ཐུབ་བསྟན་ཉི་མ།
བདེན་པ་གཅེར་བུའི་གནས་ལུགས་ལ།།
དད་དང་མོས་པ་ཆེ་ན་ཡང་།།
གླེང་ཞིང་ལག་ཏུ་བསྟར་བ་ལ།།
ཀུན་ཀྱང་དངངས་ཤིང་འཇིགས་པར་གྱུར།།
བདེན་པ་གཅེར་བུའི་གནས་ལུགས་དེ།།
ཟོལ་སྦྱོར་མཛེས་པའི་རྒྱན་སྤྲས་ཏེ།།
ཕྱོགས་ཀྱི་མགྲོན་པོར་བརྫངས་ན་ཡང་།།
རང་གཟུགས་ངོ་མ་སུ་ཡིག་འགོག།
བདེན་པ་གཅེར་བུའི་གནས་ལུགས་དེ།།
ཆུ་ཡིས་བཀྲུ་བར་མི་ནུས་ལ།།
མེ་ཡིས་ཚིག་པར་མི་འགྱུར་ཞིང་།།
རླུང་གིས་གཏོར་བ་དེ་བས་མིན།།
བདེན་པ་གཅེར་བུའི་གནས་ལུགས་དེ།།
རྡོ་རྗེའི་མཚོན་ཆ་མ་ཡིན་ཡང་།།
རྫུན་པའི་སྙིང་ཁ་འབིགས་པ་ལ།།
རྣོ་བའི་རལ་གྲི་ལས་ཀྱང་ལྷག།
བདེན་པ་གཅེར་བུའི་ལང་ཚོ་ལ།།
བཙན་གྱིས་གཡེམ་པར་བྱེད་བཞིན་དུ།།
ཕས་ཕམ་ཕོག་པར་མི་འགྱུར་ན།།
ཚུལ་ཁྲིམས་འཆལ་བ་གང་དུ་འཚོལ།།
བདེན་པ་གཅེར་བུའི་བཞིན་རས་དེ།།
སེང་རས་ནག་པོས་མི་སྒྲིབ་ལ།།
སྣ་ཚོགས་ཚོན་གྱིས་མི་འགྱུར་བའི།།
སྲ་ཞིང་མཁྲེགས་པའི་ངོ་གདོང་ཡིན།།
ལྟོ་བ་ལྡིར་བའི་བུམ་པ་ལ།།
ཟ་བཏུང་བཅུད་ཀྱིས་ཁེངས་པའི་ཚེ།།
བདེན་པ་གཅེར་བུའི་སྒེག་པའི་གཟུགས།།
ལྟ་བའི་འདྲེན་བྱེད་ཅེ་རེ་ལོང་།།
བདེན་པ་གཅེར་བུའི་འཁྲི་ཤིང་ལ།།
སྲེད་པའི་ལོ་འདབ་འཁྲིལ་ན་ཡང་།།
གཤིས་ཀྱི་མཚར་སྡུག་འཕྲད་པ་ན།།
ངོ་ཚའི་རྣམ་འགྱུར་སྣ་ཚོགས་ངོམ།།
བདེན་པ་གཅེར་བུའི་གནས་ལུགས་དེ།།
བརྗོད་པའི་དུས་ལ་བབ་པའི་ཚེ།།
ལྟ་གྲུབ་མཁན་པོའི་ངག་དིག་ན།།
འུར་གྱི་སྡེ་ལ་ཐུགས་ཁག་ཅི།།
བདེན་པ་གཅེར་བུའི་མེ་ལྕེ་ཡིས།།
རྫུན་པའི་བུད་ཤིང་དྲག་ཏུ་སྲེག།
གཞོབ་དྲི་ཀུན་ཏུ་འཐུལ་བར་བྱེད།།
སྒྱུ་མའི་སྐྱེས་བུ་འདར་ལ་ལྟོས།།
ལེགས་པོ་བྲིས་འདུག དགའ་བས་བསུ།།
བདེན་པའི་ལུས་ངན་རྫུནཔའི་གོས་ཀྱིས་མཛེས།
བདེན་པའི་གདོང་ནག་ཟོལ་རྫུན་དཀར་རྫས་མཛེས།
བདེན་པའི་ངག་རྩུབ་འཇམ་ཟོལ་ངག་གིས་མཛེས།
བདེན་པའི་ནག་སེམས་དཀར་སེམས་རྣམ་པས་མཛེས།
གཅེར་བུའི་ཆོས་ལུགས་བོད་ནང་མེད། །
གཅེར་བུར་འགྲོ་མཁན་བོད་ནང་མེད། །
གཅེར་མཐོང་མཐོང་མཁན་བོད་ནང་མང་། །
གཅེར་འཚོར་མི་ལ་རས་པ་མང་། །