མཛད་པ་པོ། གཡུ་རྔོག་པ་ཚུལ་ཁྲིམས་རྣམ་རྒྱལ།
ན་མོ་གུ་རུ་པདྨ་ཀ་ར་ཛྙཱ་ན་ཌཱཀྐི་སཾ་ག་ར་ཡེ།
དག་མཉམ་ལྟ་བ་ཚད་དུ་འཁྱོལ་བས་སྣང་སྲིད་སྐུ་དང་ཡེ་ཤེས་ཞིང་།།
རྟེན་འབྱུང་ཆོས་ཀྱི་དེ་ཉིད་གཟིགས་པས་ནམ་མཁའི་ཁམས་ལ་བྱ་བཞིན་འཕུར།།
བསམ་གྱིས་མི་ཁྱབ་བློ་ལས་འགོངས་པའི་གྲུབ་ཆེན་བརྒྱད་ཅུའི་སྤྱོད་པ་ཅན།།
གཡུ་རྔོག་གྲུབ་པ་ཀརྨ་ཚེ་དབང་རིག་འཛིན་ཆེན་པོའི་ཞབས་རྡུལ་ལེན།།
མ་མཐོང་རྒྱང་གི་གྲོགས་མཆོག་ཞིག་ལ་གཏམ་གྱི་སྐྱེས་ལན་འབུལ་བའི་ཕྱིར།།
ཁུངས་ལྡན་མེས་པོའི་ངག་ལས་བྱུང་བ་ངོ་མཚར་འབར་བའི་རྣམ་པར་ཐར།།
ཅུང་ཟད་བརྗོད་ལ་ལྷ་དང་བླ་མས་དབྱིངས་ནས་བརྩེ་བར་ཉེར་དགོངས་ཏེ།།
དགྱེས་པའི་དབུགས་དབྱུང་བྱིན་ཆེན་སྣང་བས་མི་འབྲལ་དུས་ཀུན་སྐྱོངས་བར་མཛོད།།
ཅེས་མཆོད་པར་བརྗོད་པ་དང་བཅས་པའི་ཉུང་ངུའི་ཚིག་གིས་མདུན་བསུས་ཏེ་གཡུ་རྔོག་ཀརྨ་ཚེ་དབང་རིག་འཛིན་ནམ་ཡོངས་གྲགས་སུ་གྲུབ་ཆེན་དོ་རྡོ་ཞེས་སྔོན་བྱོན་འཕགས་ཡུལ་གྱི་གྲུབ་རིགས་བརྒྱད་ཅུའི་བརྟུལ་ཞུགས་ལ་འགྲན་བཟོད་པའི་དམ་པ་གང་གི་རྣམ་པར་ཐར་བ་མདོར་བསྡུས་སུ་གླེང་ན།
དང་པོ་ཐོག་མར་དགེ་བ་རྣམ་ཐར་ལ་འཇུག་པ་སྐུ་འཁྲུངས་ཚུལ་སོགས་བརྗོད་པ། བར་དུ་དགེ་བ་གྲུབ་པའི་མཛད་སྤྱོད་རྒྱ་མཚོ་ལྟ་བུ་ལས་ཆུ་ཐིགས་ཉུང་ངུ་འགོད་པ། མཐའ་མར་དགེ་བ་གཟུགས་སྐུ་དབྱིངས་སུ་བསྡུས་པའི་མཛད་པ་བསྟན་པ།
དང་པོ་གང་དུ་འཁྲུངས་པའི་ཡུལ་ནི་རིག་འཛིན་སྔགས་ཀྱི་གྲོང་ཁྱེར་རེབ་གོང་གསེར་མོ་ལྗོངས་སུ་གྲགས་པའི་ཡུལ་གྲུ་ཆེན་པོ་དེ་ན་ཇི་སྐད་དུ། གཡུ་རྔོག་ཨ་གྲོང་ཚོ་བཞི་གསུམ།། ས་རེབ་གོང་ཁོག་གི་སྔགས་སྡེ་གསུམ།། ཞེས་ས་གྲགས་གནམ་གྲགས་སུ་གྱུར་བའི་རེབ་གོང་གྲུབ་པ་ཐོབ་པའི་གནས་བརྒྱད་ལས་ཨ་མཐུ་སྔགས་པ་གཡུ་རྔོག་ཞེས་པའི་སློབ་དཔོན་པདྨ་འབྱུང་གནས་ཀྱི་དངོས་སློབ་དང་ཡང་ལྷ་ལུང་དཔལ་རྡོར་གྱི་དངོས་སློབ་ཡིན་ཟེར་བ་སོགས་གང་ཡིན་ཆ་མ་འཚལ་ཀྱང་སྐུ་ཚེ་གཅིག་ལ་ཟུང་གཅིག་རྡོ་རྗེ་འཆང་ཆེན་པོའི་ས་ལ་བསྙེགས་པའི་རྣལ་འབྱོར་གྲུབ་པའི་དབང་ཕྱུག་གསང་མཚན་རིག་འདུས་དྲག་པོ་རྩལ་དུ་འབོད་པའི་གདུང་རྒྱུད་ལས་མཆེད་པའི་ཧོར་ཚོ་བཞི་གླིང་དྲུག་གི་ནང་ཚན་གཡུ་རྔོག་ཚོ་བ་ནི་དམ་པ་གང་འཇིག་རྟེན་དུ་སྐྱེས་པའི་ཕ་ཡུལ་ཡིན། ཕ་ཡབ་ནི་ཚེ་བརྟན་བཀྲ་ཤིས་སུ་འབོད་ཅིང་མ་ཡུམ་ནི་ཀླུ་ཚང་པདྨ་སྐྱིད་ཞེས་པའི་བསོད་ནམས་ཅན་དེ་གཉིས་ཀྱི་བུར་རབ་བྱུང་བཅུ་དྲུག་པའི་ཆུ་འབྲུག་ཕྱི་ལོ་༡༨༣༢ལ་ཡུལ་ལྷ་ཆེན་པོ་སེར་རྒོད་ཀྱི་མདུན་ཞོལ་མཐའ་སྨུག་གཞུང་དུ་མཚན་དཔེའི་མེ་ཏོག་ཐོག་མར་བཞད། དེའང་སྐུ་འཁྲུངས་པའི་སྔ་རོལ་དུ་རིག་འཛིན་འཇིགས་མེད་གླིང་པའི་དངོས་སློབ་ཁམས་པ་འཇིགས་མེད་མི་བཞིའི་ཡ་གྱལ་རྡོ་བླ་ཀུན་བཟང་གཞན་ཕན་གྱི་སློབ་མ་རྡོ་རྗེའི་གདུང་བཞིའི་ཡ་གྱལ་དུ་བགྲང་བར་མཛད་པ་ཇི་སྐད་དུ། ཤར་དུ་དུང་དཀར་ཚངས་དབྱངས་གྲགས་ལྡན་འབྱུང་།།ཞེས་པའི་སྡེ་དགེ་འཇིགས་མེད་སྐལ་བཟང་གིས་ཡོན་ཏན་མཛོད་འགྲེལ་ཤིང་རྟ་རྣམ་གཉིས་ཀྱི་གླེགས་བམ་ཞིག་གནང་ནས་འདི་ལ་ཉར་ཚགས་ལེགས་པོར་བྱོས་དང་བདག་བྱེད་མཁན་ཞིག་ཡོང་ཞེས་འབྱུང་འགྱུར་གྱི་ལུང་བསྟན་དེ་ཡང་གནང་བ་ཡིན། དེའང་གསན་བསམ་ཇི་ལྟར་མཛད་ཚུལ་སོགས་ཀྱི་ལོ་རྒྱུས་ནི་གནས་སྐབས་སུ་ལྷགས་ལ་བླ་མ་བསྟེན་ཚུལ་ནི་སྙིགས་མའི་དུས་སུ་འཕགས་མཆོག་སྤྱན་རས་གཟིགས་དགེ་བའི་བཤེས་གཉེན་གྱི་རྣམ་པར་ཤར་བ་རིས་མེད་གྲུབ་མཐའ་ཀུན་གྱིས་ཁས་ལེན་ཐོབ་པའི་མཁས་གྲུབ་ཀྱི་དབང་ཕྱུག་ཆེན་པོ་རྫ་དཔལ་སྤྲུལ་ཨོ་རྒྱན་འཇིགས་མེད་ཆོས་ཀྱི་དབང་པོ་དང་།ཁམས་སྡེ་དགེ་ནས་བྱོན་ཅིང་འགྲོ་དོན་མདོ་སྨད་ནས་རྒྱས་པའི་གཏེར་ཆེན་སྣ་ཚོགས་རང་གྲོལ་དང་གང་གི་སྐུ་ཕྲེང་གཉིས་པ་མི་ཕམ་དགའ་བའི་བློ་གྲོས་ཀྱང་བླ་མར་བསྟེན།
