ཁྱེད་ལྐུགས་པ་ཡིན་ནམ། 


བར་ཕུ་ཕུན་ཚོགས་ནས།
 

ལྟ་བ་མཐོ་པོས་རི་ལ་འགྲན་བཟོད་ཀྱང་།།
བཟོད་སྲན་འབུ་སྲིན་ཕྲ་མོའི་གཤིས་ལུགས་ཅན།།
དཀའ་སྡུག་ཅུང་ཟད་བཟོད་དཀའི་སྡུག་ངུ་དེ།།
ལྟོགས་རྔམ་སྤྱང་ཀིའི་ལྐུགས་རྟགས་མ་ཡིན་ནམ།།

རིག་པ་རྣོ་པོས་ཡོད་ཚད་ཤེས་ངེས་ཞེས།།
ང་རྒྱལ་ཚེར་མའི་གོས་ཤམ་ལུས་ལ་དཀྲིས།།
ཀུན་དང་མི་མཐུན་འདོད་གཡོའི་སྤྱོད་ངན་འདི།།
གླང་ཆེན་སྨྱོན་པའི་སྨྱོ་མཆོང་མ་རེད་དམ།།

ཕ་སྤུན་བཟའ་ཟླའི་ལྷད་མེད་བརྩེ་བ་ལ།།
རིན་ཐང་མ་མངོན་ཆུང་འདྲིས་མཛའ་བོ་ཞེས།།
ངོ་ཡག་དབྱིབས་ལ་ཆགས་པའི་འཁྲུལ་སྣང་འདི།།
སྲིན་འབུ་མེར་ཤིའི་རྨོངས་རྟགས་མ་རེད་དམ།།

ལྟ་བ་རི་ལ་བཟོད་སྲན་ངར་ལྕགས་དགོས།།
རིག་པ་གྲི་ལ་ང་རྒྱལ་ས་རྡོ་མཁོ།།
བརྩེ་བ་དུང་ལ་མཐོང་བྱེད་ཉི་ཟླ་བཟང་།།
ཨ་ཕའི་བུ་ཕྲུག་ཡིན་ན་སེམས་ལ་ཟུངས།།

ལོ་མང་ཤེས་ཡོན་སྦྱང་པའི་མཛེས་མ་ཚོ།།
ཁ་ལ་ཨ་ར་སྐྱེས་པའི་ཕོ་གཞོན་ཚོ།།
ཁོག་ན་སྙིང་གི་འཕར་སྒྲ་འདུག་ན་ནི།།
སྨྱོ་རྟགས་ལྐུགས་རྟགས་རྨོངས་རྟགས་མ་སྟོན་རོགས།།