སུམ་རྟགས་ཐོན་མིས་བརྩམས་མེད་པའི་རྒྱུ་མཚན་ཆེན་པོ་བཅུ།

བེ་རི་རྒྱལ་སྲས། ༼ཅོག་མྱིས་མཚམས་སྦྱོར་བྱས།༽

 
དེ་ཡང་བོད་གངས་ཅན་གྱི་ལྗོངས་སུ་བོད་ཡིག་གི་སྲོལ་བཏོད་པ་ནས་བཟུང་། ད་བར་བོད་ཀྱི་བརྡ་སྤྲོད་པའི་གཞུང་ལུགས་ཁག་གི་རྩ་བ་དང་སྡོམ། དེ་བཞིན་འགྲེལ་བ་ལའང་། དོན་འགྲེལ་དང་། ཚིག་འགྲེལ། འབྲུ་འགྲེལ། མཛུབ་ཁྲིད་སོགས་ཀྱི་འགྲེལ་པ་གྲངས་ཀྱིས་མི་ལོང་བ་ཞིག་མཛད་ཡོད་ལ། བརྡ་སྤྲོད་པའི་ལོ་རྒྱུས་ཀྱི་སྟེང་ནས་བཤད་ན། བོད་ནི་འཛམ་གླིང་ནང་བརྡ་སྤྲོད་པའི་བསྟན་བཅོས་མང་ཤོས་ཀྱི་གྲས་ཤིག་ཡིན་པ་བཤད་མི་དགོས་པ་ཞིག་རེད། བོད་ཀྱི་བརྡ་སྤྲོད་པའི་བསྟན་བཅོས་ཀྱི་ནང་ནས་ཆེས་སྔ་བ་ནི་ཐོན་མིས་མཛད་པའི་སུམ་རྟགས་གཉིས་ཡིན་པ་ནི་རླུང་ལྟར་གྲགས་ཤིང་། ཐོན་མིས་མཛད་པའི་བརྡ་སྤྲོད་པའི་བསྟན་བཅོས་ཁག་དུ་ཙམ་ཡོད་མེད་དང་། དེ་དག་ཐོན་མིས་མཛད་པ་ཡིན་མིན་ནི་ཅུང་བརྗོད་དཀའ་བ་ཞིག་ཀྱང་ཡིན། སུམ་རྟགས་ཀྱི་ཚིག་སྦྱོར་དེ་དག་ལ་བལྟས་ན། དུས་རབས་བརྒྱད་པའི་ནང་བརྩམས་པའི་ཚིག་སྦྱོར་དང་མི་འདྲ་ལ། སུམ་རྟགས་རྩ་བ་ཡེ་ནས་ཀློག་མ་མྱོང་བའི་བོད་ཡིག་ཤེས་མཁན་ཞིག་གིས་རྩ་བ་དེ་ཐེངས་ཤིག་ཀློག་ན། དེ་ནི་ཉེ་དུས་ཀྱི་རྩོམ་པ་པོ་ཞིག་གིས་བརྩམས་པ་རེད་ཅེས་བརྗོད་ཀྱང་ཡིད་མི་ཆེས་པའི་རྒྱུ་མཚན་ལྷག་མེད། ད་དུང་ཐོན་མིས་མཛད་པར་གྲགས་པའི་གླུ་དང་མགུར་དེ་ཚོ་ཡང་། དུས་རབས་དེའི་ནང་མཛད་པའི་བཟོ་འདྲ་ཞིག་གཏན་ནས་མེད། དུས་རབས་བརྒྱད་པ་ཕར་ཞོག་དུས་རབས་བཅུ་པའི་སྐབས་སུ་བྲིས་པའི་ཡིག་རྙིང་དེ་ཚོ་ཡང་ང་ཚོས་ཀློག་ན་གོ་མི་ཐུབ་པའི་ཚོད་དུ་ཡོད། ང་ཚོའི་བོད་པའི་ལུགས་སྲོལ་གཅིག་ལ། ཡིག་རྙིང་དེ་དག་གོ་བ་ལེགས་པོ་ཞིག་མ་རྙེད་སྐབས། དེ་དག་སྐབས་དེ་དང་དེའི་དུས་ཀྱི་མིང་ཚིག་ཏུ་བསྒྱུར་བ་ཡང་དོན་དངོས་ཡིན་ཞིང་། ད་དུང་། ལེགས་བཤད་ཀྱི་གཏམ་མང་པོ་ཞིག་ཚིག་ལྷུག་ཏུ་ཡོད་པ་རྣམས་བློར་བཟུང་སླ་བའི་སླད་ཚིགས་བཅད་བཟོས་པའང་ཡོད་དེ།
དཔེར་ན། དེང་སང་ཡོངས་གྲགས་སུ་བགྲང་བའི་ཇོ་བོ་རྗེའི་གསུང་།
ཚེ་ནི་ཡུན་ཐུང་ཤེས་བྱའི་རྣམ་པ་མང་།།
ཚེ་ཡི་ཚད་ཀྱང་ཇི་ཙམ་མི་ཤེས་པས།།
ངང་པས་ཆུ་ལས་འོ་མ་ལེན་པ་ལྟར།།
རང་གི་འདོད་པ་དང་པོར་བླང་བར་བྱ།།
ཞེས་པ་འདི་ཀུན་གྱིས་བགྲང་ན་ཡང་། དོན་དངོས་ཐོག་ཇོ་བོའི་གསུང་ན། ཚིགས་བཅད་དེ་འདྲ་མེད་པ་ནི་བཀའ་གདམས་གསུང་བགྲོས་ནང་གསལ་བར་བཞུགས་པས་མིག་རས་དང་བ་ཀུན་གྱིས་མཐོང་ཐུབ་ལ་དེ་བཞིན་མདོ་ཀུན་ལས་བཏུས་པ་ལྟ་བུ་ཡང་དེ་ལྟར་རོ།།

དེ་བཞིན་ཡིག་རྙིང་གོ་དཀའ་བ་རྣམས་མིང་ཚིག་སླ་བོར་བསྒྱུར་བ་ཡང་ཡོད་དེ། དཔེར་ན། མང་སྲོང་མང་རྗེའི་སྐབས་ཀྱི་ཡིག་རྙིང་གལ་ཆེ་ཞིག་ཡོད་པ་དེ་གཡུ་ཡི་འཕྲེང་བའི་ནང་། དེང་རབས་ཀྱི་མིང་ཚིག་སྦྱོར་ནས་བྲིས་ཡོད་ཅིང་། ཡིག་ཆ་དེ་ལོ་གྲངས་བརྒྱ་ཕྲག་འགའ་ཤས་ཤིག་ཕྱིན་པའི་མཚམས་སུ་ཡིག་ཆ་དེ་དར་ཁྱབ་ཆེ་རུ་སོང་ན། ཡིག་ཆ་དེ་མང་སྲོང་སྐབས་ཀྱི་ཡིག་རྙིང་ཡིན་པར་ཁས་ལེན་མཁན་དཀོན་པོར་གྱུར་ཅིང་། ནང་དོན་གཅིག་པ་ཡིན་མིན་ལ་མ་ལྟོས་པར། ཡིག་ཆ་དེ་རིགས་གནའ་བོའི་ཡིག་རྙིང་ཞིག་ཡིན་མིན་ཐད་དྭོགས་གཞི་འབྱུང་བ་ནི་ལྡོག་ཏུ་མེད་པ་ཞིག་རེད། གཡུ་ཡི་ཕྲེང་བའི་ནང་དེང་རབས་ཀྱི་མིང་ཚིག་སྤྱད་དེ་བྲིས་པར་མ་ཟད་གནའ་བོའི་རྡོ་རིང་གི་ཡི་གེ་ཡང་རང་སོར་བཞག་པ་ནི་ཆེས་བསྔགས་བརྗོད་ཞུ་འོས་ཤིག་རེད།

