ཁྲོཾ་རྒན་གྱི་ཕོ་ཤེད་དང་། རྒྱ་ནག་གི་འཇིགས་སྐྲག

—ཉག་རོང་དོན་གྲུབ།

 
ཁ་སང་ཨ་རིའི་སྲིད་འཛིན་གསར་པ་དགྲ་གནོན་ཁྲོཾ་ཕུར་མཆོག་ལ། ཐེ་ཝན་སྲིད་འཛིན་ལྕམ་ཚེ་གཡང་མཱ་ལགས་ཀྱིས་ཞལ་པར་ཕུལ་ནས་འཚམས་འདྲི་ཞུས། ཨ་རི་དང་ཐེ་ཝན་གཉིས་ཀྱི་སྲིད་འཛིན་ཕན་ཚུན་བར་ཁ་ཐུག་ཞལ་པར་གཏོང་སྲོལ་དེ་ཙམ་མེད་པ་མ་ཟད། ༡༩༧༩ལོ་ཨ་རིའི་སྲིད་འཛིན་སོ་དགུ་པ་དམངས་གཙོ་ཚོགས་པའི་ཚོགས་མི། འཇིགས་མེད་ཁ་རལ་ལགས་ཀྱིས་རྒྱ་དམར་པོའི་ངོ་བསྲུང་ནས། རྒྱ་ནག་གཅིག་ལ་རྩ་ཁྲིམས་གཉིས་ཟེར་བའི་ལམ་ལུགས་སྲིད་ཇུས་ཀྱི་འོག་ཏུ། ཐེ་ཝན་རྒྱ་ནག་གི་ཁ་འཐོར་ཞིང་ཆེན་ཞིག་ཡིན་པར་ངོས་འཛིན་བྱས་ཏེ། ཨ་ཐེ་གཉིས་ཀྱི་འབྲེལ་ལམ་མང་པོ་ཞིག་བཅད་ཡོད། འཇིགས་མེད་ཁ་རལ་ལ་༢༠༠༢ལོར་ནོལ་ཝེ་ཞི་བདེའི་གཟེངས་རྟགས་ཐོབ་པ་རེད། དེ་ནས་བཟུང་སྟེ། ད་བར་ཨ་ཐེ་གཉིས་ཀྱིས་དངོས་སུ་མཛའ་མཐུན་མཉམ་འབྲེལ་གྱི་ཚོང་རོགས་བྱེད་མ་ཐུབ། ཡིན་ནའང་མཚོན་ཆའི་རིགས་ཁ་ཤས་ལྐོག་འཚོང་བྱེད་བཞིན་ཡོད། ད་ཐེངས་སྲིད་འཛིན་གཉིས་ཀྱིས་ཞལ་པར་བརྒྱུད་ནས། དཔལ་འབྱོར་དང་། ཆབ་སྲིད། བདེ་སྲུང་བཅས་ཀྱི་སྐོར་ལ་མཉམ་ལས་བྱེད་རྒྱུའི་གྲོས་མོལ་བྱུང་ཡོད།

ཐེ་ཝན་ནི་༡༩༤༩ལོར་KMTགོ་མིན་ཏང་མའོ་ཡིས་ཕམ་པར་བཏང་རྗེས། རྒྱ་ནག་ནས་མཚོ་གླིང་དེར་བྲོས་བྱོལ་ལ་ཕྱིན་པ་ཞིག་ཡིན། སྐབས་དེར་གོ་མིན་ཏང་མཉམ་འབྲེལ་རྒྱལ་ཚོགས་ཀྱི་ཚོགས་མིའི་ཁོངས་སུ་ཡོད་པ་དང་། ནུབ་ཕྱོགས་རྒྱལ་ཁབ་མང་པོས་ROCརྒྱ་ནག་སྲིད་གཞུང་ཡིན་པར་ངོས་འཛིན་བྱས་ཡོད། ༡༩༧༡ལོར་མཉམ་འབྲེལ་རྒྱལ་ཚོགས་ལ་འགྱུར་བ་ཐེབས་ཏེ། པེ་ཅིང་རྒྱ་དམར་སྲིད་གཞུང་ལ་ངོས་ལེན་བྱས་ཡོད་པ་རེད། ༡༩༧༩ནས་བཟུང་ཝ་ཞིན་ཁྲོན་དམངས་གཙོ་ཚོགས་པའི་གཞུང་འཛིན་སྲིད་གཞུང་གིས་ཀྱང་། རྒྱ་དམར་ལ་བསྟུན་མཁས་དང་ངོ་སྲུང་ཞུས་ཏེ། ཐེ་ཝན་རྒྱ་དམར་གྱི་ཆ་ཤས་ཡིན་ཟེར་བ་ལས། ལོགས་སུ་རང་བཙན་རྒྱལ་ཁབ་ཅིག་ཡིན་པར་རྒྱབ་སྐྱོར་མ་བྱས་པ་རེད། ཡིན་ནའང་། རྒྱ་དམར་གྱིས་ཐེ་ཝན་སྒང་ལ་གོ་མཚོན་དང་དམག་གྲ་སྒྲིག་བྱས་ནས། གལ་ཏེ་ཐེ་ཝན་གྱིས་རང་བཙན་བརྩད་ན་དྲག་གནོན་བྱེད་རྩིས་ཡོད་པ་དེར། ཨ་རིས་བར་འདུག་དང་སེམས་འཚབ་ཡོད་པའི་བཟོ་སྟོན་གྱི་ཡོད་འདུག

