མགར་ཐར་མཁྱེན་རབ་འོད་གསལ།
གངས་ཅན་རིག་པའི་ཁྱུ་མཆོག་སྤྱན་རས་གཟིགས།།
མགོན་པོ་ཐུགས་རྗེ་ཅན་གྱི་རྣམ་རོལ་བ།།
བསྟན་འཛིན་མངའ་བདག་བྱང་ཆུབ་སེམས་མཆོག་གིས།།
རྒྱ་མཚོ་ཆེན་པོའི་ཡོན་ཏན་ཐུགས་མཁྱེན་ནས།།
སེམས་ཅན་སྡུག་བསྔལ་ལས་འདྲེན་མཐུ་རྩལ་ཅན།།
རྒྱལ་བའི་དབང་པོ་ཁྱེད་ལ་གུས་པས་འདུད།།
ཅེས་རང་ཅག་བོད་གངས་ཅན་པའི་བླ་ན་མེད་པའི་དབུ་འཁྲི་༧གོང་ས་རྒྱལ་བའི་དབང་པོ་ཐམས་ཅད་མཁྱེན་ཅིང་གཟིགས་པ་ཆེན་པོ་མཆོག་ལ་མི་ཕྱེད་དད་པའི་མཆོད་སྤྲིན་སྔོན་དུ་བཏང་ནས། གཤམ་དུ་གང་གི་མཛད་རྗེས་ཀྱི་ཟུར་ཞིག་རྗེས་དྲན་གྱི་ཚུལ་དུ་ཁོ་བོའི་བློ་ཡིས་གང་དཔོག་པ་ཐམས་ཅད་ཡི་གེའི་གཟུགས་སུ་བཀོད་ནས་འགྲེལ་བར་འདོད།
༡༽ བོད་རྒྱ་མི་རིགས་བར་མཐུན་སྒྲིལ་ཡོང་ཐབས་འཚེ་མེད་ཞི་བའི་མཛད་འགན་བཞེས་པ།
རང་ཅག་བོད་ཁ་བ་ཅན་གྱི་ཞིང་འདིར་ལོ་ངོ་སྟོང་ཕྲག་ལྷག་གི་གོང་ནས་ཐུབ་པ་སངས་རྒྱས་ཀྱི་དམ་པའི་ཆོས་རིན་པོ་ཆེ་ཐོག་མར་རྒྱ་གར་ནས་རིམ་བཞིན་བོད་དུ་དར་བ་ལ་བརྟེན་ནས་བོད་ཆོས་ལྡན་གྱི་ཞིང་ཁམས་ཞེས་སྨྲ་བ་བརྗོད་པ་ཀུན་གྱིས་བསྟོད་པའི་དབྱངས་སུ་གྱེར་བཞིན་ཡོད་མོད། འོན་ཀྱང་༡༩༥༠ཐམ་པ་ནས་བཟུང་རྒྱ་དམག་ཀླ་ཀློ་དཔུང་ཚོགས་ཀྱིས་གཡོ་སྒྱུའི་གདོང་འབག་གྱོན་བཞིན་བོད་ཤར་ཕྱོགས་བརྒྱུད་བོད་ས་ཡོངས་རྫོགས་བཙན་དབང་གིས་བཟུང་འགོ་བཙུགས་པ་ནས་ལོ་ངོ་དགུའི་རིང་རང་ཅག་བོད་ཀྱི་བླ་ན་མེད་པའི་སྐྱབས་གཅིག་དམ་པ་༧གོང་ས་༧སྐྱབས་མགོན་རྒྱལ་བ་རིན་པོ་ཆེ་མཆོག་གིས་ཐུགས་སྟོབས་ཆེན་པོའི་ངང་ནས་བོད་རྒྱ་གཉིས་དབར་ཞི་བའི་མཐུན་སྒྲིལ་ཡོང་ཐབས་འཚེ་མེད་ཞི་བའི་ལམ་ཁར་བརྒྱུད་དེ་ག་ཅིའི་ཐབས་ཤེས་སྣ་ཚོགས་མཛད་ཀྱང་དོན་ཕན་གང་མ་བྱུང་སྟབས། རྒྱ་མི་བོད་ནང་བཙན་འཛུལ་གྱིས་བོད་ཀྱི་བསྟན་སྲིད་གཉིས་ཐད་ནས་གཏོར་བཅོམ་ཚབས་ཆེན་བཟོས་མཐར་ད་གཟོད་རྒྱལ་བའི་སྐུ་ཕྱྭར་ཉེན་ཁ་ཡོང་བར་ངེས་གཏན་གྱིས་ཕྱི་ལོ་༡༩༥༩ཐམ་པར་བོད་མཇ་མང་གི་རེ་འདུན་ལྟར་རྒྱལ་དབང་མཆོག་ཉེན་གོུལ་ཆེད་རྒྱ་གར་དུ་བཙན་བྱོལ་ཕེབས་དགོས་བྱུང་བ་རེད།
རྒྱ་གར་དུ་བཙན་བྱོལ་ལ་འབྱོར་རྗེས་ཀྱང་ཐུགས་སྟོབས་སངར་ལྷག་འཕེལ་ཏེ་བོད་ཀྱི་ཕ་མེས་ནས་བརྒྱུད་པའི་རྩ་ཆེན་རིག་གཞུང་བདག་གཉེར་དང་སྐད་ཡིག་སྲུང་སྐྱོབ་ཆེད་བོད་པའི་སློབ་གྲྭ་ཟུར་བཙུགས་མཛད་དེ་བོད་རིགས་གཞོན་སྐྱེས་ཚོས་བོད་པའི་ངོ་བོ་མུ་མཐུད་རྒྱུན་སྐྱོང་ཡོང་བར་ཐུགས་རེ་ཆེན་པོར་གནང་དང་གནང་མུས་ལགས། ལྷག་པར་དུ་སྔོན་གྱི་འཕགས་བོད་མཁས་གྲུབ་ལོ་པཎ་རྣམས་ཀྱིས་བརྩོམས་པའི་ནང་པའི་གཞུང་ཆེ་ཁག་གི་ཆར་གཏོགསཚད་མའི་གཞུང་ལུགས་དང་སེམས་ཁམས་རིག་པའི་གཞུང་ལུགས་སོགས་ཀྱང་དགོན་པ་གྲྭ་ཚང་ཙམ་མ་ཟད་རང་རེ་བཙན་བྱོལ་བོད་མིའི་སློབ་གྲྭ་ཁག་ཏུའང་སྦྱང་བརྩོན་དང་ཉམས་ལེན་བྱེད་རྒྱུར་གལ་དུ་གཟིགས་ནས་སྔ་ཕྱི་རིམ་པས་བཀའ་སློབ་ལམ་སྟོན་རྒྱུན་མི་ཆད་པར་གནང་བའི་མཐུ་ལས། ད་ལྟ་དངོས་སུ་བྱེས་འབྱོར་སྐྱ་སེར་རྒན་གཞོན་ཕོ་མོ་སུ་ཞིག་ཡིན་རུང་མ་རིག་རྨོངས་པའི་བློ་སྒོ་ཡོངས་སུ་ཕྱེ་ནས་ནང་པའི་ཆོས་ལ་དང་བ་དང་དད་པའི་སྙིང་སྟོབས་ཆེར་བསྐྱེད་ཀྱིས་བོད་རང་ཉིད་ཀྱི་སྐད་ཡིག་གཉིས་གཙོས་ཁྱད་པར་ཆོས་དང་རིག་གཞུང་སོགས་ཀྱི་རིན་ཐང་དངོས་མཐོང་ཡོང་བ་སོགས་ཀྱི་དགེ་མཚན་བླ་ལྷག་ཏུ་བྱུང་བ་འདིའང་གང་གི་ཐུགས་རྗེའི་འཕྲིན་ལས་སྔོ་བསངས་ཀྱི་ནམ་མཁའ་ཇི་བཞིན་འཇིག་རྟེན་རྨོངས་པའི་ཀློང་གི་རང་རིགས་བོད་རིགས་ཚོའི་ཡིད་ཀྱི་མུན་པ་ཡོངས་སུ་སེལ་བ་ལྟར་རོ།
༢༽ འཛམ་གླིང་ཞི་བདེར་འགོད་ཐུབ་ཀྱི་ཐུགས་དགོངས་མཛད་པ།
