གཤིན་ཡུལ་འགྲིམ་པའི་གྲོགས་པོ་སྒྱུ་རྩལ་བ། ཚེ་བཀྲ་ལགས།

འདྲེ་གླེན་པ། ཨོ་གླིང་།

 
ཕ་ཡུལ་གྱི་གྲོགས་པོ་ཞིག་བརྒྱུད་ནས་ཁྱེད་རང་གཏན་དུ་ང་ཚོ་དང་ཁ་བྲལ་བ་ཐོས་རྗེས་བདག་གི་སེམས་པ་རབ་རིབ་མག་མོག་དུ་བཏང་། འུ་གཉིས་དང་ཐོག་ངོ་ཤེས་ས་དེ་རྒྱ་གར་བྱང་ཕྱོགས་ཧི་མ་ལའི་རི་རྒྱུད་རྡོ་ལ་རི་བོའི་རི་འབབས་ཀྱི་བོད་མི་སྐྱབས་བཅོལ་བ་དག་སྡོད་ཡུལ་དེ་རྡ་རམ་ས་ལའི་ཨ་མདོའི་གྲོང་གསེབ་ཏུ་གྲགས་པ་དེ་རེད།
སྐབས་ཐོག་ང་རང་སྐྱབས་བཅོལ་ཏུ་འབྱོར་ཐོག་ཡིན། ཕ་ཡུལ་གཅིག་པའི་གྲོགས་པོ་ཞིག་གིས་ཁྱེད་ཚང་ལ་ནུབ་ཟས་ཟ་རུ་ཁྲིད། དགོང་མོ་དེར་འུ་གཉིས་གླུ་གཞས་ཀྱི་སྐོར་ནས་སྐད་ཆ་མང་པོ་བཤད། ཁྱེད་ཀྱིས་དབྱངས་ཀྱི་ནང་ནས་ལྷོད་པ། འཇམ་པ། དབུགས་སྣ་རིང་བ། འགུག་སྟངས་དམའ་ས་ནས་ཁྱེར་དེ་མཐོ་སར་འཇོག་པ། མཐོ་ས་ནས་སླར་ཡང་དམའ་སར་འཐེན་པ། དཔེར་ན། སྒྲོལ་མ་སྐྱབས་ཀྱི་རྩམ་པ་དང་ཡ་དུང་གི་ཨ་ཅེ་ལ་སོ་ལྟ་བུ་དག་ལ་ཧ་ཅང་གིས་དགའ་རབས་བཤད་དེ་ང་ལ་བག་ཆགས་ཟམ་མོ་བཞག ད་དུང་ང་ལ་གླུ་ཚིག་ཅིག་འབྲི་རོགས་ཟེར།

སྤྱིར་བཏང་རྡ་ས་གཡས་གཡོན་གྱི་གསར་བུ་མང་ཆེ་བར་ཆབ་སྲིད་ཀྱི་ཉག་ཉོག་མ་མུག་ལས་གཞན་བཤད་རྒྱུ་མེད་པས། ང་ལ་མཚོན་ན་རྡ་སའི་ཁོར་ཡུག་ནས་གཞོན་གཞོན་གྱི་སྣང་བ་དེ་འདྲའི་སྤྲོ་སྣང་འཕེལ་བ་ཞིག་མ་བྱུང་བས་ཁྱེད་ལ་ལྷག་ཏུ་བྱུང་ཡོད་མི་དཔེ། ལོ་ཟླ་སྐད་ཅིག་མ་དེ་དག་ལ་འགྱུར་བ་སྣ་མང་ཕྱིན་ཏེ་ཁྱེད་ཀྱིས་རང་གི་རྨི་ལམ་དང་བརྩེ་བ་ཁུར་ནས་ཕྱིར་རང་གི་ཕ་ཡུལ་ལ་ལོག ང་ཡང་ས་མཐའ་ནས་ཡང་མཐའ་རུ་སོང་སྟེ་ད་ལྟ་ཨོ་གླིང་དུ་ཡོད།

