འབའ་སྲས།
མི་རྟག་མཛེས་སྡུག་བཀྲ་བའི་མེ་ཏོག་གི །
བདེ་ཆེན་ཟེའུ་འབྲུ་ཐོར་བའི་སྐྱེད་ཚལ་ནས།།
གཡུ་སྦྲང་མགྲིན་པའི་རོལ་མོ་ཤོར་བའི་གླུ།།
ཐོས་འཛིན་མཚོ་མོའི་ཁ་ན་གྲུ་ལྟར་འགུལ།།
སྣང་བ་ཟེར་འོད་འཕྱོ་བའི་རི་རྩེ་ནས།།
འཁོར་བའི་བདེ་སྐྱིད་འཛིན་པའི་ཉི་མ་ཆེའི།།
འོད་རླབས་ས་ཡི་ལག་མཐིལ་འཕྲོས་པ་ན།།
འཚོ་བའི་མེ་ཏོག་ཏིང་འཛིན་ཚལ་དུ་བཞད།།
འཁྲུལ་བའི་སེམས་ཀྱི་མུ་ཏིག་བསྟར་བའི་ཕྲེང་།།
སྒྱུ་མའི་དར་སྐུད་བརྒྱུས་པའི་ཚོང་ར་ན།།
ཁེ་སྤོགས་མངོན་དགའ་མེད་པའི་ཚོང་དཔོན་གྱིས།།
བཅོས་མའི་འཛུམ་གྱིས་བཀྲམས་པར་རིན་གོང་ཆེ།།
རྟོག་བཏགས་ལྷ་སྒྲུང་རིང་མོའི་ཤོག་ངོས་སུ།།
རི་བོ་ཟས་སུ་འཐག་པའི་སྦྲུལ་ཆེན་གྱི།།
ངོ་མཚར་བྱུང་བ་བརྗོད་པའི་ཡི་གེ་དག །
ཡིད་ཆེས་མིག་གི་མཐའ་ན་འོད་དུ་ཆགས།།
སྤྲིན་པས་གླང་བོ་འཁུར་བའི་གྲུབ་རྟགས་ཀྱིས།།
གནམ་གྱི་ལྷ་ཆེན་ཁོག་གི་སྙིང་ཕྱུང་བའི།།
ཁྲག་དམར་ཐིགས་པས་རྒྱ་མཚོ་དམར་བྱས་པ།།
མི་ཡི་འཚོ་བའི་ཁྲོད་ན་བདུད་རྩིར་མཐོང་།།
གློ་བ་ཚལ་བར་གཤགས་པའི་རལ་གྲི་ཡིས།།
སྙིང་གི་ཕུག་པར་གཤིན་རྗེ་གཤེད་བཏབ་ཀྱང་།།
སྲེད་པའི་རྨི་ལམ་སྟུག་པའི་སྐྱེད་ཚལ་ན།།
ཆགས་པའི་མེ་ཏོག་གློ་དམར་ད་རུང་ལྡེམ།།
བྱིས་པའི་རྩེད་ར་ཤེལ་དཀར་ཟླ་བའི་ངོས།།
འཁོར་བའི་རི་བོང་ཅན་གྱི་གཟུགས་ཕབ་པས།།
གདོད་ནས་དག་པའི་དཀྱིལ་འཁོར་མེ་ལོང་ནི།།
ད་གཟོད་མུན་གནག་ར་རི་ཅན་གྱིས་གང་།།
ཚུལ་དེ་མཐོང་བས་དྲན་རིག་རྒོད་པའི་མིག །
གནམ་སའི་མཐའ་ནས་ཟུར་གྱིས་ཁ་ཕྱེས་ཏེ།།
འཁོར་བའི་གྲོང་དུ་འཕྱན་པའི་གླང་བོ་ལ།།
གློག་གི་ཞགས་པ་སྐར་མའི་མདའ་ལྟར་བཏབ།།
སྙན་ངག་ཞེ་ལ་ཆགས་པའི་ལག་པ་འདི།།
འཆར་རྟོག་སོར་མོས་སྡོད་དུ་མ་བཅུག་པས།།
རང་ཁྱིམ་ངག་རིག་བདུད་རྩི་བཞུར་བའི་ཚལ།།
ཐོལ་གྱིས་ཤོར་བའི་ཚིག་གི་མེ་ཏོག་བཀྲམས།།
༢༠༡༧/༠༤/༢༣ སྔ་དྲོར་རང་ཁྱིམ་ནས།
ཨ་རོ། ཧོན་ལོག། ཁྱོའི་འདིའི་རོ་ཆག་པོའི་དོན་ནི། གཅིག་ལ་མི་གོ་འི། ཧ་ཧ་ཧ།
མེ་ཏོག་གི་སྐྱེད་ཚལ་ནས་ཤོར་བའི་གླུ་མཚོ་མོའི་ཁ་ན་འགུལ།
སྣང་བའི་རྩེ་ནས་ཉི་འོད་ས་ལ་འཕྲོས་ན་མེ་ཏོག་ཚལ་དུ་བཞད།
སྒྱུ་མའི་ཚོང་ར་ན་ནི་མི་མངོན་ཚོང་བས་བཀྲམས་པར་རིན་གོང་ཆེ།
ལྷ་སྒྲུང་ངོ་མཚར་བརྗོད་པའི་ཡི་གེ་དག་ནི་ཡིད་ཆེས་མིག་ལ་འོད་དུ་ཆགས།
གྲུབ་རྟགས་ཁྲག་དམར་ཐིགས་པས་མཚོ་དམར་བ་ནི་མི་ཡི་ཁྲོད་ན་བདུད་རྩིར་མཐོང་།།
རལ་གྲིས་སྙིང་ལ་བཏབ་ཀྱང་སྲེད་པའི་ཚལ་ན་མེ་ཏོག་ད་རུང་ལྡེམ།
བྱིས་བ་འཁོར་བར་ཕབ་པས་མེ་ལོང་མུན་གནག་ར་རིས་གང་།།
ཚུལ་དེ་མཐོང་བས་མིག་ཁ་ཕྱེས་ཏེ་གླང་བོར་ཞགས་པ་བཏབ།
ལག་པ་སྡོད་དུ་མ་བཅུག་བདུད་རྩིའི་ཚལ་ལ་མེ་ཏོག་བཀྲམས།
ཨོ། དེ་རེད། རྫོབ་ཆེན་ཁྱོས་ཅི་རྫོ་ལི་ཡོད་ནི་རེན།