སྤྱན་ཆེན་པོ།
ཉེ་སྔོན་ནས་བཟུང་དྲ་བ་ཁག་གི་གླེང་གཞིར་གྱུར་བ་ནི་བལྟས་ན་མིག་ཚ་ཞིང་ཐོས་ན་སྙིང་འཕར་བའི་བྱང་ཨ་རིའི་གཟའ་མཇུག་སློབ་དེབ་ཅིག་རེད། བྱང་ཨ་རིའི་གཟའ་མཇུག་གི་སློབ་དེབ་དེ་ནི་བོད་གཞུང་ཤེས་རིག་ལས་ཁུངས་ནས་གཏན་འབེབས་དང་དཔར་འགྲིམས་ཞུས་པ་ཞིག་ཡིན་པ་དང་། སློབ་དེབ་ནང་དུ་བོད་རང་གི་བརྡ་སྤྲོད་ལ་གཤག་བཅོས་བྱས་ནས་རིག་གསར་གཉིས་པ་ལྟ་བུ་ཞིག་ཡང་བསྐྱར་བོད་སྐད་ཡིག་གི་སྟེང་དུ་བསླེབས་ནས་ཉམ་ང་ཉག་ཕྲ་བའི་སྐབས་འདིར་བོད་སྐད་ཡིག་ནི་ཤི་མིན་རོ་མིན་གྱི་ནད་པ་ཉམ་ཐག་ཅིག་དུ་བཏང་འདུག
གནའ་བའི་ཨེ་ཟི་རལ་རྒྱབ་ཁབ་ཁ་ཐོར་དགུ་ཐོར་དུ་བཏང་དུས་མི་རིགས་ཀྱི་རིག་གཞུང་གཙོ་བོར་བཟུང་ནས་ཡུལ་གྱར་རྒྱལ་ཁབ་སོ་སོའི་ནང་དུ་སློབ་གྲྭ་ཁག་བཙུགས་ནས་ཨེ་ཟི་རལ་གྱིས་རང་གི་རིག་གཞུང་ལ་བཟུང་བའི་བསམ་བློ་འདུ་ཤེས་ཀྱི་སྙིང་སྟོགས་ལ་འཛམ་གླིང་མི་མང་ཧ་ལས་ཧང་སངས་པར་གྱུར། འོན་ཀྱང་། ང་ཚོ་ཅི་ཞིག་ལ་ཨེ་ཟི་རལ་མི་མང་ལྟ་བུ་མིན་སོང་བ་རེད་དམ།
༧གོང་ས་མཆོག་གིས་གཞན་ལ་མེད་པའི་སྐྱབས་བཅོལ་སྲིད་གཞུང་བཙུགས། རིག་གཞུང་གཙོ་བོར་བཟུང་ནས་བཙན་བྱོལ་དུ་འབྱོར་མ་ཐག་ནས་ཐོག་མར་སློབ་གྲྭ་ཁག་གསར་འཛུགས་བྱས། མཁས་དབང་ཟམ་གདོང་མཆོག་གིས་ཤེས་ཡོན་སྲིད་ཇུས་གཏན་འབེབས་བྱས་ནས་རིག་གཞུང་སྲ་གཏན་དུ་བཏང་ཡོད་མོད། ངོ་ཚ་མེད་པའི་གདོང་འབག་གྱོན་མཁན་ཁ་ཤས་ཧོབ་དེ་ཐོན་ནས་རྐང་རྗེས་ལག་བསུབས་ཀྱི་དཔེ་ལྟར་བློ་ཡིད་ལ་མི་ཤོང་བའི་སྐད་ཡིག་རྩ་གཏོར་གྱི་སྲིད་ཇུས་ངན་པ་ཞིག་ལག་བསྟར་བྱས་བ་འདིས་ང་ཚོ་ནི་ཨེ་ཟི་རལ་ལྟ་བུ་ཞིག་མ་ཡིན་པ་ཐག་གིས་བཅད་སོང་བ་མ་ཡིན་ནམ།
ད་དུང་ཁོང་ཚོས་སྦོམ་བཤད་ངང་འདི་ནི་ལོ་མང་གི་ཉམས་མྱོང་གཙིགས་ཆེར་བཟུང་སྟེ་གཏན་འབེབས་བྱས་པ་ཡིན་ཟེར་བའི་སྐད་ཆ་རྫབ་ཆེན་ཞིག་ཀྱང་བསྒྲགས་སོང་བས། ཁྱོད་ཚོའི་ལོ་མང་གི་ཉམས་མྱོང་ནི་བརྡ་སྤྲོད་ལ་བཟོ་བཅོས་བྱས་ནས་སློབ་ཕྲུག་ཚོའི་བསམ་བློའི་ནང་ལ་ཁྲོ་ཆུ་ལྡུག་རྒྱུ་དེ་ཡིན་ནམ།