དེས་ན། ཐོན་མིས་མཛད་པར་གྲགས་པའི་སུམ་རྟགས་གཉིས་ཀྱང་། དོན་དངོས་ཐོག་ཐོན་མིས་མཛད་པ་ཡིན་མིན་ནི་མངོན་ཤེས་ཡོད་པའི་མི་ཞིག་གིས་མ་གཏོགས་ཤེས་ཐབས་མེད་ལ། ང་ཚོས་ཞིབ་འཇུག་བྱེད་ཐབས་གཅིག་རང་ཡོད་པ་ནི། སྔོན་གྱི་ཡིག་རྙིང་དང་ལོ་རྒྱུས། དེ་བཞིན་ཚིག་སྦྱོར་ལ་བལྟ་རྒྱུ་དེ་རང་ཡིན། ཚིག་སྦྱོར་ལ་བལྟས་ན། དེ་ནི་ཐོན་མའི་དུས་སུ་བརྩམས་པ་ཞིག་ཡིན་པར་བརྗོད་དཀའ་བར་གྱུར་ཡོད་ལ། དེ་ནི་གོང་དུ་བརྗོད་པ་ལྟར། ཡིན་དང་མིན་གྱི་ཁ་ཚོན་སུས་ཀྱང་གཅོད་མི་ཐུབ་ཀྱང་། དྭོགས་གཞི་དེ་ལྟ་བུ་ཞིག་འབྱུང་བ་ཡང་རྟོག་ལྡན་ལ་སྐྱེས་པའི་དྭོགས་པ་ཞིག་ཅིས་ཀྱང་ཡིན།
དེ་བཞིན་དུ། ཐོན་མིས་མཛད་པའི་བསྟན་བཅོས་བརྒྱད་ཡོད་པའི་སྐོར་སྔོན་དང་ད་ལྟའི་འགྲེལ་བྱེད་མཁན་ཁ་ཤས་ཀྱིས་བཤད་འདུག་ཀྱང་། དེ་ནི་རང་རང་གི་ཚོད་དཔག་ཙམ་ལས། དོན་དངོས་ཤིག་སུས་ཀྱང་བཤད་ཐུབ་མེད་ལ། རྩ་བ་བརྒྱད་པོ་དེ་སུས་ཀྱང་མ་མཐོང་བས། རྩ་བ་བརྒྱད་པོ་དེའི་མཚན་བྱང་ཡང་རང་རང་གིས་ཚོད་དཔག་གིས་བཏགས་པ་ལས་ལྷག་མེད།

དེའི་ཕྱིར་སྔོན་གྱི་མཁས་པ་དག་གིས་རྩ་བ་བརྒྱད་བརྩམས་ཡོད་ཅེས་ཟེར་སྒྲོས་ཙམ་ལས་བརྩམས་པའི་ཕྱག་དཔེ་སུས་ཀྱང་མཇལ་དུ་མེད་པས། རང་རང་གིས་མཚན་གསར་པ་རེ་བཏགས་ནས་གྲངས་བརྒྱད་ལོང་པ་བྱས་པ་རེད། འོན་ཀྱང་མཁས་པ་ཁ་ཤས་ཀྱིས་ཐོན་མིས་རྩ་བ་བརྒྱད་མཛད་ཅེས་གསུངས་ཏེ། དེ་ཡང་། སྡེ་སྲིད་སངས་རྒྱས་རྒྱ་མཚོའི་བེ་དཀར་གཡའ་སེལ་[1]དུ། “རྒྱ་གར་ན་སྒྲའི་བསྟན་བཅོས་བརྒྱད་དུ་གྲགས་པ་བཞིན་དེ་དང་མཚུངས་པར་ཐོན་མིས་བརྡ་སྤྲོད་པའི་བསྟན་བཅོས་བརྒྱད་མཛད།” ཅེས་གསུངས།

ཞ་ལུ་ལོ་ཆེན་གྱི་འགྲེལ་བར།[2] “ཐོན་མིས་བརྩམས་པའི་རྒྱ་གར་སྐད་ཀློག་ཚུལ་མུན་པའི་སྒྲོན་མེ་བརྩམས་”ཞེས་གསུངས། བླ་མ་དམ་པ་བསོད་ནམས་རྒྱལ་མཚན་གྱིས་རྒྱལ་རབས་གསལ་བའི་མེ་ལོང་[3]དུ། “དང་པོ་ཡི་གེའི་རྣམ་འགྱུར་གྱི་བཟོ་བརྩམས། ཀ་མད་སུམ་ཅུར་བསྒྱུར། སྡེབ་སྦྱོར་སྒྲིག་པའི་གཞི་མ། ཐོན་མིའི་མདོ་རྫིའི་སྒྲ་མདོ་བྱ་བ་ཡོད་ཀྱི་དེ་དག་ལ་གཟིགས་ཤིག“ ཅེས་གསུངས་པ་དང་། དཀར་དྲུང་པད་མ་རྡོ་རྗེའི་སུམ་རྟགས་འགྲེལ་བ་[4] ཡི་ནང་དུ། ཀླུ་དབང་མགུལ་རྒྱན། ཞེས་བྱ་བའི་གཞུང་ཞིག་ཀྱང་ཐོན་མིས་བརྩམས་ཞེས་གསུངས་ཡོད་ཀྱང་། གསུང་མཁན་རང་ཉིད་ཀྱིས་དཔེ་ཆ་དེ་མཇལ་ཡོད་མེད་མི་ཤེས་སོ།།
ཐོན་མིས་རྩ་བ་བརྒྱད་མཛད་ཡོད་མེད་མི་ཤེས་ཀྱང་། བརྡ་སྤྲོད་པའི་བསྟན་བཅོས་གཞན་ཁ་ཤས་ཤིག་མཛད་ཡོད་ཤས་ཆེ་ན་མ་གཏོགས། བོད་ཀྱི་བརྡ་སྤྲོད་པའི་བསྟན་བཅོས་འདི་གཉིས་གཅིག་པུས་བོད་ཀྱི་བརྡ་སྤྲོད་པའི་གཞུང་ལུགས་ཀྱི་ཁ་སྐོང་ཐུབ་ཐབས་མི་འདུག་སྙམ།

 

