བདེན་འཚོལ།
༄༅།། དེང་སང་གངས་ལྗོངས་མདོ་སྨད་ཡུལ་གྱི་དགེ་ལུགས་པའི་ཆོས་སྡེ་ཆེ་ཆུང་ཡོངས་རྫོགས་སུ་ཆོ་འཕྲུལ་སྨོན་ལམ་ཆེན་མོ་ཚོགས་བཞིན་ཡོད་སྟབས། ཉེ་འཁོར་གྱི་དད་ལྡན་མང་ཚོགས་རྣམས་དགོན་སྡེ་ཁག་ཏུ་མཆོད་མཇལ་སོགས་ལ་བསྐྱོད་བཞིན་པ་ནི་རྒྱུན་སྲོལ་གྱི་བྱེད་སྒོ་གལ་ཆེན་ཞིག་ལ་བོད་མི་རྣམས་ཀྱིས་ངོས་འཛིན་བྱེད་ཀྱི་ཡོད། མདོ་སྨད་སྟག་ཚང་ལྷ་མོ་ཀིརྟི་དགོན་གྱིས་མཚོན་ཀིརྟིའི་དགོན་ཁག་རྣམས་སུ་ཡང་རྒྱུན་སྲོལ་ལྟར་ཟླ་འདིའི་བོད་ཚེས་བཞིའི་ཉིན་ནས་བཅུ་དྲུག་བར་ཆོ་འཕྲུལ་སྨོན་ལམ་ཆེན་མོ་ཚུགས་བཞིན་ཡོད། སྟག་ཚང་ལྷ་མོ་ཀིརྟི་དགོན་གྱི་ཆོ་འཕྲུལ་སྨོན་ལམ་ཆེན་མོའི་བྱེད་སྒོའི་ཆ་ཤས་བོད་ཚེས་བཅུ་གསུམ་ཉིན་གྱི་གོས་སྐུ་ཆེན་མོ་དང་། བོད་ཚེས་བཅུ་བཞིའི་ཉིན་གྱི་འབག་འཆམ། བོད་ཚེས་བཅོ་ལྔའི་ཉིན་གྱི་མེ་ཏོག་མཆོད་པ་ཆེན་མོ། བོད་ཚེས་བཅུ་དྲུག་ཉིན་གྱི་བྱམས་པ་གླིང་སྐོར་བཅས་ནི་མང་ཚོགས་ཤིན་ཏུ་འདུ་ཆེ་བའི་སྐབས་ཡིན།
ད་ལོ་ཡང་སྔ་རྒྱུན་ལྟར་ཐག་ཉེ་རིང་མང་པོ་ནས་སྟག་ཚང་ལྷ་མོ་ཀིརྟི་དགོན་དུ་མཇལ་བ་ཤིན་ཏུ་མང་པོ་འབྱོར་བཞིན་པར་བརྟེན། ཁ་སང་སྟེ་འདི་ཟླའི་ཕྱི་ཚེས་ ༡༠ ཉིན་དང་བོད་ཚེས་བཅུ་བཞིའི་ཉིན་ཀླུ་ཆུ་རྫོང་གི་ཉེན་རྟོག་པ་སྐོར་ཞིག་འབྱོར་ནས་ཀན་སུའུ་དང་སི་ཁྲོན་གྱི་ས་མཚམས་ཟེར་བར་མང་ཚོགས་རྣམས་ཀིརྟི་དགོན་པར་འགྲོ་བའི་ལམ་བཀག་སྟེ་ཀིརྟི་དགོན་པར་མཆོད་མཇལ་འགྲོ་བར་འགོག་རྐྱེན་བྱས་ཡོད། ཀླུ་ཆུ་རྫོང་གི་ཉེན་རྟོག་པས་ལམ་འགོག་དགོས་པའི་རྒྱུ་མཚན་གསལ་བཤད་གང་ཡང་བྱས་མེད་ཀྱང་། ཀིརྟི་དགོན་པར་ཕྱོགས་མཐའི་མཇལ་བ་སྟོང་ཕྲག་མང་པོས་ཁེངས་ཏེ་འཚང་ཁ་ཆེ་བ་ཞིག་ཡོད་ཀྱང་། ཤུགས་ལྡན་བསྟེན་རྒྱུ་མཚམས་འཇོག་མ་བྱས་པའི་ལྷ་མོ་ཉིན་གྱི་གསེར་ཁྲི་དགོན་པར་མཇལ་བ་ཤིན་ཏུ་ཉུང་བས་རྒྱ་གཞུང་གིས་དེའི་སེམས་ནད་མ་ཐེག་ནས