མཁོ་གཏོང་བ། འཇམ་དབྱངས་སྦྱིན་པ།
ཉེ་སྔོན་ཨ་ཁུ་འཇིགས་མེད་ལགས་བཙོན་ནས་གློད་དེ་ཟླ་གཅིག་ཏག་ཏག་འཁོར་བའི་མཚམས་སུ། ཁ་ཡིག་ལ་༼སྲོག་གི་ཉེན་ཁ་ལས་སླར་ཡང་གསོན་པ་༽ཞེས་བྲིས་གནང་བའི་ཡི་གེ་ཐུང་ཐུང་ཞིག་ཁོང་དང་ཐག་ཉེའི་མི་ཞིག་བརྒྱུད་ནས་འདི་གར་ལག་འབྱོར་བྱུང་། ཡི་གེའི་ནང་དོན་ཐད་ལག་སྙོབ་ཙམ་བྱས་ན། འདས་ཟིན་པའི་ལོ་ཟླ་དེ་གའི་ནང་ཁོང་གི་ལུས་སེམས་གཉིས་ཀའི་ཐོག་རྒྱ་དམར་གྱིས་ཞི་དྲག་ཅི་རིགས་ཀྱི་སྒོ་ནས་སྡུག་ལས་བྱས་པའི་དངོས་མྱོང་གཞི་ལ་བཞག་སྟེ། སེམས་ཚོར་ཆེན་པོས་ཁོ་བ་ཚོའི་སྐྱུགས་བྲོ་བའི་ལས་ངན་དང་། དེ་ཚོས་ཅི་བྱས་ཀྱང་བསྒྱུར་དུ་མི་བཏུབ་པའི་ཁོང་གི་སྙིང་སྟོབས་དང་ཆོད་སེམས། དེ་བཞིན་དྲང་བདེན་དང་གནས་ལུགས་ཀྱི་ཕྱིར་དུ་ཅི་ལའང་བཟོད་ཐུབ་པའི་དཔའ་སྐད་བསྒྲགས་འདུག་སྙམ་པ་ཞིག་ཏུ་ཚོར་ཡང་དེ་ཙམ་གྱིས་ཁ་ཚོད་གཅོད་ག་ལ་ནུས།
ད་དུང་སུག་བྲིས་ཡི་གེ་དེའི་མཇུག་ཏུ་འདི་ནི་འཆི་ཁའི་ཁ་ཆེམས་སམ་སྙིང་གཏམ་དྲོན་མོ་ཡིན་ཚུལ་ཡང་གསལ་འདུག་པས། དེ་མུར་འཇོག་མ་ བཟོད་པར་འབྲེལ་ཡོད་གསར་འགྱུར་སྡེ་ཁག་ལ་བསྐུར་བ་ལགས་ན། ཁྱེད་རྣམ་པས་འདིའི་ཐད་ཐུགས་ཞིབ་གནང་སྐྱོང་ཡོང་བ་མཁྱེན་ཞུ་ཞུ།
ཞེས་ཨ་ཁུ་འཇིགས་མེད་ཀྱི་དགེ་ཕྲུག་དགེ་འདུན་ཕུན་ཚོགས་ཀྱིས་བོད་རྒྱལ་ལོ་ ༢༡༤༣/༡༡/༢༩། ཕྱི་ལོ༢༠༡༧/༠༡/༢༦ ཉིན་སྤེལ།
གཤམ་དུ་སུག་བྲིས་ངོ་མ་་ཡིག་གཏག་བྱས་པ་དེ་ཡང་བསྐུར་ཡོད།
སྲོག་གི་ཉེན་ཁ་ལས་སླར་ཡང་གསོན་པ།
ང་ཡི་སྙིང་སྟོབས་དང་ཆོད་སེམས། རིགས་ཞེན་དང་ལ་རྒྱ། རེ་བ་དང་གསོན་ཤུགས་སོགས་ཉམས་སོང་བ་ཡིན་ན་ནི་ཁོ་ཚོའི“འདོད་ཐོག་ལ་རྟ་རྒྱུག”པ་ཡིན་པས་ཁོ་ཚོས་ང་ཚོ་ཕམ་ཉེས་གཏོང་བྱེད་ཀྱི་ཐབས་ལམ་ལའང་འཇིགས་སྣང་དང་བསླུ་བྲིད། རྫུན་གཏམ་དང་གཡོ་ཇུས། མདོར་ན་བཙན་པོའི་ཁྲོ་གཉེར། གཡོ་སྒྱུའི་བཅོས་འཛུམ་སོགས་ཀྱི་ཐབས་སྣ་ཚོགས་ཤིག