༡ སྔོན་གྱི་ཡིག་རྙིང་ནང་ཐོན་མིས་བརྩམས་ཞེས་ཟུར་ཙམ་ཡང་མེད་པ།

སྔོན་གྱི་ལོ་རྒྱུས་ཡིག་རྙིང་ཀུན་གྱི་ནང་དུ་ཐོན་མིས་བརྩམས་པའི་སུམ་རྟགས་གཉིས་ཞེས་པ་ཟུར་ཙམ་ཡང་མི་རྙེད་དེ། བོད་ཀྱི་ལོ་རྒྱུས་རྙིང་གྲས་སུ་གཏོགས་པ་ཉང་ཆོས་འབྱུང་ནང་དུའང་ཐོན་མིས་བོད་ཡིག་གི་སྲོལ་གཏོད་ཚུལ་མང་དུ་བཀོད་པ་ལས་སུམ་རྟགས་གཉིས་ཞེས་པ་ཞིག་ཟུར་ཙམ་ཡང་གསུངས་མེད་པ་དེས་དེ་བར་དུ་ཐོན་མིས་བརྩམས་པའི་སུམ་རྟགས་གཉིས་མེད་པ་དང་། བརྩམས་པའི་སྐོར་ཡེ་ནས་གྲགས་ཐོས་མེད་པ་མཚོན་ཐུབ།
དེ་བཞིན་ལྡེའུ་ཇོ་སྲས་(དུས་རབས་བཅུ་གཉིས་པའི་ནང་བྱུང་།) སམ་ཡང་ན། ལྡེའུ་དགེ་བཤེས་སམ་དགེ་བཤེས་ཇོ་འབུམ་ཞུ་བ་དེས་མཛད་པའི་རྒྱ་བོད་ཀྱི་ཆོས་འབྱུང་རྒྱས་པ་[5]ཞེས་པ་ལས་ཀྱང་སྲོང་བཙན་གྱི་དུས་སུ་བློན་པོ་དང་། ཁྲིམས་ལུགས། སྒྲིག་གཞི་སོགས་ཀྱི་སྐོར་བཤད་པ་ལས། སུམ་རྟགས་གཉིས་བརྩམས་པའི་སྐོར་ཡེ་ནས་གསལ་མེད་པ་དེས་ཀྱང་ཐོན་མིས་སུམ་རྟགས་གཉིས་བརྩམས་མེད་པ་གསལ་བཤད་བྱེད་ཐུབ།

དེ་བཞིན་ས་སྐྱ་གོང་མ་རྣམ་ལྔའི་ཡ་གྱལ་རྗེ་བཙུན་བསོད་ནམས་རྒྱལ་མཚན་(༡༡༤༧ནས་༡༢༡༦།)གྱིས་མཛད་པའི་རྒྱལ་རབས་གསལ་བའི་མེ་ལོང་[6]ལས་ཀྱང་། རྒྱས་པར་འདོད་ན།ཐོན་མིས་དང་པོར་ཡི་གེའི་རྣམ་འགྱུར་གྱི་བཟོ་བརྩམས། ཀ་སྨད་སུམ་ཅུར་བསྒྱུར། སྡེབ་སྦྱོར་སྒྲིག་པའི་གཞི་མ། ཐོན་མིའི་མདོ་རྫིའི་སྒྲ་མདོ་བྱ་བ་ཞིག་ཀྱང་ཡོད་ཀྱིས་དེ་དག་ལ་གཟིགས་ཤིག ཅེས་ཐོན་མིས་བརྩམས་པའི་མདོ་རྫིའི་སྒྲ་མདོ་བྱ་བ་ཞིག་ཡོད་རབས་གསུངས་པ་ལས་སུམ་རྟགས་གཉིས་བརྩམས་པའི་སྒྲ་དང་དྲི་མ་ཙམ་ཡང་མེད། དེས་ཀྱང་དུས་རབས་དེའི་ཡན་དུ་སུམ་རྟགས་གཉིས་ཞེས་པའི་མིང་ཙམ་ཡང་མེད་པ་གསལ་བཤད་བྱས་པ་རེད།
ཐོན་མིས་བརྩམས་པའི་མདོ་རྫིའི་སྒྲ་མདོ་བྱ་བ་ཞིག་ཡོད་ན། དེ་གང་དུ་ཡོད་མེད་མ་གསུངས་ཤིང་། རྗེ་བཙུན་རང་ཉིད་ཀྱིས་གཟིགས་ཡོད་པའི་ཟོལ་དུ་གསུངས་ཀྱང་། གཟིགས་ཡོད་ན་དེའི་ཁུངས་ཙམ་ཡང་མི་དྲངས་པ་ཅི་ཡིན་སྙམ་པའི་དོགས་པ་ཡང་མ་ཤར་ཀ་མེད་རེད།

ད་ཕན་མཇལ་དུ་ཡོད་པའི་བོད་ཀྱི་ལོ་རྒྱུས་རྙིང་པ་ནང་དུ་ཐོན་མིས་མཛད་པའི་སུམ་རྟགས་གཉིས་ཞེས་པ་ཞིག་ཡེ་ནས་མེད་པ་དང་དེ་ཡང་དུས་རབས་བཅུ་གཉིས་ཡན་གྱི་ལོ་རྒྱུས་ཐམས་ཅད་ཀྱི་ནང་དུ་སུམ་རྟགས་ཞེས་པའི་སྒྲ་ཙམ་ཡང་གྲགས་རྒྱུ་མེད། བོད་ཀྱི་ལོ་རྒྱུས་རྙིང་པར་གྲགས་པ་ལྔ་སྟེ། ཡོ་ག་ལྷ་གྱེས་ཅན། ཟངས་མ་གཞུག་རལ་ཅན། ལྟབ་མ་དགུ་བརྩེགས་ཅན།། ཟིང་པོ་མགོ་སྔོན་ཅན། གསང་བ་ཕྱག་རྒྱ་ཅན། ཞེས་པ་རྣམས་ད་ཕན་མཇལ་མ་མྱོང་བས། དེ་དག་གི་ནང་ཡོད་མེད་ཁ་ཚོན་བཅད་ནས་བརྗོད་མི་ཐུབ་ཀྱང་ཕལ་ཆེར་མེད་པའི་ཕྱོགས་སོ། །

འདིར་དཔྱད་དགོས་པ་ཞིག་ལ། ས་པཎ་གྱིས་མཛད་པའི་ཡི་གེ་སྦྱོར་བའི་ཚིག་སྦྱོར་དང་སུམ་རྟགས་ཀྱི་ཚིག་སྦྱོར་ཤིན་ཏུ་ནས་འདྲ་བས་མ་ཟད།
བསླབ་པ་ཀུན་གྱི་གཞི་འཛིན་ཅིང་།།
རིག་བྱེད་སྨྲ་བ་རྣམས་ཀྱི་རྒྱུ།།
མིང་ཚིག་བརྗོད་པ་ཀུན་གྱི་གཞི།།
ཡི་གེའི་སྦྱོར་བ་བཤད་པར་བྱ།།
ཞེས་མགོ་ནས་ཚིག་ཇི་མ་ཇི་བཞིན་བཤུས་པ་བཞིན་དང་། དེས་མ་ཟད་དཀྱུས་ཀྱི་ནང་དུ་སུམ་རྟགས་ཀྱི་ཚིག་ཇི་བཞིན་དུ་སྣང་བས། སུམ་རྟགས་གཉིས་ཞེས་པ་དེ་ནི་ཡི་གེའི་སྦྱོར་བ་འདི་ལས་འོས་མེད་དོ། །
ས་པཎ་གྱི་ཡི་གེ་སྦྱོར་བ་དེ་ལ་ཕྱིས་ཀྱི་མཁས་པ་རྣམས་ཀྱིས་ཡར་བཅད་མར་བཏུབ་ཀྱིས་སུམ་རྟགས་གཉིས་ཞེས་པའི་གཞུང་གསར་ཞིག་བཟོས་ནས་དེ་ཡང་ཕྱི་རབས་པ་རྣམས་ལ་སྲོང་བཙན་གྱི་དུས་སུ་ཐོན་མིས་མཛད་ཅེས་ཟེར་ན་ཀུན་གྱིས་ཐུན་མོང་དུ་སྦྱང་གཞིར་འགྱུར་ངེས་སྙམ་པ་དང་། ས་པཎ་གྱིས་མཛད་ཅེས་ཟེར་ན་ཆོས་ལུགས་བྱེ་བྲག་པ་ཞིག་ལས་གཞན་གྱིས་སློབ་གཞིར་མི་བྱེད་པར་བསམས་ནས་ཐོན་མིས་མཛད་ཅེས་མང་དུ་བཤད་ནས་དེང་གི་ཆར་ཐོན་མིས་མཛད་ཅེས་སུ་གྲགས་པ་རེད་སྙམ།