གཉིས་པ་རྣམ་ཐར་གྱི་དངོས་གཞིའི་སྐོར་ཚན་པ་ཆུང་ངུ་མང་པོ་ཞིག་དཔེར་ན་མདོ་མཁྱེན་བརྩེ་ཡེ་ཤེས་རྡོ་རྗེའི་གྲུབ་སྤྱོད་ཀྱི་རྣམ་ཐར་ལྟར་ཞུ་ན།
༡༽ བྱ་བཞིན་འཕུར་བའི་བླ་མ།
གཡུ་སྒོང་བྲག་གི་ཡོ་ལོའི་མཚམས་ཁང་ནས་ཡུན་རིང་བཞུགས་སྐབས་ཞིག་ལ་ཉིན་ཞིག་མཚམས་གྲོལ་བས་ཁོང་དང་གྲྭ་སློབ་འགའ་རེ་བྲག་རྩེར་ཕྱིན། སློབ་མ་འགའ་རེས་སུ་ཞིག་བྲག་མཆོག་གི་རི་མགོར་འཕུར་ཐུབ་ཅེས་དྲིས།འགའ་རེས་ང་འཕུར་ཐུབ་སོགས་ཀི་ཅོ་འདོན་པ་ལ། ཁོང་གིས་ཁྱེད་ཅག་འཕུར་ནུས་ན་འཕུར་དང་གསུངས། འགའ་རེས་ཁྱེད་བླ་མ་ཡིན་པས་སྔོན་ལ་འཕུར་དང་ངེད་ཅག་རྗེས་ནས་འཕུར་ཡོང་ཟེར། ཁོང་གིས་འོ་ན་ལྟོས་དང་ཞེས་གཟན་གཤོག་པ་ལྟར་བརྐྱངས་ནས་ནམ་མཁར་འཕུར་ཏེ་བྲག་མཆོག་གི་རི་རྩེར་བབས་ནས་ཕྱིར་གྲྭ་སློབ་དེ་དག་ལ་ད་ཁྱེད་ཅག་ཤོག་ཅེས་པའི་བརྡ་མཛད་དུས་དེ་དག་དད་པས་ཕྱག་འཚལ་བཞིན་ངོ་མཚར་བའི་ངང་རེ་ཞིག་ལུས། ཡང་སྔར་ལྟར་ཏུ་ཁོང་འཕུར་ཡོང་ནས་དེ་རིང་གི་དོན་དག་འདི་དག་ང་མ་ཤིའི་བར་དུ་སུ་ལའང་མ་བརྗོད་ཅེས་བཀའ་བཀྱོན་མཛད།
༢༽ རྟུག་རུལ་བྱིན་རླབས་ཇེ་ཆེ།
གནམ་ལོ་གསར་ཚེས་ཀྱི་ནང་མོ་ཞིག་ལ་ཁོང་གིས་ཇོ་མོ་ལ་དཀར་ཡོལ་གཙང་མ་ཞིག་ཁྱེར་ཤོག་དང་དངོས་པོ་རྩ་ཆེན་ཞིག་ལེན་རྒྱུ་ཡིན་གསུངས། དཀར་ཡོལ་རྐུབ་ཏུ་བཅུགས་ནས་ཡུན་རིང་པོར་ཨུ་སྐོར་བྱས་ནས་རྟུག་རིལ་ཞིག་བཏང་། དེ་ཁོང་གི་ཁྱིམ་མི་རྣམས་ལ་ཟོ་དང་གསུངས་ཡང་སུས་མ་ཟོས།དེ་ནས་ལོ་སར་ལ་ཡོང་མཁན་རེ་རེ་བཞིན་ལ་དེ་ལྟར་གསུངས་ཀྱང་སུ་ཡིས་ཀྱང་ཟ་མ་འདོད་པར་ལུས། ཅུང་ཟད་འགོར་རྗེས་སྐབས་དེ་དུས་ན་གཡུ་རྔོག་ཚོ་བར་ཆེས་དབུལ་བའི་མི་ཞིག་ཡོད་པ་དེ་ཡང་ལོ་སར་ལ་ཐོན། ཁོས་རྟུག་རིལ་དེ་བྱིན་རླབས་སུ་བསམ་ནས་ཅུང་ཟད་ཀྱང་མ་ལུས་པར་ཟོས་ནས་དཀར་ཡོལ་ངོ་གཙང་སང་ངེར་བཞག བླ་མས་ཀྱང་མི་ཧ་ཅང་བསོད་ནམས་ཆེན་པོ་ཅན་ཞིག་རེད་ཅེས་གསུངས་ཀྱང་སུས་རྣ་བར་མ་སོང་མོད་རྗེས་སུ་རྒད་པོ་ཧ་ཅང་ཕྱུག་པོ་ཆགས་ནས་མཚོ་སྔོན་པོ་དང་རྨ་ཕ་རི་ཚུར་རི་མགོ་ལོགས་སོགས་ཀུན་ན་ཁོ་མི་ཤེས་པ་མེད། ད་དུང་དགོན་ཆེན་མང་པོའི་སྦྱིན་བདག་ཀྱང་བྱས་དཔེར་ན་རེབ་གོང་རོང་བོ་དགོན་ཆེན་དུ་སླེབས་ན་དུང་དང་རྒྱ་གླིང་སོགས་རོལ་མོ་དང་སྐྱབས་མགོན་ཚང་དང་གྲྭ་མངས་ཡོངས་ཀྱིས་སེར་འཕྲེང་ལ་བསྒྲིགས་ནས་བསུ་ལ་བླ་བྲང་བཀྲ་ཤིས་འཁྱིལ་དུ་འང་དེ་ལྟར་བྱེད། ཁོས་མི་གཞན་ལ་ང་ལ་བུ་གཉིས་ཡོད་གཅིག་ནི་རེབ་གོང་སྐྱབས་མགོན་དང་བླ་བྲང་འཇམ་དབྱངས་བཞད་པ་ཡིན་ཟེར། ཁོ་འདས་རྗེས་དགེ་བ་རྒྱ་ཆེན་པོ་བྱས་ལ་མཆོད་མེ་བཞག་ཤུལ་དུ་ད་ལྟའང་རྩ་མི་སྐྱེ་བར་ལུས་ཡོད།
༣༽ རྫུན་རྐུབ་བུད་པའི་གྲུབ་རྫུན།
སྐབས་ཞིག་ན་ཡུལ་ཕྱོགས་དེར་རྡོ་སོགས་ཟན་ལྟར་བརྫིས་ནས་སྐུ་གཟུགས་བྱེད་པའི་གྲུབ་ཐོབ་ཡིན་ཟེར་བའི་གང་ཟག་ཅིག་ཐོན་པས་མི་རྣམས་ཀྱིས་རང་རང་གི་ཁྱིམ་དུ་འདྲེན་པ་སོགས་མང་དུ་བྱུང་། ཉིན་ཞིག་ཁོང་གིས་ཀྱང་དད་པ་བྱེད་པ་ལྟར་་གྲུབ་ཆེན་དེ་ལྟ་བུ་ཞིག་ཡོད་ན་ངེད་ཀྱིས་ཀྱང་གདན་དྲངས་དགོས་པར་འདུག་པས་སང་ཉིན་ཁྱིམ་དུ་ཁྲི་མཐོན་པོ་ཞིག་རྒྱོབ་དང་ཁོང་གདན་འདྲེན་བྱེད་གསུངས། ཉིན་དེར་ཁོང་གིས་གྲུབ་ཆེན་དེར་ང་ལ་སྐུ་གཟུགས་སོགས་གང་ཡང་མི་མཁོ་ཡང་ས་ཟད་འདིར་ཕུར་བ་རྡེབ་བྱེད་རྡོ་ལག་ཏུ་འཛིན་བདེ་བ་ཞིག་བྱེད་རོགས་ཟེར་ནས་སྤྱན་གྱི་ལྟ་སྟངས་ཙམ་གྱིས་ཁྲི་ཐོག་ན་ཡོད་པའི་གྲུབ་རྫུན་དེ་གཅིན་སྐྱག་དབང་མེད་དུ་ཤོར་ནས་ས་ལ་ལྷུང་། ཁོང་གིས་ཟོག་པོ་དེ་ཁྲིད་ནས་གྲམ་པའི་ནང་དུ་ཕྱིན་མི་རྣམས་ལ་འདིས་ཁྱེད་ཅག་ལ་བྱིན་པའི་རྡོ་སྐུ་དག་ཁྱེར་ཤོག་གསུངས།ཀུན་གྱིས་རྡོ་སྐུ་དག་ཁྱེར་ནས་གྲམ་པ་དེར་སྤུང་རྗེས་དེ་དག་རྡོ་རང་དུ་གྱུར་ནས་སྐུ་གཅིག་ཀྱང་མེད་ལ་རྫུན་རྐུབ་ཡང་དེ་ལྟར་བུད་དོ།།
༤༽ ཇག་ཚོགས་འདུལ་བའི་རྐང་གླིང་།
ཡང་ཁོང་རི་ཁྲོད་ན་བཞུགས་དུས་ཞིག་ལ་རི་ཁྲོད་པ་འགའ་ཞིག་ཇག་ཚོགས་ཀྱིས་བཅོམ་པ་དང་མ་ཟད་སྐུ་བཀྲོངས་པ་ཡང་ཡོད། མཚན་མོ་ཞིག་ལ་ཇག་ཚོགས་དེ་ཁོང་གི་སྒྲུབ་ཕུག་ཡོད་སར་ཡོང་བའི་སྐབས་གྲྭ་བ་ཕྱི་ལ་ཕུད་པས་ཁོ་སྐྲག་ནས་བླ་མར་ཞུ་བ་བྱས། བླ་མས་རྐང་གླིང་འདི་བོས་དང་གསུང་རྗེས་གྲྭ་བས་རྐང་གླིང་ལན་ཅིག་བོས་པས་གྲགས་འགུལ་ཅི་ཡང་མེད་པར་གྱུར། ནང་མོར་གྲྭ་བས་བལྟ་སྐབས་རི་མོར་བྲིས་པའི་ལྡེབ་རིས་ཇི་བཞིན་ལ་ལ་རྟ་ཐོག་ན་ཞོན་ནས་འདུག་ཅིང་ལ་ལ་རྟ་ནས་འབབ་པ་ལ་ལས་མེ་མདའ་ལེན་པ་ལ་ལ་ཚུར་ཕུག་པར་གཅར་བཞིན་པ་སོགས་འགུལ་གྱི་ཅུང་ཟད་ཡང་མེད་པར་ལུས་འདུག བླ་མས་ཡང་བསྐྱར་རྐང་གླིང་ལན་གཅིག་འབོད་དུ་བཅུག་པས་ཁོང་ཚོ་གྱང་འགྱེལ་བ་བཞིན་གྱུར་རྗེས་སླར་བཟོད་གསོལ་ཞུས་ནས་ཕྱིན་ཆད་སྡོམ་པའི་དམ་བཅའ་མཛད་དེ་ཇག་པའི་རྒྱུ་འགྲུལ་དེ་ཡོངས་སུ་ཆད་དོ།།
༥༽ རྐང་པ་གསོ་བའི་སྨན་པ།
ཁྱིམ་ཚང་ཞིག་གི་རྒད་པོ་རྐང་བ་འཕོངས་ལ་འབྱར་ནས་འགྲོ་བ་ལྟ་ཅི་བརྐྱངས་བསྐུམ་ཙམ་ཡང་བྱེད་མི་ནུས་པར་ལོ་ཟླ་དུ་མ་འགོར། བླ་མ་དང་སྨན་པ་མང་པོར་བསྟན་ཀྱང་ཇེ་སྡུགས་སུ་གྱུར་བ་ལས་དངས་སྐྱེད་ཅི་ཡང་མ་བྱུང་། ཁོ་རང་གྲུབ་ཆེན་ཚང་ལ་མི་གུས་པས་ཡུན་རིང་དུ་ལྷགས། འོན་ཀྱང་བཟའ་མི་རྣམས་ཀྱིས་ད་ལྟ་ཁྱོད་ཁོང་གི་མདུན་ལ་སྟོན་དུ་འགྲོ་བ་དེ་བས་ཐབས་བཟང་པོ་ཅི་ཡང་མེད་ཅེས་བླ་མ་བཞུགས་སའི་ཡོ་ལོའི་མཚམས་ཁང་དུ་བསྐྱལ། གྲུབ་ཆེན་ཚང་གིས་སང་ཉིན་ལེན་དུ་ཤོག་དོ་དགོང་མི་གཅིག་ཀྱང་འདུག་མི་དགོས་གསུངས་རྗེས་ཁྱིམ་མི་རྣམས་ཡུལ་དུ་ལོག ཁོས་བྲག་ཕུག་གི་སྒོ་རྩ་ནས་ཡར་བལྟ་སྐབས་བླ་མས་ཁོ་ལ་ཅུང་ཟད་ཙམ་ཡང་མི་གཟིགས་པར་ནུབ་ཟས་གསོལ། དེར་ཁོའི་སེམས་ལ་འདིས་ངའི་ནད་དྲག་པ་ལྟ་ཅི་ནུབ་ཟས་ཀྱང་མི་སྟེར་བའི་རང་ཁྱིམ་ན་ཡོད་ན་ཅི་མ་རུང་སྙམ། བླ་མས་ཞལ་འདོན་སོགས་བཏོན་པའི་རྗེས་སུ་རྐང་པ་མར་བརྐྱང་སྟེ་གཟིམས་པ་ལྟར་བྱས་ནས་ཅུང་ཟད་འགོར་རྗེས་བྲག་ཕུག་གི་སྒོ་འགྲམ་གྱི་ནད་པ་ཡོད་སར་རྐང་པ་མར་ནས་མར་ལ་བརྐྱང་སྟེ་ཁོ་མཐོན་པོའི་གཡང་བྲག་དེ་ནས་མར་བསྒྲིལ་མགོ་བརྩམས། རྒད་པོས་ཤེད་ཡོད་ཚད་ཀྱིས་གཏད་ཀྱང་ཅི་ཡང་མ་ནུས་པར་མར་མར་རྦབ་ལ་བསྒྲིལ་ཏེ་སྡོང་བོ་ཞིག་ཡོད་པའི་རྩར་ལྷུང་བླ་མས་ཕུག་སྒོ་ནས་ཨ་རོ་ཡར་ཤོག་གསུངས་ཀྱང་ཁོས་ང་ལངས་ཙམ་བྱེད་མི་ནུས་པ་ཞིག་ཅི་ལྟར་ཡོང་ཟེར་ནས་སྡུག་སྒུར་ངང་ཅུང་ཟད་བསྡད་ཀྱང་ཁྱོད་ཀྱིས་ཚོད་ལྟ་བྱོས་དང་ཟེར་བས་ཁོ་ཡར་ལངས་ཁུལ་བྱས་པ་ན་བློ་ཡུལ་ལས་འགོངས་པ་ཞིག་ལ་ལངས་ཐུབ་པར་མ་ཟད་རྐང་པ་ཡང་སྔོན་བཞིན་དུ་འགྲོ་ནུས་པར་གྱུར།
༦༽ གསོན་ཏུ་བཅུག་པའི་བྱིས་པ།
བཟའ་མི་གཉིས་ལ་བྱིས་པ་ཞིག་ཡོད་པར་ནད་ཚབས་ཤིན་ཏུ་ལྕི་བར་གྱུར་ནས་ཅི་བྱ་གཏོལ་མེད་ངང་ཁོང་གི་མདུན་དུ་ཡོང་། བླ་མས་འོ་དེ་དྲག་དགོས་ན་ཆུ་ཡི་འོབས་སུ་ལན་གསུམ་ཆུགས་དང་ཕན་ནོ་གསུངས། མ་ཡིས་དེ་ལྟར་བྱེད་མ་ནུས་ཀྱང་ཕ་དེ་བླ་མར་ཤིན་ཏུ་དད་པས་ད་ཕལ་ཆེར་ཤི་ཚར་བ་ལྟར་གྱུར་མོད་འོན་ཀྱང་བསླུ་བ་མེད་སྙམ་ནས་ཆུ་འོག་ཏུ་བྱིས་པའི་མགོ་བཅུག དེ་ནས་ཐེངས་གཉིས་པར་བཅུག་སྐབས་ཤ་ཅུང་ཟད་འགུལ་གསུམ་པར་བཅུག་པས་ངུ་སྐད་དྲག་པོ་ཞིག་འཐེན་བཞིན་བྱིས་པ་དེ་གསོན་པར་གྱུར།
༧༽ མིག་གཉིས་དང་སྟུ་ལུ་གཉིས།
