རྩེཿ མུན་སེལ།
དཔོན་པོའི་ཁྱུ་ཞིག་ན་ཕྲ་དོག་རླུང་དམར་འཚུབ།།
དམངས་ཀྱི་ཚོགས་ཤིག་ཏུ་སྨྲེ་ངག་རྣ་བར་གཟན།།
ཁོར་ཡུག་ལྷིང་འཇཊ་ཀྱིས་གཏམས་པའི་ཞིང་ཁམས་ཏེ།།
སྙན་ངག་གླིང་ཀ་འདི་ང་ཡི་ཕ་སར་འོས།།
ཐོས་ལྡན་བྱ་བཏང་ཚོ་རྩེ་གཅིག་བསྒོམ་ལ་མཉེས།།
མགུ་མེད་ལ་ལ་ཞིག་བསག་རྒྱུ་ཁོ་ནར་སྲེད།།
ཡོ་གཟུར་གཉིས་མེད་ཀྱི་འཚོ་བ་བདེ་མོ་ཅན།།
ཁོ་བོའི་གཅེས་ནོར་གྱི་མཆོག་དེ་སྙན་ངག་ཡིན།།
བློས་ཐུབ་གྲོགས་པོ་འགའ་ཨ་རིའི་ཡུལ་ལ་འཕུར།།
དམ་གཙང་མཆེད་པོ་དག་ཤར་གྱི་གླིང་ལ་འཕྱན།།
ལུཊ་ཟུང་གཉིས་འབྲེལ་གྱི་གཤོག་རྩལ་སྦྱོང་གིན་དུ།།
བདག་ནི་སྙན་ངག་གི་མཁའ་ལ་འགྲིམ་པར་མོས།།
བླ་རྒན་ཕལ་ཆེར་ཞིག་བན་ཆུང་ཉྭ་ལ་འཐམ།།
བག་མེད་གཞོན་སྐྱེས་འགའ་གཉིས་སྦྱོར་ཁོ་ན་སེམས།།
བརླ་གཞང་གཉིས་སྤངས་ངས་རིག་གཞུང་གསོན་ཤུཊ་ཆེད།།
སྙན་ངག་དགའ་མ་ཡི་འགྲམ་ཆང་འཇིབས་པར་འདོད།།
ཞུམ་མེད་དཔའ་བོ་རྣམས་རང་རིགས་ལ་རྒྱའི་སླད།།
ལུས་སྲོག་ལོངས་སྤྱོད་ཀྱང་སྐྱེས་སུ་སྟོབ་པར་ནུས།།
ཅང་མེད་ཁེར་རྐྱང་ངས་མ་བཅོས་ཚོར་བའི་ཉམས།།
ན་ཟླའི་སེམས་གསོ་ཡི་ཡོན་དུ་སྦྲེང་བར་སྤྲོ།།
སྲང་གི་ལད་པོ་འགའ་སྡུག་ནས་དུད་ནག་རྔུབ།།
བློ་རྒྱུད་གཉོམ་པོ་རེ་སྐྱོ་ཚེ་ཆང་རག་འཐུང་།།
ས་མཐའི་འཁྱམ་པོ་ང་འགྱོད་པས་གདུང་ཙ་ན།།
སྙན་ཚིག་དུམ་བུ་རེ་ནད་ཀྱི་སྨན་དུ་རྟེན།།
ཨ་མཚར་རྩེད་མོ་ཡི་སླད་དུ་བྲིས་པ་ལགས།།
གནམ་སྟོང་ནུབ་ཁ་ཡི་འུར་དེ་སང་དུས་དཀོན།།
རྟ་མཆོག་ཅང་ཤེས་ལ་བསྔགས་པའི་རྩལ་གྱི་ཁྱད།།
འགྲན་པའི་ཉིན་མོ་རུ་བོང་བུའི་མཚང་དུ་ཆེ།།
༢༠༡༦\༡༡\༡༢ ཉིན་ཡིད་ལ་ཤར་མར་བྲིས་པའོ།།
སྙན་དངགས།
སྙན་དངགས་སེམས་ཀྱི་རི་མོ་རེད། །
སྙན་ངག་ལྕེ་རྩེའི་ཡང་རྩེད་རེད། །
སྙན་དངགས་མཁས་པའི་ངག་རྒྱན་རེད། །
སྙན་དངགས་མི་སེམས་བཀུག་ངག་རེད། །
གཅེར་བུའི་ངག་གི་གོས་བཟང་།
་
སྙན་དངགས་གཅེར་བུར་གོས་བཀླུབས་འདྲ། །
སྙན་དངགས་མཛེས་མའི་རྣ་རྒྱན་འདྲ། །
སྙན་དངགས་ཕྱུག་མོའི་སྐེ་རྒྱན་འདྲ། །
སྙན་དངགས་མཁས་པའི་མགྲིན་རྒྱན་འདྲ། །
་
སྙན་དངགས་ཀུན་མཁོའི་གསུང་སྙན།
སྙན་པོ་ཐམས་ཅད་སྙན་ངག་མིན་།
ཚིག་རྒྱན་བརྡ་སྤྲོད་སྙན་ངག་རྒྱན་།
ཤད་ཚེག་གར་ཐོབ་མི་ཤེས་མཁན། །
སྙན་རྒྱན་འབྲི་བ་ལྟས་ངན་རྒྱན། །