་བེད་སྤྱོད་པ་ལ་བྱང་ཆ་དེ་ལྟར་མངའ་བ་རེད་ཨང་། དེ་ལྟ་བུའི་ལམ་ག་ནས་རྒྱ་ཆེའི་མང་ཚོགས་ལ་མགོ་བསྐོར་གཏོང་བ་ལས་གཞན་དུ་ང་ཚོར་ནག་ཉེས་ཀྱི་ཞྭ་མོ་གང་ཆེ་གང་ལྕི་བཟོས་ཏེ་ཁྲིམས་ལ་སྦྱར་ནས་མ་བྱས་པ་མང་པོ་ཞིག་ཁས་ལེན་དགོས་པའི་སྐུལ་མའང་ནན་ཏན་དུ་བཏང་སྟེ་ང་ཚོ་ཤི་མིན་རོ་མིན་གྱི་བེམ་གཟུགས་ཙམ་དང་། ཡང་ན་འཇིག་རྟེན་འདི་ནས་རྩ་མེད་དུ་གཏོང་བའི་ལས་སྦྱོར་ཡང་མུ་ནས་མུར་བརྩམས་པ་རེད་མོད། ཁོ་ཚོས་ངའི་བསམ་གཞིགས་ཀྱི་ཤེད་མོང་དང་། ངའི་བློ་ཕུགས་ཀྱི་དམ་བཅའ་ལ་འགྱུར་བ་འེན་ཙམ་ཡང་གཏོང་མ་ནུས་ཅེས་ཤོད་ཆོག་པ་མ་ཟད། ལྡོག་སྟེ་བདེན་དང་གནས་ལུགས་ཀྱི་སླད་དུ་དང་། དྲང་བདེན་བློ་དཀར་གྱི་ཕྱིར་དུ་ང་ལ་སྟོབས་ཤུགས་དང་། ནུས་མཐུ། སྙིང་རུས། བཟོད་བསྲན་སོགས་སྔར་མ་བྱུང་བ་མང་པོ་བསྩལ་སོང་བ་འདི་ནི་བདེན་དང་གནས་ལུགས་ཀྱི་སྟོབས་ཤུགས་ཡིན་པར་ཏན་ཏན་ཡིད་ཆེས་པ་ཡིན།
ངའི་རིགས་ལ་བཅིངས་པའི་ལྷག་བསམ། ངའི་ཡུལ་ལ་བཟུང་བའི་བརྩེ་བ། ངའི་སྤུན་ཟླར་བཅོལ་བའི་རེ་བ་སོགས་ནི་མི་འགྱུར་བྲག་རི་བཞིན་སུས་ཀྱང་གཞོམ་གཞིག་གཏོང་མི་ནུས་པ་བཞིན་དུ། འཛམ་གླིང་ཞི་བདེ་དང་།རྒྱལ་ཁམས་དར་རྒྱས། སེམས་ལྡན་བདེ་སྐྱིད་སོགས་ཀྱི་སླད་དུ་སྡུག་རུས་མཐའ་འཁྱོལ་བྱེད་ངེས་པའང་བདག་གིས་བདེན་དོན་གྱིས་བཞེངས་པའི་ཚེ་སྲོག་གི་དམ་བཅའ་ཡིན་ལ། ནམ་ཞིག་ཚེ་སྲོག་གི་མར་མེ་རླུང་གིས་བསད་པའམ། བླ་སྲོག་གི་དར་ལྕོག་གྲི་ཡིས་གཏུབ་པ་གང་ཡིན་ན་ཡང་འཆི་ཁའི་ཁ་ཆེམས་སམ་སྙིང་གཏམ་དྲོན་མོའང་འདི་ཡིན།
བླ་བྲང་འཇིགས་མེད་ཀྱིས་༢༠༡༦.༡༡.༢༦ ཉིན་བྲིས།
ངའི་རིགས་ལ་བཅིངས་པའི་ལྷག་བསམ་།
ངའི་ཡུལ་ལ་བཟུང་བའི་བརྩེ་བ་།
ངའི་སྤུན་ཟླར་བཅོལ་བའི་རེ་བ་།
བླ་བྲང་འཇིགས་མེད་ཀྱི་ང་ཚོར་སྲིངས་བའི་དོན་ཚན་གསུམ་ལ་ང་ཚོ་བོད་མི་ཚོའི་འགན་འཁུར་ཆེ་ཙམ་བཞེས་དགོས་པ་མ་རེད་དམ་?