ཡང་ཁོང་ཁམས་ཕྱོགས་སུ་དཔལ་སྤྲུལ་བསྟེན་པར་ཕྱིན་ཙ་ན་དགོན་པ་ཞིག་༼ཕལ་ཆེར་རྫོགས་ཆེན་དགོན་ཡིན་ཟེར༽གི་ནང་དུ་འགྲོ་བར་མ་བཅུགས་པས་ཁོང་ཡང་དེ་རུ་ཅུང་ཟད་སོས་དལ་བའི་ཚུལ་གྱིས་སྟུ་ལུ་གཉིས་རྩི་ཤིང་གི་མགོར་བརྒྱུན་ཏེ་རེས་མོས་སུ་མཐོ་དམའ་བྱེད་བཞིན་བཞུགས། སྐབས་དེར་དཔལ་སྤྲུལ་རིན་པོ་ཆེའི་མདུན་འདུག་གྲྭ་བ་ཞིག་གི་མིག་འབྲས་གཉིས་གཅིག་མར་གནར་ཏེ་ཐང་ལ་ལྷུང་སྙམ་པ་ཞིག་བྱས་ནས་ཡང་ཅིག་ཤོས་དེ་ལྟར་རེས་མོས་སུ་བྱས་པས། དཔལ་སྤྲུལ་ཚང་གིས་ཁྱོད་ཀྱིས་སུ་ཡོང་གི་མ་བཅུག་པ་ཡིན་དྲིས་དེས་གྱོན་པ་ཧྲལ་ཧྲིལ་དུ་གྱུར་བ་ཞིག་ཡིན་ཟེར། དེ་ནས་ཁོང་གིས་བཟོད་གསོལ་མཛད་དུ་བཅུག་པས་ཁོང་རྩེ་མཚམས་བཞག་པ་ན་གྲྭ་བའི་མིག་འབྲས་ཡང་རྒྱུན་ལྡན་བཞིན་གནས་སོ།།
༨༽ ཤ་ཚོད་བཞེས་པའི་ཆོ་ག
ཡང་སྐབས་ཞིག་ན་ཁྱིམ་ཚང་ཞིག་གི་མནའ་མར་ནད་ངོས་མི་ཟིན་པ་ཞིག་བྱུང་བས་ཁོང་གདན་དྲངས། ཁྱིམ་བདག་རྒད་པོ་ གྲུབ་ཆེན་ཁོང་ལ་མི་དད་ཅིང་མ་ཟད་སྐུར་འདེབས་དང་ལོག་ལྟ་ཡང་བྱེད་པས་ཁོང་ཡང་བྱོན་མ་ཐག་ཏུ་ཕོ་བ་ཤིན་ཏུ་ལྟོགས་འདུག་པས་ཤ་ཚོད་ལས་གསུངས། མགྱོགས་པོར་ལས་ཚར་བའི་ཚོད་མ་མདུན་དུ་བཞག་པ་ཁོང་གིས་ཕྱག་རེས་མོས་ཀྱིས་ལེན་བཞིན་ཡོངས་སུ་རྫོགས་པར་བཞེས་ཏེ་བདུད་གཅོད་གསུངས་པའི་མགོ་བཙུགས། ཌཱ་དྲིལ་བསྣམས་ནས་ཡུན་རིང་པོར་གང་ཞིག་ལ་འདང་རྒྱག་པའི་ཚུལ་གྱིས་གྲྭ་པར་ཚིག་མགོར་ཅི་ཟེར་ནི་ཡིན་འདྲ་བརྗེད་འདུག་གསུངས། དེར་གྲྭ་པས་ལན་བཏབ་པ་ན་ཚིག་རྐང་དེ་གསུངས། ཡང་རྗེས་མ་དེ་མ་དྲན་པའི་ཚུལ་མཛད་པས་གྲྭ་བ་སྐྱེངས་བཞིན་དུ་འདི་ལྟར་བྱས་ན་ཀུན་གྱིས་བླ་མར་ཡོན་ཏན་དེ་ཙམ་ཡང་མེད་བསམ་ནས་རེ་དོགས་ཀྱི་ཀློང་ལ་ཚུད་བཞིན་དེ་ལྟར་ཚིག་འགའ་དྲན་གསོ་བྱས་ནས་བཏོན། ཅུང་ཟད་འགོར་རྗེས་ཁོང་གིས་དོན་གོ་ན་གཞན་ལ་དྲིས་ནས་ཅི་བྱེད་རང་གིས་ཅིག་མི་རྩོམ་ན་ཞེས་མནའ་ལྟ་བུ་ཞིག་བསྐྱལ་རྗེས། རང་གི་ཕ་མ་གཉིས་ཀྱི་མཚན་ནས་བོས་ཤིང་། ཚེ་བརྟན་བཀྲ་ཤིས་ལ་གསོལ་བ་འདེབས།། པདྨ་སྐྱིད་ཀྱིས་བྱིན་གྱིས་རློབས།། སོགས་འདོན་བཞིན་འདས་པོ་གཞན་དག་གིས་མིང་ནས་ཀྱང་རེ་རེ་བཞིན་བོས་ཏེ་གསུངས་པ་ན་རྒད་པོ་དེས་ཁོའི་ཕ་མ་འདས་པོ་གཉིས་ཀྱི་མིང་ནས་ཀྱང་ཨེ་འཛིན་བསམས་མ་ཐག་བླ་མས་ཀྱང་དེ་ལྟར་བཏོན། ཅུང་ཟད་འགོར་རྗེས་ཁོང་གི་ཁོག་པ་ཧ་ཅང་ན་བས་ཆབ་ཐོག་ལ་འགྲོ་མི་ཐུབ་པས་སྣོད་ཅིག་ཁྱེར་ཤོག་གསུངས་ཏེ། ཁོང་གི་གྱོན་པའི་འདབས་ནས་གུར་ཕུབ་པ་བཞིན་ཀུན་གྱིས་འཐེན་ཏེ་ཁོང་གིས་ཁྲག་དམར་པོ་ཞིག་འཁྲུ་བཞིན་ཅུང་ཟད་འགོར་རྗེས་འཁྲུ་མཚམས་བཞག་པ་དང་མཉམ་དུ་ནད་པ་ཡང་སངས་དྲག་ཏུ་གྱུར།
༩༽ ཡ་མཚན་ངུ་བའི་འཕོ་འདེབས།
ཉིན་ཞིག་གཞན་གྱིས་འཕོ་འདེབས་སུ་གདན་དྲངས་པ་ན་ཁོང་མི་བྱོན་སོང་ནས་གཏེར་སྟོན་ཡང་སྤྲུལ་ཚང་གདན་དྲོངས་ཟེར། མི་དེས་ཀྱང་མི་ཕམ་དགའ་བའི་བློ་གྲོས་ཚང་གདན་དྲངས་པས་དེ་རྗེས་ཁོང་ཡང་དེ་བ་ཚང་ལ་འགྲོ་རྩིས་བྱས་པས་ཡུལ་མི་དག་གིས་གཅིག་རྗེས་གཉིས་མཐུད་ཀྱིས་ཁྱོད་ཞུ་བའི་ཚེ་མ་བྱོན་ད་སོང་ན་ཁྱིམ་ཚང་དཀའ་ལས་སུ་གཏད་པ་ཡིན་པས་མ་འབྱོན་ཞེས་བསྐུལ་ཀྱང་མ་གསན་པར་བྱོན་སོང་། སྤྲུལ་སྐུའི་འཕོ་བ་གསུང་དུས་ཁོང་གིས་ངུ་བ་ལྟར་བྱས་ནས་བཞུགས་ལ་སྤྲུལ་སྐུས་ཆོ་ག་སོགས་ཚར་རྗེས་ཁོང་གིས་དེ་རིང་བླ་མས་འཕོ་བ་བཏོན་པ་དང་དོ་རྡོ་སྨྱོན་པའི་ངུ་སྐད་མེད་ན་སྡིག་ཅན་དེ་འདྲོངས་དཀའ་འདུག་གསུངས།
༡༠༽ སྔོན་མེད་གུར་གྱི་སྦྱིན་བསྲེགས།
