་གཞན་པས་ཀྱང་མིང་མ་འདྲ་བ་རེ་འདོགས་ཀྱི་ཡོད་པ་ནི་ངེས་པ་རེད།
མེ་ཏོག་འདི་སྐྱེས་པའི་རྗེས་ནས་རིམ་པར་རྩྭ་ལྡུམ་རྩི་ཤིང་མེ་ཏོག་གི་ཚལ་རྣམས་འགྲན་པ་བཞིན་རྒྱས་པས་རི་ཐང་ཡོངས་སུ་བཟུང་བའི་མཛེས་སྡུག་གིས། བོད་ཡུལ་གནས་སྐབས་མིའི་ཞིང་ཁམས་ཤིག་ཏུ་འགྱུར་འགྲོ་བས་ན། ཕོ་མོ་རྒས་གཞོན་གང་ཞིག་གིས་མེ་ཏོག་འདི་ཐོག་མར་མཐོང་བ་ན། སེམས་ལ་དགའ་སྣང་ཁྱད་པར་བ་ཡོང་ཕྱིར། རོགས་པ་ཕན་ཚུན་བར་དུ། ད་ལུ་གུ་མེ་ཏོག་སྐྱེས་འདུག །ཅེས་གླེང་མོལ་བྱ་སྲོལ་ཡོད།