འཇིགས་དབང་པས།
སྐུའི་འཁྲུངས་སྐར་ལ་བསྟོད་པ།
༅༅། ཤེས་རབ་ཀྱི་རྣམ་དཔྱོད་བྱམས་བརྩེ་དང་སྦྲེལ་ནས།།
མཐའ་མེད་ཀྱི་འགྲོ་ལ་ཐུགས་བརྩེ་ཡི་བདེ་སྐྱིད།།
རྣམ་ཀུན་ཏུ་བརྩལ་མཁན་དགེ་སྦྱོང་གི་དཔའ་བོ།།
ཞི་བདེ་ཡི་དེད་དཔོན་བཅུ་བཞི་པ་ཆེན་པོ།།
བསྟན་འཛིན་གྱི་རྒྱ་མཚོར་སྒོ་གསུམ་ནས་བསྟོད་དོ།།
སྐུའི་འཁྲུངས་སྐར་བསུ་གླུ
༅༅། ཕ་ཡུལ་གངས་རིའི་རྒྱབ་ན་ཡོད་ན་ཡང་།།
སྔོན་ལས་དབང་གིས་མི་ཡུལ་གང་སར་བསླེབས།།
ཕྱི་རོལ་ཆ་རྐྱེན་བཟང་ཡང་སྡུག་ཀྱང་རུང་།།
༧སྐྱབས་མགོན་སྐུ་ཚེ་བརྟན་པས་སེམས་པ་དགའ།།
སྐྱེ་བ་ཕྱི་མ་ཐུགས་རྗེས་འཛིན་པར་ཞུ།།
ཉིན་གྱི་འཚོ་ལས་སླ་ཡང་ཁག་ཀྱང་རུང་།།
ཡུལ་གྱར་འཚོ་བ་སྐྱིད་ཀྱང་སྡུག་ཀྱང་རུང་།།
གནས་ཡུལ་གནམ་གཤིས་གྲང་ཡང་ཚ་ཡང་རུང་།།
༧སྐྱབས་མགོན་སྐུ་ཚེ་བརྟན་པས་སེམས་པ་དགའ།།
སྐྱེ་བ་ཕྱི་མ་ཐུགས་རྗེས་འཛིན་པར་ཞུ།།
2016/6/25