ཡང་འདི་སྐད་བདག་གི་ཐོས་པའི་དུས་གཅིག་ན་རྨ་ཀླུང་གི་ཉེ་འདབས་རི་བོ་དགེ་ལྡན་པའི་༼ཕལ་ཆེར་ར་རྒྱ་ཡིན་སྙམ༽དགོན་པ་ཞིག་གི་སྤྲུལ་སྐུར་བསྙུན་གཞི་ལྕི་བ་ཞིག་གིས་མནར་ཏེ་རིམ་གྲོ་སོགས་ཅི་བསྒྲུབས་ཀྱང་ཕན་མ་ཐོགས། དེར་ཁོང་གདན་དྲངས་ཏེ་བླ་བྲང་གི་མཐིལ་དུ་གུར་ཞིག་ཕུབ་པའི་ནང་དུ་བཞུགས། སྤྲུལ་སྐུ་དེ་ཉིད་ན་ནས་ཅུང་ཟད་ཀྱང་འགུལ་མི་ཐུབ་པར་བཞུགས་བསྡད།ཁོང་གིས་གུར་ནང་དུ་ཡར་ལྟ་མར་ལྟ་བྱས་ནས་ཅི་འདྲའི་གུར་ལེགས་པོ་ཞིག་ང་ལ་ཡང་ནགས་ཚང་ཞིག་ཡོད་མོད་འོན་ཀྱང་ཟད་སོང་ཕྱི་ནས་བལྟས་ན་ནང་རིག་ནང་ནས་བལྟས་ན་ཕྱི་རིག་པས་ཀུན་གྱིས་ཁྲེལ་རྒོད་བྱེད་པའི་གནས་སུ་གྱུར། གལ་ཏེ་ང་ལ་འདི་འདྲའི་གུར་ཞིག་ཡོད་ན་ཤི་སོང་ཡང་མི་འགྱོད་སོགས་སྨོན་པའི་ཡུལ་དུ་བྱེད་ཅིང་བརྣབས་སེམས་ཀྱི་སྐད་ཆ་ལས་སྤྲུལ་སྐུར་བསྙུན་འདྲི་ཅི་ཡང་མེད་པར་བཞུགས། རང་མི་ཀུན་གྱིས་སེམས་ཁུར་བྱས་གཞན་མི་རྣམས་ཀྱིས་འདིའི་ཅི་ཟེར་ཡ་མཚན་དུ་གླེང་ལ་གྲྭ་བ་འགའ་རེས་ཅི་འདྲའི་ངོ་ཚ་མེད་པའི་ཧེབ་ཆེན་ཞིག་རེད་ཟེར། སྤྲུལ་སྐུའི་གསུང་འབྱོན་ཐུབ་མི་ཐུབ་ཞིག་གི་ངང་ནས་གལ་ཏེ་གྲུབ་ཆེན་ཚང་དགྱེས་ན་གུར་འདི་ཁྱེད་ལ་འབུལ་བ་ཡིན་གསུངས། ཁོང་གིས་འོ་ན་སྤྲུལ་སྐུའི་བསྙུན་གཞི་ཚབ་ཆེ་བས་མྱུར་མོར་གཟིམ་ཁང་དུ་གདན་འདྲེན་བྱོས་གལ་ཏེ་ངའི་གུར་ནང་དུ་གཤེགས་ན་བཀྲ་མི་ཤེས་པར་འདུག་ད་དུང་གུར་ནི་ཉིན་གཅིག་ལ་ཕུབ་པས་ཀྱང་ཟད་ཀྱིན་འདུག་ན་ཕུར་བ་དང་ཆོན་ཐག་གཅིག་ཀྱང་མ་ལུས་ཉར་ཚགས་ད་ལྟ་རང་བྱེད་དགོས་གསུངས། དེ་ནས་ཁོང་གིས་ཁྱེད་འདི་འདྲའི་ནང་ཆེན་༼བླ་བྲང་༽ཞིག་ལ་ཤིང་མེད་དམ་མར་མེད་དམ་དེ་བས་ན་སྦྱིན་བསྲེགས་བྱེད་སའི་ཐབས་ཁ་ཆེན་ཞིག་ལས་དགོས་གསུངས། ཁོང་ལ་ཕུལ་བའི་གུར་དེ་ལྷག་ལུས་མེད་པར་སྦྱིན་བསྲེགས་སུ་བླུག་པས་དེར་འབྲངས་པའི་བགེགས་རིགས་གནོད་བྱེད་ཀྱི་ཚོགས་ཀྱང་མ་ལུས་པ་བསྲེགས་ཟ་འབར་བའི་ཀློང་དུ་རྒྱས་བཏབས་པས་སྤྲུལ་སྐུའི་བསྙུན་གཞི་སངས་དྲག་ཏུ་གྱུར།
༡༡༽ ལོ་གཅིག་རྗེས་ཀྱི་གསེར་ཐང་།
ཡང་གོང་གི་སྤྲུལ་སྐུ་དེས་ཁོང་ལ་ནན་ཏུ་བསྐུལ་བ་ལྟར་ཁོང་གི་ཐུགས་བཞེད་བཞིན་དགོན་པ་དེར་ཉིན་འགའ་ལ་བཞུགས། ཉིན་ཞིག་སྤྲུལ་སྐུ་དེ་ཉིད་ཀྱིས་ཐང་ག་ཞིག་ཁྱེར་ཡོང་ནས་འདིར་རབ་གནས་བྱེད་དགོས་གསུངས་པས་ཁོང་གིས་བཞེས་པ་གནང་བའི་སྐབས་སུ་ཁེལ་བས་ཁོང་གི་པང་དུ་ཞལ་ཕྱེས་ཤིག་གསུངས། དེ་ལྟར་བྱས་པས་གསོལ་ཅན་ནང་གི་གྲོ་མ་མར་ཁུ་དང་བཅས་པ་ཐང་གའི་ངོར་བླུག་ནས་ཕྱིར་མཐར་ཆགས་སུ་དྲིལ་རྗེས་དེ་རིང་ནས་ལོ་གཅིག་གི་རྗེས་ཀྱི་དེ་རིང་གི་ཉིན་མོ་འདི་ལ་ཞལ་ཕྱེས་ཆོག་གསུངས། ལོ་གཅིག་གི་རྗེས་སུ་ཁོང་གི་གསུངས་བཞིན་ཞལ་ཕྱེས་པས་ཐང་ག་དེ་ནི་སྔར་ལས་ཀྱང་ལྷག་པའི་མཚར་ཞིང་མཛེས་སྡུག་ལྡན་པའི་གསེར་ཐང་ཞིག་ཏུ་གྱུར།
༡༢༽ ཐལ་སྐྱོས་བྱུགས་པའི་བླ་མ།
ཡང་སྐབས་ཞིག་ཁོང་གི་བླ་མ་དང་སློབ་མ་གཉིས་ཆར་ཡིན་པ་མི་ཕམ་དགའ་བའི་བློ་གྲོས་ཚང་གིས་རང་གི་འདུལ་སྐལ་དུ་གྱུར་བའི་རོ་ལངས་བཅུ་གསུམ་བཏུལ། དེ་རྗེས་ཡང་རོ་ལངས་གཅིག་ད་དུང་ལངས་སྙམ་པ་བྱེད་པས་ཁོང་ཡང་བསྐྱར་རོ་ལངས་དེ་འདུལ་དུ་བྱོན། ད་ཐེངས་སྔོན་དང་མི་འདྲ་བར་རོ་ལངས་ཀྱིས་བླ་མ་མནན་ཡང་བླ་མས་རོ་ལངས་མནན་ནས་སུ་རྒྱལ་སུ་ཕམ་དཀའ་བ་ལྟར་གྱུར་མོད་མཐར་བླ་མའི་རོ་ལངས་བཏུལ་ཀྱང་ཁོང་ལའང་རྨས་ཚབས་ཆེན་པོ་ཕོག དེས་རྐྱེན་བྱས་ནས་ཁོང་གི་ལུས་ཡོངས་རྫོགས་སྐྲང་ནས་ཅི་བྱ་གཏོལ་མེད་ངང་ལུས་པས་གྲུབ་ཆེན་དོ་རྡོ་ཚང་གདན་འདྲེན་པར་ཐོན། གྲུབ་ཆེན་ཚང་གིས་ཁོ་རང་དཔའ་བོ་བཅའ་རྒྱུ་དང་སྲོག་ལ་འཛེམ་རྒྱུ་གཉིས་ག་ལ་ཡོང་ང་མི་འགྲོ་ཞེས་ཨུ་ཚུགས་བྱས་སློབ་མ་རྣམས་ཀྱིས་འདི་བླ་མའི་སྲོག་ལ་ཐུག་པའི་དོན་གལ་ཆེན་ཡིན་པས་ཅིས་ཀྱང་འབྱོན་དགོས་ཟེར། ཁོང་གིས་འོ་ན་དེ་རིང་ཡོང་མི་ཐུབ་སང་ཉིན་ཡོང་དེའི་བར་ལ་ངའི་ཁྲི་ཁ་འདི་ཁོང་གི་མགུལ་དུ་སྐོན་གསུངས།
