ཚིག ཨ་རི་འཇིགས་མེད།
གླུ་བ། བསང་མགོན།
དུས་མཐའི་འགྲོ་ལ་ཕན་པའི་ལམ་ན་དྲངས།།
སྲིད་བཞིའི་གླིང་ན་སྙན་པའི་གྲགས་པ་འབར།།
གང་གི་མགོན་པོ་འཕགས་པ་སྤྱན་རས་གཟིགས།།
གུས་པས་འདུད་དོ་སྙིང་ནས་གསོལ་བ་འདེབས།།
གསང་སྔགས་རྩ་བརྒྱུད་བླ་མའི་བརྒྱུད་པ་དང་།།
ཐར་པའི་ལམ་བཟང་ཐེག་ཆེན་གདམས་ངག་མཆོག།
གང་གི་མགོན་པོ་འཕགས་པ་སྤྱན་རས་གཟིགས།།
གུས་པས་འདུད་དོ་སྙིང་ནས་གསོལ་བ་འདེབས།།
བླ་མས་དུས་དབང་སོ་བཞིའི་མཛད་འཕྲིན་རྨད།།
ཕྱོགས་བཅུའི་སློབ་འབངས་འདུས་པའི་དད་སྟོབས་ཆེ།།
གང་གི་མགོན་པོ་འཕགས་པ་སྤྱན་རས་གཟིགས།།
གུས་པས་འདུད་དོ་སྙིང་ནས་གསོལ་བ་འདེབས།།
བདག་ཅག་བོད་ལ་མཇལ་པའི་བསོད་ནམས་དམན།།
བཙན་པོས་ཁྲིམས་དང་སྡུག་གི་ལོ་ཟླས་མནར།།
གང་གི་མགོན་པོ་འཕགས་པ་སྤྱན་རས་གཟིགས།།
གུས་པས་འདུད་དོ་སྙིང་ནས་གསོལ་བ་འདེབས།།
ཉམ་ཐག་བོད་འབངས་བགྲོད་པའི་གནས་མེད་ཅིང་།།
དད་པའི་ཨ་ལོང་ཤ་དང་ཁྲག་ལ་འདྲེས།།
གང་གི་མགོན་པོ་འཕགས་པ་སྤྱན་རས་གཟིགས།།
གུས་པས་འདུད་དོ་སྙིང་ནས་གསོལ་བ་འདེབས།།
ཟབ་མོའི་གཞུང་ལ་མཁྱེན་པའི་བློ་རིག་རྒྱས།།
སུ་ལ་འཕྲད་ན་བྱམས་པའི་འཛུམ་གྱིས་བསུ།།
བོད་འབངས་སྤྱི་དང་རྒྱལ་ཁམས་བདེ་བར་ཤོག།
མཐའ་བྲལ་དབུ་མའི་ལམ་བཟང་རྒྱལ་གྱུར་ཅིག།
འཛམ་གླིང་ཡོངས་ལ་ཆོས་ཀྱི་འཁོར་ལོ་སྐོར།།
འགྲོ་བ་སེམས་ཅན་ཐར་པའི་ལམ་སྣ་འདྲེན།།
ཡིད་བཞིན་ནོར་བུས་སྐུ་ཚེ་ཁྲི་ལོར་ཤོག།
གཞིས་བྱེས་མྱུར་དུ་ལྷན་འཛོམས་ཡོང་བར་ཤོག།།
༢༠༡༧/༡/༨ཉིན།
ཨ་རི་འཇིགས་མེད་ལགས།
༅༅། ཁྱེད་ཀྱིས་རྩོམ་པའི་ཚིག་རེ་ཀློག་པའི་ཚེ། སེམས་ནང་བཅོས་མིན་དགའ་སྐྱོ་གཉིས་སྐྱེས་སོང།
དགའ་ལ་དུས་དབང་སོ་བཞི་ལེགས་བརྕལ་བ། སྐྱོ་ལ་བོད་ནས་ཆེད་ཕེབས་ཕྱིར་ལོག་པ།
བཙན་གནོན་དམར་ཁྲིམས་དམ་དྲག་ཆེ་ལ་ལྟོས། ཆོས་དད་རང་དབང་ཡོད་ཅེས་རྗུན་མིན་ཅི།
༅༅། ཐམས་ཆད་མཁྱེན་པ་མཇལ་ཡོང་བསམ་པ་མ་བྱུང།
གནས་ཀྱི་མཆོག་གྱུར་རྡོ་རྗེ་གདན་ནས་མཇལ།
བགས་ཆ་བཟང་པོ་མི་ཡིས་ཡུལ་ལ་བཞག།
སྦྱིན་རླབས་གཏམ་བཟང་རང་ཡུལ་ཕྱོགས་ལ་འཁྱེར།
བྱམས་བརྩེའི་བདག་ཉིད་སླར་ཡང་མཇལ་བར་སྨོན།
༅༅། ང་ནི་ཡོང་ཡོང་གངས་ཅན་བོད་ནས་ཡོང། ཐམས་ཆད་མཁྱེན་པ་བསྟན་འཛིན་རྒྱ་མཚོ་མཆོག།
དུས་འཁོར་དབང་ཆེན་རྕ་ཆེན་ཞུ་བར་ཡོང། ཆོས་ཀྱང་ཞུས་ཡིན་བཀའ་སློབ་སེམས་ཉར་ནས།
གངས་ཅན་ལྗོངས་སུ་སླར་ཡང་ལོག་ལ་བརྩོན། མ་འོངས་སླར་ཡང་གསེར་ཞལ་མཇལ་བར་སྨོན།
རྗེས་སུ་འཛིན་གནང་ཡོང་བའི་སྒོ་གསུམ་ནས། གསོལ་བ་རྩེ་གཅིག་བཅོས་མིན་འདེབས་ལགས་སོ།