ཆང་རག་མ་མཆོད་རོགས།

མི་ཉག་ཀུན་དགའ་བཀྲ་ཤིས།

 
གྲོགས་པོ་ཚོ།
ཆང་རག་མ་མཆོད་རོགས།
དེ་ལ་བཟང་དྲི་གཏན་ནས་མི་བྲོ།
ཆང་རག་མཆོད་ན།
གསོན་ཡང་ལག་ལེན་གྱི་ཐོག་ནས་གཤིན་པོ་རེད།
གཤིན་པོ་ལས་ཀྱང་ལས་ངན་པའི་གསོན་པོ་རེད།
གསོན་པོའི་སྐབས་ཀྱི་གཤིན་པོ་འདི།
དུར་ས་ནང་སྦས་ཚར་བའི་ཕུང་པོ་ཞིག་དང་མི་འདྲ་ལ།
ན་དུས་སྨན་དགོས་ལ།
གྲང་དུས་གོས་དགོས།
ལྟོགས་དུས་ཟས་དགོས་ལ།
ས་རུབ་དུས་གནས་མལ་ཡང་དགོས།

གསོན་ཡང་གཤིན་པོ་ཡིན་པ་ཞིག་ལ།
མཆོད་འབུལ་ཙམ་གྱིས་སྐྱེལ་མ་བྱེད་མི་ཐུབ་པ་དང་།
གསོན་པོ་ཡིན་ལ་གཤིན་པོ་ཡིན་པ་ཞིག་གིས།
རང་ལ་བརྩེ་བ་ཡོད་པའི།
གཟའ་ཟླ།
བུ་རྒྱུད།
གཉེན་འབྲེལ།
གྲོགས་པོ་སོགས།
མཐའ་འཁོར་གྱི་གསོན་པོ་མང་པོ་ཞིག་ཀྱང་གཤིན་པོར་བསྒྱུར་འོང་།

ཆུ་ཇ་འོ་གསུམ་མཆོད་རོགས།
ཤིང་ཏོག་ཁུ་བ་མཆོད་རོགས།
ཁ་དྲོ།
ད་ཆང་རག་མ་མཆོད་རོགས།
གསོན་སྐབས་ཀྱི་གཤིན་པོ་ལས།
གསོན་པོའི་མཚན་ཉིད་ཚང་བ་ཞིག་བྱས་ན་མི་དགའ་འམ།
ཆང་རག་གིས་གསོན་པོ་གཤིན་པོ་བཟོ་ལ།
གསོན་དུས་གཤིན་པོ་ཞིག་བྱེད་པ་ནི།
བརྩེ་དུང་དང་མཐུན་སྒྲིལ་གསོད་པའི་ལག་དམར་བ་རེད།
ཐམས་ཅད་འཕྲོག་པའི་ཇག་དཔོན་རེད།
གཤིན་པོ་མ་ཡིན་པའི་གསོན་པོ་ཞིག་བྱ་འདོད་ན།
ད་ཆང་རག་མ་མཆོད་རོགས།

༢༠༡༦/༡༡/༠༣ ལ་བྲིས།།