ཕྱི་ཉིན་ཉིན་གུང་གི་སྐབས་མཛོ་ཞིག་ལ་ཞོན་ནས་དགོན་པར་ཕེབས་དེ་མ་ཐག་ཏུ་ཁོང་ཐུགས་ཁྲོས་པའི་ཚུལ་གྱིས་ཐལ་ཁུང་དུ་མའི་ཐལ་ཟེའུ་ཞིག་གི་ནང་དུ་བླུགས་ནས་ཐལ་སྐྱོས་བྱས། དེ་ནས་ཁོང་གིས་དེ་ཕྱག་ཏུ་བཟུང་ནས་བླ་མའི་སྐུ་ལུས་སྐྲང་པའི་སྟེང་བགོམ་པའི་ཚུལ་གྱིས་ཐལ་སྐྱོས་བྱུགས་པས་བླ་མ་ནི་མཚོན་གྱིས་བཏང་བའི་སྨན་སྐུ་ཞིག་དང་འདྲ། ཁོང་་གིས་རོ་ལངས་མི་ཐུབ་ན་ཁྱོད་ལ་སུས་བཙན་པོས་འདུག་མ་བཅུག་པ་ཡིན་གསུངས། དེ་ནས་ཁོང་གིས་ངས་ནི་བླ་མར་རྡུང་བརྡེག་བྱས་སོ་དམ་ཉམས་ཀྱི་གྲལ་དུ་ཚུད་དོ་སོགས་གསུངས་ནས་ཐུགས་འགྱོད་པའི་ཚུལ་གྱིས་ཕྱི་ལ་བྱོན་ནས་ང་དང་མཉམ་དུ་བཤགས་པ་བྱེད་ཟེར་ནས་ཕྱི་དྲོ་དེར་ཀུན་ལ་ཕྱག་འཚལ་དུ་བཅུག་དེ་ནས་མཚན་མོའི་བར་དུ་ཡང་ཕྱག་འཚལ། དེའི་ཕྱི་ཉིན་བླ་མའི་བསྙུན་གཞི་ཀྱང་རྡུལ་འཚུབ་བཞིན་དྭངས་སོ།།
༡༣༽ ཡེ་ཤེས་པ་དང་འཇིག་རྟེན་པ།
སོ་ནག་ལྷ་བ་དབང་ལྡན་དུ་འབོད་པའི་སྐད་གྲགས་ཅན་ཞིག་བྱུང་སྐད། དེ་ནི་འཇིག་རྟེན་པའི་གཞི་བདག་སོགས་མངོན་སུམ་དུ་འཁོར་ཞིང་ཇག་དམག་གིས་ལས་གྲོགས་ཤིན་ཏུ་མྱུར་བ་ཞིག་ཡིན་ལ་ཉིན་ཞིག་གྲུབ་ཆེན་ཚང་དང་ཁོ་གཉིས་ཆོས་ཐོག་༼འབྲོག་པའི་ས་ན་གུར་ནང་དུ་ཆོས་ཀྱི་ཆོ་ག་སོགས་འདོན་པ༽གཅིག་གི་སྟེང་འཕྲད། ལྷ་བས་བླ་མར་སྐ་རགས་བསླངས་པ་ན་ཞལ་ལན་མ་སྤྲད་པས་རིམ་གྱིས་ཁ་ཤགས་ཀྱི་རྣམ་པའི་འཁོན་འཛིང་ཞིག་ཏུ་གྱུར། ལྷ་བ་ནི་ཁ་ཧ་ཅང་ཁ་བདེ་ཞིག་ཡིན་ཁོང་ཕམ་པས་ཁྱོད་ཕུ་ཟེར་བཞིན་བཞུགས། ལྷ་བས་ཁྱོད་ལ་གྲུབ་རྟགས་ཡོད་ན་འདི་སོས་པར་གྱིས་ཟེར་ནས་རང་གི་མགོ་ལ་གྲི་ཡིས་རྨ་བྱས། ཁོང་གིས་ཕྱག་གིས་བྱིལ་བྱིལ་ཙམ་བྱས་རྗེས་སོས་ཀྱང་ཁོས་ལག་གཉིས་ཀྱིས་འཐེན་ནས་སྔར་ལྟར་རྨ་བྱས་པས་ཁོང་གི་གྲུབ་པའི་མཐུས་རང་ཉིད་ཀྱིས་བྱིལ་ཀྱང་སོས་པར་གྱུར་རང་ཉིད་རང་ལ་ཡ་མཚན། དེ་ནས་ལྷ་བས་ངས་ཁྱོད་ལ་ཕྱག་གཅིག་ཨེ་འཚལ་དྲིས་ཁོང་གིས་འཚོལ་ཅིག་གསུང་པས་ཁོས་སྒུ་རུ་རུ་ལན་དུ་མར་འཚལ་ཀྱང་གྲུབ་ཆེན་ཁོང་ལ་ཅི་ཡང་མ་གནོད། དེ་རྗེས་བླ་མས་ངས་ཁྱོད་ལ་ཕྱག་གཅིག་ཨེ་འཚལ་གསུངས་ཁོས་འཚོལ་དང་ཆོག་ཟེར་ནས་འགྲེངས་ནས་བསྡད་དེར་ཁོང་གིས་ཕྱག་གཅིག་འཚལ་མ་ཐག་ལྷ་བ་དེ་སྐད་ངན་དང་བཅས་པར་འགྲིལ་སོང་ངོ་།།
༡༤༽ མཐུ་ཆེན་དང་མཐུ་ཆུང་།
གོང་དུ་བཤད་པའི་ལྷ་བ་དང་མ་མཐུན་པ་ཁོང་གི་སྤུན་བན་དེ་ཙུག་གེ་ཟེར་བ་དེས་ཐོས་ནས་ཁྱོད་ལྷ་འདྲེ་ལའང་མི་མཐུན་པ་ཞིག་ལྷ་བ་དེ་མཐུ་བོ་ཆེ་ཡིན་སྐད་འདུག་པས་ཁྱོད་ལ་ཡ་ལན་སྤྲོད་ངེས་སང་ཉིན་ནས་བཟུང་མཚམས་ལ་མི་འདུག་ན་ངས་ཁྱོད་ལ་གཏམ་མི་བསྲེ་ཞེས་མནའ་བོར།དེ་བས་ཁོང་གྲྭ་འཁོར་འགའ་དང་བཅས་མཚམས་ལ་འདུག་སར་བྱོན་ལམ་བར་ཁོང་གིས་ཀྱང་སྒྲོལ་བསྟོད་ཁོ་ན་གསུངས་ཤིང་གཞན་དག་ལ་ཡང་སྒྲོལ་བསྟོད་ཐོན་ཞེས་ཀུན་ཀྱང་སྨྲ་བ་གཞན་མེད་པར་བྱོན། ལམ་འཕྲང་ཞིག་ཏུ་ཁོང་གིས་ད་སྡོད་དང་གསུངས་ཅུང་ཟད་འགོར་རྗེས་རི་མགོ་ནས་བྲག་རྡོ་ཞིག་རྦབ་ལ་འགྲིལ་ནས་ཁོང་ཚོའི་སྔོན་ལ་ལྷུངས། དེ་ནས་ཡང་ཡར་ལ་བྱོན་སྐབས་བུ་ཧའི་ཆུ་མགོ་ཟེར་བ་དེར་ཁོང་གི་ཆིབ་རྟ་གྲྭ་བ་ཞིག་གིས་བཟུང་ཡོད་ཀྱང་ཁ་ལོ་མ་ཐུབ་པས་ཁོང་བསམ་བཞིན་དུ་ཆུ་ནང་ལ་འཕེན་པ་ལྟ་བུས་འཕོང་དཀྱིལ་སྟེ་ཆུ་འཁོར་ཞིག་གི་ནང་དུ་འཕངས། གྲྭ་བ་དག་དངང་སྐྲག་དང་བཅས་ཏེ་རྒྱུགས་ནས་ཁོང་ཆུ་འཁོར་ནང་ནས་ཡར་བླངས་པ་ན་ཁོང་གིས་ཆོས་སྐྱོང་སྲུང་མ་ར་མདར་བརྒྱུགས།།ཉ་མོའི་དྲེལ་གྱི་མཇུག་མར་ལྟོས།། ཧ་ཧ།དཔའ་བོ་ཟེར་བ་ཙི་དམར་རེད། མགུར་གསུངས་བཞིན་བཞུགས། དགོང་མོ་དེར་ལྷ་བ་དབང་ལྡན་ཟེར་བ་དེ་གཟེར་ཆེན་པོ་ཞིག་གིས་ཤི་བར་གྱུར་སོང་སྐད། ཕྱི་ཉིན་ཁོང་ལ་སྔས་མགོ་ཁྱེར་ནས་ཐོན་ཡང་ཁོང་གིས་མ་བཞེས་པར་ཁྱེད་ཀྱི་ཤི་བོ་དམྱལ་བ་རྡོ་རྗེ་གདན་ནས་སྐྱེ་འདོད་ཡོད་ན་མ་གཏོགས་རྫོང་དཀར་མ་ཎི་སར་ཁྱེར་དང་དེ་བཟང་གསུངས།
༡༥༽ བསྲུང་བ་རྡོ་རྗེའི་གུར་ཁང་།