དུས་ཀྱི་འགྱུར་བ་གློག་ལྟར་མྱུར་བའི་དུས་རབས་འདིའི་དཀྱོགས་མཚམས་འདིར་འཛམ་གླིང་ཡུལ་གྲུ་ཆེ་ཁག་དཔལ་འབྱོར་དང་དབང་ཤུགས་འགྲན་རྩོད་ཀྱི་ཁྲོད་ཕན་ཚུན་གཅིག་གིས་གཅིག་ལ་དབང་བསྒྱུར་དང་འཐབ་རེས་བྱས་པ་སོགས་ཀྱི་ཡ་ང་བའི་བྱ་སྤྱོད་འདི་རིགས་ཉིན་རེ་བཞིན་གྲངས་འབོར་འཕེལ་གྱིན་པས་འཛམ་གླིང་དམག་ཆེན་གསུམ་པ་ཞིག་སློང་བའི་ཉེར་བསྡོགས་བརྩམ་རྒྱུར་འགོ་ཚུགས་པའི་དུས་སྐབས་འདི་རང་ལ་རང་ཅག་བོད་ཀྱི་བཀའ་དྲིན་བླ་ན་མ་མཆིས་པའི་༧གོང་ས་༧སྐྱབས་མགོན་རྒྱལ་བ་བསྟན་འཛིན་རྒྱ་མཚོ་མཆོག་གིས་འཛམ་གླིང་ཞི་བདེར་འགོད་ཐབས་ཐུགས་ཀྱི་དགོངས་པ་ལྷུར་བཞེས་ཀྱིས་མིའི་རིགས་ཀྱི་ཤ་མདོག་དཀར་ནག་དང་། རྒྱ་དཀར་ནག། རྒྱལ་ཕྱི་ནང་སོགས་རིས་སུ་མ་ཆད་པའི་སྐྱེ་བོ་ཀུན་གྱི་རེ་འདོད་སྐོང་ཕྱིར་ཤར་བསྐྱོད་ནུབ་ཕེབས་ཀྱི་སྐུ་ངལ་ཉིན་མཚན་སྦྲེལ་ཏེ་རྒྱལ་བའི་བསྟན་པ་རིན་པོན་ཆེ་འདི་ཉིད་གང་སར་ཁྱབ་སར་ཁྱབ་སྤེལ་གྱིས་སེམས་ཅ་སྡུག་བསྔལ་བ་དག་བདེ་བའི་སར་འགོད་པ་སོགས་བསམ་བཞིན་བརྗོད་པར་དཀའ་བའི་རླབས་ཆེན་གྱི་མཛད་རྗེས་ལུ་གུ་རྒྱུད་སྦྲེལ་ཏུ་མཛད་དེ་འགྲོ་བ་མིའི་རིགས་ཀྱི་དཀའ་རྙོག་མཐའ་དག་འགྲོ་མི་རང་ཉིད་ཀྱིས་བཟོས་པ་ཡིན་པ་དང་དེ་སེལ་བའི་ནུས་པའང་འགྲོ་བ་མི་རིགས་རང་ཉིད་ཁོ་ན་ལས་གཞན་མེད་ཚུལ་སོགས་ཀྱི་བཀའ་སློབ་ཡང་དང་བསྐྱར་དུ་བསྩལ་མཛད་གནང་དང་གནང་མུས་ཡིན་པས་རང་ཅག་འགྲོ་བ་ཡོངས་ཀྱིས་དགའ་སྤྲོ་འཕེལ་བའི་གནས་ཤིག་ཏུའང་ཅི་ལ་མིན།
༣༽ ཆོས་ལུགས་མཐུན་སྒྲིལ་གྱི་ཐུགས་དམ་མཛད་པ།
