བོད ལྷ་ཀླུ་གཉན་གསུམ།
ས་ཆེན་འདར་བའི་སྔ་གཞུག།
མི་སེམས་གཏོར་བའི་ཕྱིར་ཉིན།།
རུས་པ་ཐོར་བའི་དུས་དེར།།
རིགས་ཀྱི་སྙིང་རྩ་རྨས་སོང་།།
གངས་ཅན་བོད་ཀྱི་རིགས་རྒྱུད།།
ཡུལ་ཤུལ་ཁུལ་དུ་གནས་པའི།།
སྤུན་ཟླའི་སྐྱིད་སྡུག་ཆེད་དུ།།
གཞིས་བྱེས་གཉིས་ཀ་འགུལ་སོང་།།
དྲིན་ཆེན་༧རྩ་བའི་བླ་མ།།
སྐྱེ་ཆེན་དམ་པ་མང་བོ།།
དགེ་འདུན་འདུས་པ་རྒྱ་མཚོས།།
བསྔོ་བ་སྨོན་ལམ་གསུངས་སོང་།།
འདས་པོའི་རྣམ་ཤེས་ཕྲ་མོ།།
དག་པའི་ཞིང་དུ་སྐྱེ་བར།།
བོད་མི་ས་ཡ་དྲུག་པོའི།།
ཡི་གེ་དྲུག་མ་སྐྱོར་སོང་།།
ཤུལ་ལུས་འཚོ་བའི་ཆེད་དུ།།
འཛམ་གླིང་གང་སར་གནས་པའི།།
བྱམས་དང་སྙིང་རྗེ་ཅན་ཚོས།།
ཞལ་འདེབས་དུས་ལྟར་གནང་སོང་།།
འཛམ་གླིང་ཟླུམ་པོའི་སྟེང་དུ།།
ཤ་དང་རུས་པ་འཐག་པའི།།
འོ་འབོད་སྐད་སྒྲ་གཅིག་གིས།།
རིགས་ཀྱི་ཆིག་སྒྲིལ་མཐོང་སོང་།།
ཕྱིས་ཀྱང་སྐྱིད་སྡུག་མཉམ་མྱོང་།།
ཕྱིས་ཀྱང་རྡོག་རྩ་གཅིག་སྒྲིལ།།
ཕྱིས་ཀྱང་སྤྱི་དོན་མཉམ་ལས།།
དུས་ལྟར་ཡོང་བར་ཤེས་སོང་།།
ས་མཐའི་མི་ཁྱིམ་ཞིག་ནས།།
རིགས་ཞེན་ཁྲག་གི་འཕར་རྩ།།
སྤོམ་ཡང་གླུ་དབྱངས་ཤིག་ལས།།
འབུལ་ཐུབ་མེད་པ་སྐྱོ་སོང་།།
གཞས་ཚིག་འདི་སྤུན་ཟླ་ཞིག་གི་རེ་སྐུལ་དུ་བྲིས་ཀྱང་། ད་ལྟ་དྲ་ངོས་སུ་བཀོད་པ་ཡིན་ན། གཞས་པ་སུ་ཡིན་ཞིག་གིས་ལེན་འདོད་ཡོད་པ་དེ་ཡིས་མཐོང་སྲིད་པར་སྙམ་ནས་དེ་རིང་ཉིད་ལ་སྐུར་བ་ཡིན་ལགས།
སྨོན་ལམ་བརྒྱ་འདེབས་སྟོང་འདེབས།།
མཆོད་མེ་འོད་ཀྱིས་སྦར་ཡོད།།
བསྔོ་བ་ཁྲི་མ་འབུམ་ཕྲག །
མ་ཎི་དབྱངས་ཀྱིས་གྱེར་ཡོད།།
http://www.youtube.com/watch?v=albamHuDiyA&feature=related
གནས་ཁང་གཤེར་མར་གྱུར་བྱུང༌།
བེམ་རོ་རི་ལྟར་སྤུང་སོང༌།
སེམས་ཁམས་རྦ་རླབས་གཡོ་བས།
མིག་ཆུའི་སྐྱེམས་ཆང་འདི་འབུལ་ལོ།
མ་ཎིའི་དབྱངས་རྟ་རེ་འཐེན་ཤོག
རིགས་མཐུན་གངས་ཅན་པའི་སྤུན་ཟླ།
གནས་ཁང་གཤེད་མ་རུ་གྱུར་བྱུང༌།
བེམ་རོ་རི་བོ་ལྟར་སྤུང་སོང་།
སེམས་ཁམས་རྦ་རླབས་ལྟར་གཡོ་བས།
མིག་ཆུའི་སྐྱེམ་ཆང་འདི་འབུལ་ལོ།
མཎེའི་དབྱངས་རྟ་རེ་འཐེན་ཤོག
རིགས་མཐུན་གངས་ཅན་པའི་སྤུན་ཟླ།
སེམས་རྩར་རེ་བ་ལྕི་མོས་ཁེངས་བཞིན།
མ་ཎི་དང་སྨོན་ལམ་མཉམ་དུ།
ངས་མཆོད་མེ་རྐང་གཅིག་གིས།
སྤུན་ཟླ་ཁྱོད་ཚོར་སྐྱེལ་མ་བྱས་ཡོད།