འོད་ཟེར་བསྟན་འཛིན།
ནམ་རྒྱུན་རླུང་འཕྲིན་ཉན་པར་དགའ་བོ་ཡོད། ཡིན་ནའང་། སྐད་འཕྲིན་དར་ནས་དེ་ལ་རིམ་བཞིན་འགྱུར་བ་ཕྱིན། ཁ་སང་ངོ་དེབ་ལས་རྒྱ་རིགས་དགེ་བཤེས་ལྷ་རམས་པ་ཟེར་བ་ཞིག་མཐོང་བས་ཉན། ཁོང་གིས་བཀའ་མོལ་གསུང་སྟངས་ཧ་ལས་པའི་ཡག་པོ། བོད་རིག་པའི་ཚོགས་ཆེན་དུ་ཉི་ཧོང་གི་མཁས་པ་ཚོས་བོད་སྐད་ཀྱི་ལམ་ནས་རྩོམ་ཡིག་བཀླགས་པ་དང་གཏམ་བཤད་བྱས་ན། ངོ་གདོང་མ་མཐོང་པར་དུ་བོད་པ་ཞིག་མིན་བསམ་མི་སྐྱེས་པར་བཤད་པར། ངས་དེ་ཙམ་ཡིད་ཆེས་བྱས་མྱོང་མེད། དེ་རིང་རླུང་འཕྲིན་ཉན་སྐབས་བོད་པ་གཙང་མ་ཞིག་གིས་བོད་སྐད་དག་མ་ཞིག་བཤད་ཀི་འདུག་མི་བསམ་མཁན་སུ་ཞིག་ཡོད།
རྒྱ་ཡི་ལྕེ་རྩེ་ནས་བོད་སྐད་གཙང་མ་མི་ཡོང་ཟེར་བ་དང་། ལྷག་པར་དུ་ར་ཡིག་གི་སྒྲ་གདངས་མི་ཡོང་ཟེར་བ་ཁོང་གིས་རྫུན་དུ་བཏང་། ཁོང་གི་བཀའ་མོལ་གྱིས་ངའི་ཡིད་འཕྲོག་པར་མ་ཟད།ཁོང་གི་ཨ་མས་གནང་སྟངས་དེ་ལ་ང་སེམས་འགུལ་གཏིང་ནས་སྐྱེས། ཁོང་ནི་ཐེ་ཝན་དུ་སྐྱེས། ལོ་གསུམ་གྱི་སྟེང་ཕ་མ་དང་མཉམ་དུ་ཨ་རིར་གཞིས་ཆགས། སློབ་སྦྱོང་གི་མགོ་ཨ་རི་ནས་བཙུགས། ཨང་རྩིས་ལ་ཧ་ཅང་དོ་སྣང་དང་དགའ་སྣང་ཡོད་མཁན་ཞིག་དང་། སློབ་གྲྭ་ཆེན་མོ་སོགས་རྗེས་ནས་ཡག་པོ་ཞིག་ལ་འགྲོ་འདོད་ཀྱང་ཡོད་པ་རེད། དགུང་ལོ་བཅུ་གསུམ་ཐོག་ཁོའི་མི་ཚེ་ཡི་ཁ་ཕྱོགས་ལ་འགྱུར་བ་ཕྱིན། ཨ་མས་ལོ་རྟག་པར་སློབ་གྲྭའི་གུང་སེང་སྐབས་ཕ་ཡུལ་ཐེ་ཝན་ལ་གཏོང་གི་ཡོད། རང་སྐད་དང་རང་ཡིག་རང་སྲོལ་ཤེས་པའི་ཆེད་དུ་ནམ་རྒྱུན་གུང་སེང་ཚར་བ་དང་ཕྱིར་ཨ་རིར་ལོག་གི་ཡོད།
