—བྱ་འཕུར་དགེ་བཤེས་ལྷུན་གྲུབ་རྒྱ་མཚོ།
གངས་དཀར་ཏི་སེའི་བྱང་གི་ཕྱོགས།
རིན་ཆེན་སྤུངས་པའི་ལྷུན་པོའི་རྩེར།།
གཡུང་དྲུང་འཁྱིལ་བའི་གདན་ཐོག་ཏུ།
ལྟེ་མཚལ་དམར་པོ་འོད་དུ་འཁྱིལ།།
བརྒྱ་བྱིན་གངས་རིའི་རྩེ་ནས་བབས།།
འཇོག་པོ་མ་ཕམ་མཚོ་ནས་བཞེངས།།
བར་གྱི་གཡེན་སྡེ་མགྲོན་དུ་གཤེགས།།
དམུ་ཡི་རྒྱལ་ཁམས་བྲེལ་བས་འདུར།།
གནམ་རིག་སྨྲ་བས་གཟའ་སྐར་བརྟཌ།།
ས་དཔྱད་རྒན་པོས་མཁར་ཐབ་བརྩིཌ།།
བྲམ་ཟེའུ་མཁས་པས་སྐུ་ཁྲུས་གསོལ།།
གཤེན་རབ་མི་བོའི་མཚན་སྙན་ཕུལ།།
འགྲོ་རྣམས་རང་མཐུན་ཆ་ལུགས་བཞིན།།
དམུ་ཡི་རྒྱལ་ཁྲིར་ཞབས་ཀྱིས་བཀྱགས།།
སྲིད་འབྱོར་མངའ་ཐང་ལོངས་སྤྱོད་རྒྱས།།
རྒྱལ་ཁམས་བོན་སྲིད་བདེ་ཞིང་བསྙོམས།།།
རིན་ཆེན་གཏེར་གྱི་བང་མཛོད་དང་།།
སྙན་གྲགས་སྲིད་གསུམ་དབྱར་སྐྱེས་རྔ།།
ཟང་ཟིང་འཁོར་བ་རྒྱ་མཚོའི་རླབས།།
རྩྭ་བཞིན་འདོར་བའི་སྤོབས་པ་རྒྱས།།
མཛེས་མའི་རེ་གདུང་རྒྱབ་ཏུ་བསྐྱུར།།
གཉེན་ཉེའི་བསླབ་བྱ་རྒྱང་དུ་གཡུགས།།
ཁེར་རྐྱང་གོམ་འགྲོས་རི་ལ་ཕྱོགས།།
བྱ་སྤྲེལ་འཚོ་བ་ལོངས་སུ་སྤྱད།།
འཁོར་བ་འདམ་གྱི་རྫིང་བུ་ནས།།
བདེ་བ་སྐད་ཅིག་ཉག་ཕྲན་ཙམ།།
གཏན་བདེའི་ཡུལ་དུ་མ་རྙེད་པས།།
དབུ་ཡི་རལ་བ་དུམ་སེར་གཏུབས།།
ཏིང་འཛིན་མེ་ཏོག་ཟས་སུ་འགམས།།
བཟོད་པའི་གོ་མཚོན་སྐུ་ལ་གསོལ།།
བྱམས་བརྩེའི་བདུད་རྩི་ཆར་དུ་སྙིལ།།
རི་དྭགས་ཚོགས་ཀྱང་རྗེས་སུ་སྙེགས།།
དཀའ་ཐུབ་ལོ་ཟླའི་ཁུགས་སོ་ནས།།
ངེས་འབྱུང་ཨུ་དཔལ་རྒྱུད་དུ་འཁྲུངས།།
མྱང་འདས་དཔལ་གྱི་འབྲས་བུ་ཞིག།
ས་བཅུ་བགྲོད་པའི་ཀློང་དུ་གཟིགས།།
མདོ་ལམ་ས་བཅུའི་ཐེམ་སྐས་བཙུགས།།
སྔགས་ལམ་རིམ་གཉིས་ས་བོན་བསྐྲུན།།
རྫོགས་ཆེན་ཀུན་བཟང་རང་ཞལ་བརྡོལ།།
བསྟན་པའི་མངའ་བདག་གཤེན་རབ་པ།།
བོད་ཡུལ་མེས་པོའི་ལྗོངས་ཆེན་དུ།།
རྒྱུ་བཞི་ཐེག་པའི་སྐྱ་རེངས་བསུས།།
མདོ་སྔགས་བསྟན་པའི་འོད་ཆེན་པོ།།
ནམ་ཞིག་འཆར་བའི་སྨོན་ལམ་བཏབ།།
སྒྲ་སྒྱུར་ལོ་ཙཱའི་ཚོགས་བསྡུས་ནས།།
གཡུང་དྲུང་ཐེག་པའི་བོན་སྡེ་རྣམས།།
གདུལ་བྱའི་ཁམས་དང་མོས་པ་ལྟར།།
སྐད་གཞན་བསྒྱུར་བའི་བཀའ་ཡང་མནོས།།
རྒྱ་གར་ཡུལ་གྱི་བྱང་ཤར་མཚམས།།
ཤཀྱའི་རྒྱལ་རྒྱུད་མངའ་ཁོངས་སུ།།
རིགས་ཀྱི་སྨྱུ་གུར་འཁྲུངས་བྱས་ནས།།
དམ་ཆོས་སྤེལ་བའི་ལུང་ཡང་བསྟན།།
རྟག་འཛིན་གདོན་གྱིས་སྨྱོས་པ་ཚོར།།
མི་རྟག་སྒྱུ་འཕྲུལ་མཚོན་ཐབས་སུ།།
གང་ཡང་བདག་ཏུ་མ་བཟུང་བར།།
ཞི་བའི་རྒྱལ་སར་རེ་ཞིག་གཤེགས།།
འདི་ན་བདག་ཅག་འཁོར་བའི་ལས།།
རྒྱ་མཚོའི་རླབས་བཞིན་བསྐྱོད་པ་ལ།།
ཐུགས་རྗེའི་སྤྱན་གྱིས་མི་འདོར་བར།།
འདྲེན་པའི་ལྕགས་ཀྱུ་མ་འདོར་ཞིག།
བདག་ཀྱང་བསོད་ནམས་དགེ་ཚོཌ་ཀྱིས།།
སངས་རྒྱས་བསྟན་པའི་སྒོར་ཞུགས་ཤིང་།།
ཁྱེད་མཚན་”རྒྱལ་གཤེན་”བསྟན་པའི་རྔ།།
ཕྱོགས་བཅུར་རྡུང་བའི་བསྐལ་བ་བཟང་།།
རྒྱལ་གཤེན་འོད་སྟོང་འཕྲིན་ལས་ཀྱིས།།
ཁམས་གསུམ་སྨག་གིས་འཐོམ་པ་ཚོར།།
ཡང་དག་དགེ་ལེགས་འོད་འབྱིན་ནས།།
འདི་ཕྱིའི་ལམ་བཟང་བསྐྲུན་འགྱུར་ཅིག།
རྒྱལ་བ་གཤེན་རབ་མི་བོའི་བསྟན་པའི་སྙིང་པོར་ཤེས་ནས་དད་པ་སྐྱེས་པའི་བསྐལ་བཟང་བསོད་ནམས་ཅན་རིག་བཅུ་སྨྲ་བ་བྱ་འཕུར་དགེ་བཤེས་ལྷུན་གྲུབ་རྒྱ་མཚོས་༼རྒྱལ་གཤེན་ཞང་བོད་སློབ་གཉེར་ཁང་༽དུ་ཟླ་སྔོན་མར་ཟབ་ལམ་ཐུན་མོང་གཏུམ་མོའི་ཉམས་ལེན་གྱི་སྒོམ་སྒྲུབ་སྐབས་མགྱོགས་བྲིས་བྱས་པ་ཞིག་ལ་ཚིག་བཅད་རེ་ཟུང་ཁ་བསྣོན་བགྱིས་ཏེ་སྤེལ་བའོ། །
་་་་་་་་་་་ རྒྱ་གར་ཡུལ་གྱི་བྱང་ཤར་མཚམས།།
ཤཀྱའི་རྒྱལ་རྒྱུད་མངའ་ཁོངས་སུ།།
རིགས་ཀྱི་སྨྱུ་གུར་འཁྲུངས་བྱས་ནས།།
དམ་ཆོས་སྤེལ་བའི་ལུང་ཡང་བསྟན།། ་་་་་་་་་་་་་