ས་པཎ་གྱིས་ཡི་གེ་སྦྱོར་བ་མཛད་པ་ནས་སུམ་རྟགས་གཉིས་ཀྱི་འགྲེལ་པ་ཡིན་ཟེར་བ་མང་པོ་ཞིག་ཆར་རྗེས་ཤ་མོང་བརྡོལ་བ་བཞིན་དོན་པ་དེས་ཀྱང་སུམ་རྟགས་གཉིས་ནི་ཡི་གེའི་སྦྱོར་བ་དེ་རང་ཡིན་པ་གསལ་པོར་བསྟན་པ་རེད། འོན་ཀྱང་ཐོན་མི་ལ་བོད་ཡིག་ལ་སྨན་པའི་ཞབས་རྗེས་གང་ཡང་མེད་དམ་ཞེ་ན་དེ་ནི་ཡེ་ནས་མིན་ཏེ། ཐོན་མིས་སྔར་ཡོད་ཀྱི་བོད་ཡིག་ལ་གསར་སྣོན་དང་དེ་བཞིན་ལེགས་སྤེལ་གང་འཚམས་གནང་ཡོད་ངེས་ལ། དེ་ནི་ས་པཎ་རང་ཉིད་ཀྱིས་ཞལ་གྱིས་བཞེས་ཏེ། ས་པཎ་གྱི་བསྟོད་དབྱངས་འཕྲེང་བ་ལས།
དེ་ཕྱིར་བོད་ལ་བོད་སྐད་དུ།།
གསུང་ཕྱིར་སམ་བྷོ་ཌ་ལ་སོགས།།
འཇིག་རྟེན་མིག་འབྱེད་བྱིན་བརླབས་ནས།།
བསྟན་པ་སྤེལ་ལ་ཕྱག་འཚལ་ལོ།། [7] ཞེས་གསུངས་པས་སོ།།

 

༢ དུས་རབས་བདུན་པའི་ཚིག་སྦྱོར་དང་ཡེ་ནས་མི་འདྲ་བ།

ཐོན་མིས་སུམ་རྟགས་གཉིས་བརྩམས་ཡོད་ན་དུས་རབས་བདུན་པའི་ནང་བརྩམས་ཡོད་ངེས་པས། སུམ་རྟགས་གཉིས་མགོ་ནས་མཇུག་བར་ཐེངས་ག་ཚོད་ཅིག་ཀློག་ཀྱང་ང་ཚོས་མ་གོ་བའི་བརྡ་རྙིང་ཚིག་འབྲུ་གཅིག་ཀྱང་མི་རྙེད་པ་དེ་རང་གིས་དུས་རབས་བདུན་པའི་སྐབས་ཀྱི་གཞུང་ཞིག་མིན་པར་གོ་ཐུབ།
དུས་རབས་བདུན་པ་དང་དེ་བཞིན་བརྒྱད་པའི་དུས་སུ་བྲིས་པའི་བོད་གཞུང་རྣམས་ལ་ཞིབ་ཏུ་གཟིགས་དང་། དཔེར་ན། རྒྱལ་པོ་ཁྲི་ལྡེ་སྲོང་བཙན་སད་ན་ལེགས་ཀྱི་དུས་སུ་མཛད་པའི་སྒྲ་སྦྱོར་བམ་གཉིས་ནང་རང་རེས་གོ་ནུས་པའི་མིང་ཚིག་འགའ་ཤས་ཡོད་ཀྱང་། དེའི་ནང་བརྡ་རྙིང་ཤིན་ཏུ་མང་བས་ང་ཚོས་བདེ་བླག་ཏུ་གོ་མི་ཐུབ། གོང་དུ་བརྗོད་པ་ལྟར་ཚིག་གི་འགྲོས་དེ་ནི་དུས་རབས་དེའི་དུས་ཀྱི་ཚིག་སྦྱོར་དང་ཡེ་ནས་མི་འདྲ་བ་ཞིག་གོ།

དེ་བཞིན་ཐོན་མིས་མཛད་པར་གྲགས་པའི་རྒྱལ་པོ་ལ་ཕུལ་བའི་གླུ་དབྱངས།
“ ང་དྲིན་ཅན་གྱི་བློན་པོ་ཐོན་མི་ངས།།
ལམ་བགྲོད་པར་དཀའ་བའི་རྒྱ་གར་དུ།།
ལུང་ཚ་གྲང་ཆེ་ཡང་དཀའ་བ་སྤྱད།།
ཁོང་མཁས་པ་བྲམ་ཟེ་ལེགས་བྱིན་ལ།།
ཡིད་གུས་པའི་ཚུལ་གྱིས་མོས་གུས་བྱས།།”
ཞེས་སོགས་བླངས་རབས་འདུག་ཀྱང་། དེ་ནི་ཐོན་མི་རང་གིས་བླངས་པའི་བཟོ་མི་འདུག་ཅིང་། ཚིག་སྦྱོར་ལ་བལྟས་པས་ཀྱང་དེ་ནི་ཕྱིས་ཀྱི་ཚིག་སྦྱོར་ཞིག་ལས་འོས་མེད་དོ།།