ད་ཐེངས་གཞན་དང་མི་འདྲ་བར་སློབ་གྲོགས་གཞན་རྣམས་ཕྱིར་ལོག་ཀྱང་། མཁན་པོས་ཁྱོད་བསྡད་ན་འགྲིག་གི་རེད་གསུངས་པས། ཁོང་ཅུང་ཡ་མཚན་པ་ལས་གྲྭ་བ་བྱེད་རྒྱུ་ཡིན་པ་ཁོས་ཤེས་ཀི་མེད། ཁ་ཐོར་བོད་མིས་རང་གི་བུ་ཕྲུག་སློབ་གྲྭའི་གུང་སེང་གི་དུས་སུ་བོད་ཁྱིམ་དུ་བོད་སྐད་བོད་ཡིག་གི་ཆེད་དུ་གཏོང་བ་བཞིན། ཁོའི་ཨ་མས་ཀྱང་ཁོང་ཐེ་ཝན་ནང་པའི་དགོན་པ་ཞིག་ལ་བཏང་། དགོན་སྲོལ་ལྟར་ལོ་ཕྱེད་ལྷག་ལ་གྲྭ་བ་བྱས་ན་ཡོང་མིན་ལྟ་བའི་ཆེད་ཀུན་སྤྱོད་དང་བསམ་བློ་གཏོང་སྟངས་སོགས་ལ་མཁན་པོས་དོ་སྣང་བྱེད་པ་རེད། སྐབས་དེ་དུས་ཁོས་རྒྱ་སྐད་བཤད་ཤེས་པ་ལས་ཀློག་འབྲི་ཤེས་ཀི་མེད་པས། ལོ་གསུམ་ལྷག་ལ་དགོན་པ་དེར་ཁོས་རྒྱ་ཡིག་སྦྱངས།
དེའི་རྗེས་སུ་ད་དུང་ཚར་མེད། ཁོང་མ་བུ་གཉིས་ཀྱི་གཉེན་ཚན་རྣམས་ཀྱིས་ཁོང་མ་བུ་གཉིས་སྨྱོས་འདུག་བསམ་མྱོང་པ་རེད། མི་རྣམས་ཀྱིས་མི་ཡུལ་གྱི་ལྷ་ཡུལ།རང་དབང་དང་སློབ་གསོའི་དག་ཞིང་ནས་མ་བསྡད་པར། ཨ་མ་ཕྱིར་ཐེ་ཝན་གྱི་དགོན་པ་ཞིག་ཏུ་ལོག་པ་དང་། བུ་ཐེ་ཝན་ནས་ཀྱང་མ་བཞག་པར་རྒྱ་གར་ལྷོ་ཕྱོགས་འབྲས་སྤུངས་ར་སྟོད་གྲྭ་ཚང་ལ་སྐྱེལ་བ་རེད། སྨྱོས་འདུག་གེ་མི་འདུག ཚ་བ་དང་འཚོ་བ་སྒྲིག་ལམ་བསམ་ན་བུ་ངན་ཞིག་ཡིན་ན་སྙིང་འདར་ས། ལས་མེད་ཞིག་ཡིན་ན་སེམས་མི་འཁོར་ས།
ཁོས་ལྷག་པར་དུ་བྱ་ཤ་ཉ་ཤ་ཕག་ཤ་རྒྱ་མཚོའི་ཟས་རིགས་རྣམས་བརྗེད་ཐུབ་ཀི་རེད་པས། ཅིའི་ཕྱིར་ཁོང་གིས་དེ་རྣམས་མ་དྲན་པར་ཟླ་གཅིག་གི་ནང་ལ་མོག་མོག་ཐེངས་གཅིག་ཟ་རྒྱུ་ཡོད་པ་དེ་ལ་དགའ་ཐག་ཆོད་ནས། ཐེ་ཝན་གྱི་འཚོ་བ་དྲན་མེད་ལ། ཨ་རིའི་འཚོ་བ་དེ་བས་ཀྱང་མ་དྲན་པར། ལོ་ངོ་ཉི་ཤུ་ལྷག་ལ་གཞུང་བཀའ་པོད་ལྔ་ལ་བསླབས་པ་ཙམ་དུ་མ་ཟད། དགེ་ལུགས་རྒྱུགས་སྤྲོད་ཆེན་མོ་ཞེས་ལོ་ཡུན་རིང་ལ་སྐད་གྲགས་ཆེ་བའི་བརྒྱུད་རིམ་ནང་། ཨང་རིམ་གསུམ་པ་བཞི་བ་ལྔ་བ་ལས་མ་ཟགས་པར།