༅༅། བླ་བྲང་རྒྱལ་ཞེན་འཇིགས་མེད་ལགས་ཀྱིས་བརྩམས་གནང་བའི་འཕྲིན་ཡིག་ནི་བདག་གི་བློ་ལ་
ཤིན་ཏུ་ནས་ཐད། རྒྱ་དམར་པོ་། ཆོས་མ་ེད་ཀླ་ཀློས་འདོད་མོས་བཞིན་བོད་མི་རིགས་ལ་སྡུག་རྕུབ་མནར་
གཅོད་ཇི་ལྟར་བཏང་ཡང་། བོད་མི་རིགས་ཀྱི་སེམས་ལ་འགྱུར་བ་ནམ་ཡང་གཏོང་མི་ཐུབ་པ་ཡིན།
༅༅། རྒྱལ་སྤྱིའི་ཁྲིམས་ལས་བརྒལ་བའི་རྒྱ་དམར་པོས། རིག་རྩལ་ཤེས་ཡོན་ཅན་ལ་རྕི་བཀུར་མེད།
འགྲོ་བ་མི་ལས་བརྒལ་བའི་ལས་དོན་རྣམས། ནམ་ཡང་འཛམ་གླིང་ཁྲོད་དུ་གཟི་བརྗིད་མེད།
་་་་་་་་་ ང་ཡི་སྙིང་སྟོབས་དང་ཆོད་སེམས། རིགས་ཞེན་དང་ལ་རྒྱ། རེ་བ་དང་གསོན་ཤུགས་སོགས་ཉམས་སོང་བ་ཡིན་ན་ནི་ཁོ་ཚོའི“འདོད་ཐོག་ལ་རྟ་རྒྱུག”པ་ཡིན་པས་་་་་་་་་་
ཡང་།
་་་་་་་་་་ ང་ཚོར་ནག་ཉེས་ཀྱི་ཞྭ་མོ་གང་ཆེ་གང་ལྕི་བཟོས་ཏེ་ཁྲིམས་ལ་སྦྱར་ནས་མ་བྱས་པ་མང་པོ་ཞིག་ཁས་ལེན་དགོས་པའི་སྐུལ་མའང་ནན་ཏན་དུ་བཏང་སྟེ་ང་ཚོ་ཤི་མིན་རོ་མིན་གྱི་བེམ་གཟུགས་ཙམ་དང་། ཡང་ན་འཇིག་རྟེན་འདི་ནས་རྩ་མེད་དུ་གཏོང་བའི་ལས་སྦྱོར་ཡང་མུ་ནས་མུར་བརྩམས་པ་རེད་་་་་་་་་
འཇིགས་མེད་འཇིགས་པ་མེད་པ་ཡིས། །
འཇིགས་ཅན་རྒྱ་གཞུང་སྡུག་རྩུབ་ལ། །
འཇིགས་ཞུམ་བཞག་དང་རྒོལ་བྱས་ནས། །
འཇིགས་མེད་ཆོད་སེམས་ཡིག་སྤེལ་གྱིས། །
གཞིས་བྱེས་བོད་རིགས་ལ་རྒྱ་སྤེལ། །