རྫ་ཚེ་རིང་བཀྲ་ཤིས།
ཉིན་འདི་གར་འགྲོ་མགོན་བཀའ་བརྒྱུད་པའི་བསྟན་པའི་རྩ་ལག་གལ་ཆེ་གྲས། མཁས་བཙུན་བཟང་གསུམ་ཆ་མཉམ་གྱི་ཡོན་ཏན་བརྒྱ་ཆ་ལོངས་ངེས་ཅན་ཞིག་དགོང་ལོ་དེ་ཙམ་མིན་པའི་ཐོག་ནས་སྐུ་གཤེགས་པ་ནི་༧སྐྱབས་རྗེ་རྡོ་རྫོང་རིན་པོ་ཆེ་ལགས་ཤིང་། ཁོང་ནི་འབྲུག་ཁམས་སྤྲུལ་སྐུ་གོང་མ་དང་། ༧སྐྱབས་རྗེ་དིལ་མགོ་མཁྱེན་བརྩེ་སོགས་ཀྱི་ཞལ་སློབ་ཏུ་བཞུགས་ཤིང་། མདོ་སྔགས་སྤྱི་དང་གསང་བ་སྙིང་པོ་སོགས་ལ་མཁྱེན་པ་ཆེ་བར་གྲགས། ༧གོང་ས་མཆོག་དང་ཡང་དམ་ཚིག་ལ་རྒྱ་ཧ་ཅང་བརྟན་པར་མ་ཟད། གོ་ཐོས་ལྟར་ན་བཞུགས་སྒར་དང་ཁད་ཉེར་ཡོད་པའི་གདན་ས་གསར་པ་བྱང་ཆུབ་ལྗོངས་ཡང་༧གོང་ས་མཆོག་གིས་བཀའ་གནང་རྗེས་འབྲེལ་གྱིས་གསར་འདེབས་གནང་བར་གྲགས་ཤིང་། དགོན་པ་དབུ་འབྱེད་མཛད་སྒོར་ཡང་༧གོང་ས་སྐྱབས་མགོན་ཆེན་པོ་མཆོག་དང་༧རྒྱལ་དབང་ཀརྨ་པ། འབྲུག་ཁམས་སྤྲུལ་རིན་པོ་ཆེ། ༧སྐྱབས་རྗེ་རྫོང་སར་མཁྱེན་བརྩེ་སོགས་སྟབས་གཅིག་ཕེབས་པ་དང་། ༧གོང་ས་མཆོག་གིས་ཀྱང་རིན་པོ་ཆེའི་གདན་ས་གསར་པའི་དགོངས་བཞེད་སོགས་ལ་ཡོངས་གྲགས་བསྔགས་བརྗོད་ཆེན་པོ་མཛད།
ད་ཐེངས་ཁོང་ཐའེ་ཝན་དུ་སྨན་བཅོས་ཆེད་ཛ་དྲགས་ཆེད་ཕེབས་གནང་ཡང་མ་ཕན་པར་སྐུ་གཤེགས་ཡོད་པ་དང་། དེ་མ་ཐག་འབྲུག་པ་བཀར་བརྒྱུད་ཀྱི་བསྟན་པའི་བདག་པོ་༧རྒྱལ་དབང་འབྲུག་ཆེན་པ་དང་། ཁོང་ཉིད་ཀྱི་ཐུགས་སྲས་ཐུ་བོ་སྐྱབས་རྗེ་འབྲུག་ཁམས་སྤྲུལ་ཡང་སྲིད་རིན་པོ་ཆེ་སོགས་ཀྱིས་མྱ་ངན་གུས་འདུད་དང་། ཡང་སྲིད་མྱུར་འབྱོན་སོགས་ཀྱི་གསུང་འཕྲིན་ཡོངས་ཁྱབ་ཏུ་བསྩལ། ཁྱད་པར་༧རྒྱལ་དབང་༧ཀརྨ་པ་ཨོ་རྒྱན་ཕྲིན་ལས་རྡོ་རྗེ་མཆོག་ནས་རྡོར་གདན་བཀའ་བརྒྱུད་སྨོན་ལམ་ཚོགས་ཞུགས་ཡོངས་ཀྱི་དབུ་དྲངས་ཏེ་དམིགས་བསལ་དགོངས་རྫོགས་མཆོད་འབུལ་ཞུས་འདུག
༧སྐྱབས་རྗེ་རྡོ་རྫོང་རིན་པོ་ཆེ་ཁོང་སྔར་བདག་གི་རིགས་ཀྱི་བདག་པོ་ཨ་རིག་མཁན་ཆེན་པདྨ་ཚེ་དབང་མཆོག་འཕགས་ཡུལ་དུ་ཕེབས་སྐབས་ཀྱང་ཕན་ཚུན་དགྱེས་མཇལ་གྱིས་ཞལ་མཆིད་ཞིབ་ཏུ་མོལ་བ་སོགས་ཐོས་ཤིང་། གུས་པ་རང་ངོས་ནས་ཀྱང་། དཔལ་འཁོར་ལོ་བདེ་མཆོག་སོགས་ཀྱི་བཀའ་དབང་ཞུ་ཡུལ་གྱི་བླ་མར་གྱུར་པ་བཅས་ལགས། ཞེས་པ་འདི་ཡང་། བླ་མའི་གནས་ལ་བླ་མར་བྱེད་པར་བློ་ཅི་ནུས་སུ་སྦྱོང་མཁན་རྫ་ཚེ་རིང་བཀྲ་ཤིས་ཀྱིས་མེ་འཁོར་ནང་ནས་འགྲོ་ཞོར་བཏགས།
༢༠༡༧/༢/༡༩
མྱ་ངན་གུས་འདུད་ཞུ།
སེམས་ཁྲལ་མ་བྱེད། ངོ་མ་ཡིན་མིན་ལ་མ་ལྟོས་པར་ཡང་སྲིད་ཡིན་ཟེར་ནས་ཕྲུ་གུ་གཅིག་ཁྲི་འདོན་གནང་རྒྱུར་ཐེ་ཚོམ་མེད།