ད་ལོ་ཁོང་གིས་༧རྒྱལ་བ་དགེ་འདུན་རྒྱ་མཚོས་སླར་གསོ་མཛད་པའི་སྨོན་ལམ་ཆེན་མོའི་གྲྭ་སྐོར་བ་མཛད། ༧རྒྱལ་མཆོག་ལྔ་བ་ཆེན་པོས་སྲོལ་བཟང་བཙུགས་པའི་གདུགས་དཀར་པོའི་འོག་གི་ལྷ་རམས་དམ་བཅའ་བཞག། ལོ་རྒྱུས་ཐོག་ནས་རྒྱ་བོད་མི་རིགས་བར་ན་མེད་པ་ཞིག་ཁོང་གིས་ཁ་སྐོང་པ། རྒྱ་བོད་མི་རིགས་བར་གྱི་ལོ་རྒྱུས་གསར་བ་ཞིག་མགོ་བརྩམས་པ། ད་ལྟ་རླུང་འཕྲིན་ལ་ཁ་བརྡ་བྱེད་སྐབས་ཁོང་རྒྱ་གར་་ལྷོ་ཕྱོགས་རྒྱུད་སྨད་གྲྭ་ཚང་ན་སྔགས་ཕྱོགས་ལ་ཐོས་བསམ་བྱེད་བཞིན་བཞུགས།
ཡང་ཅིག་བཤད་ན། ཁོང་གི་ཨ་མ་ནི་འཕགས་པ་ཐོགད་མེད་སྐུ་མཆེད་ཀྱི་ཨ་མས་བུ་གཉིས་ཆོས་ཀྱི་ཆེད་དུ་བསྐྱངས་པ་དང་ཕྱོགས་སོ་སོར་བཏང་པ་ལྟར། དགེ་བཤེས་ཐུབ་བསྟན་ཆོས་གྲགས་ལགས་ཀྱི་ཨ་མས་ཀྱང་རང་གི་བུ་ཆོས་དང་རིག་གཞུང་གི་ཆེད་དུ་རང་ཡུལ་ཐེ་ཝན་ལ་བཏང་། དེས་ཀྱང་འདོད་པ་མ་ཁེངས་བར་དཔལ་ན་ལེནྡྲ་ནས་བྱུང་པའི་ཆོས་རྒྱུད་དྲི་མེད་པ་གང་ན་ལྷག་ཡོད་པའི་གནས་དེར་ཐེ་ཚོམ་མེད་པར་ལེན་དུ་བཏང་པ་འདི། ཇི་ཙམ་བསམ་ན་དེ་ཙམ་གྱིས་རླབས་ཆེན་ཞིག
བུ་ཡིས་རིན་པོ་ཆེ་ཚང་གི་རྒྱ་སྐད་གསུང་སྒྱུར་བྱེད་པ་སོགས་ཨ་མ་འདིའི་སེམས་ན་ཅི་འདྲའི་དགའ་སྣང་ཞིག་དང་ཅི་འདྲའི་སྤོབས་པ་ཞིག་མོའི་བུ་ལ། ཁོང་གིསཐེ་ཝན་དང་སྐམ་ས་ཆེན་མོའི་རྒྱ་རིགས་མི་ཉུང་བ་ཞིག་ལ་ནང་ཆོས་བསླབས་ནས་ཀུན་གྱིས་ཡིད་སེམས་འཕྲོག་ཡོད་པ་མ་ཟད། ཕ་མེས་ཀྱི་ནང་ཆོས་ལ་བྲོ་བ་ཡོད་པ་ཚོར་དུ་བཅུག་ཡོད།།
སྤྱིར་ང་རང་ཨེ་རླུང་སོགས་ལ་ཉན་རྒྱུ་དགའ་མཁན་ཞིག་མིན་ན་ཡང་།རྒྱ་རིགས་དགེ་བཤེས་ལྷ་རམས་པ་ཞེས་ཨེ་རླུང་ཚང་གི་ངོ་དེབ་ཐོག་འགྲོ་གི་འདུག་ཆ་ཚང་ཉན་པ་ཡིན།དགེ་བཤེས་ལྷ་རམས་པ་ཐུབ་བསྟན་ཆོས་གྲགས་ཀྱིས་མི་ཚེ་བྱུང་རིམ་དང་།ཁོས་སྙིང་སྟོབས་ཀྱི་སྦྱངས་འབྲས་ད་རུང་ཁོང་གི་བོད་སྐད་སོགས་ཀྱིས་བདག་གི་ཡིད་དབང་ཡང་འཕྲོག་སོང་ལ། ཡིད་སྨོན་ཡང་སྐྱེས་སོང་།
