སེར་བྱེས་དགེ་བཤེས་རྭ་རྒྱ་བློ་བཟང་དཔལ་ལྡན།
དྲུག ཀ་ལི་སྦུག
ཀ་ལི་སྦུག་ནི་འབྲས་ལྗོངས་ནས་རི་གཤམ་དུ་ཆུ་ཚོད་གཉིས་ཙམ་བབས་རྗེས་སླར་ཡང་གྱེན་དུ་ཕྱོགས་ཏེ་རླངས་འཁོར་ནང་ཆུ་ཚོད་ཕྱེད་ཙམ་ནས་སླེབས་ཀྱི་འདུག།གྲོང་ཁྱེར་དེ་ནི་ཅུང་མཐོ་བའི་རི་ཞིག་གི་ཁ་ཞེང་ཡངས་ས་ཞིག་ཏུ་ཡོད་ཅིང་། ཟུར་གཅིག་ནས་བལྟས་ན་རི་མཐོན་པོ་ཞིག་གི་རྩེར་ཡོད་པ་འདྲ་ནའང་། ཕྱོགས་གཞན་ནས་བལྟས་ན་རི་མཐོ་བའི་སྣང་བ་མི་སྟེར་བར་མ་ཟད། ལུང་ཁུག་གི་ཆུ་བཞུར་ས་ལའང་ཐག་མི་རིང་བས་རི་ཐེམ་ཅུང་བདེ་ས་ཞིག་ན་ཆགས་འདུག རླངས་འཁོར་མང་བ་དང་། ལམ་གྱི་ཞེང་ཚད་ཆུང་བས་གཟའ་འཁོར་གཅིག་ནང་གི་ཚོང་འདུས་ཆེ་ཆུང་གཉིས་ཀྱི་སྐབས་ལམ་དུ་རླངས་འཁོར་ཐར་དཀའ་ཚོད་དུ་ཡོད་པས་ཅུང་དོགས་པའི་སྣང་བ་སྟེར། ཀ་སྦུག་ཏུ་ཡོད་པའི་དགོན་པ་དགེ་ལྡན་ཐར་བ་ཆོས་གླིང་ན་བཞུགས་པའི་སེར་བྱེས་དགེ་བཤེས་བློ་བཟང་ཡོན་ཏན་དང་སེར་བྱེས་དགེ་བཤེས་བསྟན་འཛིན་མཆོག་གྲུབ་གཉིས་དང་མཉམ་དུ་ཀ་ལི་སྦུག་གི་ཁོར་ཡུག་དང་ཚོང་ཁྲོམ་ལ་གཡེངས། ཚོང་ར་ན་རྒྱ་སྲས་ཟ་འོག་རིགས་དང་། འབུ་རས། ཐེར་མ་སོགས་རྒྱུ་སྤུས་ལེགས་པ་མང་པོ་འདུག།བོད་ཀྱི་བཀའ་བློན་ཞྭ་སྒབ་པའི་གློག་བརྙན་སྟོན་ས་རེད་ཟེར་བའི་ཁང་གོག་ཧ་ཅང་ཆེ་བ་ཞིག་དང་། དེ་ནས་བར་ཐག་ཅུང་རིང་ས་ཞིག་ན་མཁས་དབང་དགེ་འདུན་ཆོས་འཕེལ་གྱི་ཕྱག་ལས་གནང་མྱོང་སའི་ལས་ཁུངས་ཏེ། བྷ་བུ་མཐར་ཕྱིན་གྱི་གསར་འགྱུར་མེ་ལོང་གི་པར་ཁང་རེད་ཟེར་བའི་རྩ་ལྡུམ་གྱིས་གང་ཞིང་ལྕགས་ཚེར་གྱི་རྭ་བ་ཅན། དབྱིན་ཡིག་གི་སྒོ་བྱང་རྩ་ལྡུམ་གྱིས་མནན་པ་ཞིག་འདུག་ལ། སྔོན་མ་དེ་གར་ལྕགས་ཤོག་གི་ཁང་པ་དང་། ཅ་དངོས་རྙིང་པ་ཁ་ཤས་ཡོད་ཚུལ་འདུག་ཀྱང་ཟླ་ཤས་གོང་གཏོར་ཚར་འདུག དེའི་འཁྲིས་སུ་ཁང་པ་དཀར་པོ་སྒལ་ཟོར་ཅིག་ལ་བོད་ཡིག་གི་སྒོ་བྱང་ཅན་ཞིག་འདུག་པ་ནི་བྷ་བུ་མཐར་ཕྱིན་གྱི་ཁང་པ་རེད་ཟེར། ལོ་སྔོན་མར་བྷ་བུ་མཐར་ཕྱིན་ལ་ཞིབ་འཇུག་གི་ཆེད་དུ་མགོ་སེར་ཁ་ཤས་ཡོང་ནས་ཁོང་གི་སྡོད་ས་དང་ཅ་དངོས་ལ་ལྟ་སྐབས་ཡིད་ཕངས་པ་ཞིག་ལ། བུ་ཕྲུག་ཚོས་ཅ་དངོས་རྙིང་པ་དག་བཙོང་ཚར་ནས་ཡོད་ཚོད་མི་འདུག ༡༩༦༠ ཙམ་ལ་བཙུགས་པའི་བོད་ཀྱི་སློབ་གྲྭ་ཞིག་འདུག་པ་འདིའི་སྐོར་ལ། ༸གོང་ས་ཡིད་བཞིན་ནོར་བུའི་བཀའ་སློབ་ཅིག་གི་ནང་དུ་ཡང་འདི་ལྟར་འཁོད་འདུག།ཕྱི་ལོ་༡༩༦༠ལོ་ནས་ང་ཚོས་དེང་དུས་ཀྱི་ཤེས་ཡོན་སློབ་སྦྱོང་བྱེད་སའི་སློབ་གྲྭ་བཙུགས་པའི་ཁོངས་ནས་ཀ་སྦུག་འདི་གཅིག་རེད། དེ་ལྟར་ང་ཚོས་ཐོག་མར་དམིགས་ཡུལ་ངེས་ཅན་ཞིག་དང་རེ་བ་ཇི་ལྟར་བརྒྱབ་པ་བཞིན་ད་ལྟ་བར་དུ་གྲུབ་འབྲས་སུ་སློབ་སྦྱོང་ཐོན་པའི་ཕྲུ་གུ་མང་པོ་ཞིག་བྱུང་ཡོད། དེ་བཞིན་སློབ་སྦྱོང་བྱེད་བཞིན་པ་ཚོས་ཀྱང་ཧུར་ཐག་ངང་སློབ་སྦྱོང་ཡག་པོ་བྱེད་རོགས་ཟེར་རྒྱུ་ཡིན་ཞེས་༢༠༡༠ལོར་གསུངས་འདུག
ཡུལ་འདིའི་མིང་འབོད་སྟངས་དང་ཐོགས་ཚུལ་བཅས་ལ་བཤད་ཚུལ་མི་འདྲ་བ་ཁ་ཤས་འདུག ཀ་ལི་སྦུག ཀ་ལིན་སྦུང་། བཀའ་བློན་སྦུག་སོགས་འདྲ་མིན་བཤད་སྲོལ་འདུག་ཀྱང་། སའི་དབྱིབས་ཀ་ལིའམ་ཀླད་ཕོར་འདྲ་བའི་ནང་དུ་ཆགས་པའི་རྒྱུ་མཚན་གྱིས་ཀ་ལི་སྦུག་ཟེར་བ་དང་། ཡང་གོ་ཚོད་ལྟར་ན། ལ་ཕྱེད་ཟེར་བའི་གནའ་བོ་ཡུལ་མིས་ཤིང་ཤུག་པའི་མིང་ལ་ཀ་ལི་ཟེར་བ་དང་། དེ་ནི་སྤོས་སྡོང་ཞེས་པའི་དོན་ཡིན་ཚུལ་འདུག་ཀྱང་གསལ་བོར་མ་ངེས། ཕྱིས་སྒྲ་འགྱུར་ནས་ཀ་ལི་སྡོང་པོ་ལ་ཀ་ལི་སྦུག་ཅེས་འབོད་སྲོལ་ཆགས་པ་ཡིན་ནམ། གང་ལྟར་ཤུག་པ་དེ་སྤོས་བཟོ་བྱེད་ཡིན་པའི་ཆ་ནས་སྤོང་སྡོང་ཟེར་སྲོལ་ཡོད་པར་མ་ཟད། ཡུལ་འདིར་ཤུག་པ་མང་བའི་ས་ཆ་ཞིག་ལ་སྤོས་སྡོང་ཟེར་བ་ད་ལྟ་ཡང་འདུག ཀ་ལི་སྦུག་ནི་རྡོ་རྗེ་གླིང་གི་ཉེ་འཁྲིས་སུ་ཡོད་ཚུལ་གོ་ཐོས་ཡོད་པས། རྒྱུས་ཡོད་ཚོར་སྐད་ཆ་དྲིས་པས་རླངས་འཁོར་ནང་སོང་ན་ཆུ་ཚོད་གཉིས་ལྷག་འགྲོ་དགོས་པ་ཤེས་པས། ལས་གྲོགས་ཕྱག་མཛོད་དང་ངེད་གཉིས་སུ་ཡིན་ཀྱང་དེ་སྔ་རྡོ་རྗེ་གླིང་ལ་འགྲོ་མྱོང་མེད་སྟབས། སྤྱི་ཚེས་༡༩ ཉིན་དགེ་བཤེས་བློ་བཟང་ཡོན་དན་དང་མཉམ་དུ་རྡོ་རྗེ་གླིང་ལ་འགྲོ་བའི་ལམ་དུ་ཆས། (མུ་འགོད།)