འདི་ནས་ཡར་བརྩིས་པའི་ཟླ་བ་ཁ་ཤས་ཀྱི་གོང་དུ་འུ་གཉིས་བསྐྱར་དུ་འཕྲིན་ཕྲན་ནས་འབྲེལ་བ་བྱུང་སྟེ་ཁྱེད་ཀྱིས་ང་ལ་༼ ཆེད་སྒྲིག་གླུ་གཞས་ཤིག་ལྟ་གོན་བྱེད་ཀྱི་ཡོད་རབས་བཤད ༽ ་དེ་ང་རང་ཧ་ཅང་དགའ་བོ་བྱུང་། ཡང་བསྐྱར་ང་ལ་གླུ་ཚིག་ཅིག་འབྲི་བར་བསྐུལ་བས་ངས་ཀྱང་ཅིག་འབྲི་ཁུལ་བྱས་ནས་ཁྱེད་ལ་བསྐུར་ཞིང་། ཉིན་ཤས་ཀྱིས་རྗེས་ནས་ཁྱེད་ཀྱིས་དབྱངས་ཤིག་ཀྱང་བརྩམས་ནས་ང་ལ་སྒྲ་འཇུག་བྱས་པ་ཞིག་བསྐུར་བར་ཡ་མཚན་སྙན་པོ་བྱུང་།

དགོངས་དག གྲོགས་པོ། ངས་ཁྱེད་ལ་སྙན་པོ་འདུག་རབས་བཤད་ཀྱང་ཁྱེད་ཀྱིས་༼ སྙན་པོ་ཙམ་མིན་པར་ཧ་ཅང་སྙན་བསམ་གྱི་འདུག་༽ ཅེས་ང་ལ་ཀུ་རེའི་ཚུལ་གྱིས་བཤད་སོང་། དྲང་པོ་བཤད་ན་དངོས་གནས་ཧ་ཅང་སྙན་པོ་འདུག་མོད་ངས་ཁྱེད་ལ་དེ་ལྟར་བཤད་རྒྱུ་མ་བྱུང་།

གཤམ་ནས་འུ་གཉིས་ཀྱིས་གླུ་གཞས་འདི་མཉམ་ལེན་བྱ།

ཁྱེད་ཀྱིས་ང་ལ་རང་བྱུང་གི་སྒྲ་དང་འདྲེས་པའི་གླུ་ཞིག་ལེན་རྒྱུ་ཡིན་ཟེར་གི ད་དུང་ཕ་ཡུལ་གྱི་སྣོད་བཅུད་ལ་འདྲེས་པ་ཞིག་ལེན་གྱི་ཡིན་ཟེར། ངོ་མ་སྐབས་ཐོག་འདིར་ཁྱེད་རང་རེ་བ་དང་རྨི་ལམ་གྱིས་གང་འདུག

གྲོགས་པོ།
ཁྱེད་རང་འགྲོ་ཁར་ང་ཚོར་གླུ་སྐད་ཙམ་ཡང་འཇོག་མ་ཐུབ་པ་དེ་ངས་ཁྱེད་ཀྱིས་རླུང་རྟ་རྒུད་པ་རེད་བསམ་གྱི་མི་འདུག བོད་ཀྱི་སྒྱུ་རྩལ་གྱི་བསོད་ནམས་ཟད་པ་རེད་དྲན་གྱི་འདུག
གང་ལྟར། ད་ནི་ཞེན་ཆགས་མེད་པར་བདེ་བར་ཕེབས་དང་།

ས་སྐྱ་པཎྜིས།
རིག་པ་ནངས་པར་འཆི་ཡང་བསླབ།།
ཚེ་འདིར་མཁས་པར་མ་གྱུར་ཀྱང་།།
སྐྱེ་བ་ཕྱི་མར་བཅོལ་བ་ཡི།།
ནོར་ལ་རང་ཉིད་ལེན་དང་མཚུངས། །གསུངས་བ་ལྟར། ཕ་ཡུལ་གྱི་ལུག་ཁྱུ་དང་རྩྭ་ཐང་། རི་བོ་དང་ཆུ་ཕྲན ། གངས་རི་དང་རྫ་རི་དག་གིས་ཁྱེད་ཀྱི་བརྩེ་བ་དང་གླུ་སྐད་རྒྱ་མཚོའི་གཏིང་དུ་ཉར་ཡོད།
གལ་སྲིད་སྐྱེས་མ་རྗེས་མ་ཞིག་ཡོད་ཚེ། ཕ་ཡུལ་སྔར་བཞིན་ཁྱེད་ཀྱི་སྙིང་དུ་སྡུག་པ་དེ་ཡིན།

27/11/2016 ཉིན།