རྒྱརིགས་དགེ་བཤེས་དང་པོ་མཚན་ཉིད་སློབ་ཟུར་ངག་དབང་བཀྲ་ཤིས། རྒྱ་རིགས་ལྷརམས་དགེ་བཤེས་ཐོག་མ་མཚན་ཉིད་སློབ་ཟུར་བསྟན་པ་འོད་ཟེར་རེད། གཉིས་ཆ་ཐེ་ཝན་ལ་མཇལ་མྱོང།
རྒྱ་རིགས་དགེ་བཤེས་ཐོག་མ་ཁོང་དེས་ག་ལ་ཚད།
ཁྱེད་རྣམ་པ་ཚོས་བཙན་བྱོལ་གྱི་ལོ་རྒྱུས་ཁྲོད་དུ་འབྲེལ་ལམ་བྱུང་བའི་རྒྱ་རིགས་དེ་དག་མ་གཏོགས་རྒྱ་མི་རིགས་ལ་བརྩི་ཡི་མེད་ན། གནས་ཚུལ་ཐ་དད་རེད། དེ་མིན་སྔོན་མ་བོད་ཀྱི་འབྲས་སྤུངས་དགོན་པའི་གྲྭ་ཚང་ག་གེ་མོ་ཞིག་གི་དགེ་བཤེས་ལྷ་རམ་པའམ་རྒྱ་ནག་པོའི་མི་རིགས་ཀྱི་དགེ་བཤེས་ལྷ་རམས་པ། བློ་བཟང་བརྩོན་འགྲུས་ཞེས་པ(འགྲན་ཟླ་བྲལ་བའི་རྒྱ་བླ་མ)ཞིག་ཉེ་སྔོན་ཨ་རིའི་གྲོང་ཁྱེར་ལོའོ་སེ ཨེན་འཇའ་ལེ་སེ (Los Angeles)གྲོང་ཁྱེར་དུ་ཆོས་ཚོགས་ཆེན་པོ་ཞིག་བཙུགས་ནས་བཞུགས་ཡོད་པའི་སྐོར།
ཁོང་རང་ཉིད་ལ་བཅར་འདྲི་ཞུས་པའི་ངག་རྒྱུན་དེབ་ཕྲེང(རྒྱ་བླ་མ་ཞིག་གི་ངག་རྒྱུན་ལོ་རྒྱུས)ཞེས་པའི་རྒྱ་ཡིག་དཔེ་དེབ་འབྲིང་གྲས་ཤིག་བོད་ནས་དངོས་སུ་མཇལ་མྱོང་ཡོད་ལ། ལོ་ཤས་སྔོན་ཁོང་གི་ཆོས་ཚོགས་སྐོར་ཞིག་སླར་ཡང་གོ་ཐོས་བྱུང་བས། གོང་གི་དགེ་བཤེས་རྣམ་པ་གཉིས་པོ་དེ། བཙན་བྱོལ་གནས་སྐབས་ཀྱི་རྒྱ་རིགས་དགེ་བཤེས་ཐོག་མ་ཡིན་སྲིད་ཀྱང་། རྒྱ་རིགས་དགེ་བཤེས་ལྷ་རམས་པའི་ཐོག་མ་མིན་པ་གོང་ཞུས་ཀྱི་གནད་དོན་དེས་ར་སྤྲོད་གསལ་པོ་བྱེད་ཐུབ་ངེས་ཡིན་པས། ཁོང་རྣམ་གཉིས་རྒྱ་རིགས་དགེ་བཤེས་ཐོག་མ་ཡིན་མ་ཡིན་པར་སྒྲུབ་པ་ནི་ངལ་བ་དོན་མེད་དུ་ཟད་དོ་སྙམ། གཞན་ཡང་དེའི་སྔོན་ནས་ད་དུང་རྒྱ་རིགས་དགེ་བཤེས་བྱུང་ཡོད་ཤས་ཆེ་བས། དེ་དག་ཞིབ་གཟིགས་གནང་བར་ཞུ།
