དགའ་དགའ།
རྒྱ་གར་ཆོས་ཀྱི་ས་བོན་བོད་དུ་བཏབ་སྟེ།།
འབྲས་བུ་ཆོས་སྲིད་གཉིས་ཀྱི་སྡོང་བུ་སྐྱེས་ཤིང་།།
མེ་ཏོག་སད་ཀྱིས་ཁྱེར་བའི་རྙིང་རལ་ཅན་དེ།།
ལོ་ངོ་སྟོང་ཕྲག་རིང་ལ་དུག་སྦྱོར་བྱས་སོ།།
ཆོས་དད་ཆོས་ཀྱིས་མི་འདུལ་ཁྲམ་པའི་ཚོཌ་དག །
ས་ཆ་གང་དུ་གནས་ཀྱང་གཡོ་དང་སྒྱུ་རེད།།
ང་རང་འཆལ་པོའི་ཚུལ་གྱིས་ངེས་མེད་འགྲིམ་ཞིང་།།
མི་ཆོས་ལྷ་ལུགས་བརྩིས་ཏེ་བྲན་དུ་གྱུར་མེད།།
ཕན་ཚུན་གུ་ཡངས་ལྟ་བའི་མིག་ཟུང་མེད་པའི
བླ་སྤྲུལ་དགེ་བཤེས་ཐམས་ཅད་ཕྱོགས་ཞེན་ཅན་རེད།།
ཆོས་པའི་ཆོས་ལུགས་དེ་ཡང་ཁྲམ་པ་ཡིན་ན།།
ཁོ་བོས་མི་ཆོས་དོར་ནས་ལྷ་ཆོས་མི་ཐེག།
རང་སེམས་མེ་ལོང་ཡིན་པའི་ཞྭ་ཅན་རྣམ་པས།།
རྟོག་བཏགས་ལྷ་སྒྲུང་འདྲེས་མའི་ཞེད་སྣང་སློང་རུང་།།
བྱེད་པོ་ཡོད་པ་སྟོན་པས་གསུངས་མྱོང་མེད་ན།།
གཤིན་རྗེ་ཆོས་རྒྱལ་ཟེར་བར་འདར་དགོས་ཡོད་དམ།།
སྤྱང་ཀིས་སྟགས་ལྤགས་གྱོན་འདྲའི་ནང་པའི་བསྟན་དུ།།
འདུལ་ཁྲིམས་སྲོག་ལྟར་གཅེས་ཚུལ་སྨྲ་ན་མཁས་ཤིང་།།
བག་མེད་ལོངས་སུ་སྤྱོད་དེ་ལྐོག་ཏུ་མྱོས་དུས།
གནས་མོའི་རུམ་ནང་སངས་རྒྱས་སྤྲུལ་པ་ཡིན་ཚོད།།
ལག་ཁྱོར་གཟེད་དེ་ལྟོ་བ་འབུར་དུ་དོད་པའི།།
དགེ་འདུན་ཁྲི་མ་འབུམ་འབུམ་ཆོས་པའི་གཟུཌ་འདྲ།།
གནད་འགག་མདུན་དུ་སླེབ་དུས་ཕལ་པའི་ཕལ་པ།།
ལྟ་བ་སྒམ་ཚུགས་ཅན་དེ་ཨེན་ཙམ་ཡིན་རེད།།
གླེགས་བམ་མེ་ལ་སྲེག་པའི་ཐལ་རྡུལ་སྐྱ་བོ།།
ལྷ་འདྲེའི་འཐེན་འཁྱེར་ཆེད་དུ་དྲག་པོས་གཏོར་ཞིང་།།
ཕས་རྒོལ་བདུད་ཀྱི་ཆོ་འཕྲུལ་རེ་ཟུང་ཞིག་གིས།།
ཡོད་ཚད་མུན་པའི་འོབས་ནས་སྐུལ་འདེད་བྱེད་ཐལ།།
འབྱོར་མེད་གྲོང་ཁྱེར་འགའ་ཞིག་དགོན་སྡེས་བཀང་སྟེ།།
ནོར་དང་སྒོར་མོ་འཕྲོག་སའི་བསྟི་གནས་བཟུང་ཞིང་།།
བདག་གཉེར་ཁ་ལ་མར་ཁུའི་གཡའ་བཙའ་བརྒྱབ་ཀྱང་།།
སྦྱིན་བདག་དབུལ་པོའི་མིག་ནི་ཞ་ར་ཡིན་སྐད།།
འཁོར་བ་སྡུག་བསྔལ་རྒྱ་མཚོར་མིག་ཆུ་འབྱིན་ཏེ།།
མངོན་མེད་དཀོན་མཆོག་ཁྱོད་ཚོས་བྱམས་བྱམས་མི་དགོས།།
ཅི་མཛད་ལེགས་པར་མཐོང་བའི་སྔར་གྱི་བློ་དེ།།
ད་ལྟ་མི་ཡུལ་འདི་ཡིས་འཁྱོངས་ས་མ་རེད།།
2017-4-4-ཉིན་བལ་ཡུལ་ནས་སྦྱར།