འོན་ཀྱང་། ཐོན་མིས་ཡི་གེའི་ཕུད་ཕུལ་བའི་དབྱངས་ངེས་པའི་སྙན་ངག་ནང་།
“ཞལ་རས་གསལ་ལ་ངང་མདངས་གང་བ་བཟང་།།
གདམས་ངག་ཟབ་ལ་མ་ཆད་ཐ་དད་དང་།།
ལས་ངན་བག་ཆགས་ཐམས་ཅད་བསལ་མཛད་པ།།
འཕགས་པ་མ་ཕམ་ཡང་དག་དམ་པ་ལ།།
བདེ་གཤེགས་བདེན་ངེས་ཡེ་ཤེས་ཏེ།།
ཏིང་འཛིན་ཞི་ཉིད་རིག་ཅིང་གཟིགས།།
ཉོན་མོངས་ཚོགས་བཅོམ་མགོན་པོ་མཆོག།
དུག་གསུམ་བདུད་འདུལ་ཀུན་ཏུ་ཐུལ།།
སྤྱན་རས་གཟིགས་དབང་ཐུགས་ཀྱི་སྲས།།
སྲོང་བཙན་སྒོམ་པོར་མཚན་གསོལ་བའི།།
ཆོས་རྒྱལ་ཁྱོད་ལ་ཕྱག་འཚལ་ལོ།།”
ཞེས་པ་འདི་ཐོན་མིས་མཛད་པ་དང་། དེ་ཡང་ཛེན་ཁོག་སྣ་རྡོའི་ལྷ་ཁང་དུ་བྲག་ལ་བརྐོས་ནས་ཡོད་པ་རྒྱལ་རབས་གསལ་མེར་གསལ་ཀྱང་། དེ་ནི་ཐོན་མིའི་ཚིག་སྦྱོར་ཡིན་མིན་ཡང་ཤིན་ཏུ་ནས་བརྟག་དགོས་ཏེ། དེ་སྐབས་བོད་དུ་དབྱངས་ངེས་པའི་སྙན་ངག་འབྲི་སྲོལ་ཡོད་མེད་དང་། མེད་ཀྱང་ཐོན་མིས་རྒྱ་གར་ནས་དཔེ་བླང་དུ་ཆུག་ཀྱང་། དེའི་ནང་ནང་ཆོས་ཀྱི་མིང་ཚིག་ཏིང་འཛིན་དང་། ཉོན་མོངས། དེ་བཞིན་ཡེ་ཤེས་སོགས་མང་དུ་སྤྱད་འདུག་པ་དང་། དེ་དག་ནི་དེ་སྐབས་སུ་དར་ཡོད་པའི་མིང་ཚིག་ཅིག་ཡིན་མིན་ཡང་སྒྲ་སྦྱོར་བམ་གཉིས་ལ་བལྟ་དགོས་པ་དང་། དེ་ཡོད་དུ་ཆུག་ཀྱང་། ཡི་གེའི་ཕུད་ཕུལ་བའི་སྐབས་ཡིན་པས། ཐོན་མིས་དེ་ལྟར་བྲིས་པའི་དབང་དུ་བཏང་ཡང་སུས་ཀྱང་མི་གོ་བའི་ཚོད་དུ་སྣང་བས་དེ་བྲིས་ཀྱང་ཕན་ཐོགས་མེད་པ་ཞིག་རེད། དེ་ལྟར་བསྟོད་པས་རྒྱལ་པོ་དགྱེས་ཐབས་ནི་དེ་བས་ཀྱང་ག་ལ་ཡོད།

 

༣ ཆོས་རྒྱལ་སྐབས་ཀྱི་རྡོ་རིང་ལ་སུམ་རྟགས་ཀྱི་སྒྲིག་སྲོལ་དང་མི་མཐུན་པ་མང་བ།

སུམ་རྟགས་གཉིས་པོ་ཐོན་མིས་བརྩམས་ཡོད་ན་ཆོས་རྒྱལ་སྲོང་བཙན་གྱི་བཀའ་བསྒོས་འོག་བརྩམས་པ་གོར་མ་ཆག་ལ། དེ་ལྟར་ན། དེ་ནི་གཞུང་གི་བཀས་བཅད་ཀྱི་གཞུང་ཞིག་ཡིན་པས། གཞུང་གི་ཡིག་ཆ་དང་། དེ་བཞིན་རྡོ་རིང་སོགས་སུ་ནི་གཞུང་དེའི་ཚིག་འགྲོས་དང་མཐུན་པ་ཞིག་སྦྱར་དགོས་པ་ནི་བཤད་མི་དགོས་པ་ཞིག་རེད། ཡིན་ཡང་། སྔོན་གྱི་ཡིག་རྙིང་དང་། རྡོ་རིང་། དེ་བཞིན་ཏུང་ཧོང་ནས་ཐོན་པའི་ལོ་རྒྱུས་རྣམས་སུ་སུམ་རྟགས་ཀྱི་ཚིག་སྦྱོར་དང་མི་མཐུན་པ་ཤིན་ཏུ་མང་སྟབས་སུམ་རྟགས་གཉིས་ནི་དུས་རབས་བདུན་པའི་དུས་སུ་མེད་པར་གོ་ཐུབ།
མཁས་དབང་ཐུབ་བསྟན་སྦྱིན་པའི་བོད་སྐད་ཀྱི་བརྡ་སྤྲོད་གསར་བསྒྲིགས་སྨྲ་སྒོའི་ལྡེ་མིག་ལས། “ཁོ་བོ་ལྟར་ན། སུམ་ཅུ་པ་ལས་རྟགས་འཇུག་དུས་རབས་ཀྱི་ཆ་ནས་ཕྱིས་པ་དང་། སྔོན་གྱི་རྡོ་རིང་དང་ཏུང་ཧོང་ནས་ཐོན་པའི་ཡིག་ཆ་སོགས་སུ་སུམ་རྟགས་ནས་གཏན་འབེབས་མཛད་པའི་བརྡ་སྤྲོད་ཀྱི་ཁྲིམས་སྲོལ་མང་པོ་ཞིག་མི་རྩི་བ་སོགས་ཀྱིས་སུམ་ཅུ་པ་ལྟ་བུའི་སྒྲའི་བསྟན་བཅོས་དང་དེ་དང་འབྲེལ་བའི་བརྡ་སྤྲོད་པའི་ཁྲིམས་རྣམས་དྲིན་ཅན་ཐོན་མིས་གཏན་འབེབས་མཛད་པར་ངེས་མོད། བོད་ཀྱི་ཡི་གེ་རང་ཉིད་ཐོན་མིས་གསར་དུ་བཟོས་ཞེས་པ་དེ་ལ་དོགས་གཞི་ཆེ་ཙམ་འདུག་ཅིང་། འདིར་ནི་དཔྱད་པ་འདིའི་སྐོར་རེ་ཞིག་བཏང་སྙོམས་སུ་བཞག་ཡོད།” [8] ཅེས་པ་ལས་མ་གསུངས་པ་ནི་ཤིན་ཏུ་ཕངས་སོ།།

 

