ཆང་སྐྱེས་ནས །
ཚང་ཚིང་རྒྱ་ལྕང་གི་གཡུ་ལོ།།
ཁྱེད་ཀྱི་ལན་བུ་དེ་ཡིན་ན།།
ཁུ་བྱུག་གསུང་སྙན་གྱི་འགྱུར་ཁུགས།།
ང་ཡི་མཛའ་གཞས་དེ་ཡིན་ཆོག།
མེ་ཏོག་དཀར་དམར་གྱི་མཛེས་སྡུག།
ཁྱེད་ཀྱི་ལང་ཚོ་དེ་ཡིན་ན།།
རྒྱང་རིང་རྐང་དྲུག་གི་གཞོན་ནུ།།
ང་ཡི་རྣམ་ཤེས་ཉིད་ཡིན་སྲིད།།
གཙང་ཆུ་ཤག་ཤག་ཏུ་འབབ་པ།།
ཁྱེད་ཀྱི་དགོད་སྒྲ་དེ་ཡིན་ན།།
གཤོག་དྲུག་ཉ་མོ་ཡི་འཁྱུག་རྩལ།།
ང་ཡི་སེམས་པ་རང་ཡིན་ངེས།།
བྱང་བགྲོད་ཆུ་འཛིན་གྱི་སྤྲིན་དཀར།།
ཁྱེད་ཀྱི་ངང་རྒྱུད་དེ་ཡིན་ན།།
ཆར་བ་ཟ་ཟིམ་དུ་བབས་པ།།
དྲན་པའི་མིག་ཆུ་དེ་ཡིན་སོང་།།
མཁའ་མཐའི་འཇའ་མཚོན་གྱི་ཁ་དོག།
མཚོན་གྱིས་བྱུག་པ་རང་མིན་ན།།
ཡིད་འོང་འཇོ་སྒེག་གི་སྟངས་སྟབས།།
ལྷ་ཡིས་གནང་བ་ཞིག་ཡིན་འདུག།
ཟླ་བ་མག་མོག་རེད་མ་བསམ།།
འོད་ཀྱི་ཐིག་ལེ་དེ་འཁྱིལ་ཡོད།།
བརྩེ་དུང་ཁྲེལ་མེད་རེད་མ་འདོད།།
སེམས་ཀྱི་ཟབ་ས་རུ་གཉེར་ཡོད།།