འཛམ་གླིང་འདིར་གནས་ཀྱི་སྐྱེ་འགྲོ་ཡོད་ཚད་ཆོས་ལུགས་འདྲ་མིན་གྱི་རྗེས་འབྲང་དང་རྒྱལ་ཁབ་འདྲ་མིན་གྱི་ཁོངས་སུ་གཏོགས་ཡོད་ཙང་མི་རིགས་འདྲ་མིན་གྱིས་ཆོས་ལུགས་འདྲ་མིན་ལ་དད་པ་དང་ཡིད་ཆེས་བྱེད་ཀྱི་ཡོད་པ་ཇི་བཞིན་བསམ་ཚུལ་ཡང་དེ་བཞིན་མང་པོ་ཞིག་ཡོང་གི་ཡོད་སྟབས། ཆོས་ལུགས་ཐ་དད་པ་གཉིས་སམ། གསུམ་མམ། བཞི་སོགས་ཆོས་ལུགས་བར་འཐེན་འཁྱེར་བྱས་ཏེ་གཅིག་ལས་གཅིག་ཡག་དང་། གཅིག་ལས་གཅིག་དམན་སོགས་ཀྱི་དོན་མེད་སྙད་རེས་བྱས་པའི་བྱ་སྤྱོད་གང་མང་དེང་གི་སྤྱི་ཚོགས་གང་སར་དར་འཕེལ་དུ་འགྲོ་ཡི་འདུག་པས་མཁས་པ་འཛམ་གླིང་ཡུལ་གྲུ་གཞན་ཁག་གིནབློ་ལྡན་དོན་གཉེར་བ་རྣམས་དང་ཁྱད་པར་༧གོང་ས་༧སྐྱབས་མགོན་ཆེན་པོ་མཆོག་གཉིས་མཉམ་འབྲེལ་གྱིས་མིའི་རིགས་ཀྱི་སྤྱོད་ངན་དེ་རིགས་ཇི་ལྟར་སེལ་ཐབས་དང་སླད་ཕྱིན་དེ་ལྟར་མི་ཡོང་ཆེད་གཞོན་སྐྱེས་ཚོའི་སེམས་རྒྱུད་ལ་འཇགས་ཐུབ་ཀྱི་བཀའ་སློབ་ལམ་སྟོན་ཅི་ཞིག་གནང་དགོས་མིན་ཐད་བགྲོ་གླེང་རབ་དང་རིམ་པ་མཛད་དེ་དེང་གི་འཁྲུག་ཆ་དོད་པའི་འཛམ་གླིང་འདི་ཞི་བདེ་བག་ཕེབས་ཅན་གྱི་འཛམ་གླིང་ཞིག་ཏུ་བསྐྲུན་གང་ཐུབ་མཛད་ཀྱི་ཡོད། མ་ཟད་ཉེ་ཆར་དྷ་སའི་མེག་གྷན་ཐེག་ཆེན་གཙུག་ལག་ཁང་དུ་ལོ་ལྟར་བོད་ཕྲུག་ཁྱིམ་སྡེ་དང་དྷ་སའི་ནང་ཆོས་མཐུན་ཚོགས་གཉིས་ཀྱིས་གོ་སྒྲིག་ཞུས་པའི་ནང་ཆོས་ངོ་སྤྲོད་ཀྱི་འདུ་འཛོམས་ཐོག་༧གོང་ས་མཆོག་གི་ཞལ་ནས། འཛམ་གླིང་ནང་གི་ཆོས་ལུགས་ཡོངས་རྫོགས་འགྲོ་བ་མི་རིགས་ལ་ཕན་འདོགས་ཀྱི་ལྟ་བ་གཅིག་གྱུར་ཡིན་པ་དང་ཆོས་ལུགས་བར་ནག་པ་དང་ཕྱི་པ་ཟེར་ནས་འཐེན་འཁྱེར་བྱ་མི་རུང་བ་སོགས་ཀྱི་བཀའ་སློབ་ཡང་ནན་པོར་བསྩལ་བ་སོགས་ཀྱི་མཛད་འཕྲིན་དངོས་ཤུགས་གཉིས་ཀར་ཧ་ལས་པ་བསྐྱངས་དང་སྐྱོང་མུས་སོ།
༼མཇུག་བསྡུའི་གཏམ།༽