ཡང་སྐྱ་རྡོ་ཟེར་བ་ཞིག་ལ་མཚོན་བསྲུང་དུ་རྫས་སྣ་ཚོགས་པ་ཞིག་བསྡུས་ནས་ཁོ་ལ་བྱིན་ཉིན་ཞིག་ཁོའི་དགྲ་བོ་རྣམས་ཀྱིས་ཁོ་བཟུང་ནས་གྲི་བཙུགས་བྱས་ཀྱང་མ་ཟུག་པས་ཅི་བྱ་གཏོལ་མེད་ངང་དུ་གྱུར་བས་ཁོ་ཚོས་དེ་ཁྲིད་ནས་ཆུ་འགྲམ་དུ་སོང་ནས་མིག་ལ་ཟགས་མ་འཕུར་བས་མིག་ཅིག་ལོང་བར་གྱུར། ཡང་མི་གཞན་ཞིག་གིས་ཁོ་ལ་མཚོན་བསྲུང་ཞིག་བྱིན་ཟེར་དེར་ཁོང་གིས་རུམ་དུ་ཉུག་ཉུག་བྱས་ནས་ཤིག་རྒན་ཞིག་ཁོའི་མཚོན་བསྲུང་དུ་གནང་བས་ཁོ་ཡིད་མ་ཆེས་པར་ཤིག་དེ་ར་མ་ཞིག་གི་སྟེང་དུ་འཕངས་དེ་ནས་དེའི་སྙིང་གར་གཏད་དེ་མདའ་ཅི་ཙམ་རྒྱབ་ཀྱང་མ་ཤི་བས་སླར་བཙལ་ཀྱང་མ་རྙེད། དེ་ལ་སོགས་པའི་དོན་དངོས་ཀྱི་གཏམ་རྒྱུད་མང་དུ་སྣང་ཡང་རེ་ཞིག་བཞག་གོ།
༡༦༽ སྨུག་རྒྱུའི་ཁྲོད་ཀྱི་ཞིང་ཁམས།
ཁོང་གི་མདུན་འདུག་གྲྭ་བ་ཞིག་གིས་ལན་དུ་མར་གནང་བ་ཞུས་ཀྱང་ལྷ་སར་འགྲོ་བའི་དགོངས་པ་མ་ཁྲོལ། ཡང་ནས་ཡང་དུ་ཞུས་པས་འོ་ན་ཅིས་ཀྱང་འགྲོ་ན་ཁྱོད་གཅིག་པུར་སོང་ལམ་གྲོགས་ཡོད་མི་ཆོག་གསུངས། དེ་ནས་ཁོ་ལྷ་སར་འགྲོ་བའི་ལམ་བར་དུ་གྲྭ་རྐྱང་ཞིག་དང་འཕྲད་པས་ཡུན་རིང་སུན་དྲགས་པས་བླ་མའི་ཞལ་གསུང་བརྗེད་ནས་མཉམ་པོར་ཕྱིན་འོན་ཀྱང་མི་རིང་བར་གྲྭ་བ་དེ་་ནད་ཞིག་གིས་གློ་བུར་ཚེ་ལས་འདས། ཁོ་བྱ་ཐབས་ཟད་ནས་དུར་བཏབ་རྗེས་མུ་མཐུད་ནས་ལྷ་སར་སོང་། མཇལ་སྐོར་སོགས་ཡོངས་རྫོགས་གྲུབ་རྗེས་སླར་སྔོན་ཆད་ཀྱི་ས་དེེར་ལྷགས་པ་ན་གྲྭ་བ་དེ་རོ་ལངས་བརྒྱབ་ནས་ཁོར་བསྒུག་ནས་བསྡད་འདུག ཁྲེལ་མེད་ཁྱོད་ཀྱིས་ལྷ་སར་མི་འཁྲིད་ཟེར་བཞིན་རྗེས་སུ་ཡོང་པས་ཁོ་སྐྲག་སྟེ་ཕྱི་ལམ་བརྒྱུད་ནས་བྲོས། རོ་ལངས་དང་བྲོས་འདེད་བྱེད་བཞིན་ཉི་ནུབ་བར་བརྒྱུགས་བཞིན་གསོལ་བ་བཏབ་ཉག་ཁའི་ཕར་ནང་ལ་བལྟས་པ་ན་སྒར་ཆེན་པོ་ཞིག་འདུག་པ་དེར་གཏད་ནས་བརྒྱུགས་སྦྲ་གུར་དང་པོའི་ནང་དུ་འཛུལ་མ་ཐག་མཆོད་ཁྲི་ཞིག་གི་སྟེང་ན་པོ་ཏི་ཆུང་བ་ཞིག་བཞག་པ་ཚམ་ཚོམ་མེད་པར་བླང་ནས་ཁ་ཕྱིར་འཁོར་བ་ན་རོ་ལངས་དེ་ཡང་སྒོར་ཐོན་འདུག་དེ་ནས་ཁོ་སྐྲག་ཞོར་འདར་ཞོར་ལ་པོ་ཏིས་རོ་ལངས་ལ་བརྒྱབ་པ་ན་རོ་ལངས་ཀྱང་འགྱེལ་སོང་། དེ་ནས་ཁོ་ཅུང་ལྷོད་པོར་གྱུར་ནས་སྦྲ་ནག་ཞིག་གི་ནང་དུ་འཛུལ་བ་ན་བུད་མེད་ཅིག་གིས་ཁོ་ལ་ཤ་དང་རྩམ་པ་སོགས་ཟས་རིགས་མང་དུ་བྱིན་དེ་ནས་ཞོ་འཐུང་ཞོར་དུ་གཉིད་ལ་ཡུར།སང་ཉིན་སད་དུས་ན་ས་སྟོང་ཞིག་ཏུ་ལྷག་འདུག་པས་ཡ་མཚན་པར་གྱུར་ནས་ཕྱིར་རང་ཡུལ་བསྙེགས། ཉི་མ་དེར་གྲུབ་ཆེན་དོ་རྡོ་ཚང་གིས་གྲྭ་བ་དག་ལ་གུར་འདི་ནས་ཕུབ་དང་ཡང་དེ་ནས་ཕུབ་གསུངས་ནས་ཐེངས་མང་པོ་དེ་ལྟར་བྱས། ཁོ་ཕྱིར་ཐོན་རྗེས་སྐད་ཆ་ཚིག་གཅིག་ཀྱང་བཤད་ལོང་མེད་པར་གྲུབ་ཆེན་ཚང་གི་པང་དུ་མགོ་བཞག་ནས་ངུས་བླ་མས་བུ་ཆུང་འདི་སྐྲག་སོང་ན་འུ་ཚང་གི་ཇོ་མོ་ཡང་མི་ཤེས་ཀི་གསུངས། ཡིན་པ་ལ་སྦྲ་གུར་ནང་གི་ཁོ་ལ་ཟས་སྟེར་མཁན་དེ་གྲུབ་ཆེན་ཁོང་ཚང་གི་ཇོ་མོ་དེ་ཡིན་འདུག
༡༧༽ ཇག་པ་ལྷར་མཐོང་བ།
ཡང་དུས་ཕྱིས་སུ་ལྷག་མེད་འཇའ་ལུས་སུ་གྲུབ་པའི་རིག་འཛིན་ཆེན་པོ་ཀརྨ་ལྷུན་གྲུབ་རིག་འཛིན་ཞེས་པའམ་ཡོངས་གྲགས་སུ་མགར་རྩེའི་མཚམས་རྒན་སུ་འབོད་པའི་དམ་པ་གང་ཡང་སྔོན་མར་ཇག་པ་ཞིག་ཡིན་ལ་སྐབས་ཞིག་གྲུབ་ཆེན་ཚང་གིས་མཐོང་ནས་སྒོམ་ཆེན་པ་གངས་ཀྱི་སེངྒེ་ལྟ་བུ་བྱི་ལུ་འདི་ལྟ་བུ་མིན་ན་ངས་ཅང་མི་ཤེས་གསུངས། རྗེས་སུ་ཁོང་གིས་ཇི་བཞིན་གཟིགས་པ་ལྟར་དུ་དོན་དངོས་སུ་བྱུང་བ་ནི་ཀུན་ལ་གསལ་བའོ།།
འདི་ལྟའི་དམ་པ་ཁོང་གི་རྣམ་ཐར་གྱི་སྐོར་མང་པོ་ཞིག་ངག་རྒྱུན་ན་ལུས་པ་དེ་དག་ལས་མདོར་བསྡུས་ཙམ་ཞིག་བྲིས་པ་ཡིན་ནོ།།
གསུམ་མཐའ་མར་དགེ་བ་གཟུགས་སྐུ་དབྱིངས་སུ་བསྡུས་པའི་མཛད་པ་བསྟན་པ།