ང་ཚོ་མི་རིགས་ལ་དགའ་ཞིག་སྐད་ཡིག་ལ་དུངས་མཁན་ཚོས་ད་ནི་ེའོས་ལངས་བྱེད་དགོས། སྐད་ཡིག་གི་ཆེད་དུ་འོས་ལངས་བྱས་ནས་སྐད་ཡིག་རྩ་གཏོར་དུ་གཏོང་མཁན་གྱི་སྐུ་དྲག་གསར་བ་དག་གི་གདོང་འབག་བཤུ་དགོས། ཉམ་ང་ཉག་ཕྲ་བའི་སྐད་ཡིག་གི་འཆི་གསོན་གྱི་གནད་འགག་ལ་ཐུག་པའི་སྐབས་འདིར་ལྷ་ཁང་མེར་ཤོར་ན་འཛུམ་དམུལ་དམུལ་ཟེར་བ་ལྟར་མི་འདུག་པར་ང་ཚོས་གཉིད་འདུག་པའི་ཡུལ་གྱར་བ་དག་ལ་བརྡ་ལན་གཏོང་དགོས། གྲོས་ཚོགས་ནང་གི་བོད་སྐད་བོད་ཡིག་མི་ཤེས་པའི་ཡིག་རྨོངས་པ་དག་ལ་རྒོལ་དགོས། ང་ཚོ་མི་མང་རྣམས་ཁ་མེད་མིག་མེད་པའི་བརྟུལ་ཞུགས་ལས་གྲོལ་ནས་སྐད་ཡིག་གི་ཆེད་དུ་ལུང་སྐད་ཉི་ཚེ་བ་ཞིག་གཙོ་བོར་བཟུང་ནས་བརྡ་སྤྲོད་ལ་གཤག་བཅོས་བྱེད་མཁན་གྱི་སྲིད་གཞུང་འདི་ལ་ཁྲོམ་སྐོར་བྱེད་དགོས། སྦྱར་ཡིག་དགྲམ་དགོས། སྐད་ཡིག་གི་ཆེད་དུ་རང་སྲོག་བཏང་བ་རྣམས་ལ་ང་ཚོས་བཟོད་གསོལ་ཞུ་དགོས།
༢༠༡༦-༨-༣ མཚན་མོར་བྲིས།
སྤྱན་ཆེན་པོའི་གསུངས་ལ་རྒྱབ་སྐྱོར་ཡོད། ་མི་སམ་བྷོ་ཊ་ཉིད་ཀྱི་ཞལ་ནས།
དེ་ལྟར་གྱུར་ན་འཇིག་རྟེན་དུ། །
དོན་མཚོན་བརྗོད་པ་ཀུན་ཀྱང་མེད། །
རིག་བྱེད་སྨྲ་བའང་ཡོད་མི་འགྱུར། །
ཉན་ཐོས་རང་རྒྱལ་སངས་རྒྱས་ཀྱི། །
བསླབ་པ་རྣམས་ཀྱང་མེད་པར་འགྱུར།།
ཅེས་བསླུ་མེད་རྡོ་རྗེའི་བཀའ་ལུང་ཟབ་མོ་འདི་ལ་ཞིབ་འདིང་ཞིག་རྒྱབ་ན། རྩོམ་པ་པོ་ཐུན་མི་ལོ་ཙཱ་བ་ཆེན་པོ་སྐབས་དེ་དུས་ནས་སེམས་ཚོར་ཆེན་པོའི་ཁོང་གི་བརྡ་སྤྲོད་ཟབ་མོ་སྟག་ཤར་ལང་ཚོའི་རྒྱན་ལྡན་འདི་ནམ་ཞིག་བསོད་ཟད་བོད་རིགས་འདི་རྣམས་ཀྱིས་རྐང་ཆད་ལག་སྡུམ་དུ་གཏོང་མི་ཡོང་ངམ་བསམ་ནས་དུས་གསུམ་གསལ་གཟིགས་མ་འོང་ལུང་བསྟན་ཡིན་པ་འདྲ།
ངས་ མདང་ ཕྱིན་པ་ཡིན།
ངས་ དེ་རིང་ འགྲོ་བགྱིད་ ཡོད།
ངས་ སང་ཉིན་ འགྲོ་བགྱི་ ཡིན།
་
ཞེས་ཡིག་ཐོག་དགོས་འདུག་ཀྱང་།
་
ང་ མདང་ ཕྱིན་པ་ཡིན།
ང་ དེ་རིང་ འགྲོ་བགྱིད་ ཡོད།
ང་ སང་ཉིན་ འགྲོ་བགྱི་ ཡིན།
་
ངག་ཐོག་ཏུ་བབ་ས་འདི་རང་རེད་དོ།།