སྐྱོ་བྲག་དགའ་དབང་།
བལ་བོད་གཉིས་པོ་ས་འདྲེས་སུ་ཡོད་སྟབས། ཕན་ཚུན་ཡུལ་སྲོལ་གོམས་གཤིས་ལ་རྒྱུས་མངའ་ཆེ་བའི་གཏམ་རྒྱུད་མང་པོ་བཤད་དུ་ཡོད་པ་ལས། ཆུང་དུས་རྒས་འཁོགས་འགའ་རེས། བལ་མོ་རྣམས་ཀྱི་སྣ་ལ་གསེར་གྱི་ཨ་ལོང་ཡོད་རབས་ཏེ། བལ་མོ་གསེར་གྱི་སྣ་དཀྱུ་ཅན། ཞེས་བཤད་ཡོང་དར།
ངའི་ཡིད་ངོར་སྣ་ལོའི་སྣ་ལ་ཤིང་གི་སྣ་དཀྱུ་ཡོད་པ་འདྲ་བ། གསེར་གྱི་ཐུར་མའི་ཨ་ལོང་ཞིག་བཏགས་ཡོད་པ་ཤར་གྱི་ཡོད་དེ། ཕལ་མོ་ཆེ་ནི་མེ་ལོང་ཆུང་ངུའི་མཐའ་ཟུར་དུ་བུག་པ་བཟོས་པ་འདྲ་བའི་ལེབ་མོ་རྐོས་མ་ཞིག་རེད་གདའ།
གོས་རྒྱན་མཛེས་མིན་ནི་སོ་སོའི་ཡུལ་སྲོལ་ཙམ་ལས་ཀུན་ལ་གཅིག་ཏུ་ངེས་པ་ཞིག་མེད་ནའང་། བལ་མོའི་གསེར་གྱི་སྣ་དཀྱུ་ནི་དབྱིབས་གཟུགས་མཛེས་པོ་རང་མིན་ཐོག །རྒྱུན་ལྡན་རང་གི་སྣབས་ལུད་དག་ལོས་འབྱར་སྙམ་པ། མཐོང་བ་ཙམ་ན་ཞེན་པ་ལོག་བྱེད་འདྲ་བོ་ཞིག་འདུག །
བོད་པའི་ཡུལ་ལུང་སྟོད་སྨད་རྣམས་ཀྱི་ཁ་རྒྱུན་དུ་ཡོད་པ་ནི། སྣ་ལོ་དང་ཕྱོགས་འདྲ་བའི་མཚར་སྣང་དང་། རྒྱུ་ཆ་གསེར་ཡིན་པའི་རིན་ཐང་གིས་གླེང་གིན་ཡོད་པ་འདྲ། འོན་ཏེ་གསེར་ནི་ཕྱུག་པོ་རྣམས་ལ་ཐོབ་པ་ལས། སྤྲང་པོ་རྣམས་ཀྱི་རྒྱུན་སྤྱོད་ནི་རག་ཡིན་ཡིན་པ་རེད།
དིང་སང་གྲོང་གསེབ་རྒན་མོ་འགའ་རེའི་སྣ་རྒྱན་དུ་ཡོད་པ་ཙམ་ལས། གྲོང་ཁྱེར་རྒན་མོ་རྣམས་ཀྱིས་གཡུགས་ཟིན་ལ། གཞོན་ནུ་མ་ཕལ་མོ་ཆེས་འདོགས་ཀྱི་མེད་པ་ནི། གནའ་བོའི་རྒྱན་གོས་མང་པོ་ཞིག་དུས་རབས་གསར་པའི་ནང་དུ་ནུབ་བཞིན་ཡོད་པའི་ཆ་ཤས་ཤིག་ཡིན་གྱི་རེད།
རྣ་ལོང་བརྒྱན་པ་ཀུན་གྱི་སྲོལ། །
སྣ་རྒྱན་བརྒྱན་པ་མུ་སྟེགས་སྲོལ། །
དེས་ན་བལ་མོ་རྒྱ་གར་མོའི། །
སྣ་རྒྱན་མཛོ་མོའི་སྣ་ཐག་འདྲ། །
ལེགས་བྱང་ཐམས་ཅད་ཉར་ན་ཕན། །
ལུགས་སྲོལ་ཡོད་ཚད་ཕན་ཐོགས་མེད། །
དཔེར་ན་བལ་མོའི་རྣ་རྒྱན་དང་། །
བོད་ཕོའི་སྐྲ་རིང་སྤོས་ཤེལ་བཞིན། །