འཛམ་གླིང་ནང་སྤྱི་ཚོགས་འཕོ་འགྱུར་གྱི་འགྲོས་དང་བསྟུན་རང་རེ་བོད་ཀྱི་སྤྱི་ཚིགས་འདི་ཉིད་ཀྱང་གོམ་གང་མདུན་སྤོས་ཀྱིས་མང་གཙོའི་ལམ་ལུགས་ཅན་དུ་བསྐྲུན་ཐུབ་པ་བྱུང་ཡང་ཚུར་གཅོད་མ་ཐུབ་པའི་ཐ་ཤལ་མི་སྣ་ཁག་ཅིག་གིས་བོད་སྤྱི་པའི་རྩ་དོན་ལ་གནོད་པའི་ཆོལ་ཁ་ཆོས་ལུགས་ཀྱི་ཤོག་ཁག་བསྒྲིགས་ཏེ་རང་དབང་སྒེར་སྤྱོད་བྱས་པ་སོགས་དགྲ་དགའ་གཉེན་སྡུག་གི་བྱ་སྤྱོད་རྫིབ་པོ་དེ་ཉིད་འཛམ་གླིང་རྒྱ་ཆེ་མི་མང་གི་སྤྱན་ལམ་དུ་མངོན་པ་དང་ལྷག་པར་གུང་ཁྲན་རིང་ལུགས་པའི་རྒྱ་མི་དཔོན་རིགས་ཚོའི་མིག་ལམ་དུ་དགོད་བྲོ་བའི་གནས་ཤིག་ཀྱང་གྱུར་ཡོད་སྟབས། འདི་ནི་འུ་ཅག་བོད་མི་རིགས་ཀྱི་ལོ་རྒྱུས་ནང་བསུབ་ཐབས་བྲལ་བའི་མཐུས་ཤོར་གྱི་རྣམ་པའི་ཟུར་ཞིག་ཀྱང་ཡིན་པས་གཟུར་གནས་བློ་ལྡན་དོན་གཉེར་བ་རྣམས་ཀྱིས་ཅིས་ཀྱང་འདིའི་རིགས་ཀྱི་མཐུས་ཤོར་ལ་གཟབ་པར་བགྱིས་ནས་༧གོང་ས་མཆོག་གིས་ད་བར་དགུང་ལོ་ཧྲིལ་བོ་བརྒྱད་བཅུའི་ལྷག་རིང་བོད་དོན་ཞབས་ཞུའི་བཀའ་དྲིན་སྙིང་བཅངས་ཡོང་བར་ཞུ་ཞེས་ཁོ་བོས་འབོད་སྐུལ་ཞིག་གི་ཚུལ་དུ་བྲིས་པ་དགེའོ།
༸གོང་ས་བཅུ་བཞི་པ་ཆེན་པོ། །
་
བོད་རིགས་སྐྱོབ་ཕྱིར་ཆབ་སྲིད་གླེང་། །
ཆོས་རིགས་མཐུན་ཕྱིར་མཐུན་འབྲེལ་གླེང་། །
མི་རིགས་བདེ་ཕྱིར་ནང་དོན་གླེང་། །
གླེང་མི་ཁྱོད་གཅིག་སྤྱན་རས་གཟིགས། །
སྐུ་དངོས་ཁྱོད་ལ་གུས་ཕྱག་འཚལ། །
་
སྐུ་ཁམས་བཟང་ཞིང་སྐུ་ཚེ་བརྟན། །
འཇིག་རྟེན་བདེ་ཕྱིར་ཞི་བདེ་གླེང་།
ཆོས་ལུགས་མཐུན་ཆེད་བྱམས་བརྩེ་གླེང་།
བོད་རྒྱ་མཐུན་ཆེད་དབུ་མ་གླེང་།
བོད་འབངས་བདེ་ཕྱིར་མང་གཙོ་བསྟན་།
འཛམ་གླིང་ཞི་བདེ་རྒྱལ་རྒྱུར་གཅིག་།
བོད་མིའི་བསོད་ནམས་འཕེལ་བ་ཤོག་།
སྐྱབས་མགོན་སྐུ་ཚེ་བརྟན་པ་ཤོག་།
བོད་དོན་བདེན་མཐའ་གསལ་བ་ཤོག་།
གཞིས་བྱེས་མཉམ་འཛོམས་ཐུབ་པ་ཤོག་།
༅༅། འགྲོ་ཀུན་བུ་བཞིན་སྐྱོང་ཞིང།།
རྒྱལ་བསྟན་སྲོག་བཞིན་འཛིན་པའི།།
ཀུན་ལ་བྱམས་བརྕེ་གནང་མཁན་།།
སྐྱབས་མགོན་བསྟན་འཛིན་རྒྱ་མཚོ།།
སྐུ་ཚེ་བསྐལ་བརྒྱར་བརྟན་ཤོག།