༤ ས་སྐྱ་པཎ་ཆེན་བར་སུམ་རྟགས་ཀྱི་འགྲེལ་པ་ཡེ་ནས་མ་བྱུང་བ།

གལ་ཏེ་སུམ་རྟགས་གཉིས་ཐོན་མིས་བརྩམས་ཡོད་ན་ས་པཎ་བར་སུམ་རྟགས་ཀྱི་འགྲེལ་པ་གཅིག་ཀྱང་མ་བྱུང་བ་ཅི་ཞིག་ཡིན། བོད་པ་རྣམས་རྩ་བ་ཞིག་བྱུང་ན་འགྲེལ་པ་འབྲི་རྒྱུ་ལ་ཤིན་ཏུ་དགའ་བ་ཞིག་ཡིན་ཏེ། མངོན་པར་རྟོགས་པའི་རྒྱན་བོད་བསྒྱུར་ཟིན་མ་ཐག་བོད་ཀྱི་རྒྱལ་པོ་ཁྲི་སྲོང་ལྡེའུ་བཙན་རང་ཉིད་ཀྱིས་དེའི་འགྲེལ་བ་ཞིག་མཛད་པ་དེས་མཚོན་ཐུབ།
དེས་མཚོན་ནས་བོད་པ་རྣམས་ནི་འགྲེལ་པ་འབྲི་སྲོལ་ཤིན་ཏུ་ཆེ་བས་ཐོན་མིས་སུམ་རྟགས་གཉིས་བརྩམས་ཡོད་ན་དེའི་འགྲེལ་པ་གཅིག་ཀྱང་མ་བྱུང་བ་ཡིན་མི་སྲིད་པ་ཞིག་རེད། ད་དུང་། ས་པཎ་གྱི་སྡེབ་སྦྱོར་གྱི་གཞུང་དུ། སུམ་རྟགས་གཉིས་ཀྱི་ཚིག་ཕལ་ཆེ་བ་གཅིག་མཚུངས་ཡིན་པ་དང། དེ་ནི་མི་གཅིག་གིས་བརྩམས་ཟེར་ཡང་ཡིད་མི་ཆེས་པ་མེད་ཅིང་། དེའི་ནང་སུམ་རྟགས་གཉིས་ཞེས་པ་ཞིག་ཟུར་ཙམ་ཡང་མི་གསལ་བ་དང་། གལ་ཏེ་དེ་སུམ་རྟགས་ཀྱི་འགྲེལ་པ་ཡིན་ན་སུམ་རྟགས་ཀྱི་མཚན་ཙམ་ཡང་མི་གསལ་བ་དེ་ཅི་ལ་ཐུག་པ་ཡིན། དེས་ནི་ས་པཎ་སྔོན་སུམ་རྟགས་གཉིས་ཞེས་པ་ཞིག་ཡེ་ནས་མེད་པ་མཚོན་ཐུབ།
འོན་ཀྱང་དེང་སང་ང་ཚོས་མཇལ་དུ་ཡོད་པའི་བསྟན་འགྱུར་ཀུན་གྱི་ནང་དུ་ཚིག་འགྲོས་ཏོག་ཙམ་མི་འདྲ་བ་ཙམ་ལས་སློབ་དཔོན་ཨ་ནུས་མཛད་པའི་བྱ་ཀ་ར་ཎའི་བསྟན་བཅོས་ཞེས་པ་ཞིག་མཇལ་དུ་ཡོད་ཀྱང་། སྔོན་གྱི་བསྟན་འགྱུར་ཁྲོད་དུ་སུམ་རྟགས་གཉིས་མེད་པ་དེས་ས་པཎ་མ་བྱུང་བར་སུམ་རྟགས་གཉིས་མེད་པར་མཚོན་ནོ།།

 

༥ ས་པཎ་གྱི་ཡི་གེའི་སྦྱོར་བ་དེ་རང་སུམ་རྟགས་གཉིས་ཡིན་པ།

བོད་ཀྱི་ལོ་རྒྱུས་ཀུན་གྱི་ནང་དུ་ས་པཎ་གྱིས་བརྩམས་པའི་ཡི་གེའི་སྦྱོར་བ་ཞེས་ཡོངས་སུ་གྲགས་པས་མ་ཟད། ཡི་གེའི་སྦྱོར་བ་ལ་ཞིབ་ཏུ་གཟིགས་ན་དེ་ནི་སུམ་རྟགས་ཀྱི་ཚིག་ཇི་མ་ཇི་བཞིན་ལགས་ཤིང་། ས་པཎ་གྱིས་སུམ་རྟགས་གཉིས་ལས་བཤུས་པ་ཡིན་ན། དེ་ལས་གསུངས་ཞེས་ལུང་འདྲེན་གནང་ངེས་ཡིན་ལ། བོད་ཀྱི་མཁས་པའི་ཡང་རྩེ་ས་པཎ་ལྟ་བུས་དོན་མེད་རྐུས་བཤུས་མི་བྱེད་པའི་ཡིད་ཆེས་མེད་ན་གཞན་སུ་ཞིག་ལ་ཡིད་ཆེས་བྱེད། ས་པཎ་གྱི་ཡི་གེའི་སྦྱོར་བ་བརྩམས་པ་ནི་བཀའ་འབུམ་རང་དུ་གསལ་ཞིང་། ས་པཎ་གྱིས་ཡི་གེའི་སྦྱོར་བ་མ་བརྩམས་བར་དུ་སུམ་རྟགས་གཉིས་མིག་གིས་རིག་རྒྱུ་མེད་ཅིང་། རྣ་བས་ཀྱང་ཐོས་རྒྱུ་མེད། ཡི་གེའི་སྦྱོར་བ་བརྩམས་པ་དང་སུམ་རྟགས་གཉིས་ཀྱི་འགྲེལ་པ་ཡིན་ཟེར་བ་མང་པོ་ཞིག་གང་ཞིག་ནས་དོན་ཡོང་བ་རེད། སུམ་རྟགས་ཀྱི་འགྲེལ་པ་དེ་དག་ནི་ས་པཎ་གྱི་རྗེས་སུ་བྱུང་བ་ཞིག་ལས་དེའི་སྔོན་དུ་བྱུང་བ་གཅིག་ཀྱང་མེད། དེས་ཀྱང་ཡི་གེའི་སྦྱོར་བ་དང་། སུམ་རྟགས་གཉིས་རྩོམ་པ་པོ་ས་པཎ་རང་ཡིན་པ་ལས་ཐོན་མིས་སུམ་རྟགས་ཟེར་བ་གཉིས་བརྩམས་མེད་པ་དེ་བས་གསལ་པོར་གྱུར་པ་རེད།

 

༦ སྔོན་གྱི་བསྟན་འགྱུར་དག་མ་རྣམས་སུ་སུམ་རྟགས་གཉིས་མེད་པ།

དེང་གི་བསྟན་འགྱུར་དང་དེའི་དཀར་ཆག་གི་ནང་དུ། ཚིག་མང་ཉུང་གི་ཁྱད་པར་ཡོད་པའི་བྱཱ་ཀ་ར་ཎ་སུམ་ཅུ་པ་དང་རྟགས་ཀྱི་འཇུག་པ་གཉིས་ཀ་སྣང་ཡང་། བཅོམ་ལྡན་པ་རིགས་པའི་རལ་གྲིས་རྒྱལ་བའི་གསུང་རབ་ཀྱི་བཀའ་བསྟན་འགྱུར་རོ་ཅོག་དང་སྔོན་གྱི་བོད་མཁས་པས་མཛད་པའི་བསྟན་བཅོས་རྣམས་ཀྱི་དཀར་ཆག་བསྒྲིགས་སྐབས་ཀྱང་ཐོན་མིས་བརྩམས་པའི་སུམ་རྟགས་གཉིས་ཞེས་པ་ཞིག་ཡེ་ནས་མེད་པ་དང་། བུ་སྟོན་ཐམས་ཅད་མཁྱེན་པའི་བསྟན་པའི་གསལ་བྱེད་ཆོས་ཀྱི་འབྱུང་གནས་གསུང་རབ་རིན་པོ་ཆེའི་མཛོད་ཅེས་པའི་ནང་། སྔོན་ནས་དེ་དུས་ཀྱི་བར་བསྟན་འགྱུར་ཡོད་དོ་ཅོག་གི་དཀར་ཆག་བསྒྲིགས་ཡོད་ཅིང་། དེའི་ནང་བོད་ཀྱི་མཁས་པས་བརྩམས་པའི་བསྟན་བཅོས་ཁག་འགའ་ཤས་ཀྱང་འཁོད་ཡོད་ལ། ཐོན་མིས་བརྩམས་པའི་སུམ་རྟགས་གཉིས་ཞེས་པ་ཞིག་མཚན་ཟུར་ཙམ་ཡང་མེད་པ་དེས། བུ་སྟོན་དང་དེའི་གོང་གི་བསྟན་འགྱུར་གྱི་ནང་སུམ་རྟགས་གཉིས་ཞེས་པ་ཞིག་ཡེ་ནས་མེད་པ་དེ་བས་གསལ་དུ་ཕྱིན་པ་རེད།