་ཀིརྟི་དགོན་པར་གནོན་ཤུགས་སྤྲད་པ་རེད་ཅེས་མང་ཚོགས་ཀྱིས་ངོས་འཛིན་བྱེད་ཀྱི་འདུག་ལ། ཡང་ཚོགས་རིགས་ཤིག་གིས་བར་ལམ་ལོ་ཤས་གོང་ནས་༸སྐྱབས་མགོན་ཀིརྟི་རིན་པོ་ཆེའི་བཀའ་འབྲེལ་ལྟར་སྟག་ཚང་ལྷ་མོའི་ནང་བསྟན་ཤེས་ཡོན་འགན་འཛིན་ལྷན་ཚོགས་ཀྱིས་སྨོན་ལམ་སྐབས་མང་ཚོགས་ཤིན་ཏུ་འདུ་ཆེ་བའི་སྐབས་དང་བསྟུན་ནས། གདན་ས་རང་གི་དགེ་བཤེས་ཚོས་མང་ཚོགས་ལ་ནང་ཆོས་ངོ་སྤྲོད་ཀྱི་ལས་རིམ་ཞིག་འགྲོ་བཞིན་ཡོད་ཅིང་། ལས་རིམ་འདི་ལ་མང་ཚོགས་ཀྱིས་དོ་སྣང་ཆེན་པོ་བྱེད་ཀྱི་ཡོད་པར་བརྟེན་དེ་ལ་རྒྱ་གཞུང་མ་དགའ་བ་ཡིན་ནམ་ཞེས་བསམ་ཚུལ་ཤོད་མཁན་ཡང་འདུག
གང་ལྟར་ཡང་ཁྲིམས་དང་གནས་ལུགས་ཀྱི་རྒྱུ་མཚན་གང་ཡང་མེད་པར་མང་ཚོགས་ཀྱི་དད་མོས་དང་འགྲོ་འདུག་ལ་བཙན་ཤེད་ཀྱིས་བཀག་སྡོམ་བྱེད་པ་ནི། རྒྱ་ནག་གཞུང་གིས་ས་གནས་ཀྱི་བོད་རིགས་མང་ཚོགས་ལ་མཐོང་ཆུང་དང་ཐུབ་ཚོད་བཏང་བ་རེད་ཅེས་མང་ཚོགས་ཀྱིས་བློ་ཕམ་དང་ཁོང་ཁྲོ་ཆེན་པོ་བྱེད་ཀྱི་ཡོད་འདུག
གོང་གསལ་གྱི་གནས་ཚུལ་འདི་སྤྱི་ཚོགས་དྲ་ལམ་ཁག་ཏུ་འགྲོ་བཞིན་པའི་གནས་ཚུལ་གསར་པ་ཞིག་ཡིན་པས་འདིར་བརྒྱུད་འགོད་བྱས་ཡོད། རྒྱུ་མཚན་དང་པོ་ནི་རྒྱ་ནག་གཞུང་གིས་བོད་མིའི་ཐོག་ཁྲིམས་འགལ་གྱིས་བཙན་ཤེད་སྣ་ཚོགས་ལག་བསྟར་བྱེད་བཞིན་པའི་དངོས་ཡོད་གནས་ཚུལ་འདི་གང་མང་མང་གིས་མཁྱེན་རྟོགས་ཡོང་བའི་དོན་དུ་ཡིན། རྒྱུ་མཚན་གཉིས་པ་ནི་ཨེ་ཤི་ཡ་རང་དབང་རླུང་འཕྲིན་ཁང་གི་བོད་སྐད་སྡེ་ཚན་གྱིས་སྒྲོག་བཞིན་པའི་གསར་འགྱུར་གྱི་སྤུས་ཚད་དང་འབྲེལ་བའི་ཚིག་གཅིག་གཉིས་ཤིག་བཤད་འདོད་པས་ཡིན། སྤྱིར་སྡེ་ཚན་འདི་ལ་དགེ་ཚན་དང་གྲུབ་འབྲས་མང་པོ་ཡོད་པ་སྨོས་མ་དགོས།