གཞན་ད་ཐེངས་ཁྲོཾ་གཡང་གཉིས་ཀྱི་ཞལ་པར་གཏམ་གླེང་དེར། རྒྱ་དམར་ཕྱོགས་ནས་སྐྱོན་བརྗོད་ཤུགས་ཆེན་དང་ཉེན་བརྡ་ཡང་བཏང་ཡོད། ཨ་རིའི་ཕོ་བྲང་དཀར་པོ་ནས་ཁྲོཾ་གཡང་གི་གཏམ་གླེང་དེས། ཨ་རྒྱ་གཉིས་ཀྱི་འབྲེལ་ལམ་ལ་འགྱུར་བ་ཅི་ཡང་མི་འགྲོ་ཞེས་ལབ་འདུག ཞལ་པར་གཏམ་གླེང་དེ་ཚར་རྗེས་མ་གཏོགས་ཕོ་བྲང་དཀར་པོས་ཧ་གོ་མི་འདུག ཁྲོཾ་གྱི་ཕྱི་འབྲེལ་མི་སྣ་ཞིག་གིས་ལབ་ན། ཁྲོཾ་རྒན་ཨ་རིས་ཐེ་ཝན་སྲིད་ཇུས་ལ་དེ་ཙམ་ཐུགས་དགྱེས་ཀྱི་མེད་པའི་རྣམ་འགྱུར་ཡོད་ལབ་འདུག

དཔྱད་བརྗོད་པ་ཁ་ཤས་ཀྱིས། ཁྲོཾ་གྱི་བྱེད་སྟངས་དེ་ཆབ་སྲིད་ལ་ཉམས་མྱོང་མེད་པས་སྐྱོན་ཡིན་ན། རྒྱ་དམར་གྱིས་ད་ཐེངས་ཁོ་ལ་ཀུ་ཡངས་བྱས་ན་བཟང་གི་རེད། དེ་མིན་དགོས་མེད་ཀྱི་རྙོག་དྲ་མང་པོ་ལངས་ཀྱི་རེད་ལབ་འདུག ཡིན་ནའང་། ཁྲོཾ་གྱིས་ཨ་རིས་རྒྱ་དམར་གྱི་ངོ་གདོང་དཀར་ནག་ལ་བསྟུན་ནས་ཐེ་ཝན་ལ་བརྙས་བཅོས་གཏོང་རུང་གི་མ་རེད་ཅེས་གསུང་འདུག དེ་ལྟར་ན། ཁྲོཾ་གཡང་གི་ཞལ་མོལ་དེ་ཐོལ་བྱུང་གི་སྐད་ཆ་ཙམ་ཡིན་པར། ཆ་རྐྱེན་དང་དམིགས་ཡུལ་ཡོད་པའི་བཟོ་མཐོང་གི་འདུག གལ་ཏེ་ཁྲོཾ་གྱིས་ཐེ་ཝན་རང་བཙན་ལ་རྒྱབ་སྐྱོར་བྱས་པ་ཡིན་ན། བོད་དང་ནང་སོག་སོགས་ཕྱོགས་མང་པོ་ཞིག་ནས། རྒྱ་དམར་ལ་སྔར་བྱུང་མ་མྱོང་བའི་གནོན་ཤུགས་དང་འཇིགས་སྐྲག་གསར་བ་ཅིག་སྟེར་གྱི་ཡོད་འདུག