 

༧ སྔོན་གྱི་མཁས་པའི་རྣམ་ཐར་དུ་སུམ་རྟགས་སྦྱངས་ཞེས་ཡེ་ནས་མེད་པ།

ས་པཎ་མ་བྱུང་གོང་གི་བོད་ཀྱི་ལོ་རྒྱུས་དང་། རྒྱལ་རབས། དེ་བཞིན་རྣམ་ཐར་སོགས་ཀུན་གྱི་ནང་བོད་ཀྱི་མཁས་པ་སུ་ཞིག་གིས་ཀྱང་སུས་མཛད་མིན་ལ་མ་ལྟོས་པར་སུམ་རྟགས་གཉིས་སྦྱངས་པའི་སྐོར་ཟུར་ཙམ་ཡང་མེད་པར། ཀུན་གྱིས་སྒྲ་ཀ་ཙན་སོགས་དང་། སྨྲ་སྒོ་སོགས་སྦྱངས་ཞེས་འཁོད་པ་ལས་སུམ་རྟགས་གཉིས་སྦྱངས་ཞེས་ཡིག་འབྲུ་གཅིག་ཀྱང་འཁོད་མེད་པ་དེས་ནི། གཟུ་བོར་གནས་པའི་བློས་དཔྱད་ན་ཏོག་ཙམ་ཡ་མཚན་དགོས་པ་ཞིག་མ་རེད་དམ།
དེའི་སྔོན་དུ་ཐོན་མིས་བརྩམས་ཟིན་ན། དེ་ནི་བོད་ཀྱི་བརྡ་སྤྲོད་པའི་ཕྱི་མོར་གྱུར་པ་ཡིན་པས། བོད་ཀྱི་མཁས་པ་དག་གིས་དེ་དག་ལ་མ་གཟིགས་པ་ག་ལ་ཡིན་སྙམ་ཞིང་ངེས་པར་དུ་གཟིགས་དགོས་པ་ཞིག་ཡིན་པ་ལས། རྒྱ་གར་གྱིས་བརྩམས་པའི་སྨྲ་སྒོ་སོགས་ལ་ཨུ་ཚུགས་ཀྱིས་གཟིགས་དགོས་དོན་ཅི་ཡོད། དེ་ཡང་ཁ་ནང་དུ་ཕྱོགས་ནས་བསམ་བློ་གཏོང་དགོས་པ་ཞིག་མི་འདུག་གམ།

 

༨ པཎ་ཆེན་སྨྲི་ཏིས་སུམ་རྟགས་གཉིས་ཀྱི་ཁུངས་ཡེ་ནས་མ་བགྲངས་པ།

པཎ་ཆེན་སྨྲི་ཏི་དྲན་པ་ཡེ་ཤེས་གྲགས་པ་ཞེས་པ་དེས་མཛད་པར་གྲགས་པའི་སྨྲ་བའི་སྒོ་མཚོན་ཆ་ནི། པཎ་ཆེན་རང་ཉིད་བོད་ཡུལ་དུ་ཕེབས་པའི་ཕེབས་ལམ་དུ་རང་གི་དགེ་ཕྲུག་ལོ་ཙཱ་བ་གྲོངས་ཤིང་། རང་གིས་བོད་སྐད་མི་ཤེས་སྟབས་བོད་ཡུལ་དུ་ལུག་རྫི་གནང་ནས་བཞུགས་དགོས་ཐུག་པའི་ཡ་ང་བའི་ལོ་རྒྱུས་དུ་མ་ཞིག་བརྒྱུད་པའི་མཐར། རང་གིས་བོད་ཡིག་ལེགས་པར་སྦྱངས་ནས། བོད་ཀྱི་བརྡ་སྤྲོད་པའི་བསྟན་བཅོས་སྨྲ་བའི་སྒོ་མཚོན་ཆ་བརྩམས་པའི་སྐབས། པཎ་ཆེན་རང་གིས་ཁུངས་སུ་གཏུགས་པའི་བརྡ་སྤྲོད་པའི་བསྟན་བཅོས་གཞན་གང་ཡང་རག་མེད་ལ། དེའི་སྐབས་སུ་སུམ་རྟགས་གཉིས་ཡོད་ན་སྨྲ་སྒོའི་ནང་སུམ་རྟགས་གཉིས་ཀྱི་ལུང་མ་དྲངས་པ་ག་ལ་སྲིད། ད་དུང་དེའི་རང་འགྲེལ་དུ་གྲགས་པའི་ནང་དུའང་སུམ་རྟགས་ཀྱི་ལུང་འདྲེན་ཕར་ཞོག བཤད་སྲོལ་ཙམ་ཡང་མི་གསལ་ན་དེའི་དུས་སུ་སུམ་རྟགས་གཉིས་རྩ་བ་ནས་མེད་པ་ཐག་གཅོད་ཐུབ་བོ།།

 

༩ རྩ་བ་བརྒྱད་ནས་སུམ་རྟགས་གཉིས་ཁོ་ན་ལུས་པ་དེ་བས་མི་འཐད་པ།

སུམ་རྟགས་གཉིས་ཐོན་མིས་མཛད་པར་མ་ཟད་ཐོན་མིས་བརྡ་སྤྲོད་པའི་བསྟན་བཅོས་བརྒྱད་བརྩམས་ཞེས་འུར་བརྗོད་པ་དེ་ནི་ཁུངས་མེད་ཀྱི་གཏམ་ཞིག་ཡིན་ཏེ།སུམ་རྟགས་གཉིས་བརྩམས་པའི་ལོ་རྒྱུས་ཁུངས་ཐུབ་གང་ཡང་མེད་པར་ད་དུང་དེའི་སྟེང་ལྷག་པོ་དྲུག་སྦྱར་བ་ནི་སྐྱག་རྫུན་གཅིག་བཤད་པས་མིས་ཤེས་པར་དོགས་ནས་དེའི་སྟེང་སྐྱག་རྫུན་ལྷག་པོ་བཤད་པ་དང་གཅིག་མཚུངས་རེད།
བསམ་བློ་ཞིབ་མོར་གཏང་ན། བསྟན་བཅོས་དྲུག་པོ་དེའི་མཚན་ཙམ་ཡང་མེད་པར་གྱུར་ཅིང་། སུམ་རྟགས་གཉིས་ཀྱི་མཚན་བྱང་མ་ཟད་མགོ་ནས་མཇུག་བར་ཚིག་གཅིག་ཀྱང་མ་ལུས་པར་ཐམས་ཅད་ཁྲ་ལམ་མེར་མཐོང་རྒྱུ་ཡོད་པ་འདི་སྒྱུ་འཕྲུལ་འདྲ་ཡིན་ཟེར་ན་མ་གཏོགས་ལུང་རིགས་ཀྱི་འགྲེལ་བཤད་བྲལ་བ་ཞིག་རེད།

 
 

