དུས་རབས་ཀྱི་སྟོན་པ།

ཨཱོྃ༔འབར།

 
ཕྱིན་དྲུག་ཉམས་ལེན་གྲོགས་སུ་བརྟེན་པའི་འཇིག་རྟེན་འདི་ཡི་མགོན་པོ་ཞིག །
བྱམས་དང་སྙིང་རྗེས་གདུལ་བྱ་སྐྱོང་བའི་འགྲོ་དྲུག་འདྲེན་པའི་བླ་མ་ཞིག །
ས་ལའི་ལྗོངས་འདིར་གཟི་འོད་རྒྱས་བའི་དུས་རབས་འདི་ཡི་སྟོན་པ་ཞིག །
གངས་ཕྲུག་ང་ཡི་སེམས་ལ་འཕྲོས་བའི་འོད་སྟོང་འབར་བའི་ཉི་གཞོན་ཞིག །

མི་ཁའི་རླུང་འཚུབ་ཅི་ཙམ་རྒོད་རུང་གཡོ་འགུལ་མེད་པའི་རི་རྒྱལ་ཞིག །
བོད་པ་ཚང་གི་གནའ་བོའི་རིག་གཞུང་སྲོག་ལྟར་གཅེས་བའི་སྐྱེས་ཆེན་ཞིག །
ཆོས་ལུགས་མཐུན་སྒྲིལ་གཅིག་ཏུ་སྒྲིལ་བའི་ཆོས་ལུགས་ཡོངས་ཀྱི་དབུ་ཁྲིད་ཅིག །
གངས་ཕྲུག་ང་ཡི་སེམས་ལ་འཕྲོས་བའི་འོད་སྟོང་འཕྲོས་བའི་ཉི་གཞོན་ཞིག །

དད་པའི་དམ་ཚིག་ལྷད་དུ་མེད་པའི་དག་གཙང་ཆུ་བོ་ཆེན་པོ་ཞིག །
བསླུ་བ་མེད་པའི་དཀོན་མཆོག་གསུམ་ལ་འགྱུར་བ་མེད་པའི་མི་རིགས་ཞིག །
སེམས་ཀྱི་ཕུགས་འདུན་གཅིག་ཏུ་སྒྲིལ་བའི་གངས་ཅན་པ་ཡི་སྤུན་ཟླ་ཞིག །
གངས་ཕྲུག་ང་ཡི་རེ་བའི་ཁྲོད་ནས་མཇལ་བའི་སྐལ་བ་བསྒུག་ནས་ཡོད།།

ཕྱི་ལོ། ༩།༤།༢༠༡༧། རྒྱ་གར་རྒྱལ་ས་ལྡི་ལི་ནས་བྲིས།