ལྕེ་ནག་པོ།
མི་ཚོགས་ཀྱི་འཚང་ཁ་དང་རླངས་འཁོར་གྱི་འུར་ཟིང་སོགས་ལ་ཞེ་ནས་སུན་པས་ནམ་རྒྱུན་ལྷོད་བག་གི་ཁོར་ཡུག་རེ་བདམས་ནས་བག་འཁུམས་ཀྱི་འདུ་ཤེས་ཚ་བོ་དེ་ཇ་ཁ་དང་དཔེ་ཀློག་ཐན་ཐུན་ཁྲོད་རླུང་ལ་སྤུར་བཞིན་ཕུགས་དོན་གྱི་ཀུན་སློང་ལ་སྙུག་ཁ་གཏད་པ་ནི་ང་རང་ཉིད་ཀྱི་དགའ་ཕྱོགས་དེའོ།། དེའི་ཕྱིར་རྡ་སའི་རི་གྲོང་འདི་ནས་ཀྱང་ངས་ཧ་ཅང་གི་ལྷིང་འཇགས་ཀྱི་ཡུལ་ཞིག་ནས་ཁང་བ་ཞིག་གླས་ནས་སྐྱབས་བཅོལ་བའི་ལས་དབང་ལ་ལས་བརྡ་མེད་པར་ཆེས་སྤྱིར་བཏང་གིས་སྤྱིར་བཏང་གི་འཚོ་བ་ཞིག་རོལ་བཞིན་ཡོད།
དེ་རིང་ཞོགས་པའི་མཁའ་དབུགས་ནི་ཆེས་གཙང་ཞིང་བསིལ་བག་ལྡན་ལ། ཁང་བའི་གཡས་གཡོན་གྱི་སྡོང་བོའི་ཚོགས་ནི་ཞོགས་སྨུག་ཁྲོད་ན་ཅི་ཞིག་ལ་སྐྱོ་བ་བཞིན་དཀྲོང་ངེར་འགྱིང་འདུག་པ་ནི་ཨ་ཆད་ཨུ་ཐུག་གི་གསར་འབྱོར་བ་ཚོའི་འཚོ་བ་ལ་མྱ་ངན་བྱེད་པ་དང་ཀུན་ནས་འདྲའོ།།
དེ་རིང་ཡང་གསུང་ཆོས་ཡོད་པས་ཁ་སང་བཞིན་ནམ་གསལ་མ་ཐག་ངས་ཞོགས་པའི་དྭངས་གཙང་གི་ཁ་དབུགས་སྔམ་བཞིན་བྲེལ་བྲེལ་ཚུབ་ཚུབ་ངང་ཡར་ལངས་ནས་གཅིན་པ་གཏོང་གི་འགྲོ་སྐབས། ལོ་ན་ཉི་ཤུར་བུད་མ་ཐག་པའི་བོད་མི་གཞོན་སྐྱེས་ཤིག་གིས་ངའི་ཁང་བའི་གཡས་ཕྱོགས་ཀྱི་ཁྲུས་ཁང་སྒོ་འགྲམ་ན་ལྷམ་གྱོན་བཞིན་འདུག ངས་དེ་ལ་དོ་སྣང་གང་ཡང་མ་བྱས་པར་ཤར་སེ་གསང་སྤྱོད་ཕྱོགས་སུ་སོང་བ་ཡིན། གློ་བུར་བའི་དངངས་སྐྲག་ཅིག་གིས་དེད་ནས་ཕྱིར་ཁང་བའི་ཕྱོགས་སུ་རྒྱུག་པ་ན། ན་གཞོན་དེ་ངའི་ཁང་བའི་ནང་ནས་མར་ཐོན་པ་དང་ང་སྒོ་ནང་ནས་ཡར་འཛུལ་བ་གཉིས་དུས་མཉམ་དུ་ཁེལ་སོང་བས་ངས་ཁོ་ལ་འཇིགས་ར་སྐུལ་བཞིན་ཕྱིར་ཁང་བའི་ནང་ལ་དེད་པ་ཡིན། ཁོས་བཤད་ན་ཁོའི་གྲོགས་པོ་ཞིག་འདི་ན་ཡོད་པས་ཁང་བ་ནོར་སོང་ནི་རེད་ཟེར། ངས་ཁང་བའི་ནང་ལ་ཞིབ་ཏུ་བལྟས་པ་ན་གློག་ཀླད་དང་ཁ་པར་སོགས་རང་འཇགས་སུ་འདུག
ད་ནི་སེམས་ཁྲལ་གཞན་ཞིག་ཡོད་པ་ནི་སྒོར་ལྡོག་ཆ་བོ་ཡོད་མེད་དེ་ཡིན་པས་སྟོད་ལྭའི་ཁུག་མའི་ནང་དུ་ལག་སྙོབ་ཅིག་བྱས་པ་ཡིན། སྒོར་ཁུག་ཀྱང་འདུག་པས་སེམས་ཅུང་ཙམ་བདེ་བའི་ངང་ཁོ་ལ་གཤེ་གཤེ་འགའ་བཏང་བ་ཡིན། ཁོས་རྒྱུ་མཚན་འགའ་བགྲང་ཞོར་ངས་མཉམ་བཞག་མེད་པའི་སྐབས་དང་བསྟུན་ནས་མྱུར་སྟབས་ངང་སྒོ་ནང་ནས་བྲོས་སོང་། ང་ཡང་དོགས་པ་དང་བཅས་སྒོར་ཁུག་ནང་ལ་བལྟས་པ་ཡིན། ཧིན་སྒོར་བཞི་སྟོང་ལྷག་ཡོད་པ་ཉིས་བརྒྱ་ལས་མི་འདུག་པས་བློ་ཕམ་དང་ཁོང་ཁྲོའི་གཞི་གཅིག་ཏུ་ཁྱེར་ནས་གསུང་ཆོས་ལ་སོང་བ་ཡིན། ལམ་བར་ནས་བསམ་གཞིག་གི་སེམས་བྱུང་ཞིག་སྐྱོ་གདུང་གི་རོལ་དབྱངས་ཀྱིས་བསྐུལ་ནས་སྐྲག་སྣང་ཞིག་མིག་ལམ་ནས་རྒྱུ་བཞིན་འདུག
