རས་པ།
ང་ཡིས་རྟག་ཏུ་དྲན་པ་ནི།།
དཔག་བསམ་ཤིང་ཞིག་ཡིན་པར་བསམ།།
ཅི་འདོད་འབྲས་བུར་རོལ་བ་དང་།།
འཕག་འཚག་རྩེད་འཇོར་གཡེང་བའི་ཚེ།།
ངལ་བའི་རྔུལ་ཆུ་རེ་རེ་ཡང་།།
བཏུང་ནས་ཟུངས་ཡང་ཟད་པར་བྱས།།
ན་རྒས་དབུ་སྐྲ་དཀར་པོ་ནི།།
རྩྭ་སྐྱར་བད་ཀྱིས་བརྒྱན་པར་འཁྲུལ།།
ཁྱེད་ལུས་གཅིག་པུར་ཅེར་ནའང་།།
རྒས་པ་ཡོད་མེད་བློར་མེད་པར།།
ལུས་ངལ་སེམས་ངལ་ཅི་རིགས་པ།།
མ་རྟོགས་ཁྱོད་ནི་སྙིང་རེ་རྗེ།།
སྟོན་མཇུག་རི་གཤམ་རླུང་བུའི་ཤུགས།།
དྲན་སྣང་སྐྱ་མོར་འཐམས་པའི་ལྗིད།།
སེམས་ལ་ལྷུང་ངོ་དུབ་པའི་ལུས།།
དྲན་པའི་མདངས་ཀྱིས་ཞུམ་པར་གནས།།
རི་བོ་རི་གཤམ་གྱ་གྱུའི་ཆུ།།
འདི་ནས་གང་ལ་བཞུར་ནས་འགྲོ།
བདག་ལ་བརྩེ་བའི་ཨ་མ་ལགས།།
དགྱེས་འཛུམ་དགོད་སྒྲ་ད་དུང་ཐོས།།
ཞིམ་མངར་ཟས་ཀྱི་བྲོ་བ་ཚོར།།
བརྩེ་བའི་མིག་མདངས་སྔར་བཞིན་མཐོང་།།
ཁྱོད་ནི་ར་རི་དྲི་མེད་ཀྱི།།
ནམ་མཁའི་དཀར་གསལ་ཟླ་བ་ལགས།།
༢༠༡༦།༡༠།༡༨ ཉིན།
རྩོམ་དེབ།
ཤེས་བྱ་མཐའ་མེད།
ཤེས་བྱ་ཤེས་ཡོན་རྣམས་ལ་མཐའ་མེད་པས།།
ཇི་ཙམ་སྦྱངས་ཀྱང་རྫོགས་རྒྱུ་མེད་པ་རེད།།
ེདེ་ལས་འོ་ཅག་རྒྱལ་བའི་གསུང་རབ་ལ།།
རབ་དུ་འབད་ནས་ཉམས་སུ་ལོངས་ཤིང་དང་།།
རབ་དུ་འབད་ནས་སྙིང་པོ་རྟོགས་འགྱུར་ལ།།
སྙིང་པོ་རྟོགས་ན་ཆོས་ཀྱི་རང་བཞིན་རྟོགས།།
ཆོས་ཀྱི་དབྱིངས་ཀྱིས་རང་བཞིན་རྟོགས་པ་ན།།
ཆོས་རྣམས་རེ་རེ་བཞིན་དུ་རྟོགས་དང་མཚུངས།།
དཔེར་ན་བུམ་པ་དངོས་པོར་རྟོགས་སོང་ན།།
ཀ་བ་སོགས་ནི་ཞོར་ལ་རྟོགས་པར་འགྱུར།
དེ་བས་ཤེས་བྱ་ཐ་དག་རེ་རེ་བཞིན།།
སྦྱངས་དགོས་པ་ཡིི་དགོས་དོན་ཅི་ཡང་མེད།།
གལ་ཏེ་རེ་རེ་བཞིན་དུ་སྦྱོང་དགོས་ན།།
ཚེ་ནི་ཐུང་ཞིང་ཤེས་བྱའི་སྣེ་ནི་མང་།།
ཇི་ཙམ་སྦྱངས་ཀྱང་གྲུབ་པར་དཀའ་ལགས་ན།།
དེ་བས་འོ་ཅག་འཁོར་བ་པ་རྣམས་ཀྱིས།།
ཤེས་བྱ་མཐའ་དག་རེ་རེ་སྦྱོང་མི་དགོས།།
གལ་ཏེ་འཁོར་བའི་བརྒྱ་ཚོ་འདིའི་ནང་ནས།།
མྱུར་བ་ཉིད་དུ་ཐོན་པར་འདོད་དགོས་ན།།
རྒྱལ་བ་ཁོ་ནའི་གསུང་ལ་བརྩོན་པར་མཛོད།།