གངས་རི་སྐྱབས།
བོད་སྐྱེ་རྒུ་མདོའི་ས་ཡོམ་གོད་ཆག་ཁྲོད་ཡུལ་མི་སྟོང་ཕྲག་མང་བོའི་ཚེ་སྲོག་ཤོར་ཞིང་། ཕ་མེད་མ་མེད་ཀྱི་ཤུལ་ལུས་དྭ་ཕྲུག་རྣམས་ཀྱིས་འཇིག་སྐྲག་དང་ངུ་སྐད་བར་ནས་ཕ་མ་འཚོལ་བཞིན་ཡོད། ཕ་མ་དང་གཉེན་ཉེ་མང་བའི་ཕྲུ་གུ་དང་སྤུན་མཆེད་ཀྱི་བེམ་རོ་མ་རྙེད་མ་རག་པར་སྐྱོ་གདུང་གི་ཉིན་མཚན་རེ་རེ་ཨུ་ཚུགས་ཀྱིས་སྐྱེལ་བཞིན་ཡོད། ཡུལ་ཤུལ་ས་ཁུལ་གྱི་ཤུལ་ལུས་མང་ཚོགས་ཀྱི་ངོས་ནས་རྒྱ་ནག་སྲིད་འཛིན་གྱི་མཚན་ཐོག་ལ་ས་གནས་མི་མང་གི་ད་ལྟའི་སྡུག་བསྔལ་དང་རེ་བ་དམར་དམར་བོ་བཀོད་པའི་སྙན་ཞུ་ཞིག་ཕུལ་ཟིན་ནའང་། རྒྱ་ནག་སྲིད་གཞུང་གིས་ད་དུང་མང་ཚོགས་ཀྱི་སེམས་ཁ་བདེ་བའི་ལན་གང་ཡང་འབྱོར་མི་འདུག
༧གོང་ས་མཆོག་སྐུ་སྒེར་གྱིས་གསར་འགོད་པ་བསྡུས་ཏེ་ཁོ་རང་ཡང་ཕ་ཡུལ་ཡུལ་ཤུལ་གྱི་མི་མང་ལ་ངོ་ཐུག་ཏེ་ས་གནས་ས་ཐོག་ཏུ་བསྔོ་སྨོན་དང་སེམས་གསོ་ཞུ་རྒྱུའི་ཐུགས་འདུན་ཆེ་བའི་གསུང་འཕྲིན་བསྒྲགས་ཡོད། ཉིན་འདི་དག་གི་རིང་ལ་རྒྱ་ནག་སྲིད་གཞུང་གིས་ཨ་ལེན་ཅི་ཡང་མེད་པར་ཁུ་སིམ་པོར་བསྡད་འདུག འདི་ནི་ཆེས་སྙིང་རྗེ་མེད་པའི་རྒྱ་ནག་སྲིད་གཞུང་གི་བྱ་སྤྱོད་འཛམ་གླིང་མི་མང་ལ་བསྟན་པ་ཞིག་རེད། ལར་རྒྱ་ནག་སྲིད་གཞུང་གིས་ལས་དོན་ཆེ་མ་ཆུང་གསུམ་གང་ཡིན་ན་ཆབ་སྲིད་ཀྱི་ངོ་བོར་སྦྱར་ཏེ་འབངས་མི་སེར་ལ་དཀའ་ངལ་ཚད་མེད་མྱོང་དུ་འཇུག་པ་ནི་འདི་ཁོ་ནས་ཀྱང་ཤེས་ཐུབ་ཞིག་མ་རེད་དམ། གལ་སྲིད་རྒྱ་ནག་སྲིད་གཞུང་ལ་དངོས་དོན་སྙིང་རྗེ་དང་བྱམས་བརྩེ་ཅན་ཞིག་ཡིན་ན། ད་ཐེངས་ཀྱི་རང་བྱུང་གནོད་འཚེ་ཚབས་ཆེན་ཕོགས་ཡུལ་གྱི་མི་མང་དག་གི་རེ་བ་སྟོང་ཟད་དུ་གཏོང་ག་ལ་ནུས།
དེ་རིང་རྒྱ་ནག་སྲིད་གཞུང་གིས་རྒྱལ་ཁབ་ཀྱི་ཁྲིམས་སྲོལ་ལྟ་བུར་བརྡ་འཕྲིན་གྱི་པར་ངོས་ཡོད་ཚད་ཀྱི་ཚོན་མདོག་བསྒྱུར་ཏེ་མྱ་ངན་གྱི་ལས་རིམ་རྒྱ་ཆེན་པོ་སྒྲུབ་ཀྱིན་འདུག དེ་ནི་སྲིད་གཞུང་གིས་བཀའ་རྒྱ་བཞིན་ནམ་གང་ལྟར་གཞུང་སྒེར་ཚང་མའི་གཅིག་མཚུངས་ཀྱི་མྱ་ངན་ཞུ་སྟངས་ཤིག་ཡིན་པས་སྙིང་ནས་བཀའ་དྲིན་ཆེ་མོད། ཡུལ་ཤུལ་མི་མང་གི་སེམས་ཀྱི་དཀའ་ངལ་ནི་དེ་ཙམ་གྱི་སེལ་མི་ཐུབ་པའང་དངོས་ཡོད་རེད། བོད་མི་རིགས་འདི་གནའ་ནས་ད་བར་ཆོས་ལ་དད་ཅིང་ཆོས་ནི་ཤི་གསོན་གཉིས་ཀྱི་ཚེ་སྲོག་དང་འབྲེལ་ནས་ཡོད་པ་ཞིག་ཏུ་ངོས་འཛིན་སྟབས། ཡུལ་ཤུལ་མི་མང་གི་མྱ་ངན་གྱི་མིག་ཆུ་གཅོད་མཁན་ནི་ཁོང་ཚོས་ཚེ་གང་བོར་ལུས་སེམས་གཉིས་ཀྱིས་འདོར་མ་མྱོང་བའི་སྐྱེས་བུ་ཞིག་དང་འབྲེལ་ནས་ཡོད་ནི་རེད། འདི་ཡང་རྒྱ་ནག་སྲིད་གཞུང་གིས་ཤེས་ཡོད་པའང་ཁོ་ཐག་ཡིན་ནི་རེད། འོན་ཀྱང་ཆབ་སྲིད་ཀྱི་དོགས་འདྲོག་ཆེ་བའི་རྒྱ་ནག་སྲིད་གཞུང་འདིས། ད་ཐེངས་ཀྱང་མགོ་སྐོར་དང་གཡོ་སྒྱུའི་བར་ནས་ཡུལ་ཤུལ་མི་མང་བློས་གཏོང་རྒྱུ་རེད། རྩེད་མཚར་ལྟ་བུའི་མྱ་ངན་གྱི་སེམས་གསོ་རྫུན་མའི་བར་ནས་ཤི་བོ་ཚོའི་རྣམ་ཤེས་ཕྱོགས་བཞིར་ལྡོམ་དུ་འཇུག་རྒྱུ་རེད། ཨ་ཤི་རེ་གོ ཨོཾ་མ་ཎི་པདྨེ་ཧྰུྃ། ཨོཾ་མ་ཎི་པདྨེ་ཧྰུྃ། ཨོཾ་མ་ཎི་པདྨེ་ཧྰུྃ།