སྤྱིར་ན་ཨ་རི་ལྟ་བུ་ལ་མཚོན་ན། སྟོབས་ཆེན་རྒྱལ་ཁབ་དང་། རང་དབང་དང་དམངས་གཙོ་གཞིར་འཛིན་བྱེད་པའི་ལུང་པ་ཞིག་ཡིན་པ་མ་ཟད། འཛམ་གླིང་ཧྲིལ་བོའི་རང་དབང་དང་དམངས་གཙོའི་ཁེ་ཕན་སྲུང་སྐྱོབ་བྱེད་མཁན་གྱི་འགོ་འཛིན་རྒྱལ་ཁབ་དེ་རེད། རྒྱ་དམར་ལྟ་བུ་རང་དབང་དང་དམངས་གཙོ་རྡོག་རོལ་གཏོང་མཁན་ཞིག་ལ། ངོ་སྲུང་དང་བསྟུན་མཁས། ངོ་གདོང་དཀར་ནག་བསྲུང་བསྡད་པ་ཡིན་ན། གོ་ལ་ཧྲིལ་བོའི་རང་དབང་དང་དམངས་གཙོ་ཉམས་དམས་སུ་འགྲོ་བའི་གཞི་མ་ཞིག་ཏུ་འགྱུར་བཞིན་ཡོད། འདས་པའི་ལོ་རྒྱུས་ལ་བལྟས་པ་ཡིན་ན། ཨ་རིའི་དམངས་གཙོ་ཚོགས་པས་རྟག་ཏུ་རྒྱ་དམར་ལ་བསྟུན་མཁས་དང་། ཚོང་འབྲེལ་རྒྱབ་སྐྱོར་བྱས་ཏེ། མཐར་དེང་གི་རྒྱ་དམར་སྲིད་གཞུང་འདི་བསྐྲུན་ཐུབ་པ་རེད། སྤྱི་མཐུན་ཚོགས་པ་ནི་དེ་ལས་ལྡོག་ཏེ། དངོས་ཤུགས་བརྒྱུད་གསུམ་ནས་རྒྱ་དམར་དང་། དམར་ལུགས་རྒྱལ་ཁབ་གཞན་དང་། ཁྲིམས་འགལ་ལུང་པ་མང་པོ་ཞིག་ལ་ཁ་གཏད་གཅོག་མཁན་གྱི་ཚོགས་པ་ཞིག་ཡིན། ཁྲོཾ་གྱི་སྲིད་གཞུང་དེ་ནི་ཨ་རིའི་ནང་བྱུང་མ་མྱོང་བའི་སྲིད་འཛིན་ཕྱུག་བདག་ཆེ་ཤོས་དང་། གཞུང་འཛིན་མི་སྣ་ཕྱུག་བདག་ཆེ་ཤོས་དེ་ཆགས་ཡོད་འདུག

ཆབ་སྲིད་ཚོགས་པ་གཉིས་ཀའི་ནང་མི་སྣ་འདྲ་མིན་ཡོད་རུང་། སྤྱི་མཐུན་ཚོགས་པའི་ཚོགས་མི་མང་ཤོས་ཕྱུག་བདག་ཅན་ཡིན་པ་དང་། སྤྱི་སེམས་བཅང་ནས་རྒྱལ་ཁབ་དང་མི་རིགས་ཀྱི་སྐད་ཆ་བཤད་ཀྱི་ཡོད་པ་རེད། དམངས་གཙོ་ཚོགས་པའི་ཚོགས་མི་མང་ཤོས་མི་ཚང་དཀྲུས་མ་ནས་མཚར་ལངས་བྱུང་བའི་མི་ཡིན་པ་དང་། གཙོ་བོ་མི་མང་འགུག་ཐབས་ཆེད་སྐྱོ་བོ་ལ་རོགས་རམ་གནང་སྦྱིན་དགོས་རབས་དང་། ཕྱུག་བདག་ཕྱུག་ནས་ཕྱུག་རུ་འགྲོ་དབུལ་བོ་དབུལ་ནས་དབུལ་དུ་འགྲོ་ཟེར་བའི་གཏམ་དཔེ་བཀོད་ནས་སྐད་ཆ་བཤད་ཀྱི་ཡོད།
སྐད་ཆ་འདི་དག་ལ་དགའ་མཁན་མང་ཆེ་བ་ཕྱི་མི་གཞིས་སྤོ་རྣམས་དང་། མི་རིགས་ནག་པོ་དང་ཧཱ་སི་ཕེ་ཉའི་རིགས་རྒྱུད་དག་ཡིན། ཡིན་ནའང་ཨ་རིའི་གཞུང་གི་སྲིད་ཇུས་གཏན་འབེབས་ལྟར་མ་གཏོགས། དམངས་གཙོ་ཚོགས་པས་དམིགས་བསལ་དབུལ་བོ་ལ་རོགས་རམ་ཅི་གང་བྱེད་ཀྱི་མེད། མི་རིགས་དཀར་པོ་མང་ཆེ་བ་ནི་སྤྱི་སེམས་ཅན་དང་། རྒྱལ་ཞེན་ཅན་ཡིན་པས་གཞུང་གིས་ཟུར་བཅད་ཐོབ་ཐང་ལ་དེ་ཙམ་མི་དགའ།

12/03/2016