རིས་མེད་བསྟན་པའི་ཁྱབ་བདག་ཀུན་ཏུ་བཟང་།།

ཨེ་མ་ཧོ།

 
ན་མོ་གུ་རུ་བུདྡྷ་ཛྙཱ་ན་ཡེ།
དུས་གསུམ་སངས་རྒྱས་ཀུན་དངོས་པདྨ་འབྱུང་།།
སྐུ་གསུམ་སངས་རྒྱས་ཀུན་གྱི་ཐུགས་སྲས་རྗེ།།
ཁམས་གསུམ་འགྲོ་བའི་དེད་དཔོན་སྐྱབས་གནས་མཆོག།
བརྒྱུད་གསུམ་ཀུན་འདུས་ཞེ་ཆེན་རབ་འབྱམས་རྒྱལ།།
སྔ་འགྱུར་སྤྱི་དང་ས་དགེ་བཀའ་ཇོ་སོགས།།
གངས་ལྗོངས་རྒྱལ་བསྟན་དབང་ལུང་གདམས་པའི་མཛོད།།
བཤད་སྒྲུབ་བསྟན་པའི་མངའ་བདག་རྡོ་རྗེ་འཆང་།།
མཆོག་གསུམ་ཀུན་འདུས་ཞེ་ཆེན་རབ་འབྱམས་རྒྱལ།།
མཁྱེན་རབ་ཕུལ་བྱུང་ཀུན་མཁྱེན་རིག་པ་འཛིན།།
བརྩེ་ཆེན་སྙིང་རྗེའི་དབང་ཕྱུག་འགྲོ་བའི་མགོན།།
མཐུ་སྟོབས་ནུས་པའི་ཕན་བདེའི་ཕྲིན་ལས་ཅན།།
རིགས་གསུམ་ཀུན་འདུས་ཞེ་ཆེན་རབ་འབྱམས་རྒྱལ།།
རྒྱལ་ལོ་རྒྱལ་ལོ་རྒྱལ་བ་ཞེ་ཆེན་རྒྱལ།།
རྒྱལ་ཀུན་ཐུགས་རྗེ་ནུས་པ་ཕུན་ཚོགས་རྒྱལ།།
རྒྱལ་བསྟན་སྤྱི་དང་སྔ་འགྱུར་བསྟན་པ་རྒྱལ།།
རྒྱལ་བསྟན་ཕྱོགས་ལས་རྣམ་པར་རྒྱལ་གྱུར་ཅིག།

ཅེས་པ་འདི་ཡང་རབ་གནས་མེ་བྱའི་ས་ག་ཟླ་བའི་དཀར་ཕྱོགས་རྒྱལ་བ་གསུམ་པར་སྙིང་ཉེ་བའི་ཆོས་མཆེད་གྲོགས་པོ་འགས་བཀའ་མོལ་གྱི་རྐྱེན་དང་ཐོ་རངས་སུ་རྨི་ལམ་ཡ་མཚན་ཅན་རྨིས་པའི་རྐྱེན་བྱས་ནས་དུས་ཚེས་དེ་ཉིད་ལ་དབྱིན་ཡུལ་རྫོགས་ཆེན་དུས་འཁོར་འོད་གསལ་རི་ཁྲོད་ཀྱི་གངས་ལྡན་རི་བོའི་མདུན་རོལ་ནས་རྒྱལ་བ་ཉིད་དྲན་བཞིན་དུ་མངོན་བསྟོད་རྒྱལ་གླུ་གང་ཤར་དུ་ཤྲཱིཿཨེ་མ་ཧོས་བགྱིས་པར་དགེའོ།། །།