ངས་བསམ་གཞིག་བྱེད་ས་ནི་བོར་སོང་བའི་ཧིན་སྒོར་དེ་མ་ཡིན་པར་འཚོ་བ་ལ་དཀའ་ངལ་ཕྲད་ནས་གོམས་གཤིས་ངན་པ་ཞིག་འཇགས་ཡོད་པའི་རྡ་སའི་གཞོན་སྐྱེས་འདི་དག་རེད། གོ་ཐོས་ལྟར་ན་འདི་འདྲའི་བདག་མེད་ཀྱི་གསར་འབྱོར་བ་ཕོ་མོ་གང་མང་ཞིག་གིས་སློབ་སྦྱོང་གི་ཁོངས་མ་འཁྱོངས་པར་སློབ་གྲྭ་ནས་རྩ་དགོངས་ཞུ་རྗེས་རྡ་སར་ཡོང་བ་ཡིན་པ་དང་། རྡ་ས་ནས་འཚོ་བར་དཀའ་ངལ་ཕྲད་ནས་ཉིན་དཀར་གྱི་ཟས་དང་མཚན་མོའི་ཉལ་ས་ཡང་མ་རེག་པར་ཕོ་གསར་ཚོས་བརྐུས་བྱས་ནས་ཉལ་ཐ་འཐེན་པ་དང་བུད་མེད་ཚོས་སྨད་འཚོང་བ་ནི་རྒྱུན་ལྡན་ལྟ་བུ་ཞིག་ཏུ་གྱུར་འདུག་ཟེར། དེ་རིང་གི་རྐུན་མ་འདི་ཡང་མདང་ནུབ་ཉལ་ས་མ་རེག་པར་མུན་རུབ་རྗེས་ངའི་ཁང་བའི་གཡོན་ཕྱོགས་ན་ཡོད་པའི་ཁང་སྟོང་དེའི་ནང་བསྡད་པ་དང་། ནམ་གསལ་མ་ཐག་ཁང་བདག་རྒྱ་གར་བ་དེ་ཡར་ལངས་མེད་པའི་སྐབས་དང་བསྟུན་ནས་ཕྱིར་འགྲོ་སྐབས་ང་ཁང་བའི་ནང་ན་མེད་པ་ཤེས་ནས་ངའི་ཁང་བའི་ནང་འཛུལ་བ་རེད་འདུག
རང་ཁ་མ་སོས་པའི་གསར་འབྱོར་བ་ཚོ་རྡ་སའི་སྲང་ལམ་ན་ཁྱི་ལྡོམ་བཞིན་ཉུལ་བཞིན་པ་འདི་དག་རྒྱས་ཟ་རྒྱས་འཐུང་ལ་རོལ་བའི་གངས་སྐྱིད་ཀྱི་ལས་བྱེད་ཚོས་མ་མཐོང་བ་ཡིན་ནམ། བཀའ་ཤག་སྐབས་སྔོན་མའི་སྔོན་མ་ནས་བཟུང་བོད་མི་རྣམས་ཕྱིའི་རྒྱལ་ཁབ་ཁག་ལ་འཐེན་པའི་ལམ་སྲོད་ཅིག་ཡོད་པས་ཁང་བ་དང་ཞིང་ས། ཤ་ཉེ་སོགས་གང་ཡང་མེད་པའི་གསར་འབྱོར་བ་རྣམས་དེའི་ཁོངས་སུ་མི་གཏོགས་པ་ག་རེ་ཡིན་ནམ། ཅུང་འཇོན་པ་ཚོས་བུ་ལོན་ཕོན་ཆེན་བླངས་ནས་ཕྱི་རྒྱལ་ལ་འགྲོ་ཐབས་བྱེད་པ་དང་མ་འཇོན་མཁན་ཚོ་རྒྱ་ནག་གཞུང་ཚབ་སྒོ་འགྲམ་ན་གྲལ་རིང་བོ་ཞིག་བསྒྲིགས་འདུག་པ་འདིས་གང་ཞིག་གསལ་བྱེད་བྱས་ཡོད་པ་རྡ་སའི་བཀའ་བློན་ཚོས་ད་དུང་ཤེས་མེད་དམ་ཞེས་ངས་བསམ་གཞིག་གི་བར་སྟོང་ནས་རང་ཉིད་ཀྱིས་ལན་མི་ཐེགས་པའི་དྲི་བ་ཁ་ཤས་རང་ཉིད་ལ་འདྲི་ཞོར་གཙུག་ལག་ཁང་གི་ཕྱོགས་སུ་སོང་བ་ཡིན།
༢༠༡༦-༩-༡ ཉིན།