དབྲ་རྩོམ་སྤྱི་མགྲིན་ནས།
ཨོཾ་བདེན་པ་རིན་པོ་ཆེ་རྒྱལ་བར་གྱུར་ཅིག། དེ་ཡང་དེང་རབས་སྒྱུ་རྩལ་རིག་འཕྲུལ་ལ་བེད་སྤྱོད་ལེགས་པར་གཏོང་བའི་གངས་ཅན་བོད་པའི་ཕུ་ནུ་སྤུན་ཟླ་ཡོངས་ལ་ཞུ་འབྲས། ཕུག་རྒྱང་རིང་མོའི་མདུན་ལམ་ལ་བསམ་ཞིབ་བྱས་ནས་དབྲ་ཆེན་གྱི་རུས་མཛོད་བདེན་པ་རིན་པོ་ཆེ་ཞེས་སྒྲིག་བཞིན་ཡོད། སྤྱིར་ན་ཆོས་ཕྱོགས་ནས་བཤད་ན་རིགས་རུས་ལོངས་སྤྱོད་མི་གཙོ་ཞེས་པ་འདུལ་ལུང་སོགས་ལས་ཡོངས་གྲགས་ཡིན་ན་ཡང་འཇིག་རྟེན་པའི་ལོ་རྒྱུས་རང་བཞིན་ལྡན་པར་གཞིར་བཞག་ནས་བཤད་ན་ཕ་མེས་དང་རྒྱུད་པའི་རིགས་རུས་རྩ་ཆེན་ཡིན་པ་དང་། ཕ་མེས་བཟང་པོས་བཞག་པ་བཟང་པོ་རྣམས་བུ་ཚ་ངན་པས་ལོག་སྤྱོད་དུ་མི་གཏོང་བའི་ཆེད་དང་གངས་ཅན་དབྲ་རིགས་སུ་གཏོགས་པའི་མི་གྲངས་དང་རུས་མཛོད་ལ་ཞིབ་འཇུག་བྱེད་བཞིན་ཡོད།
གཅིག ཆོས་ལུགས་པ།
ཆོས་ལུགས་ལ་རིས་མེད་ཀྱི་རྩོམ་བརྡའི་ནང་དུ་དབྲ་ཡེ་ཤུ་བ་འགའ་དང་ཁ་ཆེའི་སྒོར་ཞུགས་པའི་དེང་དུས་ཀྱི་བོད་དབྲ་རིགས་དང་། བོན་པོ་དབྲ་སྲས་འཇའ་ལུས་པ་སོགས་སྔོན་བྱོན་དང་དེང་དུས་ཀྱི་དབྲ་རིགས་དང་། སྔ་འགྱུར་བའི་མཁན་སྤྲུལ་རྣམ་པ་དང་། བཀའ་བརྒྱུད་པའི་མར་དྭགས་དང་། ཀཾ་ཚང་གི་ཀརྨ་པ་བཅུ་བཞི་པ་ཐེག་མཆོག་རྡོ་རྗེ་སོགས་དང་། འབྲི་གུང་དབྲ་སྲས་དམ་པ་དང་། འབའ་རོམ་པ་དང་། ཇོ་ནང་སྦྲ་སྲས་ཀྱི་གདུང་རབས་འཛིན་པ་དང་། ས་སྐྱ་གོང་མའི་རྒྱུད་རིམ་ཁག་འགའ་དང་། བཀའ་གདམས་གསར་རྙིང་གི་སྐྱེས་ཆེན་འགའ་སོགས་བཀོད་ཟིན། ད་དུང་མུ་འཐུད་ནས་ཚང་མས་རོགས་དན་གནང་རོགས་མཁྱེན་ནོ།
གཉིས། བསེ་ཁྱུང་སྦྲའི་སྐོར་ལ།
བསེ་ཁྱུང་སྦྲའི་སྐོར་ལ། མཐུ་ཆེ་དམ་ཚིག་མ་ཉམས་པ། ། སེ་ཁྱུང་སྦྲ་ཡི་བུ་རྒྱུད་ཡིན། ཞེས་པའི་བོད་མི་ཁྲི་དོ་ཆེན་པོའི་བུ་གཉིས་པ་ལ་དབྲ་མོ་རབ་བཀྲ་ཞེས་པའི་ས་ཆ་དེ་ཐོབ་ནས་དེའི་མངའ་ཁོངས་སུ་ཆགས་པའི་མི་རྒྱུད་ལ་སེ་ཁྱུང་སྦྲ་ཡི་རུས་རྒྱུད་ཅེས་བོད་མདོ་དབུས་ཁམས་སུ་ཁྱབ་ནས་ཁྱད་པར་དབྲ་སྲས་གླིང་མགོན་པོ་རྒྱན་མཚན་སོགས་སྟག་ཤར་དཔའ་བོ་གདུང་རྒྱུད་དྲ་ཉམས། གྲུ་མ་ཞིག་པ་མདོ་ཁམས་སྡེ་དགེའི་ཕྱོགས་སུ་ཡོད་པ་དང་། ཨ་མདོ་དང་། དབུས་གཙང་ན་ཡོད་པ་དང་། རུས་མཛོད་ལས། ཡུལ་འདི་ཞང་ཞུང་གི་ཡུལ་ཏེ། མངའ་རིས་དང་ལ་དྭགས། གཙང་སྟོད་བཅས་ལ་ཟེར། དེ་ལ་དབྱེ་བ་སེ་དང་དབྲ་ཡི་ཆེ་དྲུག་དེ། །སྟོད་ན་ཞང་ཞུང་ཁྱུང་པོ་གཉིས། །བར་ན་མར་པ་སྤུ་རང་གཉིས། །སྨད་ན་རེ་ཁེ་ཉག་ལེ་གཉིས། །ཆེ་དྲུག་མཚན་གྱི་བཙུན་དྲུག་དེ། །ཀྲི་ལ་རྨེ་ཤ་དང་རྨེ་ཚན་གཉིས། །བྲག་ཏུ་ལ་གྲུ་གུ་དང་རྡོར་ཉེ་གཉིས། །དེ་ཆེ་བཙུན་སྤེལ་མ་བཅུ་གཉིས་ཡིན།ཞེས་གསལ་བ་ལྟར། མཆེད་བཙུན་སྤེལ་མ་བཅུ་གཉིས་གྱི་ཡུལ་ནི། ཞང་ཞུང་དང༌། ཁྱུང་པོ། མར་པ། སྤུ་རངས། རེ་ཁེ། ཉག་ལེ། རྨེ་ཤ། རྨེ་ཚན། གྲུ་གུ རྡོར་ཉེ། ཁོ་པོ། ཁོ་དབྲ་བཅས་ཡིན་ཞིང༌། ཞང་ཞུང་དང་ཁྱུང་པོ། མར་པ་དང་སྤུ་རངས་རྣམས་ནི་དེང་སང་ཡང་མིང་དེ་གར་འབོད་པའི་བོད་ཡུལ་ནུབ་ཕྱོགས་ཀྱི་ས་ཁུལ་འདི་དག་དང་འབྲུག་དང་འབྲས་ལྗོངས། ལ་དྭགས་སོགས་བོད་ཁམས་སྟོད་སྨད་བར་གསུམ་ན་ཡོད་པ་ཚང་མ་ས་ཡ་གཅིག་ལྷག་ཡོད་པར་བཤད་འདུག་ཀྱང་དངོས་ཡོད་དུ་ད་ལྟ་བོད་མི་བཞི་སྟོང་ལྔ་བརྒྱ་ཉེར་ལྔ་ལས་བསྡུ་ཐུབ་མ་སོང་བས་དེ་ལུགས་ཀྱིས་གངས་ཅན་སྤུན་ཟླ་དབྲ་རིགས་སུ་གཏོགས་པ་ཡོངས་ཀྱིས་འགན་ཁུར་ཟབ་མོས་རེ་གནང་ནས་རུས་མཛོད་བདེན་པ་རིན་པོ་ཆེ་ལ་བོད་ཡིག་གི་འབྲེལ་འཇོག་ཡོད་པར་མཁྱེན་ནོ།
གསུམ་པར་ལུགས་གཉིས་མཐུན་པ།
རྗེས་སོར་ལོ་རྒྱུས་བསྒྲིགས་ཟིན་དུས་ང་དང་ཁོ་མི་འདུག་གི་རྩོད་གླེང་མེད་ཕྱིར་དུ་བརྡ་འཕྲིན་འདི་དང་གསལ་བསྒྲག་འདི་དག་བོད་ཡུལ་སྟོད་སྨད་བར་གསུམ་གྱི་དབྲ་ཡིག་ཡོངས་ལ་འབོད་སྐུལ་ཞུས་ན། ས་གནས་ཁག་ཏུ་ཞིབ་དཔྱད་བྱས་ན་ངེས་རྙེད་ཐུབ་པའི་རེ་འདོད་བྱས་ཡོད། དེ་བཞིན་དུ་གངས་ཅན་བོད་མིའི་མི་གྲངས་ས་ཡ་དྲུག་བདུན་གྱི་རྩ་བ་བོད་མིའུ་གདོང་དྲུག་གིས་སོ་སོས་དེ་བཞིན་མཛད་ན་ཕ་མེས་གཅིག་པའི་ལས་ཀ་དཀར་འཇམ་ཡུག་གཅིག་ཏུ་གནས་པར་གོར་མ་ཆགས་སོ།།
དབྲ་ཆེན་རུས་མཛོད་རྩོམ་རིག་ཚོགས་པ་སྤྱི་མགྲིན་ནས་ཕྱི་ལོ་༢༠༡༧་ཟླ་༤་པའི་ཚེས་༥་ལའོ།། །།