༡༠ སུམ་རྟགས་གཉིས་ཐོན་མིས་བརྩམས་པའི་ལུང་རིགས་གང་ཡང་མེད་པ།

མདོར་ན། སུམ་རྟགས་གཉིས་ཐོན་མི་ཡིས་བརྩམས་པའི་ལོ་རྒྱུས་ཀྱི་ཁུངས་དང་། རྒྱུ་མཚན་ལྡན་པའི་རིགས་པ་གང་ཡང་མེད་པ་ཤིན་ཏུ་གསལ་བ་ནི། གོང་གི་རྒྱུ་མཚན་དེ་བས་གཞན་ག་ལ་དགོས། འོ་ན། ཐོན་མིས་མཛད་པའི་སུམ་ཅུ་པ་དང་རྟགས་འཇུག་ཅེས་ཡོངས་སུ་གྲགས་པ་དེ་ནི། འདི་ལྟར་ཡིན་སྲིད་དེ་སུམ་རྟགས་གཉིས་ནི་ཐོན་མིའི་དུས་སུ་མེད་ཅིང་། ས་པཎ་གྱིས་བརྩམས་པ་ཞིག་ཡིན་པ་ལ་སུམ་རྟགས་གཉིས་བོད་ཀྱི་བརྡ་སྤྲོད་པའི་ཕྱི་མོར་གྱུར་པ་དང་། བརྡ་སྤྲོད་པའི་གཞུང་ལུགས་ཀུན་གྱི་རྩ་བར་གྱུར་པས། དེའི་མཛད་འཕྲིན་རྒྱས་ན་ཕྱོགས་ཡོངས་ནས་ཕན་ནུས་ཤིན་ཏུ་ཆེ་བ་དང་། ས་པཎ་ནི་བོད་གངས་ཅན་ལྗོངས་ཀྱི་མཁས་པའི་ཡང་རྩེར་སོན་པ་ཞིག་ཡིན་ན་ཡང་། དེའི་སྐབས་ཆོས་ལུགས་ཀྱི་བསམ་བློ་ཅུང་གུ་དོག་པོ་ཡོད་པ་ནི་ལོ་རྒྱུས་ནང་ཤིན་ཏུ་གསལ་བས། ས་སྐྱ་པཎ་ཆེན་གྱིས་མཛད་ཅེས་ཟེར་ན། བོད་མི་ཀུན་གྱིས་ཐུན་མོང་དུ་སློབ་གཉེར་མི་བྱེད་པར་དགོངས་ནས། སྲོང་བཙན་གྱི་དུས་སུ་ཐོན་མི་ཞེས་པའི་བློན་པོ་བོད་ཀྱི་ཡི་གེ་ལ་བཀའ་དྲིན་ཆེ་བ་དེས་མཛད་ཅེས་ཟེར་ན་ཀུན་གྱིས་ཡིད་ཆེས་པའི་གནས་སུ་གྱུར་བས་ཐོན་མིས་མཛད་ཅེས་ཟེར་བ་ཡིན་ནམ་སྙམ།
དེ་ལྟ་བུ་ནི། བོད་ཀྱི་ལུགས་ལ་ཡོངས་སུ་གྲགས་པ་ཞིག་སྟེ། བོད་པ་རྣམས་ཀྱིས་རྒྱ་གར་མཁས་པ་རྩི་མཐོང་ཆེན་པོར་བྱས་པའི་སྐབས་བོད་ཀྱི་མཁས་པས་བརྩམས་པའི་བསྟན་བཅོས་རྣམས་ཀྱང་རྒྱ་གར་མཁས་པའི་མིང་བཏགས་ནས་བཏོན་པ་ནི་ཇི་སྙེད་ཅིག་བྱུང་བ། རྗེ་ཙོང་ཁ་པ་ཆེན་པོའི་ལེགས་བཤད་གསེར་འཕྲེང་[9]དུ་ཞིབ་མོར་དཔྱད་ཡོད་པས་འདིར་མི་སྤྲོ་ལ་མཁྱེན་པར་འདོད་ན་དེ་དག་ལ་གཟིགས་ཤིག

སྔོན་བྱོན་མཁས་པའི་ཐུགས་ཀྱི་ཁང་བཟངས་ནས།།
བྱུང་བའི་ལེགས་པར་བཤད་པའི་འོད་དཀར་ཕྲེང་།།
ཁོ་བོའི་སྙིང་ལ་དལ་གྱིས་སིམ་པ་ན།།
མཆོད་སྤྲིན་མཁའ་ལ་རྩེན་པ་དངོས་པོའི་གཤིས།།
གནའ་དེང་ཤེས་བྱའི་མཁའ་ལ་རབ་རྩེན་པའི།།
གང་གའི་རྡུལ་ལ་སྙེད་པའི་དཀྱིལ་འཁོར་ན།།
འཆད་རྩོད་རྩོམ་པའི་དཔལ་ལ་མངའ་བརྙེས་པ།།
བེ་རི་རྒྱལ་སྲས་ཁོ་བོ་ཙམ་དུ་ཟད།།
ཅེས་པ་འདི་ཡང་། སྔོན་བྱོན་མཁས་པའི་བཀའ་དྲིན་དྲན་པ་དང་། རང་གི་དྲེགས་པའི་ཉམས་དང་འདྲེས་པའི་ངལ་གསོ་བའི་ཚིགས་སུ་བཅད་པའོ།།

[1] བེ་དཀར་གཡའ་སེལ། སྡེ་སྲིད་སངས་རྒྱས་རྒྱ་མཚོ། ཤོག་གྲངས། པར་མ།

[2] ཞ་ལུ་ལོ་ཆེན་གྱི་འགྲེལ་པ། ཞ་ལུ་ལོ་ཙཱ་བ་ཆོས་སྐྱོང་བཟང་པོ། ཤོག་གྲངས། པར་མ།

[3] རྒྱལ་རབས་གསལ་བའི་མེ་ལོང་། བླ་མ་དམ་པ་བསོད་ནམས་རྒྱལ་མཚན། ཤོག་གྲངས། པར་མ།

[4] དཀར་དྲུང་པད་མ་རྡོ་རྗེའི་སུམ་རྟགས་འགྲེལ་པ། དཀར་ལེབ་དྲུང་ཡིག ཤོག་གྲངས། པར་མ།

[5] རྒྱ་བོད་ཀྱི་ཆོས་འབྱུང་རྒྱས་པ། ལྡེའུ་དགེ་བཤེས་ཇོ་འབུམ། ཤོག་གྲངས། པར་མ།

[6] རྒྱལ་རབས་གསལ་བའི་མེ་ལོང་། བླ་མ་དམ་པ་བསོད་ནམས་རྒྱལ་མཚན། ཤོག་གྲངས། པར་མ།

[7] ཐུབ་བསྟན་སྦྱིན་པའི་བརྡ་སྤྲོད་སྨྲ་སྒོའི་ལྡེ་མིག་ནས་དྲངས། ཤོག་ངོས། ༣༡ བོད་ཀྱི་གཙུག་ལག་ཞིབ་དཔྱོད་ཁང་།

[8] བོད་སྐད་ཀྱི་བརྡ་སྤྲོད་སྨྲ་སྒོའི་ལྡེ་མིག གླང་རི་བ་ཐུབ་བསྟན་སྦྱིན་པ། ཤོག་གྲངས། བོད་ཀྱི་གཙུག་ལག་ཞིབ་དཔྱོད་ཁང་།

[9] ལེགས་པར་བཤད་པ་གསེར་གྱི་ཕྲེང་བ། རྗེ་ཙོང་ཁ་པ་བློ་བཟང་གྲགས་པའི་དཔལ། ཤོག་གྲངས།