འོན་ཀྱང་ཤིན་ཏུ་གཟབ་དགོས་པ་ནི་གསར་འགྱུར་ཆེ་ཆུང་གང་འདྲ་ཡིན་ཡང་སྒྲོག་རྒྱུ་ཙམ་གཙོ་བོ་མི་བྱེད་པར་དེའི་རྒྱབ་ལྗོངས་ཀྱི་གནས་ཚུལ་ལ་ཞིབ་འཇུག་གཏིང་ལོན་པ་བྱ་དགོས་པ་ཤིན་ཏུ་གལ་ཆེ་སྙམ། གནས་ཚུལ་མང་པོ་ཞིག་གསར་འགོད་པས་ཞིབ་འཇུག་གང་ཡང་མི་བྱེད་པར་ཡིན་ཚོད་ཀྱིས་མ་དག་པ་དང་རྫུན་མ་སྣ་ཚོགས་སྒྲོག་བཞིན་ཡོད། དཔེར་ན། ཨེ་ཤི་ཡ་རང་དབང་རླུང་འཕྲིན་ཁང་གི་བོད་སྐད་སྡེ་ཚན་གྱི་ཨ་མདོའི་སྐད་ཀྱི་གསར་འགོད་པ་ཀུན་བཟང་བསྟན་འཛིན་ཟེར་བས་གནས་ཚུལ་མང་པོ་ཞིག་ཡིན་ཚོད་ཀྱིས་བཤད་ཀྱི་འདུག་པ་ལྟ་བུ་ཡིན། ཁོས་གོང་གི་གནས་ཚུལ་འབྱུང་ས་དེ་རྔ་པ་ཀིརྟི་དགོན་པ་ཡིན་ཤག་གིས་བཤད་པར་མ་ཟད། ས་གནས་ཀྱི་མི་ལ་འབྲེལ་བ་བྱས་ནས་རྒྱུས་ལོན་བྱས་ཡོད་པ་ལྟ་བུའི་སྐད་ཆ་རྫུན་མ་འགའ་ཤས་ཀྱང་སྒྲིག་འདུག
འདིར་བཀོད་པའི་གནས་ཚུལ་ནི་ཁ་སང་གསར་དུ་བྱུང་མ་ཐག་པའི་གནས་ཚུལ་ཞིག་ཡིན་པས་དཔེ་མཚོན་དུ་བཀོད་པ་ལས། འདི་འདྲའི་གནས་ཚུལ་ཤིན་ཏུ་མང་པོ་ཡོང་གི་འདུག བོད་ནང་གི་ཨེ་ཤི་ཡ་རང་དབང་རླུང་འཕྲིན་ཁང་གི་གསར་འགྱུར་ཉན་མཁན་མང་པོ་ཞིག་ཧང་སང་ནས་རླུང་འཕྲིན་ཁང་འདིས་འདི་ལྟ་བུའི་གསར་འགྱུར་མ་དག་པ་དང་རྫུན་མ་ཤོར་དགོས་པའི་རྒྱུ་མཚན་ཅི་ཡིན་ནམ། རྔ་པ་རྫོང་དང་ཀན་སུའུ་བར་གྱི་ས་མཚམས་ཤིག་གང་དུ་ཡོད་པ་རེད།
འདིའི་གསར་འགོད་པ་ཚོ་བོད་ཀྱི་ས་ཁམས་ཀྱི་གནས་ཚུལ་ལ་རྒྱུས་ལོན་གཏན་ནས་མེད་པ་འདི་འདྲ་གང་འདྲ་རེད་ཅེས་སྐད་འཕྲིན་དང་ཁ་པར་གྱི་བརྒྱུད་ལམ་ནས་འདྲི་མཁན་ཤིན་ཏུ་མང་པོ་ཡོང་གི་འདུག་ཀྱང་། གསར་འགོད་པ་འདི་ཚོས་གནས་ཚུལ་གྱི་རྒྱབ་ལྗོངས་ལ་ཞིབ་འཇུག་དང་རྩད་གཅོད་མི་བྱེད་པར་གང་མགྱོགས་ཀྱིས་ཕྱི་ལ་སྒྲོག་བྱེད་བཞིན་པ་འདི་དངུལ་གྱི་ཆེད་དུ་རེད་ཅེས་བོད་ནང་གི་དྲི་བ་འདྲི་མཁན་ཚོར་བཤད་རྒྱུའི་སྤོབས་པ་ང་ལ་བྱུང་མ་སོང་ཡང་། གསར་འགོད་པ་ཁྱེད་ཚོས་རང་གི་སྒོར་རྡོག་འགའ་ཤས་ཀྱི་དོན་དུ་མཚན་སྙན་ཆེ་བའི་རླུང་འཕྲིན་ཁང་འདི་མང་ཚོགས་ཀྱི་ཡིད་ཆེས་དང་རྒྱབ་སྐྱོར་མེད་པ་ཞིག་ཏུ་མ་གཏོང་རོགས་ཞེས་ལྷག་བསམ་རྣམ་དག་གིས་རེ་འབོད་བྱེད་ཀྱི་ཡོད།