ལྷ་རམས་དགེ་བཤེས་ཀྱི་གཟི་བརྗིད་ཡོད་ན་མེད་ན་དེ་དགེ་ལུགས་རྒྱུགས་སྤྲོད་ཆེན་མོ་རེད།སྔོན་དུས་བོད་ནས་ལྷ་རམས་པ་ཡིན་ན་དཔེ་ཆ་མཁས་པ་ཡིན་དགོས་ཀི་མེད་པ།གང་ལྟར་གང་ཡང་སྒྲུབ་ཀི་མེད་དོ།
དགེ་བཤེས་ལྷ་རམས་ཀྱི་ཁོངས་སུ་རྒྱུགས་ལོན་པ་དང་། མི་ལོན་པ་ཚང་མ་ཆ་སྙོམས་ཀྱིས་ར་མགོ་ལ་བྲེ་གང་དང་ལུག་མགོ་ལ་ཡང་བྲེ་གང་ཞེས་འགྲོ་ས་མེད་པ་བཟོས་གནང་མཁན་ཐོག་མ་དེ། ༸རྒྱལ་མཆོག་སྐུ་ཕྲེང་བཅུ་གསུམ་པ་ཡིན་པར༸གོང་ས་མཆོག་གིས་ཡང་ནས་ཡང་དུ་གསུངས་པ་ཁྱེད་རྣམ་པས་ཀྱང་གསན་མྱོང་ཡོད་ངེས་ཡིན་པས།
དེ་ལ་ང་ཚོས་འབྲེལ་བཤད་ཇི་ལྟར་རྒྱག་དགོས་སམ།
དེར་མ་ཟད། ད་ཆ་ང་ཚོའི་བརྗོད་གཞི་ནི། རྒྱ་མི་རིགས་ཀྱི་དགེ་བཤེས་ཁྲོད་ནས་ཐོག་མ་དེ་སུ་ཡིན་མིན་དང་།
དགེ་བཤེས་ལྷ་རམས་པ་དང་པོ་དེ་སུ་ཡིན་མིན་སྐོར་ལ་སྐད་ཆ་བཤད་ཀྱི་ཡོད་པ་མ་གཏོགས། ཁོང་རྣམ་པ་ཚོ་མཁས་པ་ཡིན་དང་མིན་ཟེར་བ་དེ་སྐབས་དོན་གྱི་བརྗོད་གཞི་མ་རེད། གཅིག་བྱས་ན། དེང་དུས་ཀྱི་དགེ་ལུགས་རྒྱུགས་སྤྲོད་ཆེན་མོ་ཉིན་གཅིག་དང་། གཞུང་གཅིག་ཀྱང་བཏང་མ་མྱོང་མེད་པའི་སྔར་གྱི་དགེ་བཤེས་ལྷ་རམས་པ་ཁོང་། དེང་གི་དགེ་ལུགས་རྒྱུགས་སྤྲོད་ཆེན་མོ་བཏང་ཟིན་པའི་རྒྱའི་དགེ་བཤེས་རྣམ་པ་ལས་ལྷག་པ་ཡང་ཡོད་སྲིད་པ་ཞིག་ཡིན་པས། དེ་དག་ནི་སུས་ཀྱང་ཁ་མཚོན་གཅོད་དཀའ་བ་ཞིག་ཡིན་ལ། སྐབས་འདིའི་གླེང་གཞིའི་ཁྱབ་ནི་དེ་བས་ཀྱང་མ་ཡིན་ནོ།
སྣྲོན་ལགསོ་ཞུ།ཁྱེད་ཀྱིས་བཤད་པའི་དགེ་བཤེས་དེའི་ལོ་དུས་སོགས་གསལ་ཙམ་གསུང་རོགས
མིང་ཙམ་གྱི་ལྷ་རམས་་པ་ཞིག་མིན་ན
ནུབ་ཕྱོགས་གངས་ཕྲུག་ལགས་ཀྱིས་བཤད་པ་དེའང་གདན་ས་གསུམ་གང་རུང་གི་སློབ་གཉེར་བ་ཞིག་ཡིན་པ་མི་འདུག་ག
