ཆང་སྐྱེས།
བདེན་ཁུངས་ཡོད་ཚད་རང་གི་ཕྱོགས་སུ་གཏུགས།།
རྫུན་གཞི་མ་ལུས་གཞན་གྱི་མགོ་ལ་བསྐོན།།
གཡོ་སྒྱུ་ཐབས་ལ་མཁས་བའི་ཆོ་འཕྲུལ་གྱིས།།
བདེན་པའི་མི་ལ་ཞ་མོ་ནག་པོ་གཡོག །
མི་གཙང་ཁ་དབུགས་རུལ་བའི་ཁོར་ཡུག་ན།།
བསླུ་བྲིད་རླུང་བུ་རྩུབ་མོ་ཕྱོགས་སུ་ལྡང་།།
རང་རིགས་རང་གིས་རླག་པའི་ངང་ཚུལ་འདིས།།
ནག་པོ་ཤ་བཟའི་ཚོགས་ལ་དགའ་བ་བྱིན།།
དགྲ་ལ་ཐུག་དུས་སྒྱིད་པ་ལྕིག་ལྕིག་འདར།།
ནང་ལ་བསྐོར་ན་མཆེ་བ་གཙིགས་ཏེ་མཆོང་།།
སྤུན་ཟླ་ནང་རྨས་བྱེད་པའི་རྟགས་མཚན་འདི།།
མི་རིགས་རླབས་ཆེན་ཡིན་པའི་དཔང་བོ་ཡིན།།
མགོ་བོ་གཞན་ལ་སྒུར་བའི་ན་ཟུག་གིས།།
ཟུར་གསུམ་དམར་ཆུང་སྙིང་གིས་འཕུར་ལྡིང་འཇགས།།
རང་མགོ་རང་གིས་གཡོག་པའི་ཨུ་ཚུགས་ཀྱིས།།
མཐུན་སྒྲིལ་གསེར་གྱི་ཨ་ལོང་ཡུན་གྱིས་ཐོར།།