རྩེཿ མུན་སེལ།
ཕྱོགས་དུས་རྒྱལ་བ་ཡི་མཁྱེན་བརྩེ་ནུས་གསུམ།
གཅིག་བསྡུས་མ་ངེས་ཀྱི་རྣམ་པར་འཆར་བའི།།
སངས་རྒྱས་གཉིས་པ་དེས་ཚེ་རབས་ཀུན་ཏུ།།
འཁྱམ་བུའི་ལམ་སྟོན་གྱི་སྒྲོན་མེ་མཛོད་ཅིག།།
གང་གི་དྲི་མེད་ཀྱི་ལུང་སྙན་རོལ་མོས།།
ས་ཆེན་ཁོ་ར་དང་ཁོར་ཡུག་འགེང་པའི།།
ངོ་མཚར་གནས་མཆོག་གི་ཆེ་བའི་ཆ་ཙམ།།
གང་དྲན་ཐོལ་གླུ་ཡི་ངང་ནས་ལེན་ནོ།།
སྟོང་གསུམ་དཔལ་གཡང་ཀུན་ཚོམ་བུར་སྤུངས་པས།།
མཐིལ་གྱི་ཟེའུ་འབྲུ་ཡི་རྣམ་པར་སྨིན་འདྲ།།
རྣམ་གཉིས་དངོས་གྲུབ་ཀྱི་བྱིན་རླབས་རང་འཁྱིལ།།
བཀྲིས་སྡིངས་རི་བོ་དེ་དབུས་ན་ལྷུན་མཛེས།།
ཕྱོགས་དང་མཐའ་མཚམས་ཀྱི་རི་རབ་རི་ཕྲན།།
ངོ་མཚར་བཀོད་ལེགས་ཀྱི་ཕུག་བཟང་དུ་མ།།
རིན་བྲལ་སྐྱེ་དངོས་དང་རྫས་རིགས་བགྲང་ཡས།།
གཡས་ཆུ་གཡོན་ཆུ་ཡི་བཞུར་འགྲོས་འཁྱུགས་མ།།
གཡུ་ལྗང་ཚང་ཚིང་གིས་མཛེས་པའི་ལྗོངས་སུ།།
སྐད་སྙན་འདབ་ཆགས་ཀྱིས་ཆོས་སྒྲ་སྒྲོག་ཅིང་།།
ཐང་གཞོང་མེ་ཏོག་གིས་སྤུད་པའི་གླིང་ན།།
ཤྭ་གཉན་རི་སྐྱེས་དག་ལྷོད་ཀྱིས་འཚོ་ས།།
མི་རྣམས་བྱམས་བརྩེ་ཡིས་གཤིིས་རྒྱུད་བརླན་པས།།
གཡོ་སྒྱུ་བསླུ་བྲིད་ཀྱི་མིང་ཙམ་དབེན་ལ།།
བཟའ་བཏུང་ལོངས་སྤྱོད་ཀུན་ངང་གིས་འབྱུང་བས།།
ཚོང་ལས་རྩོལ་སྒྲུབ་ཀྱི་འདུ་འཛི་ཉུང་ས།།
མཚོ་སྐྱེས་རྡོ་རྗེ་དེའི་གསང་གསུམ་བྱིན་རླབས།།
ཡེ་ནས་སྣོད་བཅུད་ཀྱི་གཤིས་ལ་རྫོགས་པས།།
གནས་འདིར་སྐལ་ལྡན་གྱི་སྐྱེ་བོ་སུ་སླེབས།།
མཐོང་ཐོས་དྲན་རེག་གིས་ཉེས་ངན་རང་དག།
ཨ་ཧོ་སྦས་ཡུལ་གྱི་ཡོན་ཏན་མ་ལུས།།
ཕལ་པ་བདག་འདྲ་ཡི་སྤྱོད་ཡུལ་མ་ལགས།།
འོན་ཀྱང་རྨོངས་བློ་རུ་འཆར་བའི་ཚུལ་འགའ།།
སོར་མོའི་འདུ་བྱེད་ཀྱིས་བཀོད་པ་ཙམ་མོ།།