མི་རིགས་གཞན་གྱི་དགེ་བཤེས་དང་ལྷ་རམས་པ་མང་ཤོས་སོག་པོ་ཡིན་རྒྱུ་རེད།དེ་ཡང་དང་པོ་དང་གྲགས་ཅན་སུ་ཡིན།ཉི་ཧོང་པ་ཡོད་མེད།ད་དུང་གཞན་དང་གཞན།རྒྱ་རིགས་པོ་དང་པོ་གྲགས་ཆེ་ཤོས་
སུ་ཡིན་གསལ་བོར་ཤེས་ན་གསུང་དང་།
བཀུར་འོས་རྒན་བསྟན་འཛིན་ལགས།
ངས་ཞུས་པའི་དགེས་བཤེས་ཁོང་། ད་ཆ་ཨ་རིའི་གྲོང་ཁྱེར་ལོའོ་སའན ཇི་ལི་སེ་ལ་བཞུགས་ཡོད་རེད་ཅེས་ཞུས་ཟིན་པ་ཡིན། ཁོང་ད་ཆ་དགུང་ལོ་དགུ་བཅུ་ལྷག་ཡིན་ས་ཡོད།
ཁོང་གི་ལོ་རྒྱུས་སྐོར་ངས་སྔོན་མ་ལོ་བཅོ་ལྔ་ཙམ་གྱི་སྔོན་ལ། ཧོང་ཀོང་གི་གསར་འགོད་པ་གཉིས་ཀྱིས་ཁོང་ལ་བཅར་འདྲི་ཞུས་པའི་རྒྱ་རིགས་སྐུ་ཞབས་ཞིག་གི་ངག་རྒྱུན་ལོ་རྒྱུས༼འགྲན་ཟླ་བྲལ་བའི་རྒྱ་བླ་མ༽ཞེས་པའི་དཔེ་དེབ་འབྲིང་གྲས་ཤིག་ནས་རག་ཙམ་ཤེས་རྟོགས་བྱུང་བ་མ་གཏོགས། དེ་རྗེས་ངའི་དེབ་དེ་འདིར་སྐུར་བའི་ལམ་བར་ནས་བོར་བརླགས་སོང་སྟབས། ང་ལ་སླར་ཡང་ཁོང་གི་སྐོར་ཤེས་རྟོགས་བྱེད་པའི་ཐབས་ལམ་ཞིག་མ་རྙེད།
དེབ་དེའི་རིགས་རྗེས་སུ་ངས་བཙལ་ཚོལ་མང་པོ་བྱས་ཀྱང་ལག་ཏུ་འབྱོར་མ་བྱུང་བས་ཞིབ་ཕྲ་གསལ་པོ་དྲན་གྱི་མི་འདུག་ལགས། གཅིག་བྱས་ན། ཧོང་ཀོང་དང་ཐའི་དབེན་གྱི་དེབ་ཁང་ཁག་ལ་ཡོད་ཤས་ཆེ།
བོད་ཀྱི་རྒྱལ་ས་ལྷ་སའི་དེབ་ཁང་ཁག་ནས་དེབ་དེ་ཕྱིར་བསྡུ་བྱས་ཡོད་ཚོད་འདུག
གང་ཡིན་ཟེར་ན། དེའི་ནང་ཆབ་སྲིད་ཀྱི་འཕོ་འགྱུར་དང་གནད་འགག་འགའ་ཞིག་ཀྱང་བྲིས་འདུག་པས།
དེའི་རྐྱེན་གྱིས་མིན་ནམ་སྙམ།
དགེ་བཤེས་ཞེས་བཅོས་རོགས་གནང་།
དགེ་བཤེས་ཁོང་རྒྱ་མི་རེད་མི་འདུག་ག ཐེ་ཝན་གྱི་མི་ལ་རྒྱ་མི་ཞེས་བརྗོད་ན་ཕལ་ཆེ་བ་རླུང་ལང་གི་རེད།
བཀུར་འོས་སྐུ་ཞབས་འཇོན་ལགས།
རེད། རེད། རེད། ཁྱེད་ཀྱིས་གསུངས་པ་བདེན་པ་རེད། ཡིནའང་མཐར་གཏུགས་ན། ཁོང་གི་མི་རིགས་དེ་ག་རེ་ཡིན་མིན་ཁྱེད་ཀྱི་མཁྱེན་ནམ།