ཁོང་དགུང་གྲངས་བརྒྱད་ཅུ་གྱ་གཉིས་སུ་བཞུགས་ལ་མཐར་བོད་རབ་བྱུང་བཅུ་དྲུག་པའི་ཤིང་སྟག་ལོ་སྟེ་ཕྱི་ལོ་༡༩༡༤ལོར་གཟུགས་སྐུའི་བཀོད་པ་རེ་ཞིག་དབྱིངས་སུ་བསྡུས།
སློབ་མ་ནི་སྐབས་དེར་མདོ་སྨད་རྩེ་གཞུང་གི་ཕྱོགས་སུ་མཛད་ཕྲིན་ཆེ་བའི་གཏེར་སྟོན་མི་ཕམ་དགའ་བའི་བློ་གྲོས་ཀྱིས་མཚོན་པའི་སྐབས་དེ་དུས་ན་ཡོད་པའི་མདོ་སྨད་ཕྱོགས་ཀྱི་བསྟན་འཛིན་ཆེ་རྒུ་དག་དང་ཡུལ་དཔོན་ཕལ་མོ་ཆེ་སྐྱ་སེར་རིས་མེད་ཀྱི་ཚོགས་མང་པོ་ཞིག་ཁོང་གི་སློབ་མར་གྱུར་བའོ།།
བརྟུལ་ཞུགས་སྤྱོད་པ་མཆོག་གྱུར་ནག་པོ་བ།།
སླར་ཡང་གངས་རིའི་ལྗོངས་ན་གྲུབ་སྨྱོན་ཟོལ།།
མཚན་གྱི་སྙན་པའི་གཡུ་འབྲུག་ལྷ་ལམ་ནས།།
གྲགས་པའི་མགོན་དེ་སླར་ཡང་སྙིང་ནས་དྲན།།
ཚུར་མཐོང་བློ་ལས་འདས་པའི་ཡེ་ཤེས་ཀྱི།།
གསང་བ་ཆེན་པོའི་དོན་ལ་དགྱེས་རོལ་བས།།
སྣང་ཞེན་མ་དག་འགྲོ་བའི་ཁམས་འདིར་ཡང་།།
ཀུན་ལས་ཁྱད་འཕགས་གྲུབ་པའི་མཛད་སྤྱོད་བསྟན།།
ཨེ་མ་ཨེ་མ་བརྒྱུད་གསུམ་ཐུགས་རྗེའི་མགོན།།
རིག་འཛིན་བླ་མ་མཆོག་གི་སྐུར་བཞེངས་པའི།།
ཡེ་ཤེས་སྒྱུ་མའི་སྐུ་ཅན་སྐྱེ་འཆི་བྲལ།།
དེ་བཞིན་གཤེགས་ལ་ཡིད་རབ་ཅིས་མི་གུས།།
སྔོན་བྱོན་མེས་པོ་བརྒྱུད་ཟམ་མ་ཆད་པའི།།
མཁའ་ལྡིང་ཁྱུང་གི་ཁྱུ་ཚོགས་འདི་མཐོང་བས།།
ཡིད་ཀྱི་ཁྱེའུ་ཆུང་གར་ལ་བྲེལ་བ་ཡིས།།
རྣམ་ཐར་འདི་ཙམ་ཀུན་དགའི་སྐྱེས་སུ་འབུལ།།
ཕ་མེས་རིག་འཛིན་བརྒྱུད་པའི་ཁྲོད་ན་ཡོངས་གྲགས་སུ་གྲུབ་ཆེན་དོ་རྡོ་ཚང་ཞེས་འབོད་པའི་དམ་པ་གང་གི་རྣམ་པར་ཐར་བ་ཉུང་ངུ་འདི་ཁོང་སྐུ་འཁྲུངས་ནས་ལོ་བརྒྱ་དང་བརྒྱད་ཅུ་ལོན་པའི་ཕྱི་ལོ་༢༠༡༢ལོར་ཀླུ་སྨྱོན་ཁྲག་འཐུང་གླིང་བས་བསྐུལ་ངོར་གསེར་ལྗོངས་བླ་མ་རུང་དུ་གཡུ་རྔོག་པ་ཚུལ་ཁྲིམས་རྣམ་རྒྱལ་གྱིས་བྲིས་པ་དགེ།
ཞུ་དག་དང་ཚིག་གི་སྡེབ་སྦྱོར་ལེགས་པོ་བྱེད་ཁོམ་མ་བྱུང་བས་ཉིད་ཀྱིས་བཅོས་རོགས་ཞུ། དུས་བཟང་ཚེས་བཅུ་ལ་ཕུལ་བའོ།།
སྙན་མོ་འདུག སྒྲུང་མང་པོ་ཞིག་སྔོན་བོད་ན་ཡོད་དུས་ཐོས་མྱོང་ཡོད།
ཨ་མདོ་རེབ་གོང་རྩེ་ཁོག་རྫོང་། རེབ་གོང་གཉན་སྡེ་ཁ་གསུམ་ཞེས་མདོ་སྨད་སོག་ཡུལ་ཚུན་ཆོད་དུ་མཚན་ཙམ་གོ་ཡང་འཇིགས་ཟིང་བྱེད་པའི་སྔགས་སྡེ་ལ། མཐུ་སྟོབས་ནུས་པའི་དབང་ཕྱུག་རིམ་པར་བྱོན་པ་ལས་མ་མོ་རྦོད་གཏོང་གི་བཀའ་བབ་གཡུ་རྔོག་གཉན་སྡེ་རེད། རེབ་ཀོང་སྔགས་མང་ལོ་རྒྱུས་སུ་གསལ། ད་རེས་གསེར་རྟ་བླ་རུང་གི་གཡུ་རྔོག་རྫོང་སྔོན་གདུང་སྲས་ཚུལ་ཁྲིམས་རྣམ་རྒྱལ་མཆོག་གིས་གཡུ་རྔོག་གྲུབ་ཆེན་དོ་དོ་ཚང་གི་རྣམ་པར་ཐར་བ་བརྗོད་པ་ཤིན་ཏུ་ལེགས། །གཡུ་རྔོག་གཉན་སྡེར་ད་དུང་ཡང་ཕཊ་སྒྲ་བསྒྲགས་ན་སྙིང་རྩ་འགས་ཚུལ། རལ་བ་བསིག་ན་མེ་རྟག་འབར་བ། ཟོར་ཁྱིམ་མདུན་ནས་སེར་བ་འབེབ་པ། །གཏོར་མ་བརྡབ་ན་གློག་མར་འཁྱུགས་པ། ཡ་གི་དཔོན་མཐུ་ཆེ་ཚུལ། མ་གིའི་མ་བཀའ་གཉན་ཚུལ་སོགས་ཀྱི་ལོ་རྒྱུས་མང་། མདོ་ཁམས་སྨད་ན་ད་ལྟ་སྔགས་ནུས་སྟོན་བྱས་ན། ཁ་ཡོད་ལག་ཡོད་ཅུང་ཟད་རེ་སྟོན་རྒྱུ་ཡོད་མཁན་གཡུ་རྔོག་དང་མག་གསར་གཉིས་ཡིན་སྲིད་སྙམ།
སྔགས་ཀྱིས་མཐུ་དང་ནུས་སྟོབས་སྟོན་རྒྱུ་ཡོད་ན་དེང་སང་གུང་བྲན་ཏང་ལ་ཅིག་སྟོན་དགོས་ངེས་རེད་མི་འདུག་གམ། འོབ་ཤོབ་དེ་འདྲ་བོད་པའི་སེར་མོ་བའི་ལོ་རྒྱུས་ནང་མང་དྲགས་ལས་མི་འདུག་དྲན།
དངོས་གནས་བྱས་ན་གསེར་རྟ་བླ་རུང་བཤིགས་མཁན་གྱི་གཏེ་བོ་ཚོར་རྟགས་ཤིག་སྟོན་དགོས་ཀྱི་འདུག དེང་དུས་གཡུ་རྔོག་ན་སྔགས་ནུས་ཅན་སུ་ཡོད་དམ། ཨ་ལགས་དོ་རྡོ་ཚང་གི་སྤྲུལ་སྐུ་རྩོམ་པ་པོ་གྲགས་ཅན་ཀླུ་སྨྱོན་ཧེ་རུ་ཀ་རེད། ཁོང་ནི་སྙན་ངག་ལ་དབུ་འཁོར་ནས་སྔགས་ནུས་ཅང་ཡོད་དམ། ཧ་ཧ་ཀུ་རེ་ཡིན་ད། མག་སར་ཟེར་ན་སུ་རེད། །
སྔགས་རྒན་དེ་འདྲ་ཡོད་པ་གོ་ཐོས་བྱུང་། འུར་སྟོད་ཆེ་དྲག་ནས་ཆ་ཚང་ལྟ་འདོད་མ་བྱུང་།