ཆོས་མེད་ཀླ་ཀློའི་ཆོས་ཕྱོགས་བཀག་པ་དང་།
གསར་འགྱུར་འགོད་པོའི་གང་བསམ་བཀོད་པ་སོགས་།
ས་ཕྱོགས་ཀུན་ལ་ཁྲིམས་འགལ་དར་ཆེ་ནས་།
ཁྲིམས་སྲུང་མི་མང་ཉམས་ཆུང་ཡིད་རེ་མུག་།
༅༅། ལུས་ངག་ཡིད་གསུམ་ངང་ནས་སྒུག་བྱས་ཏེ།
སེམས་རེ་སྡུག་ནས་མི་ལོ་ལྔ་བཅུ་སོང། ཡིད་རེ་མུག་ནས་མི་ལོ་དྲུག་བཅུར་ཉེ།
ལྔ་བཅུ་དྲུག་བཅུའི་རེ་བ་མ་སྒྲུབ་ན་། ད་ནི་རང་སྲོག་བཅད་ལ་ཉེ་སོང་ངོ།
ལྷ་ཀླུ་ཡུལ་ལྷ་གཞི་བདག་རྣམ་པ་གང་ན་བཞུགས།
མི་རབས་མི་རབས་བར་ནས་གསོལ་འདེབས་པའི།
ལྷ་དང་སྲུང་མ་རྣམ་པ་གང་ན་བཞུགས།
སྐྱོབས་པའི་ནུས་པ་ཕྲན་ཙམ་མེད་པ་སྐྱོ།
གནས་ཚུལ་ངོ་མ་མཁོ་སྤྲོད་གནང་བར་ཐུགས་རྗེ་ཆེ། དངོས་གནས་བོད་ཀྱི་གསར་འགོད་པ་ཚོས་གཟབ་གཟབ་བྱ་དགོས་པ་ཞིག་འདུག རང་འཚམས་ཀྱིས་གསར་འགྱུར་གཏོང་བའི་གནས་ཚུལ་མང་པོ་ཡོང་གི་འདུག ས་གནས་ཀྱི་གནས་ཚུལ་རྒྱུས་ལོན་མ་བྱས་པར་ར་མགོ་ལུག་སྦྱར་གྱི་གནས་ཚུལ་སྤེལ་བ་ཡག་པོ་གཏན་ནས་མ་རེད། ཀུན་བཟང་བསྟན་འཛིན་ཟེར་བས་གནས་ཚུལ་མང་པོ་གཏོང་གི་འདུག་ཀྱང་འདི་ལྟར་བྱས་ན་བདེན་པ་ཉུང་ཉུང་ཡིན་ཚོད་འདུག འདི་རིགས་ལ་འགན་འཛིན་རྣམ་པའི་ཐོག་ནས་རྒྱ་གཡན་དུ་མ་སོང་བ་བྱ་དགོས་པ་གལ་ཆེ། རྫུན་གྱི་རྐུབ་རྡོལ་མཁན་མང་པོ་ཡོང་གི་མེད་སྟབས་གསར་འགོད་པ་འདི་རིགས་ཅུང་སྐྱག་ལང་དུ་ཤོར་ཡོད་ཚོད་འདུག ང་ལ་དེ་སྔ་གསར་འགོད་པ་ཞིག་གིས་དག་རྫུན་མང་པོ་བསྲེས་ནས་གསར་འགྱུར་གང་མང་གཏོང་རྒྱུར་དཀའ་ངལ་མི་འདུག་ཀྱང་། ར་མ་འཕྲོད་པ་དང་རང་ཉིད་ལ་གསལ་ཁ་མ་བྱུང་བའི་གནས་ཚུལ་ཞིག་བཏང་བ་ཡིན་ན་ཡག་པོ་མི་འདུག་བསམས་ནས་གཏོང་གི་མེད་ཅེས་བཤད་མྱོང་བ་འདི་ཤིན་ཏུ་བདེན་པ་དང་འགན་ལེན་ཡོད་པའི་སྐད་ཆ་རིན་ཐང་ལྡན་པ་ཞིག་ཏུ་མཐོང་། མདོར་ན། གསར་འགོད་པ་ཚོས་རྫུན་མ་བཤད་རོགས་ཞེས་རེ་འབོད་བྱེད་ཀྱི་ཡོད།